May Gidasig Ka ba sa Dili pa Dugay?
SI Elena 17 anyos pa sa dihang nadiskobrehan sa mga doktor nga siya may kanser sa obaryo. Ang iyang inahan, si Mari, kinahanglang mosagubang sa kabalaka sa pagtan-aw kang Elena nga nag-antos sa hilabihang kaul-ol.
Sa ulahi, si Elena gibalhin ngadto sa usa ka ospital sa Madrid, sa Espanya, 1,900 kilometros gikan sa iyang pinuy-anan sa Canary Islands. Sa Madrid usa ka tem sa mga doktor ang andam nga modisdis nga walay dugo. (Buhat 15:28, 29) Apan wala magdugay human sugdi ang pagdisdis, nadayag nga kritikal ang kahimtang ni Elena. Ang kanser milukop na sa tibuok niyang lawas, ug walay mahimo ang mga siruhano. Si Elena namatay walo ka adlaw sukad sa pag-abot sa Madrid.
Si Mari wala mag-inusara sa pag-atubang nianang grabeng hitabo. Sa ilang kaugalingong gasto, duha ka Kristohanong ansiano ang miuban kaniya ug sa iyang kamagulangang anak nga lalaki ngadto sa Madrid ug nagpabilin didto hangtod sa kamatayon ni Elena. “Gitabangan nila ako nga antoson ang hilabihang kasubo nga akong gibati,” matud ni Mari. “Dili ko gayod kalimtan ang pagdasig nga ilang gihatag kanako. Bililhon uyamot ang ilang espirituwal nga pagpaluyo ug praktikal nga tabang. Sila maoy tinuod nga ‘tagoanan gikan sa hangin.’”—Isaias 32:1, 2.
Si Jehova nalipay nga ang mahigugmaong mga magbalantay nga sama niini nila nagaatiman sa iyang mga karnero nga may kalumo. (Proverbio 19:17; 1 Pedro 5:2-4) Ang paghatag ug pagdasig, hinunoa, dili lamang pribilehiyo sa mga ansiano. Ang tanang Kristohanon makigtigom aron makadawat ug espirituwal nga pagtudlo ug sa ‘pagdasig sa usag usa.’ (Hebreohanon 10:24, 25) Ang pagdinasigay maoy usa ka kinaiyanhong bahin sa Kristohanong kapunongan.
Unsay Nalangkit sa Pagdasig?
Sama nga ang matahom nga bulak moluyloy kon hikawan sa tubig, ingon man ang mga indibiduwal—diha sa pamilya ug diha sa kongregasyon—maluya tungod sa kakulang ug pagdasig. Sa laing bahin, ang tukma sa panahong pagdasig makapalig-on niadtong nagaatubang sa pagsulay, makapasadya sa mga naguol, ug makapalagsik niadtong nagaalagad nga matinumanon sa Diyos.
Ang Gregong pulong gihubad nga “pagdasig” nagalakip sa ideya sa paghupay, pagtambag, ug paglipay. Busa, ang pagdasig dili lang kay sultihan ang usa nga siya maayog nahimo. Kini mahimong naglangkit usab sa pagtaganag praktikal nga ayuda ug espirituwal nga tabang.
Sa pagkatinuod, ang Gregong pulong gihubad nga “pagdasig” sa literal nagkahulogang “pagdapit nga maanaa sa presensiya sa usa.” Ang paglakaw nga magkauban sa atong espirituwal nga mga igsoong lalaki ug babaye makaarang kanato sa paghatag ug dihadihang pagpaluyo kon usa kanila kapuyan o mapandol. (Ecclesiastes 4:9, 10) Makaiikag, ang katawhan ni Jehova “nagaalagad kaniya abaga por abaga.” (Sofonias 3:9) Ug si apostol Pablo nagtawag sa usa ka Kristohanon nga usa ka “tiunay nga kayugo.” (Filipos 4:3) Ang pagbuhat nga magkauban ubos sa samang yugo pinaagi sa pag-alagad nga abaga por abaga makapagaan sa luwan, ilabina alang niadtong dili malig-on sa espirituwal.—Itandi ang Mateo 11:29.
Sila Mihatag ug Pagdasig
Sanglit ang pagdasig hinungdanon kaayo, tagdon nato ang pipila ka mga panig-ingnan sa Kasulatan bahin niini. Sa dihang talitapos na ang kinabuhi sa manalagna sa Diyos nga si Moises, gitudlo ni Jehova si Josue nga mahimong lider sa mga Israelinhon. Kini dili sayon nga buluhaton, ingon nga nasayod pag-ayo niini si Moises. (Numeros 11:14, 15) Busa, gisultihan ni Jehova si Moises nga “sugoon si Josue ug dasigon siya ug palig-onon siya.”—Deuteronomio 3:28.
