Ideboto ang Imong Kaugalingon sa Pagbasa
“Samtang ako nagasingabot, padayon kang magmakugihon sa publikong pagbasa, sa maawhagong pagpanambag, sa pagpanudlo.”—1 TIMOTEO 4:13.
1. Sa unsang paagi makakuha kitag kaayohan gikan sa pagbasa sa Bibliya?
ANG Diyos nga Jehova naghatag sa katawhan ug katingalahang katakos sa pagkat-on sa pagbasa ug pagsulat. Siya nagtagana usab sa iyang Pulong, ang Bibliya, aron kita matudloan ug maayo. (Isaias 30:20, 21) Sa mahulagwayon, ang mga panid niini makapaarang kanato sa “paglakaw” uban sa mahinadlokon-sa-Diyos nga mga patriarka sama kang Abraham, Isaac, ug Jacob. Atong “makita” ang diyosnong mga babaye sama kang Sara, Rebeca, ug ang maunongong Moabihanon nga si Ruth. Oo, ug atong “madungog” si Jesu-Kristo nga nagpahayag sa iyang Wali sa Bukid. Kining tanang kalipay ug dakong pagpanudlo nga gikan sa Balaang Kasulatan atong maangkon kon kita maoy maayong mga magbabasa.
2. Unsay nagpakita nga si Jesus ug ang iyang mga apostoles makabasag maayo?
2 Sa walay duhaduha, ang hingpit nga tawong si Jesu-Kristo may maayo kaayong katakos sa pagbasa, ug siya sinati kaayo sa Hebreohanong Kasulatan. Busa, sa dihang gitental sa Yawa, masubsob nga gikutlo kini ni Jesus ug miingon, “Kini nahisulat.” (Mateo 4:4, 7, 10) Sa usa ka higayon diha sa sinagoga sa Nasaret, gibasa niya sa publiko ug gipadapat sa iyang kaugalingon ang bahin sa tagna sa Isaias. (Lucas 4:16-21) Unsay ikasulti bahin sa mga apostoles ni Jesus? Diha sa ilang mga sinulat, kanunay nilang gikutlo ang Hebreohanong Kasulatan. Bisan tuod giisip sa Hudiyohanong mga magmamando si Pedro ug Juan nga dili-edukado ug ordinaryo tungod kay sila wala makaeskuyla sa kolehiyo sa Hebreohanong mga tunghaan, ang ilang dinasig sa Diyos nga mga sulat tin-awng nagpamatuod nga sila makabasa ug makasulat gayod. (Buhat 4:13) Apan ang katakos sa pagbasa hinungdanon ba gayod kaayo?
“Malipayon Siya Kinsa Nagabasa sa Makusog”
3. Nganong hinungdanon kaayo ang pagbasa sa Kasulatan ug sa Kristohanong mga publikasyon?
3 Ang pagkuha ug pagpadapat sa tukmang kahibalo sa Kasulatan mosangpot ug kinabuhing walay kataposan. (Juan 17:3) Busa ang mga Saksi ni Jehova nahibalo nga parehong hinungdanon ang pagbasa ug pagtuon sa Balaang Kasulatan ug sa Kristohanong mga publikasyon nga gitagana sa Diyos pinaagi sa kasaligan ug mabuot nga ulipon nga matang sa dinihogang mga Kristohanon. (Mateo 24:45-47) Sa pagkatinuod, pinaagi sa paggamit sa ilabinang gidesinyo nga mga publikasyon sa Watch Tower, libolibo ang natudloan sa pagbasa ug sa ingon nakabaton sa nagahatag-ug-kinabuhi nga kahibalo sa Pulong sa Diyos.
4. (a) Nganong makahatag ug kalipay ang pagbasa, pagtuon, ug pagpadapat sa Pulong sa Diyos? (b) Bahin sa pagbasa, unsay gisulti ni Pablo kang Timoteo?
