Mahimong Mabination Kaayo

“Isul-ob sa inyong kaugalingon ang malumong mga pagmahal sa pagkamabination, kalulot.”​—COLOSAS 3:12.

1. Nganong adunay dakong panginahanglan sa pagkamabination karong adlawa?

WALA pa sukad sa kasaysayan nga daghan kaayong tawo ang nagkinahanglan ug mabinationg tabang kay sa karon. Tungod sa sakit, kagutmanan, kawalay-trabaho, krimen, mga gubat, anarkiya, ug kinaiyanhong mga katalagman, ang milyonmilyon nagkinahanglan ug tabang. Apan adunay usa ka suliran nga mas grabe pa, ug kana mao ang makaluluoyng espirituwal nga kahimtang sa katawhan. Si Satanas, kinsa nahibalo nga ang iyang panahon maoy hamubo na, “nagapahisalaag sa tibuok gipuy-ang yuta.” (Pinadayag 12:9, 12) Busa, ilabina kadtong anaa sa gawas sa matuod Kristohanong kongregasyon nameligro nga mawad-an sa ilang mga kinabuhi, ug ang Bibliya wala maghatag ug paglaom sa pagkabanhaw niadtong pagapatyon panahon sa umaabot nga adlaw sa paghukom sa Diyos.​—Mateo 25:31-33, 41, 46; 2 Tesalonica 1:6-9.

2. Nganong si Jehova nagpugong sa paglaglag sa mga tuman-kadaotan?

² Bisan pa niana, hangtod niining kataposang bahin sa kataposang mga adlaw, si Jehova nga Diyos nagpadayon sa pagpakitag pailob ug pagkamabination ngadto sa mga dili-mapasalamaton ug sa mga tuman-kadaotan. (Mateo 5:45; Lucas 6:35, 36) Gibuhat niya kini tungod sa samang katarongan nga iyang gilangan ang pagsilot sa dili-matinumanong nasod sa Israel. “‘Maingon nga ako buhi,’ mao ang ginaingon sa Soberano Ginoong Jehova, ‘ako nagakalipay, dili sa kamatayon sa usang tuman-kadaotan, kondili nga kanang usa nga tuman-kadaotan motalikod sa iyang dalan ug magpadayong buhi. Biya, biya na sa imong daotang mga dalan, kay ngano man nga ikaw mamatay, Oh balay sa Israel?’”​—Ezekiel 33:11.

3. Unsang panig-ingnan ang atong nabatonan sa pagkamabination ni Jehova alang niadtong dili iyang katawhan, ug unsay atong makat-onan gikan niini?

³ Ang pagkamabination ni Jehova gipaabot usab ngadto sa tuman-kadaotang mga taga-Nineve. Si Jehova nagpadala sa iyang propetang si Jonas aron sa pagpasidaan kanila bahin sa umaabot nga kalaglagan. Positibo silang misanong sa pagwali ni Jonas ug naghinulsol. Kadto nakapatandog sa mabinationg Diyos, si Jehova, nga wala ipadayon ang paglaglag sa siyudad sa maong panahon. (Jonas 3:10; 4:11) Kon ang Diyos naluoy sa mga taga-Nineve, kinsa may purohan sa pagkabanhaw, pagkalabi pa nga siya magmabination sa katawhan nga karon nag-atubang ug walay-kataposang kalaglagan!​—Lucas 11:32.

