Usa ka Pangulo Nagpalandong sa Iyang Umaabot
ANG pangulo sa Kasadpang Aprika maoy minahal uyamot ug tinamod kaayong lider sa iyang komunidad. Sa iyang ika-78ng adlawng-natawhan, ang iyang mga higala, pamilya ug ubang mga tigpahalipay nagtigom sa pagpahalipay kaniya. Sa usa ka pakigpulong, ang pangulo mipilig usa ka talagsaong topiko alang sa maong okasyon. Iyang gipahayag ang iyang mga hunahuna bahin sa kinabuhi human sa kamatayon.
Siya miingon nga sa laing kalibotan “adunay usa ka bag-ong kalibotan nga walay panglimbong, kasina ug kadalo.” Iyang gihubit kini ingong usa ka kalibotan nga “naliminan sa misteryo,” usa nga gipuy-an lamang sa mga matarong, kinsa adunay maayong relasyon uban sa Diyos.
Ang maong pagtuo maoy kasagaran taliwala sa mga tawo sa tibuok Aprika. Sumala sa tradisyonal nga relihiyon sa Aprika, ang kamatayon dili maoy kataposan sa kinabuhi kondili usa lamang ka kausaban, usa ka pagpadayon sa kinabuhi ngadto sa kalibotan sa espiritu. Inigkamatay ang usa ka tawo kuno motabok gikan sa usa ka makitang kalibotan ngadto sa dili-makitang kalibotan. Ingong espiritu, ang indibiduwal unya mosulod sa usa ka dapit nga gipuy-an sa iyang mga katigulangan.
Daghan sa mga taga-Kasadpang Aprika nagtuo nga ang mga katigulangan, o mga espiritu sa mga katigulangan, magpaneguro sa kaayohan sa ilang mga pamilya sa yuta. Nag-ingon ang librong West African Traditional Religion: “Wala gayoy kalainan sa impluwensiya tali sa mga membro sa komunidad nga ania pa sa yuta, ug niadtong atua sa laing kalibotan. Sa dihang dinhi pa sa yuta, [ang mga katigulangan] mao ang mga punoan sa ilang mga pamilya. Karon nga dili na nato sila makita, sila mao ang mga punoan gihapon sa kalibotan sa mga espiritu. Sila dili mohunong sa pagpaikag sa ilang kaugalingon sa pagtaganag katibuk-ang kaayohan sa ilang mga pamilya.”
Busa, ang tigulang nga pangulo nga gihisgotan sa sinugdan naglaom nga mahiuban sa iyang mga katigulangan ug motrabaho uban kanila diha sa kalibotan sa espiritu. Siya miingon: “Ako adunay malig-ong pagtuo sa kinabuhi human sa kamatayon ug sa posibilidad sa akong padayong pag-alagad—bisan human sa kamatayon.”
Bisan pa niana, tungod sa sunod nga gisulti sa pangulo, ang mantalaang Sunday Times nag-ingon nga siya “daw dili bug-os kombinsido” mahitungod sa kinabuhi luyo sa kamatayon. Gisultihan niya ang panon sa mga tawo nga siya nakadungog bahin sa usa ka libro nga naghisgot ug kinabuhi human sa kamatayon. Ang pangulo nagpangita sa libro sulod na sa lima ka tuig. Maikagon kaayo siyang mobasa niana nga siya mitanyag ug katumbas nga $1,500 (T.B.) alang kang bisan kinsa nga makadala kaniyag usa ka kopya.
Malikayan unta sa pangulo ang problema sa pagpangita pinaagi sa pagkonsulta sa usa ka libro nga dili lisod pangitaon. Kini nga libro daling mabatonan nga gihimo dili sa tawo kondili sa Maglalalang sa tanang tawo. (1 Tesalonica 2:13) Kanang libroha mao ang Bibliya. Unsay giingon niini bahin sa kinabuhi human sa kamatayon?