4 Ang kalipay maoy mosangpot sa pagbasa, pagtuon, ug pagpadapat sa Pulong sa Diyos. Tinuod kini tungod kay sa ingon niana atong mapahimut-an ug mapasidunggan ang Diyos, makadawat sa iyang panalangin, ug makasinatig kalipay. Buot ni Jehova nga ang iyang mga alagad magmalipayon. Busa, iyang gisugo ang mga saserdote sa pagbasa sa iyang Kasugoan ngadto sa katawhan sa karaang Israel. (Deuteronomio 31:9-12) Sa dihang gibasa ni Esdras nga tigkopya ug sa uban ang Kasugoan ngadto sa tanang katawhan nga nagtigom sa Jerusalem, ang kahulogan niini napatin-aw, ug ang resulta maoy “dakong panagsadya.” (Nehemias 8:6-8, 12) Gisultihan sa ulahi sa Kristohanong si apostol Pablo ang iyang kaubang magbubuhat nga si Timoteo: “Samtang ako nagasingabot, padayon kang magmakugihon sa publikong pagbasa, sa maawhagong pagpanambag, sa pagpanudlo.” (1 Timoteo 4:13) Ang laing hubad mabasa: “Ideboto ang imong kaugalingon sa pagbasa sa Kasulatan ngadto sa publiko.”—New International Version.
5. Sa unsang paagi gilangkit sa Pinadayag 1:3 ang kalipay uban sa pagbasa?
5 Nga ang atong kalipay nagadepende sa pagbasa ug pagpadapat sa Pulong sa Diyos gipatin-aw diha sa Pinadayag 1:3. Didto kita gisultihan: “Malipayon siya kinsa nagabasa sa makusog ug kadtong mga nagapaminaw sa mga pulong niini nga propesiya, ug kinsa nagasunod sa mga butang nga nahisulat niini; kay ang tinudlong panahon haduol na.” Oo, kinahanglang basahon natog kusog ug mamati sa matagnaong mga pulong sa Diyos diha sa Pinadayag ug sa tibuok Kasulatan. Ang tinuod nga tawong malipayon mao ang usa kansang “kalipay anaa sa kasugoan ni Jehova, ug sa iyang kasugoan siya nagabasa niini sa hagawhaw nga tingog sa adlaw ug gabii.” Ang resulta? “Ang tanang butang nga iyang pagahimoon molampos.” (Salmo 1:1-3) Busa, sa maayong mga katarongan nga giawhag sa organisasyon ni Jehova ang matag usa kanato sa pagbasa ug sa pagtuon sa iyang Pulong sa tinagsatagsa, ingong mga pamilya, ug uban sa mga higala.
Paghunahunag Maayo ug Pagpamalandong
6. Unsay gisugo kang Josue nga pagabasahon, ug sa unsang paagi mapuslanon kini?
6 Sa unsang paagi bug-os nimong mapahimuslan ang imong pagbasa sa Pulong sa Diyos ug ang Kristohanong mga publikasyon? Tingali imong makita nga makabenepisyo ang pagbuhat sa gibuhat ni Josue, usa ka mahinadlokon-sa-Diyos nga lider sa karaang Israel. Siya gisugo: “Ayaw pag-ibulag kining basahon sa kasugoan sa imong baba, ug kinahanglang basahon nimo kini sa hagawhaw nga tingog sa adlaw ug gabii, aron himatngonan mo ang pagbuhat sumala sa tanan nga gisulat diha; kay sa ingon niana ikaw maghimo sa imong dalan nga malamposon ug unya ikaw molihok nga maalamon.” (Josue 1:8) Ang ‘pagbasa sa hagawhaw nga tingog’ nagkahulogan sa pagbungat sa mga pulong diha sa imong kaugalingon sa mahinay nga tingog. Kini maoy tabang sa paghinumdom, kay kini magpasilsil sa materyal diha sa hunahuna. Si Josue gisugo sa pagbasa sa Kasugoan sa Diyos sa “adlaw ug gabii,” o sa regular. Mao kana ang paagi aron molampos ug sa paglihok nga maalamon sa pagtuman sa hinatag sa Diyos nga mga responsibilidad. Ang ingon niana nga regular nga pagbasa sa Pulong sa Diyos makatabang kanimo sa samang paagi.
