Pagpangita sa Bahandi nga “Maampingong Natago Diha Kaniya”
“Maampingong natago diha kaniya ang tanang bahandi sa kaalam ug kahibalo.”—COL. 2:3.
1, 2. (a) Unsay nadiskobrehan niadtong 1922, ug asa na kini karon? (b) Unsang pagdapit ang makita diha sa Bibliya?
ANG pagkakaplag ug natagong mga bahandi sagad nahimong ulohang mga balita. Pananglitan, niadtong 1922, human ang daghang tuig nga paghago ilalom sa lisod nga mga kahimtang, ang Britanikong arkeologo nga si Howard Carter nakahimog talagsaong kaplag. Iyang nakita ang halos tibuok pa nga harianong lubnganan ni Paraon Tutankhamen, nga nasudlan ug halos 5,000 ka mahalong mga butang.
2 Bisan tuod talagsaon ang nakaplagan ni Carter, ang kadaghanan niini anaa lang sa mga museyo o sa pribadong mga koleksiyon. Bililhon tingali kini sa kasaysayan o sa arte, apan kini gamay ra o walay epekto sa atong adlaw-adlawng kinabuhi. Hinunoa, ang Pulong sa Diyos nagdapit kanato sa pagpangitag bahandi nga tinuod gayong makaapektar kanato. Ang tanan gidapit, ug ang ganti niini labaw pa gayod kay sa bisan unsang materyal nga bahandi.—Basaha ang Proverbio 2:1-6.
3. Sa unsang mga paagi mapuslanon ang bahandi nga giawhag ni Jehova nga pangitaon sa iyang mga magsisimba?
3 Tagda ang bili sa bahandi nga giawhag ni Jehova nga pangitaon sa iyang mga magsisimba. Lakip niana nga bahandi mao “ang kahadlok kang Jehova,” nga makapanalipod kanato niining peligrosong mga panahon. (Sal. 19:9) Ang pagkakaplag sa “mismong kahibalo sa Diyos” mahimong motultol sa kinadak-ang pasidungog nga mabatonan ni bisan kinsang tawo—ang suod nga relasyon uban sa Labing Hataas. Ug pinaagi sa bahandi sa hinatag-sa-Diyos nga kaalam, kahibalo, ug pagsabot, kita malamposong makasagubang sa mga problema ug kabalaka sa atong adlaw-adlawng pagkinabuhi. (Prov. 9:10, 11) Sa unsang paagi atong makaplagan kanang bililhong bahandi?
Pagpangitag Espirituwal nga mga Bahandi
4. Sa unsang paagi atong makaplagan ang bahandi nga gisaad sa Diyos?
4 Dili sama sa mga arkeologo ug sa ubang mga eksplorador nga sagad mangadto sa lagyong mga lugar aron sa pagpangitag bahandi, kita nahibalo gayod kon asa makita ang espirituwal nga mga bahandi. Ang Pulong sa Diyos, nga samag usa ka mapa, motultol kanato sa eksaktong lugar diin atong makita ang bahandi nga gisaad sa Diyos. Naghisgot bahin kang Kristo, si apostol Pablo misulat: “Maampingong natago diha kaniya ang tanang bahandi sa kaalam ug kahibalo.” (Col. 2:3) Samtang nagbasa kita nianang mga pulonga, kita tingali makapangutana: ‘Nganong kinahanglan mang pangitaon ang maong bahandi? Sa unsang paagi kana “natago diha” kang Kristo? Unsaon nato kana pagpangita?’ Aron masayran ang tubag, atong susihon ang gipamulong ni apostol Pablo.
