Bahin 2—Mga Kidlap sa Kahayag​—Dagko ug Gagmay

“Pinaagi sa imong kahayag makakita kami ug kahayag.”​—SALMO 36:9.

1. Unsang unang paningkamot ang gihimo aron masabtan ang simbolismo sa basahon sa Pinadayag?

ANG basahon sa Pinadayag sa Bibliya nakapaikag sa mga Kristohanon sukad pa sa unang panahon. Kini naghatag ug maayong pananglitan kon sa unsang paagi ang kahayag sa kamatuoran mas misanag pa. Niadtong 1917, ang katawhan ni Jehova nagpatik ug usa ka pagpatin-aw sa Pinadayag diha sa librong The Finished Mystery. Maisogong giyagyag niini ang relihiyoso ug politikanhong mga lider sa Kakristiyanohan, apan daghan sa mga pagpatin-aw niini gikuha gikan sa nagkalainlaing mga reperensiya. Bisan pa, ang The Finished Mystery nagsilbing pagsulay sa pagkamaunongon sa mga Estudyante sa Bibliya ngadto sa makitang agianan nga gigamit ni Jehova.

2. Unsang kahayag sa basahon sa Pinadayag ang gihatag sa artikulong “Birth of the Nation”?

² Ang talagsaong kidlap sa kahayag midan-ag diha sa libro sa Pinadayag uban sa pagpatik sa artikulong “Birth of the Nation” sa The Watch Tower sa Marso 1, 1925. Gihunahuna niadto nga ang Pinadayag kapitulo 12 naghubit ug usa ka gubat tali sa paganong Roma ug sa papa sa Roma, uban sa batang lalaki nga naghawas sa kagamhanang papanhon. Apan gipakita niadtong artikuloha nga ang Pinadayag 11:15-18 may kalabotan sa kahulogan sa kapitulo 12, nga nagpaila nga nalangkit kini sa pagkatawo sa Gingharian sa Diyos.

3. Unsang mga publikasyon ang naghatag ug dugang kahayag sa Pinadayag?

³ Kining tanan mitultol sa mas matin-aw pa nga pagsabot sa Pinadayag nga miabot uban sa pagpatik sa Light, sa duha ka tomo, niadtong 1930. Ang dugang pa nga pag-ulay migula sa “Babylon the Great Has Fallen!” God’s Kingdom Rules! (1963) ug “Then Is Finished the Mystery of God” (1969). Apan, daghan pa ang angay pagatun-an bahin sa matagnaong basahon sa Pinadayag. Oo, ang mas masanag nga kahayag midan-ag diha niana sa 1988, uban sa pagkapatik sa Pinadayag​—Hingpit nga Sangkoanan Niini Haduol Na! Ang yawi niining anam-anam nga kalamdagan mahimong ikaingon nga mao ang kamatuoran nga ang tagna sa Pinadayag aplikado sa “adlaw sa Ginoo,” nga nagsugod sa 1914. (Pinadayag 1:10) Busa ang basahon sa Pinadayag mas masabtan pa samtang kanang adlawa nagpadayon.

Gipatin-aw “ang Hataas nga mga Gahom”

4, 5. (a) Sa unsang paagi gisabot sa mga Estudyante sa Bibliya ang Roma 13:1? (b) Unsa ang pagsabot sa ulahi nga mao ang baroganan sa Kasulatan bahin sa “hataas nga mga gahom”?

⁴ Usa ka masidlak nga kahayag ang nasabtan niadtong 1962 may kalabotan sa Roma 13:1, nga nag-ingon: “Kinahanglang ang tanang kalag magpasakop sa hataas nga mga gahom [“labaw nga mga awtoridad,” New World Translation].” (King James Version) Nasabtan sa unang mga Estudyante sa Bibliya nga ang “hataas nga mga gahom” nga gihisgotan didto nagpunting sa kalibotanong mga awtoridad. Gisabot nila kining kasulatan nga nagkahulogan nga kon ang usa ka Kristohanon tawgon sa pagkasundalo panahon sa gubat, obligado siya sa pagsul-ob ug uniporme, sa pagpas-an ug pusil, ug sa pag-adto sa panggubatan, ngadto sa trensera. Gituohan niadto nga sanglit ang usa ka Kristohanon dili mahimong mopatay ug isigkatawo, siya mapugos sa pagtiro sa iyang pusil sa hangin kon maabtan diha sa malisod nga kahimtang.a