7. Nganong dili angay mangibabaw sa atong hunahuna ang gikusgon kon magbasa kita sa Pulong sa Diyos?
7 Ayaw tugoti nga mangibabaw sa hunahuna ang gikusgon sa dihang magbasa sa Pulong sa Diyos. Kon nagplano ka sa paggugol ug panahon sa pagbasa sa Bibliya o sa pipila ka Kristohanong publikasyon, buot mo tingali nga dili ka magdalidali sa pagbasa. Hinungdanon kini ilabina kon ikaw magtuon uban sa tumong nga mahinumdoman ang dagkong mga punto. Ug sa dihang ikaw magbasa, paghunahunag maayo. Timbangtimbanga ang mga pulong sa magsusulat sa Bibliya. Pangutan-a ang imong kaugalingon, ‘Unsa ang iyang punto? Unsay angay nakong buhaton niining impormasyona?’
8. Nganong mapuslanon ang pagpamalandong kon magbasa sa Kasulatan?
8 Paggugol ug panahon sa pagpamalandong samtang magbasa sa Balaang Kasulatan. Makatabang kini kanimo sa paghinumdom sa mga asoy sa Bibliya ug sa pagpadapat sa mga prinsipyo sa Kasulatan. Ang pagpamalandong sa Pulong sa Diyos ug sa ingon nagsilsil sa mga punto sa imong hunahuna makahimo usab kanimo sa pagsulti gikan sa kasingkasing, nga makahatag sa mga tawo nga sinserong nangutana ug tukmang mga tubag imbes mosultig usa ka butang nga imong basolan sa ulahi. Ang dinasig sa Diyos nga sanglitanan nag-ingon: “Ang kasingkasing sa usa nga matarong magapalandong aron makatubag.”—Proverbio 15:28.
Ilangkit ang Bag-ong mga Punto Uban sa Daan
9, 10. Sa unsang paagi ang imong pagbasa sa Bibliya mapalambo pinaagi sa paglangkit sa bag-ong mga punto sa Kasulatan uban sa mga punto nga imo nang nahibaloan?
9 Tino nga dawaton sa kadaghanang Kristohanon nga kaniadto diyutay ra kaayo silag nahibaloan bahin sa Diyos, sa iyang Pulong, ug sa iyang mga katuyoan. Karon, hinunoa, kining Kristohanong mga ministro, sugod sa paglalang ug sa pagkahulog sa tawo sa sala, makasaysay sa katuyoan sa halad ni Kristo, makapatin-aw sa kalaglagan niining daotang sistema sa mga butang, ug makapakita kon sa unsang paagi ang masinugtanong katawhan pagapanalanginan ug kinabuhing walay kataposan diha sa usa ka paraiso nga yuta. Sa dakong bahin nahimo kining posible tungod kay kining mga alagad ni Jehova nagakuha sa “mismong kahibalo sa Diyos” pinaagi sa pagtuon sa Bibliya ug sa Kristohanong mga publikasyon. (Proverbio 2:1-5) Anam-anam nilang gilangkit ang bag-ong mga punto nga nakat-onan uban sa daang mga punto nga nasabtan na.
