Unsang Kaayohan ang Mahimong Mosangpot sa Paghisgot ug Relihiyon?

ANG mga ginikanan maikagong magpaabot sa unang mga pulong nga ilitok sa ilang masuso. Inigkadungog nila sa usa ka gibalikbalik nga silaba taliwala sa pagtilagak, tingali sa “Mama” o “Papa,” mosugwak ang kalipay sa ilang mga kasingkasing. Ila dayong ipaambit ang maong balita sa higala ug silingan. Ang unang sulti sa bata tinuod nga maayong balita nga makahatag ug kalipay.

Ang mga tingog, mga talan-awon, ug mga baho nga masuhop sa mga sentido sa gamayng bata modasig sa usa ka sanong. Hinuon, magkadaiya ang mga sanong. Apan kon, human sa usa ka yugto sa panahon, ang usa ka masuso napakyas sa pagsanong ngadto sa maong mga pandasig, ang mga ginikanan tukmang mabalaka nga ang pagtubo sa ilang anak tingali nadaot.

Ang mga masuso mosanong nga labing maayo ngadto sa mga tawo nga ilang nailhan. Sa dihang ang masuso kugoson sa inahan, ang dakong pahiyom kasagarang mosangpot. Bisan pa niana, ang paghikap sa usa ka miduawng paryente mahimong makabikil sa mga luha, bisan sa magahiong pagdumili nga pakugos sa maong tawo. Ang kadaghanang paryente nga makasinati niini dili moundang. Sa dihang sila mas mailhan sa masuso, sila malipay sa dihang wala na ang babag sa pagkawala-mailhi sa masuso, ug ang pahiyom sa masuso inanay nga motungha.

Sa susama, daghang hamtong ang magpanuko sa paghisgot sa dayag sa ilang relihiyosong mga tinuohan uban sa usa ka tawo nga dili usa ka dugay nang kaila. Basin sila dili makasabot kon nganong ang usa ka estranyo gustong makigsulti bahin sa usa ka personal nga butang​—ang relihiyon. Ang sangpotanan mao nga ilang itugot nga motungha ang babag tali kanila ug niadtong mosulti bahin sa Maglalalang. Dili pa gani sila mohisgot kon unsay, kon buot sabton, usa ka kinaiyahan sa katawhan, ang tinguha sa pagsimba.

Sa pagkamatuod, angay nga maikag kita sa pagkat-on bahin sa atong Maglalalang, ug ang pagpakigsulti sa uban mahimong magbutang kanato sa kahimtang nga makakat-on. Kana matuod kay ang Diyos dugay nang nalangkit sa dayag nga pakigkomunikar. Tan-awon nato kon sa unsang paagi.

‘Mamati ug Makakat-on’

Ang unang pakigsulti sa Diyos uban sa usa ka tawo maoy uban kang Adan sa tanaman sa Eden. Bisan pa niana, human makasala si Adan ug si Eva, gipalabi nila ang pagtago sa dihang gitawag sila sa Diyos, sa dihang buot niyang dugang makigsulti kanila. (Genesis 3:8-13) Hinuon, ang Bibliya nagtala ug mga detalye bahin sa mga lalaki ug mga babaye nga gustog pakigsulti gikan sa Diyos.

Ang Diyos nakigsulti kang Noe bahin sa umaabot nga kalaglagan sa tuman-kadaotang kalibotan sa iyang adlaw, diin si Noe nahimong “usa ka magwawali sa pagkamatarong.” (2 Pedro 2:5) Ingong tigpamaba sa Diyos ngadto sa iyang kaliwatan, si Noe wala lamang magpasundayag ug pagtuo sa mga pakiglabot sa Diyos uban sa tawo kondili sa dayag nagpahayag usab nga siya dapig kang Jehova. Unsang sanong ang namatikdan ni Noe? Ikasubo, kadaghanan sa iyang mga katalirongan “wala magmatikod hangtod nga miabot ang baha ug silang tanan naanod.” (Mateo 24:37-39) Apan ikalipay nato, pito ka sakop sa pamilya ni Noe namati, mituman sa mga instruksiyon sa Diyos, ug naluwas sa tibuok-yutang Lunop. Ang tanang tawo nga buhi karong adlawa maoy gikan kanila.

