Unsaon Nimo Pagpalambo sa Imong mga Pag-ampo?
ANG pag-ampo walay-sama sa tanang mahigugmaong mga tagana ni Jehova nga Diyos. Hayan kuhaon sa mga magsusupak ang imong Bibliya o pugngan ka sa pagpakig-uban sa imong isigkamagsisimba, apan walay tawo ang makahikaw kanimo sa pag-ampo. Bililhon kaayo ang pag-ampo. Nan, pagkahinungdanon nga pabilhan ug bug-os pahimuslan sa matag usa kanato kining pribilehiyoa. Unsay makatabang kanimo sa pagpalambo sa imong mga pag-ampo?
Ang Bibliya dili usa ka basahon sa pangadyeon. Apan, mahimo kining ihubit ingong ang kinamaayohang basahon sa pag-ampo sa katawhan. Ang Hebreohanong Kasulatan lamang naundan ug kapin sa 150 ka pag-ampo. Ang pipila mugbo; ang uban tag-as. Kini giampo sa atubangan sa katilingban o sa pribado, sa mga hari o sa mga binihag, panahon sa kadaogan o sa kasakitan. Ingon sa giawit ni David sa Salmo 65:2, “ang mga tawo sa tanang unod” manuol kang Jehova, ang “Tigpatalinghog sa pag-ampo.” Nganong gidasig sa Diyos ang mga magsusulat sa Bibliya sa pagrekord ug daghang kapiliang mga pag-ampo?
Sa pagtubag sa maong pangutana, tagda ang 2 Timoteo 3:16. Kini nag-ingon: “Ang tibuok Kasulatan inspirado sa Diyos ug mapuslanon.” Busa, ang mga pag-ampo sa Bibliya gitala aron mogiya kanato, sama sa Kasulatanhong tagna, mga prinsipyo, ug kasaysayan. Sa unsang paagi kita makabenepisyo niining mga pag-ampoa?
Pinaagi sa maayong pagsusi sa mga pag-ampo sa Kasulatan, mailhan nato kadtong gibungat ubos sa mga kahimtang nga susama sa atoa. Atong makat-onan kon sa unsang paagi nagkalainlain ang katuyoan ug kahimtang sa mga pag-ampo. Dugang pa, makakaplag kita ug bag-ong mga ekspresyon sa pagdayeg ug pagpasalamat ug makakitag bag-ong mga pulong alang sa atong mga hangyo ug mga pangaliyupo. Sa laktod nga pagkasulti, ang mga pag-ampo sa Bibliya makatabang kanato sa pagpalambo sa atong kaugalingong mga pag-ampo.
Si Maria, nga nahimong inahan ni Jesus, maoy usa ka tawo nga dayag nga nakabenepisyo gikan sa mga ekspresyong gigamit diha sa pag-ampo nga natala sa Bibliya. Iyang giduaw ang iyang paryente nga si Elisabet human nga silang duha nagsabak ug usa ka batang lalaki pinaagi sa langitnong tabang. Si Maria mitanyag ug pagdayeg ug pagpasalamat sa Diyos, ug ang pipila sa iyang mga pulong dayag nga susama niadtong naundan sa pag-ampo diha sa Hebreohanong Kasulatan. Malagmit gayod nga si Maria sinati sa pag-ampo nga gibungat ni Ana, ang inahan ni Samuel nga propeta. Si Ana nanamkon usab ug anak nga lalaki pinaagi sa tabang sa Diyos, nga kapin ug 1,000 ka tuig ang miagi. Mahimo kaha nga si Maria namalandong niining pag-ampoa tungod kay kini nagpabanaag man sa iyang kaugalingong mga pagbati?—1 Samuel 2:1-10; Lucas 1:46-55.
Ikaw komosta? Makahinumdom ka ba ug usa ka pag-ampo sa Bibliya nga gilitok ubos sa mga kahimtang nga susama sa imoha? Ang pagpangita, pagbasa, ug pagpamalandong niining mga pag-ampoa motabang kanimo sa pagpalambo sa imong kaugalingong pagpakigsulti sa Diyos. Sa sunod nga artikulo, gidapit namo kamo sa pagsusi sa tulo ka pag-ampo sa Balaang Kasulatan. Kini giampo ubos sa lainlaing kahimtang, nga tingali susama sa imoha.