Pangabugho Hapit Magdaot sa Akong Kinabuhi

ANG pangabugho sa pagkatinuod nagsugod ug apektar kanako sa dihang naminyo ako sa akong ikaduhang bana, si Mark.a Tali kanamo, ginaatiman namo ang pipila ka humablos ug nakiglabot sa among mga kapikas kanhi. Ang kahimtang usahay dili maagwanta. Matag higayon nga may komprontasyon sa pamilya, daw dili ako paluyohan ni Mark. Nagsugod ako sa pagbati nga gihigugma gihapon niya ang iyang asawa kanhi. Imbes kontrolahon ang akong pangabugho, gitugotan nako kana sa pagkontrolar sa akong kinabuhi. Mahingawa ako matag higayong anaa ang asawa kanhi ni Mark.

Bantayan nako kanunay si Mark, tan-awon pa gani ang iyang mga mata sa pagsusi kon diin siya nagtan-aw. Akong gihatagag kahulogan ang iyang mga tinan-awan sa paagi nga wala gani niya hunahunaa. Usahay dayag nako siyang akusahon nga nahigugma gihapon siya sa iyang asawa kanhi. Usa niana ka higayon nasuko kaayo siya tungod niini nga siya mitindog ug mibiya sa Kristohanong asembliya. Gibati ko nga sad-an sa atubangan ni Jehova. Gihimo nakong miserable ang kinabuhi sa akong pamilya tungod kay sa ulahi naapektahan usab ang mga bata. Naglagot ako sa akong kaugalingon tungod sa akong nahimo, apan bisag unsang paningkamot ang akong himoon, daw dili gayod nako makontrolar ang akong pangabugho.

Inay tabangan ako, nagsugod na hinuon ug panimalos si Mark. Sa dihang ako siyang akusahon, singkahan niya ako, “Nangabugho, nangabugho ka lang.” Daw tuyoon pa gani niya nga paseloson ako. Tingali nagtuo siya nga kini makatambal sa akong pangabugho, apan nagpasamot lamang hinuon kini sa mga kahimtang. Nagsugod siyag tan-aw sa ubang mga babaye, nga mokomento kon unsa sila ka tahom tan-awon. Nagpasamot kini sa akong pagbati nga ubos ug sinalikway. Misangko kini sa punto diin ang laing emosyon​—pagdumot—​mibutho ingong ngil-ad nga kamatuoran. Nianang higayona, naglibog ako kaayo nga gusto ko nga siya ug ang iyang pamilya mawala sa akong kinabuhi.

Sa dihang ang Bibliya moingon nga “ang pangabugho maoy pagkadunot sa kabukogan,” tinuod gayod kana. (Proverbio 14:30) Niadtong tungora naapektohan ang akong panglawas. Nagkaulser ako sa tiyan nga dugaydugay nga naayo. Padayon nakong gihimong miserable ang akong kinabuhi pinaagi sa pagkatahap sa tanang butang nga himoon ni Mark. Akong tan-awon ang iyang mga bulsa, ug kon makakita akog numero sa telepono, akong teleponohan aron sayron kon kinsa ang motubag. Sa akong kahiladman naulaw gayod ako sa akong kaugalingon, mohilak ako tungod sa kaulaw sa atubangan ni Jehova. Bisan pa dili nako mapugngan ang akong kaugalingon. Ako ang kinagrabehan nakong kaaway.

Nadaot ang akong espirituwalidad sa punto nga dili na ako makaampo. Gihigugma ko si Jehova ug sa pagkatinuod buot nakong himoon kon unsa ang matarong. Nahibalo ako sa tanang teksto bahin sa mga bana ug mga asawa, apan dili nako kana mapadapat. Sa unang higayon sa akong kinabuhi, dili na ako gustong mabuhi, bisan pa sa kamatuoran nga ako may matahom nga mga anak.