Sa panahon sa mga maghuhukom sa Israel, ang anak nga babaye ni Jepte kinabubut-ong mituman sa panaad sa iyang amahan pinaagi sa pagtalikod sa posibilidad nga makabaton ug pamilya aron makaalagad sa sangtuwaryo ni Jehova. Nalilong ba ang iyang sakripisyo? Wala, kay ang Maghuhukom 11:40 nag-ingon: “Matag tuig ang mga batan-ong babaye sa Israel magaadtoan sa pagpasidungog sa anak nga babaye ni Jepte nga taga-Galaad, sulod sa upat ka adlaw sa tuig.” Ang maong mga pagduaw nakapadasig gayod alang sa nagsakripisyo-sa-kaugalingong anak nga babaye ni Jepte.
Ang paghatag ug pagdasig usahay nagkinahanglag kaisog. Sa unang misyonaryong panaw ni apostol Pablo, iyang gikasugat ang mabangis nga pagsupak sa ubay-ubayng siyudad sa Asia Minor. Siya gipapahawa gikan sa Antioquia, hapit mamatay sa Iconio, ug gibato ug gituohang patay na sa Listra. Wala magdugay human niadto, hinunoa, si Pablo ug ang iyang mga kauban mibalik niining mga siyudara, “nga nagpalig-on sa mga kalag sa mga tinun-an, nga nagdasig kanila nga magpabilin sa pagtuo ug nagaingon: ‘Kita kinahanglang mosulod sa gingharian sa Diyos pinaagi sa daghang mga kasakitan.’” (Buhat 14:21, 22) Gipameligro ni Pablo ang iyang kinabuhi aron sa pagdasig niining bag-ong mga tinun-an.
Ugaling, dili lamang ang bag-ong mga tinun-an nga mga Kristohanon ang nagkinahanglag pagdasig. Katuigan sa ulahi si Pablo nakasinatig malisod nga panaw paingon sa Roma, diin siya moatubang ug bista. Samtang siya nagkaduol na sa iyang destinasyon, siya maorag nawad-ag kadasig. Apan sa miabot siya sa lugar nga 74 kilometros habagatan-sidlakan sa Roma, siya nadasig. Ngano? Tungod kay ang mga igsoon gikan sa Roma miabot sa pagsugat kaniya diha sa Tiyanggihan sa Apio ug sa Tulo ka Abotanan. “Sa nalantawan sila, si Pablo nagpasalamat sa Diyos ug nakabaton ug kaisog.” (Buhat 28:15) Sa samang mga okasyon, ang atong presensiya mahimong makapadasig kaayo sa mga isigkamagtutuo.
Pahimusli ang mga Kahigayonan sa Paghatag ug Pagdasig
Sa pagkatinuod, daghan ang mga kahigayonan sa paghatag ug pagdasig. Napalihok ba ang imong kasingkasing tungod sa usa ka maayong pakigpulong sa estudyante nga gihatag sa usa ka igsoong lalaki o babaye diha sa Tunghaan sa Teokratikanhong Ministeryo? Nalipay ka ba nga adunay mga tin-edyer nga malig-on sa espirituwal diha sa kongregasyon? Nakapahinuklog ba kanimo ang pagkamainantoson sa mga edaran? Nakadayeg ka ba sa paagi sa usa sa mga payunir sa paggamit ug Bibliya diha sa balay-ug-balay nga ministeryo? Nan hatagig komendasyon, ug isulti ang makapadasig nga butang.
Ang pagdasig hinungdanon usab diha sa panimalay ingon man diha sa kongregasyon. Kini makatabang sa mga ginikanan sa pagmatuto sa ilang mga anak “diha sa disiplina ug mapasiboong pagdumala-sa-kaisipan ni Jehova.” (Efeso 6:4) Ang pagsulti sa bata nga siya nakabuhat ug maayo, ug sa pagpatin-aw kon ngano, makapadasig kaayo! Sa mga tuig sa pagkatin-edyer, sa dihang ginaatubang sa mga batan-on ang daghang pagsulay ug mga pagpit-os, hinungdanon ang kanunayng pagdasig.
Ang kakulang ug pagdasig sa panahon sa pagkabata mahimong makadaot. Karon si Michael, usa ka Kristohanong ansiano, maoy mahigalaon, apan siya miingon: “Wala gayoy gisulti ang akong amahan nga ako nakabuhat ug maayo. Busa ako nagdako nga kulang ug pagtamod-sa-kaugalingon. . . . Bisag ako karon 50 anyos na, gipabilhan ko gihapon nga pasaligan ako sa akong mga higala nga nakabuhat ako ug maayo ingong usa ka ansiano. . . . Ang akong kaugalingong kasinatian nagtudlo kanako kon unsa ka hinungdanon ang paghatag ug pagdasig sa uban, ug ako nagapaningkamot sa paghatag niana.”
Kinsay Nagkinahanglan ug Pagdasig?