Sa ulahi, ang Diyos nakigsulti sa usa ka tibuok nga nasod sa katawhan, ang karaang Israel. Pinaagi ni Moises, ang Diyos mihatag kanila ug Napulo ka Sugo ug sa mga 600 ka ubang samang obligadong balaod. Gidahom ni Jehova nga sundon kanang tanan sa mga Israelinhon. Gimando ni Moises nga matag pito ka tuig, panahon sa tinuig nga Pista sa mga Balongbalong, ang Kasugoan sa Diyos basahong kusog. “Tigoma ang katawhan,” siya nagsugo, “ang mga lalaki ug ang mga babaye ug ang mga bata ug ang inyong langyaw nga lumolupyo nga anaa sa sulod sa inyong mga ganghaan.” Alang sa unsang katuyoan? “Aron nga sila makapamati ug aron sila makakat-on, kay kinahanglang mahadlok sila kang Jehova nga inyong Diyos ug magbantay sa pagtuman sa tanang pulong niining kasugoan.” Ang tanan kinahanglang mamati ug makakat-on. Mahanduraw gayod nga gikahimut-an nila ang paghisgot kon unsay ilang nadunggan!​—Deuteronomio 31:10-12.

Kapig lima ka siglo sa ulahi, ang hari sa Juda nga si Josapat miorganisar sa mga prinsipe ug sa mga Levihanon sa usa ka kampanya sa pagpabuhi pag-usab sa putling pagsimba ni Jehova. Kining mga tawhana mipanaw sa mga siyudad sa Juda nga nagtudlo sa mga molupyo sa mga balaod ni Jehova. Pinaagi sa pagpahisgot sa dayag niining mga balaora, gipasundayag sa hari ang iyang kaisog dapig sa matuod nga pagsimba. Bahin sa iyang mga ginsakpan, sila kinahanglang mamati ug makakat-on.​—2 Cronicas 17:1-6, 9.

Paghatag ug Pamatuod Pinaagi sa Panaghisgot

Gisugo sa Diyos ang iyang kaugalingong Anak, si Jesus, sa yuta sa pag-alagad nga Iyang Tigpamaba. (Juan 1:14) Samtang nasaksihan sa tulo ka tinun-an nga nausab ang dagway ni Jesus sa ilang atubangan, nadunggan nila ang tingog mismo sa Diyos nga nagpahayag: “Kini ang akong Anak, ang hinigugma, kinsa akong giuyonan; patalinghog kaniya.” (Mateo 17:5) Sila misugot dayon.

Sa susama, gisugo ni Jesus ang iyang mga apostol sa pagpahayag sa mga katuyoan sa Diyos ngadto sa uban. Apan sa dihang mga unom ka bulan sa ministeryo sa yuta ang nahibilin, gipahibalo ni Jesus nga ang buluhaton sa pagwali sa Gingharian sa mga langit maoy tuman ka dako nga gikinahanglan ang mas daghang tinun-an. Gitudloan niya ang 70 kanila kon unsaon paghisgot sa Gingharian sa Diyos uban sa mga estranyo ug unya gipadala sila sa pagsabwag sa maong mensahe sa dayag. (Lucas 10:1, 2, 9) Sa dayon na siyang mobalik ngadto sa iyang Amahan sa langit, giawhag ni Jesus ang iyang mga sumusunod nga maoy manguna sa pagpakigsulti sa uban mahitungod sa maong mensahe, nga nagsugo pa kanila: “Busa panlakaw kamo ug paghimog mga tinun-an sa katawhan sa tanang nasod, . . . nga magatudlo kanila sa pagsunod sa tanang butang nga akong gisugo kaninyo.” (Mateo 28:19, 20) Sa tibuok kalibotan, ang matuod nga mga Kristohanon karong adlawa nagtuman sa maong tinudlong-buluhaton pinaagi sa pagpakighisgot sa maayong balita sa Gingharian sa Diyos uban sa ilang mga silingan. Ang maong mga panaghisgot makapaarang kanila sa paghatag ug pamatuod ngadto sa kamatuoran bahin sa Maglalalang, si Jehova.​—Mateo 24:14.

