Si Jehova Nagamando nga May Kahangawa

SA TIBUOK kasaysayan daghang tawhanong magmamando ang nagagamit ug gahom nga walay pagbati sa pag-antos sa ilang mga gimandoan. Apan, si Jehova nagtaganag kalainan pinaagi sa pagpili sa usa ka nasod​—ang Israel​—ug nagmando niini sa mabinationg paagi.

Samtang mga ulipon pa ang mga Israelinhon sa karaang Ehipto, si Jehova nagpatalinghog sa ilang mga pagtuaw alang sa tabang. “Sa tanan nilang mga kasakitan kini nakapasakit kaniya. . . . Sa iyang gugma ug sa iyang kahangawa siya mismo nagtubos kanila.” (Isaias 63:9) Giluwas ni Jehova ang Israel, nagtagana kanila ug milagrosong pagkaon, ug nagdala kanila ngadto sa yuta nga ilang kaugalingon.

Ang mahangawaong hiyas ni Jehova dugang gipakita diha sa mga balaod nga iyang gihatag niining nasora. Gisugo niya ang mga Israelinhon nga makiglabot nga mabination uban sa mga ilo, balo, ug langyawng mga molupyo. Dili sila magpahimulos sa mga baldado.

Gikinahanglan sa Balaod nga ipakita ang kahangawa niadtong nanginahanglan. Ang kabos makapanghagdaw human sa pagpangani. Ang mga utang gikanselar sa Igpapahulay (ikapito) nga tuig. Ang tanang napanunod nga yuta nga gibaligya kinahanglang ibalik sa Tinghugyaw (ika-50) nga tuig. Ang Ancient Israel​—Its Life and Institutions nagtaho: “Sa Israel, wala gayoy naglungtad nga mga hut-ong sa katilingban diha sa modernong diwa.” “Sa unang mga adlaw sa pagpuyo, ang tanang Israelinhon nakapahimulos sa labing menos samang sukdanan sa pagkinabuhi.”​—Levitico 25:​10; Deuteronomio 15:​12-​14; 24:​17-​22; 27:18.

Pagsundog sa Kahangawa ni Jehova

Ang mga alagad sa Diyos gidasig sa iyang kahangawa. Pananglitan, latas sa kasaysayan, gipatay sa pipila ka bag-ong mga hari ang buhing mga membro sa miaging harianong dinastiya. Apan wala kini buhata sa alagad ni Jehova nga si David. Human mamatay si Haring Saul, gipanalipdan ni David si Mephiboshet, ang buhing apo ug manununod ni Saul. “Ang hari mibatig kaluoy kang Mephiboshet ang anak ni Jonathan nga anak ni Saul.”​—2 Samuel 21:7.

Walay laing tawo ang nakasundog sa kahangawa ni Jehova sama sa gibuhat ni Jesus. Daghan sa iyang mga milagro nabuhat tungod sa diyosnong kahangawa. Sa usa ka okasyon usa ka sanlahon ang nangaliyupo kaniya: “Kon buot mo lamang, mapahinlo mo ako.” Si Jesus gitukmod sa kaluoy ug mihikap kaniya, nga miingon: “Buot ko. Mamahinlo ka.” (Marcos 1:​40-42) Sa laing higayon ang dakong panon misunod kang Jesus. Taliwala sa kaguliyang, gihatagan ug pagtagad ni Jesus ang duha ka butang lalaki nga misinggit: “‘Ginoo, kaluy-i kami, Anak ni David!’ . . . Natukmod sa kaluoy, gihikap ni Jesus ang ilang mga mata, ug dihadiha sila nakadawat sa panan-aw.”​—Mateo 20:​29-34.

Ang dakong panon wala makapugong sa mga pagbati ni Jesus alang sa uban. Tungod kay sila taudtaod na nga wala makakaon, miingon siya sa usa ka okasyon: “Gibati ako ug kaluoy alang sa panon.” Busa gipakaon niya sila sa milagrosong paagi. (Marcos 8:​1-8) Sa dihang milibot si Jesus, wala lamang niya tudloi ang kinabag-an apan mapanid-on sa ilang mga panginahanglan. (Mateo 9:​35, 36) Human sa maong paglibot, walay higayong nakapahulay si Jesus ug ang iyang mga tinun-an bisan sa pagpangaon. Ang asoy sa Bibliya nagsulti kanato: “Busa namiya sila nga diha sa sakayan paingon sa usa ka dapit nga mingaw alang sa ilang kaugalingon. Apan ang mga tawo nakakita kanila nga mibiya ug daghan ang nakahibalo niini, ug gikan sa tanang siyudad sila nanagan paingon didto ug nakauna kanila. Buweno, sa pagkawas, iyang nakita ang usa ka dakong panon sa katawhan, apan gitukmod siya sa kaluoy alang kanila, tungod kay nahisama man sila sa mga karnero nga walay pastol. Ug misugod siya pagtudlo kanila sa daghang butang.”​—Marcos 6:​31-34.

Ang nagpalihok kang Jesus dili lamang ang balatian ug kakabos sa mga tawo kondili ang ilang espirituwal nga kahimtang. Gipahimuslan lamang sila sa ilang mga lider, busa si Jesus ‘natukmod sa kaluoy alang kanila.’ Ang Gregong pulong alang sa ‘natukmod sa kaluoy’ nagpasabot “sa kinailadmang mga pagbati.” Si Jesus sa pagkatinuod usa ka mabinationg tawo!