⁵ Ang The Watchtower sa Nobyembre 15 ug Disyembre 1, 1962, naghatag ug tin-aw nga kahayag bahin sa tema sa naghisgot sa mga pulong ni Jesus sa Mateo 22:21: “Ibayad . . . ang mga butang ni Cesar ngadto kang Cesar, apan ang mga butang sa Diyos ngadto sa Diyos.” Hinungdanon mao ang mga pulong sa apostol diha sa Buhat 5:29: “Kinahanglang among sugton ang Diyos ingong magmamando inay kay sa mga tawo.” Ang mga Kristohanon magpasakop kang Cesar​—“ang hataas nga mga gahom”—​basta nga kini dili magkinahanglan sa Kristohanon sa pagsupak sa kasugoan sa Diyos. Ang pagpasakop kang Cesar gisabot ingong relatibo, dili bug-os. Ang mga Kristohanon mobayad lamang kang Cesar sa butang nga dili mahisupak sa mga kinahanglanon sa Diyos. Pagkamakapatagbaw ang pagkabaton ug matin-aw nga pagsabot nianang ulohana!

Mga Kidlap sa Kahayag Bahin sa Organisasyonal nga mga Butang

6. (a) Aron mapahilayo gikan sa herarkiyal nga paagi nga kaylap sa Kakristiyanohan, unsang prinsipyo ang gisagop? (b) Unsa sa kataposan ang nasabtan nga mao ang hustong paagi sa pagpili alang sa mga magtatan-aw sa kongregasyon?

⁶ Dihay suliran niadto bahin sa kon kinsa ang mag-alagad ingong mga ansiano ug mga deakono sa mga kongregasyon. Aron malikayan ang herarkiyal nga paagi nga kaylap sa Kakristiyanohan, gihukom nga kini kinahanglang pilion sa demokratikanhong paagi pinaagig pagboto sa mga membro sa matag kongregasyon. Apan ang nagadugang nga kahayag nga makita sa The Watchtower sa Septiyembre 1 ug Oktubre 15, 1932, nagpakita nga ang Kasulatan wala maghatag ug pasikaranan sa pagtudlo ug mga ansiano pinaagig eleksiyon. Busa gipulihan kinig komite sa pag-alagad, ug ang direktor sa pag-alagad gipili sa Sosyedad.

7. Ang mga kidlap sa kahayag misangpot ug unsang mga kauswagan sa paagi sa pagtudlo sa mga alagad sa kongregasyon?

⁷ Ang The Watchtower sa Hunyo 1 ug Hunyo 15, 1938, nag-unod sa mga kidlap sa kahayag nga nagpakita nga ang mga alagad sa kongregasyon dili angay pilion, kondili itudlo, sa ato pa, itudlo sa teokratikanhong paagi. Niadtong 1971 gipakita sa laing kidlap sa kahayag nga ang matag kongregasyon dili pagadumalahon sa usa lamang ka alagad sa kongregasyon. Hinunoa, ang matag usa kinahanglang adunay usa ka lawas sa mga ansiano, o mga magtatan-aw, nga gitudlo sa Nagamandong Lawas sa mga Saksi ni Jehova. Busa tungod sa nagauswag nga kahayag sulod sa mga 40 ka tuig, nahimong matin-aw nga ang mga ansiano ingon man ang mga deakono, nga karon nailhan ingong ministeryal nga mga alagad, kinahanglang itudlo sa “kasaligan ug mabuot nga ulipon,” pinaagi sa Nagamandong Lawas niini. (Mateo 24:45-47) Kini nahiuyon sa nahitabo sa panahon sa mga apostoles. Ang mga lalaki sama kang Timoteo ug Tito gitudlo ingong mga magtatan-aw sa unang-siglong nagamandong lawas. (1 Timoteo 3:1-7; 5:22; Tito 1:5-9) Kining tanan maoy dakong katumanan sa Isaias 60:17: “Puli sa tumbaga magdala ako ug bulawan, ug puli sa puthaw magdala ako ug plata, ug puli sa kahoy, tumbaga, ug puli sa mga bato, puthaw; ug himoon ko ang pakigdait ingong imong mga magtatan-aw ug ang pagkamatarong ingong imong tigtudlog mga buluhaton.”