Malinawon, Makapalig-ong mga Panaghisgot

Sa unsang paagi ang mga tinun-an ni Jesus maghisgot sa ilang mga tinuohan sa uban? Kinahanglang dili nila pasuk-on ang mga magsusupak, ni makiglantugi sa mga magsusupak. Hinunoa, kinahanglang pangitaon nila kadtong modawat sa maayong balita ug dayon ipadayag ang Kasulatanhong ebidensiya sa pagpaluyo niana. Siyempre, napanid-an sa Diyos ang mga sanong niadtong nahibalag sa mga tinun-an sa iyang Anak, maingon nga si Jesus mipahayag: “Siya nga magadawat kaninyo magadawat usab kanako, ug siya nga magadawat kanako magadawat usab kaniya nga nagpadala kanako.” (Mateo 10:40) Usa ka grabeng pagsalikway sa Diyos sa dihang gisalikway sa kadaghanan sa mga katalirongan ni Jesus ang iyang mensahe!

“Ang usa ka ulipon sa Ginoo dili kinahanglang makig-away,” mitambag ang Kristohanong apostol Pablo. Hinunoa, siya “kinahanglang magmalumo sa tanan, kuwalipikado sa pagpanudlo, nga padayong makapugong sa iyang kaugalingon ubos sa pagkadaotan, nga magatudlo uban ang kalumo niadtong dili makiling sa pag-uyon; kay basin ang Diyos magahatag kanila ug paghinulsol nga motultol sa tukmang kahibalo sa kamatuoran.” (2 Timoteo 2:24, 25) Ang paagi sa pagmantala ni Pablo sa maayong balita ngadto sa katawhan sa Atenas, Gresya, magahatag ug usa ka maayong panig-ingnan. Siya nangatarongan sa mga Hudiyo sa ilang sinagoga. Sa matag adlaw sa tiyanggihan siya nakigsulti “niadtong nahitabong diha.” Bisan pag ang pipila, sa walay duhaduha, nakaangay lamang sa pagpamati sa bag-ong mga ideya, si Pablo nakigsulti sa direkta ug sa malulutong paagi. Gihisgotan niya uban sa mga namati kaniya ang mensahe sa Diyos, nga midasig kanila sa paghinulsol. Ang ilang sanong pareho kaayo sa iya sa katawhan karong adlawa. “Ang pipila misugod pagbiaybiay, samtang ang uban miingon: ‘Pamatian ka namo bahin niini sa lain pang higayon.’” Wala mopugos si Pablo nga ipadayon ang panaghisgot. Kay nakawali na sa iyang mensahe, siya “mipahawa sa ilang taliwala.”​—Buhat 17:16-34.

Sa ulahi, gisultihan ni Pablo ang mga membro sa Kristohanong kongregasyon sa Efeso nga siya ‘wala magpugong sa pagsulti kang bisan kinsa sa mga butang nga mapuslanon ni sa pagpanudlo sa dayag ug sa balay-balay.’ Dugang pa, siya ‘bug-os mihisgot sa paghinulsol ngadto sa Diyos ug pagtuo diha kang Jesu-Kristo uban sa samang mga Hudiyo ug mga Grego.’​—Buhat 20:20, 21.

Kining Kasulatanhong mga panig-ingnan nagpadayag kon sa unsang paagi ang matinumanong mga alagad sa Diyos sa kapanahonan sa Bibliya naghisgot ug relihiyon. Busa karong adlawa, ang mga Saksi ni Jehova masinugtanong nagahisgot ug relihiyon uban sa ilang mga silingan.

Mga Panaghisgot nga Mabungahon Kaayo

‘Pamati sa Pulong sa Diyos.’ ‘Patalinghog sa iyang mga sugo.’ Pagkasubsob makita ang maong mga awhag diha sa Bibliya! Makasanong ka niining mga sugoa sa Bibliya sa sunod panahong makigsulti kanimo ang mga Saksi ni Jehova. Pamati sa mensahe nga ilang dala kanimo gikan sa Bibliya. Kining mensahea dili politikanhon kondili nagpasiugda sa usa ka langitnong kagamhanan pinaagi sa Diyos, sa iyang Gingharian. Mao kini ang paagi sa Diyos sa pagwagtang sa mga hinungdan sa mga panagbangi karon. (Daniel 2:44) Human niana hikayon sa maong pagmando sa Diyos gikan sa langit nga ang tibuok yuta mausab ngadto sa usa ka paraiso nga sama sa tanaman sa Eden.