5. Nganong si Pablo nagsulat bahin sa espirituwal nga bahandi?
5 Gisulat ni Pablo kanang mga pulonga sa mga Kristohanon sa Colosas. Gisultihan niya sila nga siya nakigbisog alang kanila aron “ang ilang mga kasingkasing mahupay [ug] aron sila may panag-uyon nga mahugpong diha sa gugma.” (Basaha ang Colosas 2:1, 2.) Nganong nabalaka man siya pag-ayo? Dayag nga si Pablo nahibalo nga ang mga igsoon didto lagmit naimpluwensiyahan sa pipila diha sa ilang taliwala nga nagpasiugdag Gregong mga pilosopiya o nangusog nga sundon ang Balaod ni Moises. Siya kusganong nagpasidaan sa mga igsoon: “Pagbantay kamo: basin adunay modagit kaninyo pinaagi sa pilosopiya ug walay-pulos nga panglimbong sumala sa tradisyon sa mga tawo, sumala sa paninugdang mga butang sa kalibotan ug dili sumala kang Kristo.”—Col. 2:8.
6. Nganong angay kitang mainteres sa tambag ni Pablo?
6 Karong adlawa, kita usab nag-atubang ug susamang mga impluwensiya gikan kang Satanas ug sa iyang daotang sistema. Ang kalibotanong pilosopiya, lakip na ang teoriya sa ebolusyon, nag-umol sa panghunahuna, moralidad, tumong, ug estilo sa kinabuhi sa mga tawo. Ang bakak nga relihiyon adunay dakong papel diha sa daghang popular nga mga selebrasyon. Daghang salida sa telebisyon ug sa sine, musika, ug uban pang matang sa kalingawan ang gidisenyo aron sa pagtagbaw sa daotang mga tinguha sa unod, ug kadaghanan sa makita diha sa Internet delikado gayod sa mga bata ug tigulang. Ang kanunayng pagkaladlad niini ug sa ubang mga uso sa kalibotan daling makaimpluwensiya sa atong pagbati ug tinamdan sa giya nga gitagana ni Jehova, nga tungod niana molugak ang atong paghawid sa tinuod nga kinabuhi. (Basaha ang 1 Timoteo 6:17-19.) Tataw nga kita kinahanglang makasabot sa tambag ni Pablo sa mga taga-Colosas ug ipadapat kana kon dili nato buot nga malit-agan ni Satanas.
7. Unsa ang duha ka butang nga gisulti ni Pablo nga motabang sa mga taga-Colosas?
7 Kon atong balikan ang gipamulong ni Pablo sa mga taga-Colosas, atong mamatikdan nga human niya masulti ang iyang kabalaka, siya naghisgot ug duha ka butang nga motabang kanila nga mahupayan ug magkahiusa sa gugma. Una, siya naghisgot sa “bug-os nga pagsalig sa ilang pagsabot.” Kinahanglan nga sila kombinsido gayod nga tukma ang ilang pagsabot sa Kasulatan, aron ang ilang pagtuo mapasukad sa lig-ong patukoranan. (Heb. 11:1) Dayon, siya naghisgot sa “tukmang kahibalo sa sagradong tinago sa Diyos.” Dili igo ang pagbaton lamang ug paninugdang kahibalo sa kamatuoran. Kinahanglan usab nilang mabatonan ang tin-awng pagsabot sa mas lawom nga mga butang sa Diyos. (Heb. 5:13, 14) Maayo gayod kana nga tambag alang sa mga taga-Colosas ug alang kanato karon! Apan, sa unsang paagi atong mabatonan ang maong pasalig ug ang tukmang kahibalo? Si Pablo nagtubag niana diha sa iyang pahayag bahin kang Jesu-Kristo: “Maampingong natago diha kaniya ang tanang bahandi sa kaalam ug kahibalo.”
Bahandi nga “Natago Diha” Kang Kristo
8. Ipatin-aw ang kahulogan sa terminong “natago diha” kang Kristo.
8 Ang pag-ingon nga ang tanang bahandi sa kaalam ug kahibalo “natago diha” kang Kristo wala magpasabot nga imposible kining mabatonan. Hinunoa, kini nagpasabot nga aron makaplagan ang bahandi, kita kinahanglang maningkamot pag-ayo, ug ang atong pagtagad angayng isentro kang Jesu-Kristo. Nahiuyon kini sa gisulti ni Jesus bahin sa iyang kaugalingon: “Ako ang dalan ug ang kamatuoran ug ang kinabuhi. Walay makaadto sa Amahan kon dili pinaagi kanako.” (Juan 14:6) Oo, aron atong mabatonan ang kahibalo sa Diyos, kinahanglan nga atong pahimuslan ang tabang ug giya nga gitagana ni Jesus.
