Nausab na ang Kapanahonan

PAGKAMALIPAYON unta ang pagpuyo sa karaang Israel ubos sa bulahang pagmando sa matinumanong Haring Solomon! Kadto maoy usa ka yugto sa kalinaw, kadagaya, ug kalipay. Sa panahon nga si Solomon maunongong nagpaluyo sa matuod nga pagsimba, si Jehova dagayang nagpanalangin sa nasod. Gihatag sa Diyos kang Haring Solomon dili lamang ang dakong bahandi kondili ang ‘maalamon ug masinabtanong kasingkasing’ usab aron si Solomon magmando uban ang pagkamatarong ug gugma. (1 Hari 3:12) Ang Bibliya nag-ingon: “Ang tanang hari sa yuta nangita sa nawong ni Solomon aron makabati sa iyang kinaadman, nga gibutang sa matuod nga Diyos diha sa iyang kasingkasing.”​—2 Cronicas 9:23.

Si Jehova mihatag sa kasegurohan, kalinaw, ug dagayang maayong mga butang ngadto sa katawhan. Ang Pulong sa Diyos nag-ingon: “Ang Juda ug ang Israel daghan, ingon sa balas sa daplin sa dagat ang kadaghan, nga nanagpangaon ug nanagpanginom ug nanagsadya.” Sa literal ug masambingayong paagi, ang katawhan “nagpadayon pagpuyo diha sa kasegurohan, ang matag usa ilalom sa iyang kaugalingong kaparasan ug ilalom sa iyang kaugalingong kahoyng igos . . . sa tanang adlaw ni Solomon.”​—1 Hari 4:20, 25.

Nausab na ang kapanahonan. Ang kinabuhi karong adlawa lahi na kaayo niadtong malipayong mga adlaw kanhi. Lahi sa panahon ni Solomon, usa ka dakong suliran karong adlawa mao ang kakabos. Bisan sa datong kanasoran, adunay kakabos. Pananglitan, sa Tinipong Bansa ug sa Uropanhong Unyon, halos 15 porsiento sa katawhan nagpuyo sa kakabos, nagpahayag ang Programa sa Kaugmaran sa Hiniusang Kanasoran.

Mahitungod sa tibuok-kalibotang hulagway, ang The State of the World’s Children 1994, nga usa ka taho sa UNICEF (United Nations Children’s Fund), nag-ingon nga ang ikalimang bahin sa populasyon sa kalibotan nagpuyo sa tumang kakabos, nga nagkanayon pa nga ang pagkinabuhi alang sa kinabag-ang mga kabos sa kalibotan “nagkalisod ug dili na matabang.”

Sa pipila ka nasod, ang nagasulbong nga implasyon nakadugang sa mga kalisdanan sa mga kabos. Usa ka babaye sa usa ka Aprikanhong nasod miingon: “Duna kay makit-an sa merkado, ug moingon ka, ‘OK, mopauli usa ko ug mokuhag kuwarta aron mapalit kana.’ Mobalik ka human sa usa ka oras nga unya ingnan lamang nga dili nimo mapalit kana sa kuwartang imong dala tungod kay ang prisyo bag-o pang gipatas-an. Unsa man ang buhaton sa usa ka tawo? Pagkamakapahigawad gayod kini.”

Laing babaye didto ang miingon: ‘Aron mabuhi, kalimtan namo ang ubang mga kinahanglanon. Kon sa unsang paagi ang pagkaon mabatonan mao karon ang among giatubang.’

Sumala sa Hiniusang Kanasoran, ang umaabot mangiob. Pananglitan, gibanabana sa UNICEF nga kon ang mga kiling karon sa populasyon magpadayon, ang gidaghanon sa mga tawong kabos sa tibuok kalibotan moupat ka pilo “sulod sa usa ka gitas-on sa pagkinabuhi.”

Hinuon, bisan pa sa nagkagrabeng ekonomikanhon ug sosyal nga mga kahimtang, adunay katarongan nga magmalaomon ang mga alagad sa Diyos. Bisan pag sila nagkinabuhi taliwala niadtong nagpanan-aw sa umaabot uban sa nagdakong kadili-malaomon, gipanan-aw sa mga alagad sa Diyos ang umaabot uban sa kalipay ug pagkamasaligon. Tugkaron sa sunod artikulo ang mga katarongan.

[Picture Credit Line sa panid 3]

De Grunne/Sipa Press