8. (a) Ang nagadugang nga kamatuoran nagdala ug unsang mga kauswagan sa paagi sa pagpalakaw sa Sosyedad? (b) Unsa ang mga komite sa Nagamandong Lawas, ug unsa ang ilang tagsatagsa ka bahin sa buluhaton o pagdumala?

⁸ Dihay mga butang usab bahin sa pagpalakaw sa Watch Tower Society. Sa daghang tuig ang Nagamandong Lawas sa mga Saksi ni Jehova parehas ra sa lawas sa mga direktor sa Watch Tower Bible and Tract Society of Pennsylvania, ug ang mga butang kontrolado halos sa presidente niini. Ingon sa gipakita sa 1977 Yearbook of Jehovah’s Witnesses (mga panid 258-9), sa 1976 ang Nagamandong Lawas nagsugod sa paglihok nga may unom ka komite, ang matag usa gitudlo sa pag-atiman sa pila ka bahin sa tibuok-kalibotang buluhaton. Ang Personnel Committee nagaatiman sa mga butang may kalabotan sa mga kawani, lakip sa intereses sa tanang nag-alagad sa tibuok-kalibotan nga pamilyang Bethel. Ang Publishing Committee nagaatiman sa tanang sekular ug legal nga mga butang, sama sa propiedad ug pag-imprinta. Ang Service Committee nagaatiman sa buluhatong pagsangyaw ug nagadumala sa nagapanawng mga magtatan-aw, mga payunir, ug sa mga buluhaton sa mga magmamantala sa kongregasyon. Ang Teaching Committee mao ang responsable sa mga miting sa kongregasyon, sa mga special assembly day, sa mga sirkito nga asembliya, ug sa distrito ug internasyonal nga mga kombensiyon maingon man sa nagkalainlaing mga eskuylahan alang sa espirituwal nga edukasyon sa katawhan sa Diyos. Ang Writing Committee nagadumala sa pagpangandam ug sa paghubad sa tanang matang sa mga publikasyon, nagatino nga ang tanan nahiuyon sa Kasulatan. Ang Chairman’s Committee nagaatiman sa mga emerhensiya ug sa uban pang dinaliang mga butang.b Usab sa mga tuig sa 1970, ang mga sangang buhatan sa Watch Tower Society gisugdan sa pagdumala sa usa ka komite imbes sa usa ka magtatan-aw.

Kahayag Maylabot sa Kristohanong Paggawi

9. Sa unsang paagi ang kahayag sa kamatuoran nakaapekto sa relasyon sa mga Kristohanon ngadto sa mga gobyerno sa kalibotan?

⁹ Daghang kidlap sa kahayag ang midan-ag maylabot sa Kristohanong paggawi. Pananglitan, tagda ang neyutralidad. Usa ka masanag gayod nga kidlap sa kahayag ang midan-ag diha niining ulohana diha sa artikulong “Neutrality” nga migula sa The Watchtower sa Nobyembre 1, 1939. Pagkatukma kadto sa panahon, nga migula human gayod magsugod ang Gubat sa Kalibotan II! Gipatin-aw sa artikulo ang neyutralidad ug nagpakita nga ang mga Kristohanon dili angay mag-apil-apil sa mga kalihokan sa politika o sa mga gubat tali sa mga nasod. (Miqueas 4:3, 5; Juan 17:14, 16) Mao kini ang hinungdan kon nganong gidumtan sila sa tanang mga nasod. (Mateo 24:9) Ang mga gubat sa karaang Israel wala maghatag ug giya alang sa mga Kristohanon, sama sa gipatin-aw ni Jesus diha sa Mateo 26:52. Dugang pa, walay usa ka politikal nga nasod karon ang teokrasiya, nga gimandoan sa Diyos, sama sa karaang Israel.