Usa ka kanhi sekreta subsob nga midumili sa pagpamati sa dihang ang mga Saksi ni Jehova nakigsulti kaniya bahin sa Bibliya. Apan tungod sa pagdaghan sa krimen nga kinahanglang iyang atubangon, siya nawad-ag kasibot sa mga panghitabo sa kinabuhi. Busa giingnan niya ang sunod nga Saksi nga miduaw nga iyang susihon ang ebidensiya dapig sa mensahe sa Bibliya. Misangpot ang regular nga mga panaghisgot sa Bibliya. Bisan pag ang polis makadaghan mibalhin ug pinuy-anan, ang mga Saksi malipayong nangita kaniya sa matag bag-ong dapit sa pagpadayon sa mga panaghisgot. Sa kataposan ang polis miila: “Ang ebidensiya nga akong gipangita diha ra mismo sa Balaang Kasulatan sa tanang panahon. Kon kadtong mga Saksi wala pa molahutay sa pagpakigsulti kanako, ako unta atua pa sa kalibotan nga nahibulong kon unsay kahulogan sa kinabuhi. Ang matuod mao, ako nahidangat sa pagkakat-on sa kamatuoran, ug gugolon ko ang nahibilin kong mga adlaw sa pagpangita sa uban nga nagapangita sa Diyos sama kanako kaniadto.”

Ang interesadong mga tigpamati tinuod nga gustong mahibalo ug dugang pa. Sa tukma ilang ginadahom ang mga katarongan alang sa mga tinuohang gipahayag. (1 Pedro 3:15) Maingon nga ang usa ka bata magsukitsukit sa iyang mga ginikanan ug magadahom nga ilang tubagon, ikaw sa tukma makadahom sa mga Saksi nga mohatag kanimo ug malig-ong mga tubag. Makasalig ka nga sila malipay nga mobalik ug dugang maghisgot sa mensahe sa Bibliya uban nimo.

Tingali ikaw may diyutay nang nahibaloan bahin sa Bibliya. Basin naamgohan nimo nga ang gidahom sa Diyos kanimo maglangkit ug pila ka kausaban sa paagi sa imong pagkinabuhi. Ayaw pagpanuko sa pagpadayon tungod sa kahadlok nga ang mga kinahanglanon sa Diyos maglangkit ug dako kaayong pagsakripisyo. Tinuod lamang nga kalipay ang igahatag niana. Imo kining maila samtang mouswag ka sa usa ka tikang sa usa ka panahon.

Una sa tanan, tun-i kon kinsa si Jehova, kon unsay gidahom niya kanimo, ug kon unsay iyang gitanyag. Hangyoa ang mga Saksi nga ipakita kanimo kon unsay giingon sa Bibliya bahin niini. Susiha kon unsay giingon nila diha sa imong kaugalingong kopya sa Bibliya. Kay nahibalo nga ang mga Saksi makataronganon sa ilang ginapahayag ingong mao ang kamatuoran bahin sa relihiyon, sa walay duhaduha buot nimong tugkaron ang daghan pang maayong butang nga ilang ikapaambit kanimo gikan sa Kasulatan.​—Proverbio 27:17.

Ikaw giabiabi sa pagpaniid sa mga Saksi diha sa ilang lokal nga dapit tigomanan, ang Kingdom Hall. Didto imong madungog ang mapuslanong mga panaghisgot sa Pulong sa Diyos. Imong makita kon sa unsang paagi kadtong nanambong mahimuot sa paghisgot sa usag usa bahin sa mga katuyoan sa Diyos. Tugoti kining mga Saksi sa pagtabang kanimo sa pagkat-on sa kamatuoran mahitungod sa kabubut-on sa Diyos alang kanato karong adlawa. Sanong sa pagdapit sa Diyos sa paghisgot sa matuod nga pagsimba ug dawata ang iyang pahiyom sa pag-uyon, bisan ang kinabuhing dayon sa Paraiso.​—Malakias 3:16; Juan 17:3.

[Hulagway sa panid 5]

Si Noe dayag nga naghisgot bahin sa katuyoan sa Diyos

[Hulagway sa panid 7]

Sama sa gibuhat ni Pablo sa karaang Atenas, ang mga Saksi ni Jehova nagtudlo sa mga kamatuoran sa Bibliya ngadto sa uban