Nahiusa Diha sa Hingpit nga Bugkos sa Gugma

“Sa panagkauyon mahugpong diha sa gugma.”​—COLOSAS 2:2.

1, 2. Unsang makapabahin nga impluwensiya ang ilabinang nabati karong adlawa?

PAMATI Milanog ang makusog nga tingog sa tibuok kalangitan nga nagaingon: “Alaot alang sa yuta ug sa dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.” (Pinadayag 12:12) Matag labay sa tuig, kana nga mensahe dugang nga nakahatag kalisang sa mga molupyo sa yuta.

² Ang dakong kaaway ni Jehova dugay nang nailhan ingong magsusupak (Satanas) ug tigbutangbutang (Yawa). Apan kini nga limbongan karon adunay laing makahahadlok nga papel​—siya nahimong usa ka masuk-anong diyos! Ngano? Tungod kay gipalayas siya gikan sa langit ni Miguel ug sa iyang mga manulonda diha sa gubat nga misugod sa langit sa 1914. (Pinadayag 12:7-9) Ang Yawa nahibalo nga mubo na lamang ang iyang panahon aron pamatud-an ang iyang hagit nga iyang mapatalikod ang tanang mga tawo gikan sa pagsimba sa Diyos. (Job 1:11; 2:4, 5) Sanglit wala nay kaikyasan, siya ug ang iyang mga demonyo maoy samag masuk-anong panon sa mga buyog nga nagpahungaw sa ilang kasuko diha sa magubot nga masa sa katawhan.​—Isaias 57:20.

3. Unsay epekto sa pagkaubos nga kahimtang ni Satanas sa atong panahon?

³ Kining mga hitaboa, nga dili-makita sa tawhanong mga mata, maoy hinungdan kon nganong adunay dakong pagkahugno karon sa moral taliwala sa katawhan sa katibuk-an. Kini usab maoy hinungdan sa grabeng paningkamot sa mga tawo sa paghusay sa pagkabahinbahin sa mga nasod nga dili gayod makapuyo diha sa panaghiusa. Ang tribonhon ug etnikong mga grupo mapintasong nag-atakehay sa usag usa, nga miresultag minilyon nga nawad-ag mga pinuy-anan ug nakapalagiw sa mga tawo. Dili ikahibulong nga ang pagkadaotan misamot sa sukod nga wala pa mahitabo sukad! Sama sa gitagna ni Jesus, ‘ang gugma sa kadaghanan nagakabugnaw.’ Bisan asa ka motan-aw, ang kawalay-panagkauyon ug kawalay-gugma nagatimaan sa magubot nga katawhan karon.​—Mateo 24:12.

4. Nganong ilabinang nameligro ang katawhan sa Diyos?

⁴ Tungod sa kahimtang sa kalibotan, ang pag-ampo ni Jesus alang sa iyang mga sumusunod nahimong labi pang makahuloganon: “Ako nagahangyo kanimo, dili sa pagkuha kanila gikan sa kalibotan, apan sa pagbantay kanila tungod sa tuman-kadaotang usa. Sila dili bahin sa kalibotan, maingon nga ako dili bahin sa kalibotan.” (Juan 17:15, 16) Karong adlawa, “ang tuman-kadaotang usa” ilabinang nagpahungaw sa iyang kasuko batok niadtong “mga nagasunod sa sugo sa Diyos ug may buluhaton sa pagpanaksi bahin kang Jesus.” (Pinadayag 12:17) Kon wala pa ang mabinantayon ug mahigugmaong pagtagad ni Jehova, ang iyang matinumanong mga Saksi nangalaglag na unta. Ang atong mga kinabuhi nagadepende sa atong pagpahimulos sa tanang mga tagana nga gihimo sa Diyos alang sa atong espirituwal nga kaluwasan ug kaayohan. Naglangkit kana sa atong pagkugig maayo nga nahiuyon sa paglihok sa Iyang gahom pinaagi ni Kristo, sama sa giawhag sa apostol diha sa Colosas 1:29.

5, 6. Unsay gibati ni apostol Pablo bahin sa mga Kristohanon sa Colosas, ug nganong tukma ang tema nga teksto alang sa 1995?