10. Unsa ang gipahayag sa mga kidlap sa kahayag bahin sa kon unsaon paglantaw sa mga Kristohanon ang dugo?

¹⁰ Ang kahayag midan-ag usab bahin sa pagkabalaan sa dugo. Ang mga Estudyante sa Bibliya nagtuo nga ang pagdili batok sa pagkaon ug dugo, diha sa Buhat 15:28, 29, maoy limitado ngadto sa Hudiyohanong mga Kristohanon. Apan, ang Buhat 21:25 nagpakita nga sa panahon sa mga apostoles kining sugoa gipadapat usab ngadto sa mga nasod nga nahimong mga magtutuo. Busa ang pagkabalaan sa dugo ikapadapat ngadto sa tanang mga Kristohanon, sama sa gipakita sa The Watchtower sa Hulyo 1, 1945. Kana nagkahulogang dili lamang magadumili sa pagkaon sa dugo sa mananap, sama sa soriso nga dugo, kondili sa paglikay usab gikan sa dugo sa tawo, sama sa kaso sa mga pag-abunog dugo.

11. Unsa ang nasabtan bahin sa paglantaw sa mga Kristohanon sa paggamit ug tabako?

¹¹ Ingong resulta sa nagadugang nga kahayag, ang mga batasan nga sa sinugdan dili seryoso sa ulahi giatiman ingong usa ka seryoso nga sala. Ang usa ka pananglitan niini mao ang bahin sa paggamit sa tabako. Sa Zion’s Watch Tower sa Agosto 1, 1895, gipunting ni Igsoong Russell ang pagtagad ngadto sa 1 Corinto 10:31 ug sa 2 Corinto 7:1 ug misulat: “Dili ako makasabot kon sa unsang paagi mahimo kining kahimayaan sa Diyos, o sa iyang kaayohan, nga mogamit ang bisan kinsang Kristohanon ug tabako sa bisan unsang matang.” Sukad sa 1973 tin-awng nasabtan nga walay tigpanabako ang mahimong usa sa mga Saksi ni Jehova. Sa 1976 gipatin-aw nga walay Saksi ang mahimong magtrabaho sa mga sugalan ug magpabilin sa kongregasyon.

Uban Pang mga Pag-ulay

12. (a) Unsa ang gipadayag sa sidlak sa kahayag bahin sa gidaghanon sa mga yawi sa Gingharian nga gihatag kang Pedro? (b) Unsa ang mga sirkumstansiya nga gigamit ni Pedro ang matag usa ka yawi?

¹² Dihay dugang kahayag usab bahin sa gidaghanon sa simbolikong mga yawi nga gihatag ni Jesus kang Pedro. Ang mga Estudyante sa Bibliya nagtuo niadto nga si Pedro nakadawat ug duha ka yawi nga nagbukas sa dalan aron ang mga tawo mahimong manununod sa Gingharian​—ang usa alang sa mga Hudiyo, nga gigamit sa Pentekostes 33 K.P., ug ang usa pa alang sa mga Hentil, nga unang gigamit sa 36 K.P. sa dihang gisangyawan ni Pedro si Cornelio. (Buhat 2:14-41; 10:34-48) Sa ulahi, nasabtan nga adunay ikatulong grupo ang nalangkit​—ang mga Samarianhon. Gigamit ni Pedro ang ikaduhang yawi sa dihang gibuksan kanila ang kahigayonan sa Gingharian. (Buhat 8:14-17) Busa, ang ikatulong yawi gigamit sa gisangyawan ni Pedro si Cornelio.​—Ang Bantayanang Torre, Abril 1, 1980, mga panid 9-16, 19.

13. Unsa ang gipadayag sa mga sidlak sa kahayag bahin sa mga toril nga gihisgotan sa Juan kapitulo 10?

¹³ Gikan sa laing kidlap sa kahayag, nasabtan nga si Jesus naghisgot dili lamang duha kondili tulo ka toril sa karnero. (Juan, kapitulo 10) Kini mao (1) ang Hudiyohanong toril diin si Juan Bawtista mao ang magbalantay sa ganghaan, (2) ang toril sa dinihogang mga manununod sa Gingharian, ug (3) ang toril sa “ubang mga karnero,” nga adunay yutan-ong paglaom.​—Juan 10:2, 3, 15, 16; Ang Bantayanang Torre, Agosto 15, 1984, mga panid 10-21.