Kahangawa Diha sa Usa ka Mapintas nga Kalibotan

Si Jesu-Kristo mao na karon ang Hari sa langitnong Gingharian ni Jehova. Sama sa iyang gibuhat sa karaang Israel, karon ang Diyos nagmando sa iyang katawhan nga may kahangawa. “‘Sila gayod mahimong mga ako,’ miingon si Jehova sa mga panon, ‘sa adlaw nga ako magpatunghag usa ka linaing kabtangan. Ug ako magpakitag kahangawa kanila.’”​—Malaquias 3:17.

Kadtong kinsa buot makadawat sa kahangawa ni Jehova kinahanglang mosundog sa iyang mga paagi. Tinuod, kita nagkinabuhi sa usa ka kalibotan diin ang mga tawo mas interesado sa pagpatunhay sa ilang estilo sa kinabuhi kay sa pagtabang niadtong nanginahanglan. Ang mga tawo nga anaa sa gahom sagad nagtinguha nga makaganansiya sa bili sa kahilwasan sa mga trabahante ug sa mga pumapalit. Sa 2 Timoteo 3:​1-4, ang Bibliya tukmang naghubit sa moral nga kahimtang sa atong panahon nga nagpapas sa kahangawa diha sa mga kasingkasing sa kadaghanan.

Sa gihapon, kita lagmit makakaplag ug mga higayon sa pagpakitag kahangawa. Ikatanyag ba nato ang pipila ka gikinahanglang tabang ngadto sa atong mga silingan? Aduna bay nasakit nga atong maduaw? Mapalipay ba nato kadtong kinsa naguol, nga nahiuyon sa tambag: “Pamulong nga mahupayon sa magul-anong mga kalag, buligi ang mga maluya”?​—1 Tesalonica 5:14.

Ang kahangawa motabang usab kanato nga malikayan ang pagsanong nga maharuson sa dihang ang uban nakahimog mga sayop. Kita gisultihan: “Kuhaa gikan kaninyo ang tanang mapangdaoton nga kayugot ug kasuko ug kapungot ug sininggitay ug maabusohong sinultihan uban sa tanang pagkadaotan. Apan magmaluloton ngadto sa usag usa, magmabination uban ang kalumo, bukas nga magapasaylo sa usag usa maingon nga ang Diyos usab pinaagi kang Kristo bukas nga mipasaylo kaninyo.”​—Efeso 4:​31, 32.

Ang kahangawa motabang kanato nga malikayan ang kiling sa pag-abuso sa gahom. Ang Bibliya nag-ingon: “Isul-ob sa inyong kaugalingon ang malumong mga pagmahal sa pagkamabination, kalulot, pagkamapaubsanon sa hunahuna, kalumo, ug hataas-nga-pailob.” (Colosas 3:12) Ang pagkamapaubsanon sa hunahuna magpaarang kanato sa pagbutang sa atong kaugalingon sa kahimtang niadtong ubos sa atong pagdumala. Ang pagkamabination naglangkit sa pagkamapaubsanon ug pagkamakataronganon inay kay lisod pahimut-an. Ang pagkaepisyente angayng dili maoy hinungdan sa pagtratar sa mga tawo ingong mga piyesa lamang sa makina. Lain pa, diha sa pamilya ang mabinationg mga bana mahinumdom nga ang ilang mga asawa maoy mas huyang nga mga sudlanan. (1 Pedro 3:7) Ang pagpalandong sa mabinationg panig-ingnan ni Jesus makatabang kanato niining tanan.

Sanglit naluoy pag-ayo si Jesus sa mga tawo sa panahon sa iyang yutan-ong ministeryo, kita makatino nga ingon usab niana ang iyang gibati sa pagkakaron, ug magpadayon nga mobating ingon niana, usa ka mabinationg Magmamando. Ang Salmo 72 nag-ingon nga matagnaon bahin kaniya: “Pahukmi kaniya ang mga sinakit sa katawhan, ipaluwas kaniya ang mga anak sa kabos, ug ipalaglag kaniya ang mga malimbongon. Ug siya makabatog mga sakop gikan sa dagat ngadto sa dagat ug gikan sa Suba ngadto sa mga kinatumyan sa yuta. Siya mobatig kaluoy sa usa nga timawa ug sa usa nga kabos, ug iyang pagaluwason ang mga kalag sa mga kabos.”​—Salmo 72:​4, 8, 13.

Ang Pulong sa Diyos nagtagna: “Pinaagi sa pagkamatarong pagahukman gayod niya ang mga timawa, ug pinaagi sa katul-id siya magabadlong gayod alang sa mga maaghop sa yuta. . . . Patyon niya ang usa nga daotan.” Human batbata kon sa unsang paagi bisan ang ubang mapintas, samag mananap nga mga tawo magbag-o sa ilang mga dalan, ang tagna nagpadayon: “Dili nila pagadaoton ni pagagub-on ang tibuok ko nga bukid nga balaan; kay ang yuta mapuno gayod sa kahibalo kang Jehova ingon sa mga tubig nga nagatabon sa dagat.” (Isaias 11:​4-9) Kining tagnaa sa pagkatinuod nagsaad ug usa ka tibuok-yutang katilingban sa mga tawong nakaila kang Jehova ug nagasundog sa iyang mabinationg mga dalan!