Gituman Nila ang Kabubut-on ni Jehova
Usa ka Gamayng Batang Babaye nga Misulting Maisogon
SA IKANAPULONG siglo W.K.P., dili maayo ang relasyon sa Israel ug Syria. Kanunay gayod nga may mahitabong mga gubatgubat nga sa dihang milabay ang tulo ka tuig nga walay kapintasan, nahimo kining rekord sa kasaysayan.—1 Hari 22:1.
Makahahadlok kaayo niadtong panahona ang mga pundok sa mga tulisan nga Syrianhon, ang pipila may gatosan ka sundalo. Sulngon ug lungkabon niini nga mga manggugubat ang mga Israelinhon, dagiton ug uliponon ang daghan—bisan mga bata.
Sa usa ka pagsulong, “usa ka gamayng batang babaye” sa walay-kaluoy gidagit gikan sa iyang mahinadlokon-sa-Diyos nga pamilya. (2 Hari 5:2) Gidala sa Syria, siya gipugos sa pagpuyo taliwala sa mga tawong tingali nakita niya nga makahahadlok ug katingad-an—mga tawong nagsimba sa adlaw, bulan, mga bituon, mga kahoy, mga tanom, ug bisan sa mga bato. Pagkalahi nila gikan sa iyang pamilya ug mga higala, nga nagsimba sa usa ka matuod nga Diyos, si Jehova! Apan, bisan pa diha niining katingad-ang palibot, kini nga batang babaye nagpakitag talagsaong kaisog labot sa pagsimba kang Jehova. Tungod niini, nausab niya ang kinabuhi sa usa ka prominenteng opisyal nga nag-alagad ubos sa hari sa Syria. Atong tan-awon kon sa unsang paagi.
Ang Kaisog sa Pagsulti
Ang gamayng batang babaye wala nganli sa asoy sa Bibliya. Siya nahimong sulugoon sa asawa ni Naaman, usa ka maisog nga hepe sa kasundalohan ubos ni Haring Ben-hadad II. (2 Hari 5:1) Bisag siya tinamod pag-ayo, si Naaman may makaluod nga sakit nga sanla.
Tingali ang matinahorong kinaiya sa batang babaye maoy nagtukmod sa asawa ni Naaman sa pagsulti kaniya. Ang babaye tingali nangutana sa batang babaye, ‘Unsay himoon alang sa mga sanlahon sa Israel?’ Kining batang babayeng Israelinhon wala maulaw sa pagsulting maisogon: “Kon ang akong ginoo atua pa lang unta atubangan sa manalagna nga atua sa Samaria! Nan mamaayo siya sa iyang sanla.”—2 Hari 5:3.
Kining mga pulonga sa batang babaye wala isipang hinanduraw lang sa usa ka bata. Sa kasukwahi, gitaho kini ngadto kang Haring Ben-hadad, kinsa nagpadala kang Naaman ug sa uban sa 150-kilometros nga biyahe ngadto sa Samaria sa pagpangita niini nga manalagna.—2 Hari 5:4, 5.
Ang Pagkaayo ni Naaman
Si Naaman uban sa iyang kasundalohan miadto kang Haring Jehoram sa Israel, nga nagdalag sulat nga pagpailaila gikan kang Ben-hadad ug igoigong gidak-ong regalo nga salapi. Dili ikahibulong, ang magsisimbag-baka nga si Haring Jehoram wala magpakitag pagtuo sa manalagna sa Diyos nga sama sa gipakita sa sulugoon nga batang babaye. Hinunoa, nagtuo siya nga si Naaman miabot sa pagpangitag away. Sa dihang nadungog sa manalagna sa Diyos nga si Eliseo ang katahap ni Jehoram, siya dihadiha nagpadalag mensahe nga naghangyo nga ipadala sa hari si Naaman sa iyang balay.—2 Hari 5:6-8.
Sa dihang miabot si Naaman sa balay ni Eliseo, ang manalagna nagpadalag mensahero sa pagsulti kaniya: “Kinahanglang maligo ka pito ka beses sa Jordan aron maulian ka sa imong panit; ug mamahinlo.” (2 Hari 5:9, 10) Nasuko si Naaman. Naglaom ug usa ka milagroso ug mapagawalong pasundayag, siya nangutana: “Dili ba ang Abana ug ang Parpar, nga mga suba sa Damasco, labing maayo pa kay sa tanang tubig sa Israel? Dili ba ako makaligo niini ug mamahinlo?” Si Naaman milakaw sa balay ni Eliseo nga naglagot. Apan sa dihang nangatarongan kaniya ang mga sulugoon ni Naaman, siya sa kataposan misunod. Human maligo sa pito ka beses sa Subang Jordan, “ang iyang panit naulian sama sa panit sa usa ka bata ug siya nahinlo.”—2 Hari 5:11-14.
Mibalik kang Eliseo, si Naaman miingon: “Ania, karon, nahibaloan ko na gayod nga walay Diyos bisan asa sa yuta gawas sa Israel.” Misaad si Naaman nga siya “dili na mohalad ug halad nga sinunog ngadto sa bisan haing mga diyos gawas kang Jehova.”—2 Hari 5:15-17.
Mga Leksiyon Alang Kanato
Si Naaman dili unta mahiadto sa manalagna nga si Eliseo kon ang sulugoon nga batang babaye wala pa misulting maisogon. Karong adlawa, daghang batan-on ang naghimo sa samang paagi. Sa eskuylahan, hayan sila gilibotan sa mga estudyante nga walay interes sa pag-alagad sa Diyos. Bisan pa niana, misulti sila bahin sa ilang gituohan. Ang uban kanila misugod sa pagbuhat niana sa linghod pa kaayong edad.
Palandonga si Alexandra, usa ka singko-anyos nga batang babaye sa Australia. Sa dihang misugod siya sa pagtungha, ang iyang inahan nakigsabot ug panahon aron ipatin-aw ang mga pagtulon-an sa mga Saksi ni Jehova ngadto sa magtutudlo. Apan sa pag-abot nahibulong ang inahan ni Alexandra. “Ubay-ubay na akog nahibaloan bahin sa inyong mga pagtulon-an, ingon man sa buhaton ug dili buhaton ni Alexandra sa eskuylahan,” miingon ang magtutudlo. Natingala ang inahan ni Alexandra, sanglit walay laing batang Saksi sa eskuylahan. “Gisultihan kami ni Alexandra bahin sa iyang tinuohan,” mibatbat ang magtutudlo. Oo, kining batang babaye nakighisgot na nga mapaagihon sa iyang magtutudlo.
Ang maong mga batan-on maisogong misulti. Sila sa ingon milihok nga nahiuyon sa Salmo 148:12, 13: “Kamong mga batan-ong lalaki ug usab kamong mga ulay, kamong mga tigulang ug mga batang lalaki. Padayega sila sa ngalan ni Jehova, kay ang iyang ngalan lamang maoy hilabihan ka hataas. Ang iyang kahalangdon labaw sa yuta ug sa langit.”