9. Unsa nga mga papel ang gihatag kang Jesus?
9 Gawas pa sa pagkahimong “dalan,” si Jesus miingon nga siya “ang kamatuoran ug ang kinabuhi.” Kini nagpakita nga ang iyang papel dili lamang ang pagkahimong paagi sa pagduol sa Amahan. May mga papel usab si Jesus nga hinungdanon sa pagsabot sa kamatuoran sa Bibliya ug sa pagbaton ug kinabuhing walay kataposan. Tataw nga natago diha kang Jesus ang bililhon kaayong espirituwal nga bahandi, nga naghulat nga makaplagan sa maampingong nagatuon sa Bibliya. Atong susihon ang pipila sa mga bahandi nga direktang nag-apektar sa atong kaugmaon ug sa atong relasyon sa Diyos.
10. Unsay atong makat-onan bahin kang Jesus sa Colosas 1:19 ug 2:9?
10 “Diha kaniya nga ang tibuok kabug-osan sa hiyas sa Diyos nagapuyo nga lawasnon.” (Col. 1:19; 2:9) Kay nakauban ang iyang langitnong Amahan sulod sa dugayng panahon, si Jesus lamang ang bug-os nga nahibalo sa personalidad ug kabubut-on sa Diyos. Sa tibuok niyang yutan-ong ministeryo, gitudlo ni Jesus sa mga tawo ang gitudlo ni Jehova kaniya ug nadayag usab sa iyang mga lihok ang mga hiyas nga iyang nakat-onan gikan sa iyang Amahan. Mao nay hinungdan nga si Jesus nakaingon: “Siya nga nakakita kanako nakakita usab sa Amahan.” (Juan 14:9) Ang tanang kaalam ug kahibalo sa Diyos natago, o anaa, kang Kristo, ug wala nay mas maayong paagi pa alang kanato sa pagkat-on bahin kang Jehova kay sa maampingong pagtuon kutob sa atong mahimo bahin kang Jesus.
11. Unsay kalabotan ni Jesus sa mga tagna sa Bibliya?
11 “Ang pagpamatuod bahin kang Jesus maoy nagdasig sa pagpanagna.” (Pin. 19:10) Kanang mga pulonga nagpaila nga si Jesus mao ang pangunang persona diha sa katumanan sa daghang tagna sa Bibliya. Sukad sa unang tagna nga gilitok ni Jehova, nga nasulat sa Genesis 3:15, hangtod sa mahimayaong mga panan-awon sa basahon sa Pinadayag, ang mga tagna sa Bibliya tukmang masabtan lamang kon tagdon ang papel ni Jesus may kalabotan sa Mesiyanikong Gingharian. Mao nay rason kon nganong daghan sa mga tagna sa Hebreohanong Kasulatan ang dili masabtan niadtong wala modawat kang Jesus ingong gisaad nga Mesiyas. Mao usab kanay rason kon nganong si Jesus giisip lamang ingong bantogang tawo niadtong wala magpabili sa Hebreohanong Kasulatan, nga naundag daghang tagna bahin sa Mesiyas. Ang kahibalo bahin kang Jesus nagtabang sa katawhan sa Diyos sa pagsabot sa kahulogan sa mga tagna sa Bibliya nga pagatumanon pa.—2 Cor. 1:20.
12, 13. (a) Sa unsang paagi si Jesus mao “ang kahayag sa kalibotan”? (b) Human mahigawas sa bakak nga relihiyon, unsa ang obligasyon sa mga sumusunod ni Kristo?