⁵ Bisan tuod si Pablo tingali wala gayod makakita kanila nawong sa nawong, iyang gihigugma ang iyang mga igsoon sa Colosas. Iyang gisultihan sila: “Buot ko nga inyong masayran kon unsa ka dako sa akong kabalaka alang kaninyo.” (Colosas 2:1, The New Testament in Modern English, ni J. B. Phillips) Sanglit ang mga sumusunod ni Jesus dili man bahin sa kalibotan, “ang tuman-kadaotang usa” magpadayon sa pagsulay sa pagbungkag sa panaghiusa sa mga igsoon pinaagi sa pagpugas taliwala kanila sa espiritu sa kalibotan. Ang balita nga gidala ni Epafras gikan sa Colosas nagpakita nga kini ang nagakahitabo sa pipila ka paagi.

⁶ Ang usa sa dakong gikabalak-an ni Pablo sa iyang Kristohanong mga igsoon laktod nga gipadayag niining mga pulonga: “Sa panagkauyon mahugpong diha sa gugma.” Ang iyang mga pulong adunay linain nga kahulogan karong adlawa, diha sa usa ka kalibotan nga puno sa kawalay-panaghiusa ug kawalay-gugma. Kon kinasingkasing natong sundon ang tambag ni Pablo, atong matagamtam ang pag-amoma ni Jehova. Atong masinati usab ang gahom sa iyang espiritu diha sa atong kinabuhi, nga motabang kanato sa pagsukol sa mga pagpit-os sa kalibotan. Pagkamaalamon gayod niining tambaga! Busa, ang Colosas 2:2 mao ang atong tema nga teksto alang sa 1995.

7. Unsang panagkauyon ang angay makita taliwala sa matuod nga mga Kristohanon?

⁷ Diha sa nahauna nga sulat ngadto sa mga taga-Corinto, gigamit sa apostol ang tawhanong lawas ingong usa ka ilustrasyon. Siya misulat nga “kinahanglang walay panagkabahin” diha sa kongregasyon sa dinihogang mga Kristohanon kondili nga ang “mga sangkap niini magbatog samang pag-atiman alang sa usag usa.” (1 Corinto 12:12, 24, 25) Pagkamaayo nga ilustrasyon! Ang atong mga bukton ug mga tiil nagadepende sa usag usa, ang matag usa nasumpay sa ubang bahin sa atong lawas. Ang samang prinsipyo aplikado diha sa atong tibuok-yuta nga pag-ubanay sa mga igsoon, nga gilangkoban sa mga dinihogan ug sa minilyon nga naglaom nga mabuhi diha sa usa ka paraiso nga yuta. Kinahanglang dili gayod kita mobulag gikan sa lawas sa isigka-Kristohanon aron magkinaugalingon sa pagkinabuhi! Nagalihok pinaagi kang Kristo Jesus, ang espiritu sa Diyos moagos diha kanato sa dakong sukod pinaagi sa atong pagpakig-uban sa atong mga igsoon.

Panagkauyon Nalangkit sa Kahibalo

8, 9. (a) Unsang pangunang butang ang atong ikatabang sa panagkauyon sa kongregasyon? (b) Sa unsang paagi imong nakat-onan ang kahibalo bahin kang Kristo?

⁸ Ang usa sa pangunang mga punto ni Pablo mao nga ang Kristohanong panagkauyon nalangkit sa kahibalo, ilabina may kalabotan kang Kristo. Si Pablo misulat nga ang mga Kristohanon kinahanglang “sa panagkauyon mahugpong diha sa gugma ug maoy tumong ang tanang bahandi sa bug-os nga kasegurohan sa ilang pagsabot, nga maoy tumong ang tukmang kahibalo sa sagradong tinago sa Diyos, nga mao, si Kristo.” (Colosas 2:2) Kita nakabaton ug kahibalo​—mga kamatuoran—​sukad nga kita nagsugod sa pagtuon sa Pulong sa Diyos. Ingong bahin sa pagbaton sa pagsabot kon sa unsang paagi mohaom ang kadaghanan niining mga kamatuorana diha sa katuyoan sa Diyos, kita makadangat sa pagsabot sa hinungdanong papel ni Jesus. “Maampingong natakpan diha kaniya ang tanang bahandi sa kaalam ug sa kahibalo.”​—Colosas 2:3.