Usa ka Wala-Sukad-Mahitabo nga Buluhaton sa Pagkamabination

4. Sa unsang paagi si Jehova nagapahayag ug pagkamabination alang sa katawhan karong adlawa?

⁴ Nahiuyon sa iyang mabinationg personalidad, si Jehova nagsugo sa iyang mga Saksi nga magpadayon pagduaw sa ilang mga silingan uban sa “maayong balita sa gingharian.” (Mateo 24:14) Ug sa dihang ang mga tawo mapabilhong mosanong niining moluwas-sa-kinabuhi nga buluhaton, si Jehova magbukas sa ilang mga kasingkasing nga masabtan ang mensahe sa Gingharian. (Mateo 11:25; Buhat 16:14) Sa pagsundog sa ilang Diyos, ang matuod nga mga Kristohanon magpadayag ug malumong pagkamabination pinaagi sa pagbalik-duaw sa mga interesado, nga tabangan sila, kon mahimo, pinaagig usa ka pagtuon sa Bibliya. Sa ingon, niadtong 1993, kapig upat ug tunga ka milyong Saksi ni Jehova, sa 231 ka nasod, migugol ug kapin sa usa ka bilyong oras sa pagsangyaw sa balaybalay ug pagtuon sa Bibliya uban sa ilang mga silingan. Kining bag-ong interesadong mga tawo, sa baylo, nakabaton ug kahigayonan nga ipahinungod ang ilang mga kinabuhi kang Jehova ug mokuyog sa ranggo sa iyang bawtismadong mga Saksi. Sa ingon, ilang giabaga usab ang pagbuhat niining wala-sukad-mahitabo nga buluhaton sa pagkamabination alang sa umaabot nga mga tinun-an nga nabilanggo pa sa himalatyong kalibotan ni Satanas.​—Mateo 28:19, 20; Juan 14:12.

5. Sa dihang ang balaang pagkamabination nakaabot sa kinutbanan niini, unsay mahitabo sa relihiyon nga nagmisrepresentar sa Diyos?

⁵ Sa dili na madugay si Jehova molihok isip “usa ka tawo sa panggubatan.” (Exodo 15:3) Tungod sa pagkamabination alang sa iyang ngalan ug sa iyang katawhan, iyang wagtangon ang tumang-pagkadaotan ug tukoron ang usa ka matarong nga bag-ong kalibotan. (2 Pedro 3:13) Ang unang makasinati sa adlaw sa kapungot sa Diyos mao unya ang mga simbahan sa Kakristiyanohan. Maingon nga wala luwasa sa Diyos ang iyang kaugalingong templo sa Jerusalem gikan sa kamot sa hari sa Babilonya, dili usab niya luwason ang relihiyosong mga organisasyon nga nagmisrepresentar kaniya. Ibutang sa Diyos sa kasingkasing sa mga membro sa Hiniusang Kanasoran ang paglaglag sa Kakristiyanohan ug sa tanang ubang matang sa bakak nga relihiyon. (Pinadayag 17:16, 17) “Ug alang kanako,” si Jehova mipahayag, “ang akong mata dili maluoy, ni akong ipakita ang pagkamabination. Ang ilang dalan ako gayod nga igapahamtang sa ilang ulo mismo.”​—Ezekiel 9:5, 10.

6. Sa unsang mga paagi ang mga Saksi ni Jehova natukmod sa pagpakitag pagkamabination?

⁶ Samtang aduna pay panahon, ang mga Saksi ni Jehova magpadayon sa pagpakitag pagkamabination alang sa ilang mga silingan pinaagi sa madasigong pagsangyaw sa mensahe sa kaluwasan sa Diyos. Ug natural lamang, kon mahimo, tabangan usab nila ang mga tawong adunay materyal nga panginahanglan. Hinuon, niining bahina ang ilang unang responsabilidad mao ang pag-atiman sa mga panginahanglan sa suod nga mga membro sa pamilya ug niadtong kaubanan nila sa pagtuo. (Galacia 6:10; 1 Timoteo 5:4, 8) Ang daghang misyon sa panghinabang nga gihimo sa mga Saksi ni Jehova alang sa mga isigkamagtutuo nga nakaagom ug lainlaing mga katalagman nahimong talagsaong mga panig-ingnan sa pagkamabination. Bisan pa niana, ang mga Kristohanon dili kinahanglang magpaabot ug usa ka krisis una pa magpakitag malumong pagkamabination. Ipadayag dayon nila kining hiyasa sa pagsagubang sa maayo ug daotang mga panghitabo sa adlaw-adlaw nga pagkinabuhi.

Bahin sa Bag-ong Personalidad

7. (a) Sa Colosas 3:8-13, sa unsang paagi ang pagkamabination nalangkit sa bag-ong personalidad? (b) Unsay mas sayon nga mabuhat sa mga Kristohanon tungod sa malumong pagbati?