10 Ang paglangkit sa bag-ong mga punto sa Kasulatan uban sa mga punto nga nahibaloan na nimo mapuslanon ug magantihon. (Isaias 48:17) Sa dihang ang mga kasugoan sa Bibliya, mga prinsipyo, o bisan ang daw dili pa kaayo tin-aw nga mga ideya ipresentar, ilangkit kini sa imo nang nahibaloan. Ipasibo ang impormasyon sa imo nang nahibaloan labot sa “sumbanan sa makapahimsog nga mga pulong.” (2 Timoteo 1:13) Pangitaa ang impormasyon nga basig makatabang kanimo aron sa paglig-on sa imong relasyon sa Diyos, sa pagpauswag sa imong Kristohanong personalidad, o sa pagtabang kanimo sa pagpakig-ambit sa mga kamatuoran sa Bibliya ngadto sa uban.
11. Unsay mahimo nimong himoon sa dihang magbasag usa ka butang nga gipamulong sa Bibliya bahin sa paggawi? Iilustrar.
11 Sa dihang nagabasa ug usa ka butang nga gipamulong sa Bibliya mahitungod sa paggawi, paningkamoti nga masabtan ang prinsipyong nalangkit. Pamalandong niana, ug paghukom kon unsay imong buhaton ilalom sa samang mga kahimtang. Ang anak ni Jacob nga si Jose malig-ong midumili sa pagpakigbahin sa seksuwal nga imoralidad uban sa asawa ni Potipar, nga nangutana: “Unsaon ko paghimo kining dakong pagkadaotan ug makasala batok sa Diyos?” (Genesis 39:7-9) Niining makapatandog nga asoy, imong makita ang usa ka sukaranong prinsipyo—ang seksuwal nga imoralidad maoy usa ka sala batok sa Diyos. Mahimong ikalangkit nimo kini nga prinsipyo sa hunahuna uban sa ubang mga pahayag sa Pulong sa Diyos, ug makabaton kag kaayohan gikan niini nga kahibalo kon sulayon sa pagpakigbahin sa ingon niana nga buhat nga daotan.—1 Corinto 6:9-11.
Handurawa ang mga Hitabo sa Kasulatan
12. Nganong handurawon ang mga asoy sa Bibliya samtang nagabasa ka niana?
12 Aron mapatisok ang mga punto diha sa imong hunahuna samtang nagabasa ka, handurawa ang nahitabo. Tan-awa sa hunahuna ang dagway sa yuta, ang mga balay, ang mga tawo. Pamati sa ilang mga tingog. Panimahoa ang tinapay nga giluto sa hudno. Buhia pag-usab sa hunahuna ang mga talan-awon. Unya ang imong pagbasa mahimong usa ka makapatandog nga kasinatian, kay mahimong makita mo ang usa ka karaang siyudad, magtungas sa habog nga bukid, maghinan-aw nga may kahibulong sa mga katingalahan sa kalalangan, o makig-uban sa mga lalaki ug mga babaye nga may dagkong pagtuo.
13. Sa unsang paagi ikahubit mo ang narekord sa Maghuhukom 7:19-22?
13 Ingnon ta nga nagbasa ka sa Maghuhukom 7:19-22. Handurawa ang nahitabo. Si Maghuhukom Gideon ug ang tulo ka gatos ka maisog nga mga lalaking Israelinhon nagpahimutang sa ilang mga dapit sa kadaplinan sa kampo sa mga Midianhon. Mga alas diyes na sa gabii, nga maoy panahon sa pagsugod sa “pagbantay sa tungang gabii.” Mao pay pagkapahiluna sa mga guwardiyang Midianhon, ug ang kangitngit mitabon sa kampo sa nangatulog nga mga kaaway sa Israel. Tan-awa! Si Gideon ug ang iyang kasundalohan nasangkapan ug mga budyong. Sila nagdalag dagkong mga tibod sa tubig nga nagtabon sa mga sulo nga gikuptan sa ilang tuong mga kamot. Sa kalit, gihuyop sa tulo ka pundok sa usa ka gatos sa matag usa ang mga budyong, gipamuak ang mga tibod, gipang-isa ang mga sulo, ug naninggit: “Ang espada ni Jehova ug ni Gideon!” Mitan-aw ka sa kampo. Tan-awa, nangalagiw ang mga Midianhon ug misugod sa pagpaninggit! Samtang ang tulo ka gatos nagpadayon sa paghuyop sa ilang mga budyong, gipabakyaw sa Diyos ang mga espada sa mga Midianhon batok sa usag usa. Ang mga Midianhon mikalagiw, ug gihatagan ni Jehova ang Israel ug kadaogan.
