Ang Sigpit nga Dalan Padulong sa Kagawasan
DIYUTAY rang intelihenteng tawo molalis nga ang uniberso gimandoan sa mga balaod sa kinaiyahan. Kining mga balaora nagamando sa tanang butang gikan sa gagmitoyng mga atomo ngadto sa dagkong mga galaksiya nga adunay bilyonbilyong kabituonan. Kon wala ang mga balaod sa kinaiyahan, walay pagplano ug walay pagsabot; ang kinabuhi mismo dili makalungtad. Tungod sa pagkasabot sa mga balaod sa kinaiyahan ug pakigtambayayong niini, ang tawo nakahimog tagsaong mga kahimoan, sama sa paglakaw sa bulan ug pagpadan-ag sa dekolor nga mga hulagway gikan sa bisan diing dapit sa yuta o bisan gikan pa sa gawas sa atmospera sa yuta nganha sa mga eskren sa telebisyon sa atong kabalayan.
Apan komosta man ang moral nga mga balaod? Ang pagsunod ba niini sama ka mapuslanon ug mabungahon? Daghan daw mibati nga wala ing moral nga mga balaod ug nagpili sa matugotong pilosopiya o sa relihiyon nga mosibo sa ilang kaugalingong mga tinguha.
Hinuon, adunay pipilang nagpili sa laing dalan, ang ‘sigpit nga dalan nga motultol ngadto sa kinabuhi’ sumala sa gilaraw diha sa Bibliya. Dili kita angay matingala nga kini maoy gipili sa minoriya lamang, kay si Jesus miingon bahin sa sigpit nga dalan: “Diyutay ra ang nakakaplag niini.” (Mateo 7:14) Nganong diyutay ra man?
Tungod kay ang sigpit nga agianan gipig-otan sa mga balaod ug mga prinsipyo sa Diyos. Madanihon lamang kini ngadto sa usang tim-os matinguhaon sa pagpahiuyon sa iyang kinabuhi ngadto sa mga sukdanan sa Diyos. Kasukwahi kaayo sa lapad nga dalan, nga mohatag sa handurawan sa kagawasan apan sa katinuoran moulipon, ang sigpit nga dalan, nga daw mapig-oton, mohatag ug kagawasan sa usa ka tawo diha sa matag hinungdanong bahin. Ang mga utlanan niini gitino sa “hingpit nga balaod nga iya sa kagawasan.”—Santiago 1:25.
Kon sa Unsang Paagi ang Sigpit nga Dalan Magpagawas
Tinuod, dili kanunayng sayon ang pagpabilin sa sigpit nga dalan. Ang matag buhing tawo dili hingpit ug adunay napanunod nga hilig sa pagbuhat ug daotan. Busa ang usa ka tawo tingali makiling sa pagtipas ug diyutay. Bisan pa niana, ang mga kaayohan sa pagpabilin sa ‘hagip-ot nga dalan’ takos sa bisan unsang gikinahanglang pagdisiplina-sa-kaugalingon o mga pagpasibo, kay ang Diyos ‘nagtudlo kanato sa pagpahimulos sa atong kaugalingon.’—Isaias 48:17; Roma 3:23.
Sa pag-ilustrar: Ang maalamong mga ginikanan maghan-ay ug usa ka ‘hagip-ot nga dalan’ labot sa pagkaon alang sa ilang mga anak. Usahay kini nagkahulogan sa pagkaestrikto panahon sa pagpangaon. Apan inigkadagko sa mga anak, ilang pabilhan ang mahigugmaong pagdisiplina sa ilang mga ginikanan. Ingong mga dagkong tawo, sila nakaugmad nag tinguha sa makapahimsog nga pagkaon. Ug tungod kay adunay nagkadaiyang sustansiyadong pagkaon sila dili gayod mobating gipig-otan.
Sa espirituwal nga paagi, sama ang gihimo sa Diyos uban niadtong nagsubay sa sigpit nga dalan padulong sa kinabuhi. Iyang giugmad diha sa mga maaghop ang maayong mga tinguha nga motultol sa kalipay ug sa tinuod nga kagawasan. Gihimo niya kini pinaagi sa pagtagana sa iyang Pulong, ang Bibliya. Dugang pa, gidapit niya kita nga moampo alang sa iyang espiritu sa pagtabang kanato, ug kita iyang gisugo nga makig-uban sa kaubang mga Kristohanon, kinsa makadasig kanato sa pagpabilin sa sigpit nga agianan. (Hebreohanon 10:24, 25) Oo, ang Diyos gugma, ug kining kinalabwang hiyas maoy nagpaluyo sa iyang mga tumong ug sa tanan niyang paagi.—1 Juan 4:8.