Ang makugihong Kristohanong mga ansiano angayan sa pagdasig. Si Pablo misulat: “Kami nagahangyo kaninyo, mga igsoon, nga pagatamdon silang kinsa nagahago taliwala kaninyo ug nagadumala kaninyo diha sa Ginoo ug nagapahimangno kaninyo; ug nga hatagan sila ug labi pa kay sa labaw-ordinaryo nga pagtagad diha sa gugma tungod sa ilang buhat.” (1 Tesalonica 5:12, 13) Sayon lang nga ibalewala ang kahago sa mga ansiano. Apan ang mga pulong sa kinasingkasing nga pagpabili ug pagdasig makapagaan sa ilang luwan.
Kadtong sa taliwala kanato nga nagaantos sa malisod nga mga sirkumstansiya nagkinahanglan usab ug pagdasig. “Pamulong nga mahupayon sa magul-anong mga kalag, buligi ang mga maluya,” nagtambag ang Bibliya. (1 Tesalonica 5:14) Ang nag-inusarang mga ginikanan, balo, tin-edyer, ang mga edaran, ug ang may kakulian maoy lakip niadtong kinsa mobating nagmagul-anon ug maluya sa espirituwal sa matag karon ug unya.
Si María usa ka Kristohanong babaye nga kalit lang gibiyaan sa iyang bana. Siya miingon: “Sama kang Job, may mga panahon nga buot ko na nga mamatay. [Job 14:13] Apan ako wala mosurender, tungod sa pagdasig nga akong nadawat. Duha ka ansiano, nga suod kaayo nako, migugol ug daghang oras sa pagtabang kanako nga makita ang bili sa pagpadayon sa bug-os-panahong pag-alagad. Ug duha usab ka masinabtanong igsoong babaye ang naglipay kanako, nga namating mapailobon samtang gisugid ko ang akong mga suliran. Pinaagig paggamit ug Bibliya, sila nagtabang kanako sa pagtan-aw sa mga butang gikan sa panghunahuna ni Jehova. Wala ako mahinumdom kon pila ka beses namong gibasa ang Salmo 55:22, apan nasayod ako nga pinaagi sa pagpadapat niini nga kasulatan, ako sa hinayhinay naulian sa akong espirituwal ug emosyonal nga pagkatimbang. Kining tanan nahitabo 12 ka tuig ang milabay, ug ako malipay sa pag-ingon nga ako nagpadayon sa bug-os-panahong pag-alagad hangtod karon. Ang akong kinabuhi magantihon ug malipayon bisan pa sa panalagsang kasakit sa emosyon. Ako kombinsido nga ang pagdasig sa panahon nga sama niana dakog mahimo sa kinabuhi sa usa ka tawo.”
Ang uban nagkinahanglag pagdasig tungod kay sila nakahimog kasal-anan ug karon nagapanlimbasog sa pagtul-id niana. Tingali sila nakadawat ug mahigugmaong pagbadlong. (Proverbio 27:6) Ang mga ansiano nga naghatag sa pagbadlong mahimong alerto sa paghatag ug komendasyon sa dihang nakita nila nga ang tambag sa Kasulatan ginapadapat. Ang ilang mga pulong sa pagdasig aduna unyay dobleng kaayohan—nagapamatuod sa ilang gugma alang sa nakasala aron nga siya dili “lamyon sa hilabihang kamasulub-on” ug nagapahinumdom kaniya sa mga kaayohan sa pagpadapat sa tambag.—2 Corinto 2:7, 8.
Usa ka ansiano nakahimog grabeng kasal-anan ug nawad-an sa iyang pribilehiyo sa pagkamagtatan-aw sa kongregasyon. “Sa gipahibalo ang pagkatangtang kanako ingong ansiano, ako nagtuo nga mobating dili komportable ang mga igsoon sa pagpakig-uban kanako,” matud niya. “Bisan pa niana, gihuptang hugot nga kompidensiyal sa mga ansiano ang hinungdan ug sila naningkamot sa paghatag kanako ug pagdasig. Ang uban sa kongregasyon sa ingon usab nagpakita sa ilang gugma ug panag-ubanay, nga tinong nagpadali sa akong espirituwal nga pagkaayo.”
Mahimong Tuboran sa Pagdasig
Sa atong puliki nga mga kinabuhi, ang pagdasig sayon ra nga hikalimtan. Apan pagkabililhon gayod niana! Aron makahatag ug epektibong pagdasig, ibutang sa imong hunahuna ang duha ka butang. Una, hunahunaa kon unsay isulti, aron espisipiko ang imong pagdasig. Ikaduha, pangitag higayon nga maduol ang tawo nga angayan sa komendasyon o nga nagkinahanglang mapalig-on.
Kon kanunay nimong buhaton kini, ikaw mahimong mas malipayon. Kon hunahunaon, si Jesus nagapasalig kanato: “Adunay labaw nga kalipay sa paghatag kay sa pagdawat.” (Buhat 20:35) Pinaagi sa pagdasig sa uban, imong ginadasig ang imong kaugalingon. Nganong dili nimo himoong tumong ang paghatag ug pagdasig ngadto sa uban matag adlaw?