⁷ Matuod nga ang atong makasasalang kinaiyahan ug ang daotang impluwensiya sa kalibotan ni Satanas maoy kababagan sa atong malumong pagkamabination. Kana ang hinungdan nga ang Bibliya nag-awhag kanato nga isalikway ang “kapungot, kasuko, pagkadaotan, maabusohong sinultihan, ug law-ayng sulti.” Hinunoa kita gitambagan nga ‘isul-ob nato ang bag-ong personalidad’​—usa ka personalidad nga nahiuyon sa dagway sa Diyos. Una sa tanan, kita gisugo nga isul-ob “ang malumong mga pagmahal sa pagkamabination, kalulot, pagkamapaubsanon sa hunahuna, kalumo, ug hataas-nga-pailob.” Unya ang Bibliya nagpakita kanato ug praktikal nga paagi sa pagpadayag niining mga hiyasa. “Padayon nga mag-inantosay sa usag usa ug magpasayloay sa usag usa kon ang usa may hinungdan sa pagreklamo batok sa lain. Maingon gayod nga si Jehova sa walay pagpanuko nagapasaylo kaninyo, buhata usab ninyo ang ingon.” Labi pang sayon nga magpasaylo kon naugmad nato ang ‘malumong pagmahal sa pagkamabination’ sa atong mga igsoon.​—Colosas 3:8-13.

8. Nganong hinungdanon nga magbaton ug mapinasayloong espiritu?

⁸ Sa laing bahin, ang pagkapakyas sa pagpadayag ug mabinationg pagpasaylo magdaot sa atong relasyon uban kang Jehova. Kini kusganong gipakita ni Jesus diha sa iyang ilustrasyon sa ulipong dili mapinasayloon, nga gipabilanggo sa iyang agalon “hangtod nga iyang kabayran ang tanang nautang.” Ang ulipon takos sa maong pagtratar tungod kay siya sa makapakurat napakyas sa pagpakitag pagkamabination alang sa kaubang ulipon nga nangaliyupo alang sa kaluoy. Gitapos ni Jesus ang ilustrasyon pinaagi sa pag-ingon: “Sa samang paagi usab ang akong langitnong Amahan makiglabot kaninyo kon ang matag usa kaninyo dili magpasaylo sa iyang igsoon gikan sa inyong mga kasingkasing.”​—Mateo 18:34, 35.

9. Sa unsang paagi ang malumong pagkamabination nalangkit sa labing hinungdanong kinaiyahan sa bag-ong personalidad?

⁹ Ang malumong pagkamabination maoy usa ka hinungdanong kinaiyahan sa gugma. Ug ang gugma mao ang nagapailang timaan sa matuod nga Kristiyanidad. (Juan 13:35) Busa, ang kabatbatan sa Bibliya sa bag-ong personalidad gitapos: “Gawas pa niining tanang butanga, isul-ob sa inyong kaugalingon ang gugma, kay kini usa ka hingpit nga bugkos sa panaghiusa.”​—Colosas 3:14.

Kasina​—Usa ka Babag sa Pagkamabination

10. (a) Unsa tingaliy makapahinabo nga ang kasina mogamot diha sa atong mga kasingkasing? (b) Unsa ang daotang mga sangpotanan sa kasina?

¹⁰ Tungod sa atong makasasalang tawhanong kinaiyahan, ang mga pagbati sa kasina daling makagamot diha sa atong mga kasingkasing. Ang usa ka igsoong lalaki o babaye tingali binulahan sa kinaiyanhong mga katakos o materyal nga mga bentaha nga wala nato maangkon. O tingali may usang nakadawat ug espesyal nga espirituwal nga mga panalangin ug mga pribilehiyo. Kon kita masina kanila, makaarang ba kita sa pagtagad kanila uban ang malumong pagkamabination? Lagmit dili. Hinunoa, ang masinahong mga pagbati ngadtongadto mapadayag tingali diha sa hinawayong panulti o dili-malulutong mga buhat, kay si Jesus miingon mahitungod sa mga tawo: “Gumikan sa kadagaya sa kasingkasing ang iyang baba magasulti.” (Lucas 6:45) Ang uban tingali mouyon sa maong pagsaway. Sa ingon mabungkag ang kalinaw sa usa ka pamilya o kongregasyon sa katawhan sa Diyos.