Sa dihang maglungtad ang gugma, pakigdait, pagkamaayo, pagpugong-sa-kaugalingon, ug ubang mga bunga sa espiritu sa Diyos, ang sigpit nga dalan mopatim-awng dili mapig-oton. Sumala sa giingon sa kasulatan, “batok nianang mga butanga wala ing balaod.” (Galacia 5:22, 23) “Kon asa ang espiritu ni Jehova, adunay kagawasan.” (2 Corinto 3:17) Bisan karon, ang matuod nga mga Kristohanon nagpahimulos na niining kagawasana. Sila nahigawas sa daghang kahadlok nga nagsakit sa katawhan karong adlawa, sama sa kahadlok bahin sa umaabot ug sa matuotuohong kahadlok sa kamatayon. Makapaukyab gayod ang pagpalandong sa umaabot sa dihang “ang yuta mapuno gayod sa kahibalo kang Jehova ingon sa katubigan nga nagtabon sa dagat mismo”! (Isaias 11:9) Sa maong panahon, bisan ang kahadlok sa krimen mawala na. Ang mga kandado ug mga rehas mahanaw na sa walay kataposan. Ang tanan mobating gawasnon ug luwas—adlaw ug gabii, sulod sa balay ug sa gawas. Kana unya maoy tinuod nga kagawasan!
Gipasaligan Kita sa Tabang sa Diyos
Tinuod, ang pagkinabuhi sumala sa mga sukdanan sa Diyos nagkinahanglag paningkamot, apan “ang iyang mga sugo dili mabug-at,” bisan alang sa dili-hingpit nga mga tawo. (1 Juan 5:3) Samtang magpasibo kita ngadto sa sigpit nga dalan ug mobati sa mga kaayohan sa pagsubay ibabaw niini, maugmad nato ang nagdakong pag-ayad sa mga paagi ug panghunahuna nga nagtimaan niadtong nagsubay sa lapad nga dalan. (Salmo 97:10) Ang pagsunod sa balaod sa Diyos madanihon sa atong hinatag-sa-Diyos nga konsensiya. Inay sa “kahapdos sa kasingkasing” ug “pagkagun-ob gayod sa espiritu” nga maoy kinaiyahan sa daghan, ang Diyos nagsaad: “Tan-awa! Ang akong kaugalingong mga alagad mopatugbaw nga mangayaon tungod sa maayong kahimtang sa kasingkasing.” Oo, ang kasingkasing nga nabansay ni Jehova maoy mangayaon ug may kagawasan.—Isaias 65:14.
Si Jesus namatay aron ang tinuod nga kagawasan atong maangkon. Ang Bibliya nag-ingon: “Gihigugma pag-ayo sa Diyos ang kalibotan mao nga iyang gihatag ang iyang bugtong-gianak nga Anak, aron nga ang tanan nga magapasundayag ug pagtuo kaniya dili malaglag kundili makabaton ug kinabuhing walay-kataposan.” (Juan 3:16) Karon, ingon nga Hari sa langitnong Gingharian sa Diyos, ginapadapat ni Jesus ang mga kaayohan sa maong halad. Sa dili na madugay, human sa “dakong kasakitan,” sa dihang ang lapad nga dalan ug kadtong nagsubay niana mangalaglag, mosugod siya sa paggiya nga mapailobon sa masinugtanong katawhan subay sa nahibilin sa sigpit nga dalan hangtod gayod sa kataposan niini, ang tawhanong kahingpitan. (Pinadayag 7:14-17; Mateo 24:21, 29-31) Sa kataposan atong maagoman ang katumanan sa halangdong saad: “Ang kalalangan mismo usab igapagawas gikan sa pagkaulipon sa pagkadunot ug makabaton sa mahimayaong kagawasan sa mga anak sa Diyos.” Dili hilabwan kining hinatag-sa-Diyos nga kagawasan. Bisan ang kamatayon mahanaw na.—Roma 8:21; Pinadayag 21:3, 4.