Pagkat-on sa Bililhong Pagtulon-an
14. Sa unsang paagi ang Maghuhukom kapitulo 9 mahimong gamiton sa pagtudlo sa usa ka bata sa panginahanglan nga magmapainubsanon?
14 Pinaagi sa pagbasa sa Pulong sa Diyos, kita makakat-on ug daghang pagtulon-an. Pananglitan, tingali buot nimong ipasilsil sa imong mga anak ang panginahanglan nga magmapainubsanon. Buweno, sayon ang paghanduraw ug pagsabot sa punto sa gipamulong sa tagna sa anak ni Gideon nga si Jotham. Pagsugod sa pagbasa sa Maghuhukom 9:8. “Sa usa ka panahon,” miingon si Jotham, “ang mga kahoy miadto sa pagdihog sa usa ka hari ibabaw kanila.” Ang kahoyng olibo, ang kahoyng igira, ug ang paras midumili sa pagmando. Apan ang ubos nga sampinit nalipay nga mahimong hari. Human mabasag kusog ang asoy ngadto sa imong mga anak, mahimong imong isaysay nga ang bililhong mga tanom naghawas sa mga tawong takos nga wala mangita sa posisyon sa pagkahari ibabaw sa ilang isigka-Israelinhon. Ang sampinit, nga magamit lamang ingong sugnod, naghawas sa pagkahari sa mapahitas-ong Abimelech, usa ka mamumuno nga buot nga mohari sa uban apan namatay sa katumanan sa tagna ni Jotham. (Maghuhukom, kapitulo 9) Kinsa bang bataa ang gustong modako ug mahisama sa usa ka sampinit?
15. Sa unsang paagi gipasiugda ang pagkabililhon sa pagkamaunongon diha sa basahong Ruth?
15 Ang pagkabililhon sa pagkamaunongon gipatin-aw sa basahon sa Bibliya nga Ruth. Ingnon ta nga nagpulihay sa pagbasag kusog ang mga sakop sa imong pamilya nianang asoya ug naningkamot sa pagsabot sa gipamulong niana. Imong makita ang Moabihanong si Ruth sa usa ka panaw paingon sa Betlehem uban sa iyang biyuda nga ugangang babaye, si Noemi, ug ikaw nakadungog kang Ruth nga miingon: “Ang imong katawhan mahimong akong katawhan, ug ang imong Diyos mahimong akong Diyos.” (Ruth 1:16) Ang kugihang si Ruth nakita nga nanghagdaw sa likod sa mga mangangani sa uma ni Boaz. Imong nadungog si Boaz nga midayeg kaniya, nga nag-ingon: “Ang tanan sa ganghaan sa akong katawhan nahibalo nga usa ikaw ka dalayegon nga babaye.” (Ruth 3:11) Wala magdugay, gipakaslan ni Boaz si Ruth. Nahisubay sa kahikayan sa pagpakigminyog bayaw nga lalaki, pinaagi kang Boaz siya nanganak ug usa ka anak nga lalaki “kang Noemi.” Si Ruth nahimong usa ka kagikan ni David ug sa kataposan ni Jesu-Kristo. Siya sa ingon nakadawat ug “usa ka hingpit nga balos.” Dugang pa, kadtong nagbasa sa asoy sa Kasulatan makakat-on ug usa ka bililhong pagtulon-an: Magmaunongon kang Jehova, ug ikaw tugob niyang pagapanalanginan.—Ruth 2:12; 4:17-22; Proverbio 10:22; Mateo 1:1, 5, 6.