11. Sa unsang paagi ang napulo ka igsoong lalaki ni Jose nawad-an ug pagkamabination diha sa ilang mga kasingkasing, ug unsay misangpot?

¹¹ Tagda kon unsay nahitabo sa usa ka dakong pamilya. Ang napulo ka magulang nga mga anak lalaki ni Jacob nasina sa ilang manghod nga igsoong si Jose tungod kay siya ang pinangga sa ilang amahan. Ingong sangpotanan, “sila dili makaarang sa pagpakigsulti nga malinawon uban kaniya.” Sa ulahi, si Jose nabulahan sa balaang mga damgo, nga nagpamatuod nga naangkon niya ang pag-uyon ni Jehova. Kadto mihatag sa iyang mga igsoon ug “dugang hinungdan sa pagdumot kaniya.” Tungod kay sila wala maglangkat sa kasina gikan sa ilang mga kasingkasing, kadto wala maghatag ug luna sa pagkamabination ug misangpot sa seryosong sala.​—Genesis 37:4, 5, 11.

12, 13. Unsay atong pagabuhaton sa dihang mosulod sa atong kasingkasing ang mga pagbati sa kasina?

¹² Sa kapintas, sila nagbaligya kang Jose ngadto sa kaulipnan. Sa paningkamot nga itago ang buhat nilang daotan, sila naglansis sa ilang amahan ngadto sa paghunahuna nga si Jose gipatay sa usa ka mabangis nga hayop. Katuigan sa ulahi ang ilang sala nabutyag sa dihang sila napugos sa pag-adto sa Ehipto ug sa pagpalit ug pagkaon tungod sa kagutmanan. Ang tagdumala sa pagkaon, kinsa wala nila hiilhi nga si Jose, nag-akusar kanila sa pagpangespiya ug giingnan sila nga dili na mangayo pag-usab sa iyang tabang gawas kon dad-on nila ang kamanghoran nilang igsoon, si Benjamin. Niadtong panahona si Benjamin na ang pinangga sa ilang amahan, ug sila nasayod nga dili gusto ni Jacob nga siya palakton.

¹³ Busa samtang nagtindog atubangan ni Jose, ang ilang mga konsensiya nagtukmod kanila sa pag-angkon: “Sa walay pagduhaduha kita sad-an kon bahin sa atong igsoon [Jose], tungod kay atong nakita ang kasakitan sa iyang kalag sa dihang siya nangaliyupo sa pagkamabination sa atong bahin, apan kita wala mamati. Kana ang hinungdan nga ang maong kasakitan miabot na kanato.” (Genesis 42:21) Pinaagi sa iyang mabination apan malig-ong mga pakiglabot, gitabangan ni Jose ang iyang mga igsoon sa pagpamatuod sa katiunay sa ilang paghinulsol. Dayon iyang gipadayag ang iyang pagkatawo ngadto kanila ug madagayaong nagpasaylo kanila. Ang panaghiusa sa pamilya nahibalik. (Genesis 45:4-8) Isip mga Kristohanon, angay nga makakat-on kitag pagtulon-an gikan niini. Kay nahibalo sa daotang mga sangpotanan sa kasina, angay nga kita moampo kang Jehova alang sa tabang sa pagpuli sa masinahong mga pagbati pinaagi sa ‘malumong pagmahal sa pagkamabination.’

Ubang Kababagan sa Pagkamabination

14. Nganong angay natong likayan ang dili-kinahanglanong pagkaladlad sa kapintasan?

¹⁴ Ang laing babag sa atong pagkamabination mahimong mosangpot gikan sa dili-kinahanglanong pagladlad sa atong kaugalingon sa kapintasan. Ang mga esport ug kalingawan nga nagapasundayag sa kapintasan mopausbaw sa tinguha sa kapintasan aron maukyaban. Sa kapanahonan sa Bibliya, ang mga pagano kanunayng motan-aw ug mga panagtigi sa mga mag-aaway ug ubang matang sa pagpaantos sa tawo diha sa mga dapit sa kalingawan sa Romanhong Empiryo. Ang maong kalingawan, sumala sa usa ka historyano, “nagdaot sa pagkamabination sa pag-antos nga nagapalahi sa tawo gikan sa kahayopan.” Kadaghanan sa kalingawan sa modernong kalibotan karong adlawa dunay samang epekto. Ang mga Kristohanon, kinsa naningkamot nga magmabination kaayo, kinahanglang magmapilion gayod sa ilang pagpilig balasahon, mga sine, ug mga programa sa TV. Sa kamaalamon sila naghinumdom sa mga pulong sa Salmo 11:5: “Si bisan kinsa nga nahigugma sa kapintasan [si Jehova] nagdumot gayod.”