⁹ Mao ba kanay imong gibati bahin kang Jesus ug sa iyang papel diha sa katuyoan sa Diyos? Daghan diha sa Kakristiyanohan mohisgot dayon bahin kang Jesus, nagapangangkon nga midawat kaniya ug naluwas na. Apan nakaila ba gayod sila kaniya? Wala gayod, kay ang kadaghanan nagtuo sa dili-kasulatanhong doktrina sa Trinidad. Dili lamang nakahibalo ka sa kamatuoran bahin niini apan malagmit daghan kag nahibaloan bahin sa gipamulong ug gihimo ni Jesus. Minilyon ang natabangan niini pinaagi sa usa ka impormatibong pagtuon nga ginamit ang librong Ang Labing Bantogang Tawo nga Nabuhi Sukad. Bisan pa kinahanglang magpadayon kita sa pagpalalom pa sa atong kahibalo bahin kang Jesus ug sa iyang mga paagi.

10. Sa unsang paagi ang natakpan nga kahibalo atong mabatonan?

¹⁰ Ang mga pulong nga ang “tanang bahandi sa kaalam ug sa kahibalo” “mainampingong natakpan” diha kang Jesus wala magpasabot nga ang maong kahibalo dili gayod nato masabtan. Hinunoa, sama kini sa usa ka bukas nga mina. Dili na kinahanglang mangita pa kita diha sa dako kaayong luna nga maglibog kon asa magsugod sa pagpangalot. Kita nahibalo na​—ang tinuod nga kahibalo magsugod sa kon unsay gipadayag sa Bibliya bahin kang Jesu-Kristo. Samtang bug-os pa natong masabtan ang papel ni Jesus sa katumanan sa katuyoan ni Jehova, atong mabatonan ang mga bahandi sa matuod nga kaalam ug tukmang kahibalo. Busa kinahanglang magpadayon kita sa pagpangalot nga mas lalom pa, sa pagkuhag dugang pang mahalong mga bato o bililhong mga butang nga mabatonan gikan niining tuborana diin kita nakapangalot na.​—Proverbio 2:1-5.

11. Sa unsang paagi mapalambo nato ang atong kahibalo ug kaalam pinaagi sa pagpalandong kang Jesus? (Iilustrar sa paghugas ni Jesus sa mga tiil sa mga tinun-an, o paggamit ug laing mga pananglitan.)

¹¹ Pananglitan, tingali nahibalo na kita nga nanghugas si Jesus sa mga tiil sa iyang mga apostoles. (Juan 13:1-20) Apan, kita ba nakapamalandong bahin sa pagtulon-an nga iyang gitudlo ug sa tinamdan nga iyang gipakita? Sa pagbuhat niini, basin makakuha kita ug bahandi sa kaalam nga makaarang kanato​—oo, mopalihok kanato​—sa pagbag-o sa atong pagpakiglabot sa atong igsoong lalaki o babaye kansang personalidad dugay nang nakapikal kanato. O sa dihang hatagan ug asaynment nga wala kaayo kita makaangay, mahimong lahi ang atong pagsanong sa dihang atong masabtan ang bug-os nga kahulogan sa Juan 13:14, 15. Ingon niana ang epekto sa kahibalo ug kaalam diha kanato. Unsa kahay epekto diha sa uban samtang dugang natong ipahiuyon ang atong kaugalingon sa nagauswag nga kahibalo bahin kang Kristo? Malagmit ang panon ‘labaw pang mahugpong sa panagkauyon diha sa gugma.’a

Kasamok Makadaot sa Panagkauyon

12. Mahitungod sa unsang kahibalo nga kita kinahanglang magbantay?

¹² Kon ang tukmang kahibalo makapasayon sa atong ‘pagkahugpong sa panagkauyon diha sa gugma,’ unsay mosangpot nianang “bakak nga gitawag nga ‘kahibalo’”? Ang kaatbang​—panagbangi, panag-away, ug pagtipas gikan sa pagtuo. Busa kinahanglang magbantay kita batok sa maong bakak nga kahibalo, sama sa gipasidaan ni Pablo kang Timoteo. (1 Timoteo 6:20, 21) Si Pablo misulat usab: “Nagasulti ako niini aron walay tawo nga molingla kaninyo pinaagi ug makapaagning mga argumento. Pagbantay kamo: basin ug adunay modagit kaninyo pinaagi sa pilosopiya ug walay-pulos nga panglimbong sumala sa tradisyon sa mga tawo, sumala sa paninugdang mga butang sa kalibotan ug dili sumala kang Kristo.”​—Colosas 2:4, 8.