Tungod sa pagkakita ug pagkasabot sa tin-aw kon asa mosangko ang sigpit nga dalan, ang usa ka tawo mas makaarang sa pagpili niining dalana ug sa pagpadayon pagsubay niini. Ang mga batan-on ilabina katabangan nga dili mahimong mubog panglantaw ug dili mapikal tungod sa ilang isipong mga pagpig-ot nga gipahamtang sa mga sukdanan sa Diyos. Makatuon sila sa pagsabot niini ingong usa ka pamatuod sa gugma sa Diyos ug ingong panalipod batok sa mga kadaotan sa lapad nga dalan. (Hebreohanon 12:5, 6) Siyempre, ang usa kinahanglang mahimong mapailobon, nga maghinumdom nga nagkinahanglag panahon ang pag-ugmad sa diyosnong mga hiyas ug mga tinguha, maingon nga nagkinahanglag panahon aron ang kahoyng nagapamunga mamungag maayong mga bunga. Apan ang kahoy mamunga kon kini atimanon ug bisbisan.
Busa tun-i ang Pulong sa Diyos, makig-uban sa ubang mga Kristohanon, ug “pag-ampo sa walay hunong” alang sa balaang espiritu. (1 Tesalonica 5:17) Salig sa Diyos sa pagtabang kanimo “nga tul-iron ang imong mga agianan.” (Proverbio 3:5, 6) Apan praktikal ba kining tanan? Molampos ba gayod kini? Oo, kini milampos alang kang Tom maingon man kang Mary, kinsa gihisgotan sa naunang artikulo.
Mihunong Sila Pagsubay sa Lapad nga Dalan
Si Tom misulat: “Sa tungatunga sa katuigang 1970, nakahibalag kamig mga Saksi ni Jehova sa dihang usa kanila miduaw sa among balay. Ang panaghisgot misangko sa usa ka pagtuon sa Bibliya. Sa inanay gisugdan ko paghinlo ang akong kinabuhi. Nabawtismohan ako sa 1982 ug karon nagaalagad diha sa lokal nga kongregasyon. Ang among anak lalaki usab karon bawtismado na. Nagpasalamat ako sa akong asawa tungod sa pag-antos kanako sulod niadtong tanang katuigan sa wala pa ako masayod sa kamatuoran. Ug labaw sa tanan nagpasalamat ako kang Jehova ug sa iyang Anak, si Kristo Jesus, tungod sa tanang ilang gihatag kanamo ug tungod sa paglaom nga karon among gihambin alang sa umaabot.”
Ug komosta ba si Mary? Aw, mibati siyang ang Diyos dili na gayod magpasaylo kaniya, apan buot niya nga makakat-on bahin kaniya alang sa kaayohan sa iyang mga anak. Sa dihang nadunggan niyang ang mga Saksi ni Jehova nagtudlo sa Bibliya sa iyang silingan, siya usab mihangyo ug tabang. Ugaling, ang iyang nakadukot nang daotang mga bisyo nakapalisod sa pag-uswag. Ang pagtuon miagi sa mga yugto sa pag-uswag ug pagsibog. Ang iyang siyete-anyos nga batang babaye, hinunoa, nagpadayon pagdasig kaniya. “Ayawg hunong, Ma. Makahimo ka lagi niana!” siya moingon. Unya si Mary mas maningkamot.
Sa dihang ang iyang puyopuyo, nga tig-abuso usab ug droga, mibalik sa balay, siya miduyog usab sa pagtuon. Sa kadugayan ang duha nakabuntog sa ilang daotang mga bisyo. Unya, human ipalegal ang ilang kaminyoon ug magpabawtismo, natagamtam nila ang dakong kalipay ug mibating samag usa ka tinuod nga pamilya sa unang panahon. Ikasubo, ang AIDS sa kataposan mihunos sa kinabuhi ni Mary, apan namatay siyang ang iyang kasingkasing napunting sa saad sa Bibliya sa pagkabanhaw ug kinabuhi sa paraisong yuta, nga nahinloan sa tanang timaan sa madinaotong lapad nga dalan.
Oo, posible ang pagkawas sa lapad ug luag nga dalan nga mosangko sa kalaglagan. Si Kristo Jesus miingon: “Kini nagkahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Nan, nganong dili mohukom sa pagsubay sa sigpit nga dalan nga mosangko sa kinabuhi? Pinaagi sa pagbutang sa kasingkasing ug pagpadapat kon unsay imong natun-an gikan sa Pulong sa Diyos, ikaw mahimong makasinati sa personal sa makapadasig-sa-kasingkasing nga saad sa Bibliya: “Inyong mahibaloan ang kamatuoran, ug ang kamatuoran magpagawas kaninyo.”—Juan 8:32.