16. Unsang pagsulay ang naagoman sa tulo ka Hebreohanon, ug sa unsang paagi kining asoya makatabang kanato?
16 Ang asoy bahin sa mga Hebreohanon nga ginganlag Sadrach, Mesach, ug Abednego makatabang kanato nga magmatinumanon sa Diyos sa masulayong mga kahimtang. Handurawa ang hitabo samtang kusog nga basahon ang Daniel kapitulo 3. Usa ka dakong larawan nga bulawan nangibabaw sa kapatagan sa Dura, diin nagtipon ang mga opisyales sa Babilonya. Sa pagtingog sa mga tulonggon, nanghapa sila ug misimba sa larawan nga gipatindog ni Haring Nabucodonosor. Sa ato pa, ang tanan nanghapa gawas kang Sadrach, Mesach, ug Abednego. Sa matinahoron, apan sa malig-on, ilang gisultihan ang hari nga dili sila moalagad sa iyang mga diyos ug mosimba sa imahen nga bulawan. Kining tulo ka batan-ong mga Hebreohanon gibalhog sa gipainit pa gayod nga hudno. Apan unsay nahitabo? Mitan-aw sa sulod, nakita sa hari ang upat ka himsog nga mga lalaki, ang usa kanila “kaamgid sa anak sa mga diyos.” (Daniel 3:25) Ang tulo ka Hebreohanon gipagula sa hudno, ug gihimaya ni Nabucodonosor ang ilang Diyos. Magantihon ang paghanduraw sa asoy. Ug pagkamaayo nga pagtulon-an ang gihatag niini labot sa pagkamatinumanon ngadto kang Jehova ilalom sa pagsulay!
Pahimusli ang Kaayohan Gikan sa Pagbasa sa Bibliya Ingong Pamilya
17. Sa mubo paghisgot ug pila ka mapuslanong mga butang nga makat-onan sa imong pamilya pinaagi sa pagbasa sa Bibliya nga magkauban.
17 Ang imong pamilya makapahimulos ug daghang kaayohan kon regular kamong mogugol ug panahon sa pagbasa sa Bibliya nga magkauban. Sugod sa Genesis, imong masaksihan ang kalalangan ug makatan-aw sa orihinal nga pinuy-anan sa tawo nga Paraiso. Makabahin ka sa mga kasinatian sa matinumanong mga patriarka ug sa ilang mga pamilya ug makasunod sa mga Israelinhon samtang nangagi sila sa uga nga salog sa Pulang Dagat. Imong makita nga gipildi sa batan-ong magbalantay sa hayop nga si David ang higanteng Pilistihanon nga si Goliath. Ang imong pamilya makasud-ong sa pagtukod sa templo ni Jehova sa Jerusalem, makakita sa pagkalumpag niini pinaagi sa kasundalohang Babilonyanhon, ug makakita sa pagtukod pag-usab niini ubos ni Gobernador Zerubabel. Uban sa timawang mga magbalantay duol sa Betlehem, madungog nimo ang gipamulong sa manulonda bahin sa pagkatawo ni Jesus. Imong makuha ang mga detalye bahin sa iyang bawtismo ug sa iyang ministeryo, makakita kaniya nga gihalad ang iyang tawhanong kinabuhi ingong usa ka lukat, ug makabahin sa kalipay sa iyang pagkabanhaw. Sunod, makabiyahe ka uban kang apostol Pablo ug makapaniid sa pagkatukod sa mga kongregasyon samtang ang Kristiyanidad mikaylap. Dayon, sa basahon sa Pinadayag, ang imong pamilya malipay sa halangdong panan-awon ni apostol Juan bahin sa umaabot, lakip sa Usa ka Libo ka Tuig nga Pagmando ni Kristo.
18, 19. Unsang mga sugyot ang gitanyag bahin sa pagbasa sa Bibliya sa pamilya?