Ang mga ansiano sa Kristohanong kongregasyon nakapadasig gayod ug mihimo kutob sa ilang maarangan sa pagtabang kanako. Apan sa dihang ilang hisgotan ang bahin sa akong pangabugho, ako kanang ipanghimakak tungod sa kaulaw, nga dili buot moadmiter nga may suliran ako niana.

Ngadtongadto, nadaot ang akong panglawas hangtod sa punto nga kinahanglan akong magpaospital alang sa usa ka operasyon. Samtang didto akong naamgohan nga dili mahimong magpadayon ang kinabuhi nga ingon niana. Si Mark ug ako nakahukom sa pagbulag sulod sa tulo ka bulan aron masusi ang among kahimtang nga dili kaayo malangkit ang emosyon. Niining panahona usa ka maayong butang ang nahitabo. Sa magasing Pagmata! may migula nga artikulo nga nag-ulohang “Tabang Alang sa Hamtong nga mga Bata sa mga Alkoholiko.”b

Abi god nimo, ang akong inahan maoy usa ka alkoholiko. Bisan tuod wala ako abusohi sa pisikal, ang akong mga ginikanan wala gayod magpakitag pisikal nga pagmahal alang sa usag usa o kanako. Wala akoy mahinumdoman nga gigakos ako sa akong inahan o gisultihan ako nga gimahal niya ako. Busa ako nagdako nga wala gayod mahibalo kon unsaon sa paghigugma o, sama ka hinungdanon, kon sa unsang paagi higugmaon.

Sultihan ako kanunay sa akong inahan bahin sa pagpamabaye sa akong amahan ug nga siya dili gayod makasalig kaniya. Mao nga sa akong pagtuo ako nagdako nga walay pagsalig sa mga lalaki sa kinatibuk-an. Tungod sa pagmatuto kanako, kanunay nakong bation nga ubos sa uban, ilabina sa ubang mga babaye. Ang pagbasa sa maong artikulo sa Pagmata! nakatabang kanako sa pagsabot sa kahulogan niining mga butanga. Sa unang higayon, akong nasabtan ang gamot nga mga hinungdan sa akong suliran sa pangabugho.

Akong gipakita ang artikulo sa Pagmata! ngadto sa akong bana, si Mark, ug kini nakatabang usab kaniya nga makasabot pa kanako ug mas maayo. Sa wala madugay siya ug ako nakahimo sa pagsunod sa tambag sa Bibliya alang sa mga magtiayon nga naghunahuna sa pagbulag. Nagkauli kami. (1 Corinto 7:10, 11) Karon ang among kaminyoon mas maayo na kay sa kaniadto. Magkauban kaming magbuhat sa kadaghanan sa mga butang, ilabina kon bahin sa Kristohanong mga kalihokan. Si Mark nagpakita ug dugang empatiya. Halos matag adlaw iya akong sultihan nga gihigugma gayod niya ako, ug karon nagtuo gayod ako niana.

Sa dihang masayod ako nga makigkita kami sa asawa kanhi ni Mark, moampo ako kang Jehova alang sa kusog, mohangyo kaniya nga tabangan ako sa paggawi sa hamtong Kristohanong paagi. Ug kini miobra. Bisan gani ang akong kasuko kaniya nag-anam-anam ka wala. Wala na ako maghambin ug negatibong mga hunahuna o magtugot nga maghingapin ang akong imahinasyon.

Ako mobati gihapon usahay ug dili-angay nga pangabugho. Ang hingpit lamang nga kinabuhi sa bag-ong kalibotan sa Diyos ang bug-os makawagtang niana gikan kanako. Kasamtangan, nakakat-on ako sa pagkontrolar sa pangabugho, imbes tugotan kana nga maoy mokontrolar kanako. Oo, ang pangabugho hapit magdaot sa akong kinabuhi, apan tungod kang Jehova ug sa iyang organisasyon, mas malipayon na ako karon nga tawo, ug naulian ako sa akong normal nga panglawas. Sa makausa pa ako aduna nay maayong relasyon uban sa akong Diyos, si Jehova.​—Tinampo.

[Footnote]