14. Sa unsang paagi gipatin-aw sa dugang nga kahayag ang bahin sa pagsugod sa antitipiko nga Tinghugyaw?

¹⁴ Ang pagsabot sa antitipiko nga Tinghugyaw nakadawat usab ug pila ka pagpatin-aw. Ilalom sa Kasugoan, ang matag ika-50ng tuig maoy usa ka dakong Tinghugyaw, diin ang mga butang iuli sa ilang orihinal nga mga tag-iya. (Levitico 25:10) Dugay nang gisabot nga kini naglandong sa Usa ka Libo ka Tuig nga Pagmando ni Kristo. Hinunoa, ning bag-o pa lang, nasabtan nga ang antitipikong Tinghugyaw sa aktuwal nagsugod sa Pentekostes 33 K.P., sa dihang kadtong nakadawat sa gibubo nga balaang espiritu gipahigawas gikan sa pagkaulipon sa pakigtugon sa Moisesnong Kasugoan.​—Ang Bantayanang Torre, Enero 1, 1987, mga panid 18-28.

Dugang Kahayag Bahin sa mga Termino

15. Unsang kahayag ang gihatag bahin sa paggamit sa pulong “plano”?

¹⁵ “Ang magtitipon nagtinguha sa pagpangita sa mga pulong nga kahimut-anan ug sa pagsulat sa hustong mga pulong sa kamatuoran.” (Ecclesiastes 12:10) Kining mga pulonga mahimong ikaaplikar sa atong gihisgotan karon, kay ang kahayag midan-ag dili lamang sa importanteng mga butang sama sa doktrina ug paggawi kondili sa Kristohanong mga termino usab ug sa hustong kahulogan niini. Pananglitan, taliwala sa mga Estudyante sa Bibliya, ang usa sa labing gikaikagan nga mga publikasyon mao ang tomo uno sa Studies in the Scriptures, nga nag-ulohang The Divine Plan of the Ages. Apan, naamgohan sa ulahi nga naghisgot ang Pulong sa Diyos nga ang mga tawo lamang ang maghimog mga plano. (Proverbio 19:21) Ang Kasulatan wala gayod maghisgot bahin kang Jehova nga nagplano. Dili siya kinahanglang magplano. Bisan unsa pay iyang mga katuyoan tino gayod nga molampos tungod sa iyang walay-kinutobang kaalam ug gahom, ingon sa mabasa nato sa Efeso 1:9, 10: “Maoy sumala sa iyang maayong kahimut-anan nga siya naglaraw diha sa iyang kaugalingon ug usa ka pagdumala inig-abot sa bug-os nga kinutoban sa tinudlong kapanahonan.” Mao nga anam-anam nga nasabtan nga ang terminong “katuyoan” mas haom kon maghisgot bahin kang Jehova.

16. Unsa ang anam-anam nga nasabtan ingong husto nga pagsabot sa Lucas 2:14?

¹⁶ Unya anaa usab ang bahin sa pagkabaton ug mas tin-aw nga pagsabot bahin sa Lucas 2:14. Sumala sa King James Version, kini mabasa: “Himaya sa Diyos sa kahitas-an, ug sa yuta pakigdait, maayong kabubut-on ngadto sa mga tawo.” Nasabtan nga wala kini magbutyag sa hustong panghunahuna, kay ang maayong kabubut-on sa Diyos wala ipakita ngadto sa mga daotan. Busa gilantaw sa mga Saksi kini ingong butang sa pakigdait ngadto sa mga tawong may maayog kabubut-on sa Diyos. Mao nga padayon nilang gitawag kadtong interesado sa Bibliya ingong mga tawo nga may maayog kabubut-on. Apan nasabtan sa ulahi nga ang nalangkit mao ang maayong kabubut-on, dili sa bahin sa mga tawo, kondili sa bahin sa Diyos. Busa, ang potnot sa New World Translation sa Lucas 2:14 naghisgot bahin sa “mga tawo nga iyang [Diyos] gikahimut-an.” Ang tanang mga Kristohanon nga nagkinabuhi sumala sa ilang panaad sa dedikasyon may maayong kabubut-on sa Diyos.

17, 18. Unsa ang ibindikar ni Jehova, ug unsa ang iyang pakabalaanon?