15. (a) Sa unsang paagi ang usa ka tawo tingali magpadayag ug seryosong kakulang sa pagkamabination? (b) Unsay sanong sa matuod nga mga Kristohanon ngadto sa mga panginahanglan sa isigkamagtutuo ug mga silingan?

¹⁵ Ang usa ka tawong mahunahunaon sa kaugalingon lagmit usab nga kulang ug pagkamabination. Kini seryoso, kay si apostol Juan nagsaysay: “Si bisan kinsa nga adunay kahinguhaan sa kinabuhi niining kalibotana ug makakita sa iyang igsoon nga may panginahanglan ug bisan pa magasira sa pultahan sa iyang malumong pagkamabination nganha kaniya, sa unsang paagi ang gugma sa Diyos magpabilin diha kaniya?” (1 Juan 3:17) Ang susamang kawalay pagkamabination gipadayag sa nagpakamatarong-sa-kaugalingon nga saserdote ug sa Levihanon sa ilustrasyon ni Jesus bahin sa mahigalaong Samarianhon. Sa pagkakita sa kahimtang sa ilang halos patay nang Hudiyong igsoon, kini sila mingtabok ngadto sa pikas nga bahin sa dalan ug nagpadayon sa ilang paglakaw. (Lucas 10:31, 32) Sa kaatbang, ang mabinationg mga Kristohanon mosanong dayon ngadto sa materyal ug espirituwal nga mga panginahanglan sa ilang mga igsoon. Ug sama sa Samarianhon sa ilustrasyon ni Jesus, sila mabalak-on usab sa mga panginahanglan sa mga estranghero. Sa ingon malipayon silang mohatag sa ilang panahon, kusog, ug materyal nga kahinguhaan aron pauswagon ang buluhatong paghimog tinun-an. Niining paagiha sila nakatabang sa kaluwasan sa milyonmilyon.​—1 Timoteo 4:16.

Pagkamabination Alang sa Masakiton

16. Unsang mga limitasyon ang atong mahibalag sa pagpakiglabot sa mga kaso sa pagkasakit?

¹⁶ Ang sakit maoy pahat sa dili-hingpit, himalatyong katawhan. Ang mga Kristohanon dili eksepsiyon, ug kadaghanan kanila dili propesyonal nga mga doktor, ni makahimo silag mga milagro sama sa pipila ka unang mga Kristohanon nga nakadawat nianang mga gahoma gikan ni Kristo ug sa iyang mga apostol. Duyog sa pagkamatay sa mga apostol ni Kristo ug sa ilang suod nga mga kauban, ang maong milagrosong mga gahom nahanaw. Busa, ang katakos nato sa pagtabang niadtong nag-antos sa pisikal nga sakit, lakip sa pagkainutil sa utok ug mga panghanduraw, maoy limitado.​—Buhat 8:13, 18; 1 Corinto 13:8.

17. Unsang pagtulon-an ang atong makat-onan gikan sa paagi sa pagtagad sa masakiton ug nagbangotan nga tawong si Job?

¹⁷ Ang depresyon o sobrang kaguol sagad nagaduyog sa sakit. Pananglitan, ang mahinadlokon-sa-Diyos nga Job naguol kaayo tungod sa grabeng sakit ug sa mga katalagman nga gipahinabo ni Satanas kaniya. (Job 1:18, 19; 2:7; 3:3, 11-13) Siya nagkinahanglag mga higala nga motratar kaniya uban ang malumong pagkamabination ug ‘mamulong nga mahupayon.’ (1 Tesalonica 5:14) Sa kapulihay, tulo ka maglilipay kono ang miduaw kaniya ug nagdalidali sa pagpahayag ug sayop nga mga panapos nga sulti. Gipasamot nila ang magul-anon kaayong kahimtang ni Job pinaagi sa pagpasabot nga ang iyang mga katalagman maoy tungod sa kaugalingon niyang sala. Kay may malumong pagkamabination, ang mga Kristohanon molikay nga makahimog samang sayop sa dihang ang isigkamagtutuo maoy masakiton o magul-anon kaayo. Usahay, ang pangunang butang nga gikinahanglan nianang maong mga tawo mao ang pila ka malulutong pagduaw sa mga ansiano o ubang hamtong nga mga Kristohanon nga mamating may pagkamabination, magpakitag pagkamasinabtanon, ug mohatag ug mahigugmaong Kasulatanhong tambag.​—Roma 12:15; Santiago 1:19.