13, 14. (a) Nganong ang mga igsoon sa Colosas nameligro may kalabotan sa kahibalo? (b) Nganong ang pipila karong adlawa mibati nga sila wala nianang kapeligrohana?

¹³ Ang mga Kristohanon sa Colosas gilibotan sa malalangong impluwensiya nga sa pagkatinuod maoy bakak nga gitawag nga kahibalo. Daghang tawo sa palibot sa Colosas dako kaayog pagtamod sa Gregong mga pilosopiya. Dihay mga magtutuo usab sa Hudaismo kinsa nagtinguha nga sundon sa mga Kristohanon ang Moisesnong Kasugoan, sama sa mga adlaw sa piyesta ug sa mga kinahanglanon niini bahin sa pagkaon. (Colosas 2:11, 16, 17) Si Pablo dili supak nga magbaton ug tukmang kahibalo ang iyang mga igsoon, apan kinahanglang magbantay sila nga walay usa ang makadala kanila ingong bihag, ginamit ang makapaagning mga argumento sa pagkombinsir kanila sa pagbaton ug yanong tawhanong panglantaw sa kinabuhi ug mga lihok. Imong masabtan nga kon adunay pipila diha sa kongregasyon nga magpadala sa ilang kaisipan ug mga desisyon niining dili-kasulatanhong mga hunahuna ug mga tinamdan sa kinabuhi, kini makadaot sa panagkauyon ug gugma tali sa mga sakop sa kongregasyon.

¹⁴ ‘Oo,’ tingali maghunahuna ka, ‘nakita ko ang kapeligrohang giatubang sa mga taga-Colosas, apan walay kapeligrohang maimpluwensiyahan ako sa Gregong mga panghunahuna, sama nianang kalag nga dili-mamatay o tulo ka diyos sa usa ka persona; ni nakita ko nga adunay kapeligrohang madani sa paganong mga selebrasyon sa bakak nga relihiyon diin ako nakaikyas.’ Maayo kaayo. Maayo nga hugot ang imong pagtuo bahin sa pagkalabaw sa paninugdang kamatuoran nga gipadayag pinaagi kang Jesus ug nga mabatonan diha sa Kasulatan. Hinunoa, mahimo kaha nga kita nameligro gikan sa ubang mga pilosopiya o tawhanong mga hunahuna nga kaylap nga gituohan karong adlawa?

15, 16. Unsang tinamdan sa kinabuhi nga tingalig makaapekto sa panghunahuna sa usa ka Kristohanon?

¹⁵ Ang usa sa maong tinamdan dugay nang naglungtad: “Hain na karon ang saad sa iyang pag-abot? Nangamatay na lang ang atong katigulangan, apan nagpadayon ang tanang butang sumala sa naandan.” (2 Pedro 3:4, The New English Bible) Kana nga pagbati mahimong ikapahayag sa laing mga pulong, apan ang panglantaw mao ra gihapon. Pananglitan, tingalig may mangatarongan, ‘Sa panahong akong unang nakat-onan ang kamatuoran sa daghan nang katuigang nanglabay, ang kataposan “duol na kaayo.” Apan wala gihapon kini moabot, ug kinsa bay nasayod kon kanus-a kini moabot?’ Tinuod, walay tawo ang nahibalo kon kanus-a moabot ang kataposan. Apan, matikdi ang hunahuna nga giawhag ni Jesus nga pagabatonan: “Padayon sa pagtan-aw, padayon sa pagtukaw, kay wala kamo mahibalo kon kanus-a ang tinudlong panahon.”​—Marcos 13:32, 33.

¹⁶ Pagkapeligrosong magbaton ug hunahuna nga, kay wala mahibalo kon kanus-a moabot ang kataposan, magplano kita alang sa usa ka tugob “normal” nga kinabuhi! Kana nga paagi mabanaag sa pangatarongang, ‘Mas maayo pang mohimo akog mga lakang nga magtugot kanako (o sa akong mga anak) sa pagbaton ug halangdong karera nga dakog suweldo ug makahimo kanako sa pagtagamtam ug usa ka haruhay nga kinabuhi. Siyempre, motambong ako sa Kristohanong mga tigom ug makigbahin sa pagsangyaw nga buluhaton, apan walay katarongan nga maghago pa ako o maghimog dagkong mga pagsakripisyo.’​—Mateo 24:38-42.