18 Kon kamo nagabasa nga kusog sa Bibliya ingong pamilya, basaha kana uban ang katin-aw ug kadasig. Sa dihang magbasa ug pipila ka bahin sa Kasulatan, usa ka membro sa pamilya—posible ang amahan—mobasa sa mga pulong sa katibuk-ang asoy. Ang uban kaninyo makakuha sa mga papel sa mga karakter sa Bibliya, nga magabasa sa inyong mga bahin uban sa pagbati nga nahiangay.
19 Samtang makigbahin ka sa pagbasa sa Bibliya ingong pamilya, ang imong katakos sa pagbasa hayan mouswag. Malagmit, ang imong kahibalo sa Diyos modaghan, ug kini angayng makapasuod kanimo ngadto kaniya. Si Asap miawit: “Alang kanako, ang pagpaduol sa Diyos maayo alang kanako. Diha sa Soberano Ginoong Jehova nga gihimo ko ang akong dalangpanan, aron isugilon ko ang tanan mong mga buhat.” (Salmo 73:28) Kini makatabang sa imong pamilya nga mahisama kang Moises, kinsa “nagpabilin mang lig-on nga daw sa nakita ang Usa kinsa dili-makita,” sa ato pa, si Jehova nga Diyos.—Hebreohanon 11:27.
Pagbasa ug ang Kristohanong Ministeryo
20, 21. Sa unsang paagi ang atong buluhatong pagsangyaw nalangkit sa katakos sa pagbasa?
20 Ang atong tinguha sa pagsimba sa “Usa kinsa dili-makita” angay mopalihok kanato sa pagpaningkamot nga mahimong maayong mga magbabasa. Ang katakos sa pagbasag maayo makatabang kanato sa pagpamatuod gikan sa Pulong sa Diyos. Kini makatabang gayod kanato sa pagpadayon sa pagsangyaw sa Gingharian nga buluhaton diin gisugo ni Jesus ang iyang mga sumusunod sa dihang siya miingon: “Panglakaw . . . ug paghimog mga tinun-an sa katawhan sa tanang kanasoran, nga magabawtismo kanila sa ngalan sa Amahan ug sa Anak ug sa balaang espiritu, nga magatudlo kanila sa pagsunod sa tanang butang nga akong gisugo kaninyo.” (Mateo 28:19, 20; Buhat 1:8) Ang pagsangyaw mao ang pangunang buluhaton sa katawhan ni Jehova, ug ang katakos sa pagbasa makatabang kanato sa pagtuman niini.
21 Paningkamot ang gikinahanglan aron mahimong maayong magbabasa ug hanas nga magtutudlo sa Pulong sa Diyos. (Efeso 6:17) Busa, ‘buhata ang kutob sa imong maarangan nga ikapakita ang imong kaugalingon nga inuyonan sa Diyos, nga sa husto nagagamit sa pulong sa kamatuoran.’ (2 Timoteo 2:15) Pauswaga ang imong kahibalo sa kamatuoran sa Kasulatan ug ang imong katakos ingong usa ka Saksi ni Jehova pinaagi sa pagdeboto sa imong kaugalingon sa pagbasa.
Unsay Imong mga Tubag?
◻ Sa unsang paagi ang kalipay nagadepende sa pagbasa sa Pulong sa Diyos?
◻ Nganong magpalandong sa imong ginabasa sa Bibliya?
◻ Nganong gamiton ang paglangkit ug paghanduraw sa dihang magbasa sa Kasulatan?
◻ Unsa ang pipila ka mga pagtulon-an nga makat-onan gikan sa pagbasa sa Bibliya?
◻ Nganong basahon ang Bibliya sa makusog ingong pamilya, ug unsay kalabotan sa pagbasa diha sa Kristohanong ministeryo?
[Mga hulagway sa panid 13]
Sa dihang magbasa sa Bibliya ingong pamilya, handurawa ang mga asoy ug palandonga ang kahulogan niini