12 “Ako mao ang kahayag sa kalibotan.” (Basaha ang Juan 8:12; 9:5.) Sa wala pa matawo si Jesus, si Isaias nagtagna: “Ang katawhan nga naglakaw sa kangitngit nakakita ug dakong kahayag. Kon bahin niadtong mga nagapuyo sa yuta sa mabagang kangiob, ang kahayag mismo misidlak diha kanila.” (Isa. 9:2) Ang apostol nga si Mateo nagpatin-aw nga gituman ni Jesus kanang tagnaa sa dihang Siya nagsugod sa pagsangyaw nga nag-ingon: “Paghinulsol kamo, kay ang gingharian sa mga langit haduol na.” (Mat. 4:16, 17) Ang ministeryo ni Jesus nagdalag espirituwal nga kalamdagan ug kagawasan sa katawhan gikan sa pagkaulipon sa mga pagtulon-an sa bakak nga relihiyon. “Ako mianhi ingon nga kahayag sa kalibotan,” miingon si Jesus, “aron nga ang matag usa nga magbutang ug pagtuo kanako dili magpabilin sa kangitngit.”—Juan 1:3-5; 12:46.
13 Daghang tuig sa ulahi, giingnan ni apostol Pablo ang iyang mga isigka-Kristohanon: “Kanhi kamo kangitngit, apan karon kamo kahayag na labot sa Ginoo. Magpadayon sa paglakaw ingon nga mga anak sa kahayag.” (Efe. 5:8) Kay nahigawas na sa pagkaulipon sa espirituwal nga kangitngit, ang mga Kristohanon obligadong molakaw ingong mga anak sa kahayag. Kini nahiuyon sa gisulti ni Jesus sa iyang mga tinun-an sa Wali sa Bukid: “Palamdaga ang inyong kahayag atubangan sa mga tawo, aron ilang makita ang inyong maayong mga buhat ug maghimaya sa inyong Amahan nga anaa sa mga langit.” (Mat. 5:16) Imo bang gipabilhan pag-ayo ang espirituwal nga bahandi nga imong nakaplagan diha kang Jesus, nga imo usab kining irekomendar sa uban pinaagi sa pagpakigsulti kanila ug sa imong maayong Kristohanong panggawi?
14, 15. (a) Sa unsang paagi ang mga karnero ug ang ubang mga hayop nahimong bahin sa matuod nga pagsimba sa panahon sa Bibliya? (b) Nganong si Jesus nahimong di-hitupngang bahandi sa iyang papel ingong “Kordero sa Diyos”?
14 Si Jesus mao “ang Kordero sa Diyos.” (Juan 1:29, 36) Sa tibuok Bibliya, ang mga karnero gigamit alang sa kapasayloan sa sala ug sa pagduol sa Diyos. Pananglitan, human mapasundayag ni Abraham nga andam siya sa paghalad sa iyang anak nga si Isaac, siya giingnan nga dili patyon si Isaac ug siya gihatagan ug usa ka laking karnero ingong kapuli. (Gen. 22:12, 13) Sa dihang ang mga Israelinhon nakagawas sa Ehipto, ang karnero nagdula usab ug hinungdanong papel, nianang tungora ingong bahin sa “paskuwa ni Jehova.” (Ex. 12:1-13) Dugang pa, ang Balaod ni Moises nagtugot sa paghalad sa lainlaing hayop, lakip na ang mga karnero ug kanding.—Ex. 29:38-42; Lev. 5:6, 7.
15 Wala niadtong mga halara—sa pagkatinuod, walay halad nga himoon sa tawo—ang makahatag ug permanenteng kagawasan gikan sa sala ug kamatayon. (Heb. 10:1-4) Si Jesus, sa laing bahin, mao “ang Kordero sa Diyos nga magakuha sa sala sa kalibotan.” Tungod niini, mas bililhon pa si Jesus kay sa bisan unsang materyal nga bahandi nga nakaplagan sukad masukad. Busa, maayong maggahin kita ug panahon aron sa pagtuon pag-ayo bahin sa lukat ug magpakitag pagtuo nianang kahibulongang tagana sa Diyos. Kon ato kanang himoon, kita may paglaom nga modawat ug usa ka dakong panalangin ug ganti—himaya ug dungog uban ni Kristo sa langit alang sa “gamayng panon” ug kinabuhing dayon sa Paraiso sa yuta alang sa “ubang mga karnero.”—Luc. 12:32; Juan 6:40, 47; 10:16.