Pagkamabination Alang sa Mahuyang

18, 19. (a) Unsaon pagpakiglabot sa mga ansiano sa mga mahuyang o nakasala? (b) Bisan pag gikinahanglan ang pagpormag usa ka hudisyal nga komite, nganong hinungdanong tagdon sa mga ansiano ang mga mamumuhat ug daotan uban ang malumong pagkamabination?

¹⁸ Ang mga ansiano ilabina ang kinahanglang may malumong pagkamabination. (Buhat 20:29, 35) “Kita . . . nga mga lig-on angay mopas-an sa mga kaluyahon niadtong mga dili lig-on,” ang Bibliya nagsugo. (Roma 15:1) Kay dili man hingpit, kitang tanan makahimog mga sayop. (Santiago 3:2) Ang kalumo gikinahanglan sa pagpakiglabot sa usa nga “mohimo ug sayop nga lakang sa dili pa niya himatngonan kini.” (Galacia 6:1) Ang mga ansiano dili gayod buot nga mahisama sa nagpakamatarong-sa-kaugalingon nga mga Pariseo nga dili makataronganon sa ilang pagpadapat sa Kasugoan sa Diyos.

¹⁹ Sa kaatbang, ang mga ansiano magasunod sa mabination kaayong mga panig-ingnan ni Jehova nga Diyos ug ni Jesu-Kristo. Ang panguna nilang buluhaton mao ang pagpakaon, pagdasig, ug pagpalagsik sa mga karnero sa Diyos. (Isaias 32:1, 2) Inay mosulay paggahom sa mga butang pinaagi sa kapid-ang mga lagda, sila modangop ingong pagpaluyo sa maayong mga prinsipyo sa Pulong sa Diyos. Busa, ang buluhaton sa mga ansiano angay nga mao ang pagpalig-on, paghatag sa kalipay ug pagpabili sa pagkamaayo ni Jehova diha sa mga kasingkasing sa ilang mga igsoon. Kon ang usa ka kaubang magtutuo makahimog gamayng sayop, ang usa ka ansiano kasagarang molikay pagtul-id kaniya nga may ubang tawo nga makabati. Kon gikinahanglan gayod nga mosulti, ang malumong mga pagkamabination magtukmod sa ansiano nga dad-on siya sa daplin ug hisgotan ang suliran nga dili madungog sa uban. (Itandi ang Mateo 18:15.) Bisan pag ang usa ka tawo tingali lisod kaayong ikasinabot, ang pagduol sa ansiano kinahanglang mapailobon ug matinabangon. Siya dili gayod mangitag mga hinungdan sa pagpagawas sa maong tawo gikan sa kongregasyon. Bisan pag gikinahanglan nga pormahon ang usa ka hudisyal nga komite, ang mga ansiano magpakitag malumong pagkamabination sa pagpakiglabot sa tawong nalangkit sa seryosong buhat nga daotan. Ang ilang kalumo basin makatabang sa pagpadangat sa maong tawo sa paghinulsol.​—2 Timoteo 2:24-26.