17, 18. Unsang panghunahuna ang giawhag ni Jesus ug sa mga apostoles nga atong batonan?

¹⁷ Apan, dili ikalimod nga si Jesus ug ang iyang mga apostoles nagsugyot nga magkinabuhi kita nga mobating dinalian nga mawali ang maayong balita, nga kita maningkamot ug andam sa paghimog mga pagsakripisyo. Si Pablo misulat: “Moingon ako niini, mga igsoon, ang panahong nabilin mubo na. Sukad karon kadtong mga may asawa magpakaingon nga sila daw wala, . . . ug usab kadtong mga nanagpamalit magpakaingon kanilang wala magapanag-iya, ug kadtong nagagamit sa kalibotan ingon kanilang wala magagamit niini sa bug-os; kay ang talan-awon niining kalibotana nagakausab.”​—1 Corinto 7:29-31; Lucas 13:23, 24; Filipos 3:13-15; Colosas 1:29; 1 Timoteo 4:10; 2 Timoteo 2:4; Pinadayag 22:20.

¹⁸ Halayo nga nagsugyot nga himoon natong tumong ang haruhay nga kinabuhi, si Pablo misulat ubos sa pagdasig: “Wala kitay gidalang bisan unsa nganhi sa kalibotan, ug ni kita makadala ug bisan unsa pagawas. Busa, nga may makaon ug ikasapot, kita makontento na niining mga butanga. . . . Bugnoa ang maayong bugno sa pagtuo, panggunit nga hugot sa kinabuhing walay-kataposan nga alang niini ikaw gitawag ug ikaw mitanyag sa maayong pagpahayag sa dayag atubangan sa daghang saksi.”​—1 Timoteo 6:7-12.

19. Sa unsang paagi maapektohan ang kongregasyon sa dihang kadtong sakop niana modawat sa panghunahuna sa kinabuhi nga gidasig ni Jesus?

¹⁹ Kon ang kongregasyon pagalangkoban ug madasigong mga Kristohanon nga masingkamoton kaayo sa ‘pagtanyag ug maayong pagpahayag sa dayag,’ ang panagkauyon natural nga mosangpot. Sila dili magpadala sa tinamdang, ‘Aduna kay daghang maayong mga butang nga natigom sa daghang katuigan; pagpahayahay, kaon, inom, paglipay sa imong kaugalingon.’ (Lucas 12:19) Hinunoa, sila nahiusa sa samang paningkamot, andam sa paghimog mga pagsakripisyo aron makabaton ug bug-os nga bahin kutob sa mahimo diha niining dili na masubli nga buluhaton.​—Itandi ang Filipos 1:27, 28.

Pagbantay Batok sa Makapaagning mga Argumento

20. Unsang laing dapit nga basin mahisalaag ang mga Kristohanon?

²⁰ Sa pagkamatuod, adunay ubang mga paagi diin ang mga Kristohanon basin ‘malingla sa makapaagning mga argumento’ o walay-pulos nga mga panglimbong nga makabalda sa ‘pagkahimong nahugpong sa panagkauyon diha sa gugma.’ Ang sangang buhatan sa Watch Tower Society sa Alemanya misulat: “Usa ka kaso miresultag panagbangi, ang mga magmamantala ug bisan ang mga ansiano nagdapigdapig bahin sa mga matang sa tambal nga gigamit sa usa ka igsoon.” Sila midugang: “Tungod sa nagkalainlaing mga paaging gigamit ug sa kadaghan sa mga pasyente, kini nahimong usa ka kontrobersiyal nga butang ug, kon ang mga paagi sa pagtambal may pagka-espiritismo, mahimong peligroso usab kini.”​—Efeso 6:12.