16, 17. Nganong hinungdanon nga atong masabtan ang papel ni Jesus ingong “Pangulong Ahente ug Maghihingpit sa atong pagtuo”?
16 Si Jesus mao “ang Pangulong Ahente ug Maghihingpit sa atong pagtuo.” (Basaha ang Hebreohanon 12:1, 2.) Sa Hebreohanon kapitulo 11, atong mabasa ang makapadasig nga paghisgot ni Pablo bahin sa pagtuo, nga naghatag sa laktod nga kahulogan niini ug naglakip sa listahan sa sulondang mga lalaki ug babaye nga nagpasundayag ug pagtuo sama ni Noe, Abraham, Sara, ug Rahab. Tungod niini si Pablo nag-awhag sa iyang mga isigka-Kristohanon nga “tutokan ang Pangulong Ahente ug Maghihingpit sa atong pagtuo, si Jesus.” Ngano?
17 Ang matinumanong mga lalaki ug babaye nga narekord sa Hebreohanon kapitulo 11 may lig-ong pagtuo sa saad sa Diyos, apan wala sila mahibalo sa tanang detalye kon unsaon pagtuman sa Diyos ang iyang saad pinaagi sa Mesiyas ug sa Gingharian. Gani, bisan kadtong gigamit ni Jehova sa pagsulat sa daghang tagna bahin sa Mesiyas wala makasabot sa bug-os kon unsa ka hinungdanon ang ilang gisulat. (1 Ped. 1:10-12) Pinaagi lamang kang Jesus nga mahingpit, o mabug-os ang pagtuo. Hinungdanon gayod nga tin-aw natong masabtan ug maila ang papel ni Jesus ingong “Pangulong Ahente ug Maghihingpit sa atong pagtuo”!
Padayon sa Pagpangita
18, 19. (a) Unsa pang espirituwal nga mga bahandi ang natago diha kang Kristo? (b) Nganong angay kitang magpadayon sa pagpangitag espirituwal nga bahandi diha kang Jesus?
18 Atong nahisgotan ang pipila lamang sa hinungdanong mga papel ni Jesus sa katuyoan sa Diyos alang sa kaluwasan sa katawhan. Duna pay ubang espirituwal nga bahandi nga natago diha kang Kristo. Ang pagkakaplag niana maghatag kanatog kalipay ug mga kaayohan. Pananglitan, si apostol Pedro nagtawag kang Jesus ingong “Pangulong Ahente sa kinabuhi” ug “bituon sa adlaw” nga mosubang. (Buh. 3:15; 5:31; 2 Ped. 1:19) Ug ang Bibliya nagpadapat sa pulong “Amen” kang Jesus. (Pin. 3:14) Nahibalo ka ba sa kahulogan ug kahinungdanon nianang mga papela? Sama sa giingon ni Jesus: “Padayon sa pagpangayo, ug igahatag kini kaninyo.”—Mat. 7:7.
19 Sa tibuok kasaysayan, walay lain nga sama kang Jesus, kansang papel makahuloganon kaayo ug dakog kalabotan sa atong dumalayong kaayohan. Diha kaniya, ang espirituwal nga bahandi daling makaplagan ni bisan kinsa nga bug-os kasingkasing nga mangita niana. Hinaot nga ikaw magmalipayon ug panalanginan sa imong pagpangita sa bahandi nga “maampingong natago diha kaniya.”
Nahinumdom Ka Ba?
• Unsang matanga sa bahandi ang angayng pangitaon sa mga Kristohanon?
• Nganong ang tambag ni Pablo alang sa mga taga-Colosas haom gihapon alang kanato karon?
• Hisgoti ug ipatin-aw ang pipila sa espirituwal nga bahandi nga “natago diha” kang Kristo.
[Mga hulagway sa panid 5]
Ang Bibliya samag usa ka mapa nga nagtultol kanato sa bahandi nga “maampingong natago diha” kang Kristo