20. Kanus-a dili angay ang emosyonal nga mga pagpadayag sa pagkamabination, ug ngano?

²⁰ Hinuon, adunay mga panahon nga ang usa ka alagad ni Jehova dili makapakitag pagkamabination. (Itandi ang Deuteronomio 13:6-9.) Ang ‘paghunong pagpakig-uban’ sa usa ka Kristohanon sa usa ka suod nga higala o paryente nga napalagpot mahimong usa ka dakong pagsulay. Sa maong kahimtang, hinungdanon nga siya dili magpadaog sa mga pagbati sa kaluoy. (1 Corinto 5:11-13) Ang ingon nga kalig-on basin magdasig pa sa nakasala sa paghinulsol. Dugang pa, sa pagpakiglabot sa kaatbang nga sekso, ang mga Kristohanon kinahanglang maglikay sa dili-angayang mga pasundayag sa pagkamabination nga mahimong mosangpot sa seksuwal nga imoralidad.

21. Sa unsang ubang mga bahin gikinahanglan nga atong ipakita ang malumong pagkamabination, ug unsa ang mga kaayohan?

²¹ Tungod sa kakulang ug luna dili mahisgotan ang tanang daghang bahin diin gikinahanglan ang malumong pagkamabination​—sa pagpakiglabot sa mga tigulang, sa nagbangotan, niadtong nakasinatig paglutos gikan sa dili-magtutuong mga kapikas. Ang kugihang mga ansiano angay pagatagdon usab uban ang malumong pagkamabination. (1 Timoteo 5:17) Tahora sila ug hatagi silag pagpaluyo. (Hebreohanon 13:7, 17) ‘Pagbaton kamong tanan sa . . . malumong pagkamabination,’ misulat si apostol Pedro. (1 Pedro 3:8) Pinaagi sa paglihok niining paagiha diha sa tanang kahimtang nga nagkinahanglan niini, atong gipasiugda ang panaghiusa ug kalipay diha sa kongregasyon ug magadani sa mga tagagawas nganha sa kamatuoran. Labaw sa tanan, sa ingong paagi atong gipasidunggan ang atong mabination kaayong Amahan, si Jehova.

Mga Pangutana Agig Pagsubli

◻ Sa unsang paagi si Jehova nagpakitag pagkamabination alang sa makasasalang katawhan?

◻ Nganong hinungdanon nga magmabination kaayo?

◻ Unsa ang pipila ka kababagan sa atong pagkahimong mabination kaayo?

◻ Unsaon nato pagtratar ang masakiton ug magul-anon kaayo?

◻ Kinsa ilabina ang kinahanglang magmabination kaayo, ug ngano?

[Kahon sa panid 19]

DILI-MABINATIONG MGA PARISEO

ANG adlawng Igpapahulay gituyo alang sa espirituwal ug pisikal nga kaayohan sa katawhan sa Diyos. Apan, ang Hudiyong relihiyosong mga pangulo mihimog daghang lagda nga nagpakawalay-pulos sa balaod sa Diyos sa Igpapahulay ug nagpabug-at niini sa mga tawo. Pananglitan, kon dunay maaksidente o magkasakit, dili siya matabangan sa adlaw sa Igpapahulay gawas lamang kon nameligro ang iyang kinabuhi.

Usa ka sekta sa mga Pariseo estrikto kaayo sa ilang pagsabot sa balaod sa Igpapahulay nga sila nag-ingon: “Walay mohupay sa mga nagbangotan, ni moduaw sa mga masakiton panahon sa Igpapahulay.” Ang ubang relihiyosong mga pangulo nagtugot sa maong mga pagduaw sa adlaw sa Igpapahulay apan nagbaod nga: “Gidili ang paghilak.”

Mao nga, si Jesus sa husto nagsaway sa Hudiyong relihiyosong mga pangulo tungod sa pagpabaya sa mas importanteng mga kinahanglanon sa Kasugoan, sama sa hustisya, gugma, ug kaluoy. Dili ikahibulong nga giingnan niya ang mga Pariseo: “Inyong ginahimo nga imbalido ang pulong sa Diyos pinaagi sa inyong tradisyon”!​—Marcos 7:8, 13; Mateo 23:23; Lucas 11:42.

[Hulagway sa panid 17]

Sa 231 ka nasod ang mga Saksi ni Jehova nagahimo sa usa ka wala-sukad-mahitabo nga buluhaton sa pagkamabination diha sa mga balay sa katawhan, sa kadalanan, bisan sa mga bilanggoan

[Hulagway sa panid 18]

Ang pagkaladlad sa kapintasan, sama nianang anaa sa TV, magadaot sa malumong pagkamabination