21. Sa unsang paagi mawad-an ang Kristohanon sa hustong pagsentro sa pagtagad karong adlawa?

²¹ Ang mga Kristohanon buot nga magpabiling buhi ug mahimsog aron sila makasimba sa Diyos. Bisan pa, niini nga sistema kita matigulang ug masakit gayod nga maoy resulta sa pagkadili-hingpit. Imbes ipasiugda ang mga isyu sa panglawas, angay natong isentro ang atong pagtagad sa tinuod nga sulbad, alang kanato ug sa uban. (1 Timoteo 4:16) Si Kristo mao ang dugokan sa mao nga sulbad, maingon nga siya ang sentro sa tambag ni Pablo ngadto sa mga taga-Colosas. Apan hinumdomi, si Pablo nagpakita nga ang uban tingali adunay “makapaagning mga argumento” nga magpalayo sa atong pagtagad gikan kang Kristo, tingali ngadto sa mga paagi sa paghiling, mga pagtambal, o mga diyeta.​—Colosas 2:2-4.

22. Unsang timbang nga tinamdan ang angay natong batonan kon bahin sa daghang pangangkon mahitungod sa mga paagi sa paghiling ug pagtambal?

²² Ang mga tawo sa tibuok kalibotan ginabombahan sa mga paanunsiyo ug mga pamatuod bahin sa tanang matang sa mga pagtambal ug mga paagi sa paghiling. Ang pipila niini kaylap nga gigamit ug giila; ang uban kaylap nga gisaway o gidudahan.b Ang matag tawo ang responsable sa paghukom kon unsay iyang himoon bahin sa iyang panglawas. Apan kadtong kinsa nagadawat sa tambag ni Pablo nga makita diha sa Colosas 2:4, 8 mapanalipdan batok sa pagkalingla sa “makapaagning mga argumento” o “walay-pulos nga mga panglimbong” nga nagapahisalaag sa daghan kinsa, kay nakulangan sa paglaom sa Gingharian, desperado ug kahupayan. Bisag makombinsir ang usa ka Kristohanon nga ang usa ka pagtambal daw maayo alang kaniya, dili niya angay nga iduso kini diha sa Kristohanong panag-igsoonay, kay mahimo unya kining ulohan sa kaylap nga diskusyon ug panaglalis. Sa ingon iyang mapadayag nga iyang gitahod pag-ayo ang bili sa panagkauyon sa kongregasyon.

23. Nganong kita ilabinang may katarongan sa pagkalipay?

²³ Gipasiugda ni Pablo nga ang Kristohanong panagkauyon maoy usa ka basehanan sa tinuod nga kalipay. Tino nga mas diyutay ang gidaghanon sa mga kongregasyon sa iyang panahon kay sa karon. Bisan pa siya nakasulat sa mga taga-Colosas: “Bisan tuod ako wala diha sa unod, sa gihapon ako uban kaninyo diha sa espiritu, nga nagamaya ug nagatan-aw sa inyong kahapsay ug sa kalig-on sa inyong pagtuo kang Kristo.” (Colosas 2:5; tan-awa usab ang Colosas 3:14.) Pagkadako sa atong katarongan sa pagkalipay! Kita makahimo sa pagkakita sa tinuod nga ebidensiya sa panagkauyon, maayong kahusay, ug kalig-on sa pagtuo diha sa atong kaugalingong kongregasyon, nga nagabanaag sa katibuk-ang kahimtang sa katawhan sa Diyos sa tibuok yuta. Busa sa mubo nga panahong nahibilin sa presente nga sistema, pasagdi nga ang matag usa kanato magmadeterminado nga ‘mahugpong sa panagkauyon diha sa gugma.’

[Footnote]

Nakatimaan Ka Ba?

◻ Unsa ang tinuig nga teksto sa mga Saksi ni Jehova alang sa 1995?

◻ Nganong ang mga Kristohanon sa Colosas kinahanglang mahugpong sa panagkauyon diha sa gugma, ug nganong kita usab karon maingon niana?

◻ Unsang mabitikong panglantaw sa kinabuhi nga ilabinang magbantay ang mga Kristohanon karong adlawa?

◻ Nganong ang mga Kristohanon kinahanglang magmaigmat nga dili mapahisalaag sa makapaagning mga argumento labot sa panglawas ug mga paagi sa paghiling?

[Mga hulagway sa panid 17]

Ang imo bang mga plano sa umaabot nahasentro diha sa presensiya ni Jesus?