¹⁷ Sa susama, sa daghang tuig, ang mga Saksi naghisgot bahin sa pagbindikar sa ngalan ni Jehova. Apan gikuwestiyon ba ni Satanas ang ngalan ni Jehova? Bahin niana, gikuwestiyon ba sa mga ahente ni Satanas ang ngalan ni Jehova, nga daw si Jehova walay katungod nianang ngalana? Wala, wala gayod. Dili ang ngalan ni Jehova ang gihagit ug nga kinahanglang bindikahon. Maoy hinungdan kon nganong ang mga publikasyon sa Watch Tower Society sa ulahi wala maghisgot bahin sa ngalan ni Jehova ingon nga nabindikar. Naghisgot kini bahin sa soberanya ni Jehova ingong nabindikar ug sa iyang ngalan ingong napabalaan. Nahiuyon kini sa gisugo kanato ni Jesus nga iampo: “Pakabalaanon ang imong ngalan.” (Mateo 6:9) Sa masubsob, si Jehova miingon nga iyang pakabalaanon ang iyang ngalan, nga wala gayod hagita sa mga Israelinhon apan gipanamastamasan.​—Ezekiel 20:9, 14, 22; 36:23.

¹⁸ Makaiikag, sa 1971, ang librong “The Nations Shall Know That I Am Jehovah”​—How? nagpaila niini: “Si Jesu-Kristo nagapakig-away . . . sa pagbindikar sa pagkasoberano ni Jehova sa uniberso ug sa paghimaya sa ngalan ni Jehova.” (Panid 364-5) Sa 1973, ang God’s Kingdom of a Thousand Years Has Approached nag-ingon: “Ang umaabot nga ‘dakong kasakitan’ mao ang panahon nga mabindikar sa Labing Makagagahom nga Diyos nga si Jehova ang iyang pagkasoberano sa uniberso ug sa pagbalaan sa iyang takos nga ngalan.” (Panid 409) Unya, sa 1975, ang Man’s Salvation Out of World Distress at Hand! nag-ingon: “Ang labing dakong hitabo sa kasaysayan sa uniberso nianang panahona matuman, ang pagbindikar sa pagkasoberano ni Jehova sa uniberso ug ang pagbalaan sa iyang balaang ngalan.”​—Panid 281.

19, 20. Sa unsang paagi atong ikapakita ang atong apresasyon sa mga sidlak sa espirituwal nga kahayag?

¹⁹ Pagkabulahan sa katawhan ni Jehova nga nagatagamtam niining tanang espirituwal nga kahayag! Sa dako nga kabaliskaran, nagpadayag sa espirituwal nga kangitngit nga naagoman sa mga lider sa Kakristiyanohan mao kining pulong sa usa ka klerigo: “Nganong adunay sala? Nganong adunay pag-antos? Nganong adunay yawa? Mga pangutana kini nga gusto kong ipangutana sa Ginoo inig-abot nako sa langit.” Apan ang mga Saksi ni Jehova makasulti kaniya kon ngano: Tungod sa isyu bahin sa pagkamatarong sa pagkasoberano ni Jehova ug sa isyu kon ang tawhanong mga linalang magpabilin bang maunongon sa Diyos bisan pa sa pagsupak sa Yawa.

²⁰ Sa daghang tuig, ang mga kidlap sa kahayag nga dagko ug gagmay naglamdag sa dalan sa dedikadong mga alagad ni Jehova. Katumanan kini sa mga kasulatan sama sa Salmo 97:11 ug Proverbio 4:18. Apan dili gayod nato kalimtan nga ang paglakat diha sa kahayag nagkahulogan sa pagbaton ug apresasyon alang sa dugang nga kahayag ug sa pagkinabuhi nga nahiuyon niini. Sama sa atong nakita, kining dugang nga kahayag naglangkit sa atong paggawi ug sa atong buluhaton sa pagmantala.

[Footnote]

Nahinumdom Ka Ba?

◻ Unsang kahayag ang gihatag bahin sa pagpasakop sa “hataas nga mga gahom”?

◻ Misangpot ug unsang mga kauswagan sa organisasyon ang mga kidlap sa kahayag?

◻ Sa unsang paagi ang dugang kahayag nakaapekto sa Kristohanong paggawi?

◻ Ang espirituwal nga kahayag misangpot ug unsang mga pag-ulay sa atong pagsabot bahin sa pipila ka punto sa Kasulatan?

[Picture Credit Line sa panid 25]

Mga yawi sa panid 24: Dibuho gipasukad sa letrato nga kinuha sa Cooper-Hewitt, National Design Museum, Smithsonian Institution