Usa ka Mas Maayong Kinabuhi—Sa Dili Madugay!

HUNAHUNAA ang usa ka tigbalita sa kahimtang sa panahon kansang mga balita tukma kanunay. Kon ibalita niya sa panggabii nga balita nga moulan sa sunod adlaw, dili ka magpanuko sa pagdala sa imong payong inigbiya nimo sa balay sa sunod buntag. Ang iyang rekord sa nangagi nakakuha sa imong kompiyansa. Molihok ka sumala sa iyang isulti.

Karon, unsa ka tinuod ang saad ni Jehova bahin sa usa ka mas maayong kinabuhi diha sa paraisong yuta? Buweno, unsay gipakita sa iyang rekord sa nangagi? Ang katumanan sa mga tagna sa Bibliya sa tin-aw nagpalig-on sa rekord ni Jehova. Siya maoy usa ka Diyos nga walay-pagkapakyas ang katukma ug kamatinud-anon. (Josue 23:14; Isaias 55:11) Kasaligan kaayo ang mga saad ni Jehova nga Diyos nga usahay siya sa aktuwal naghisgot sa gisaad nga mga hitabo sa umaabot ingon nga daw kini nahitabo na. Pananglitan, human sa iyang saad bahin sa usa ka bag-ong kalibotan diin ang kamatayon ug pagbalata mawala na, atong mabasa: “Kini [ang gisaad nga mga panalangin] napahinabo na!” Sa laing pagkasulti, “Kini maoy tinuod!”​—Pinadayag 21:5, 6, potnot.

Oo, ang katumanan sa nangaging mga tagna ni Jehova naghatag kanatog kompiyansa sa katumanan sa iyang saad bahin sa usa ka mas maayong kinabuhi alang sa katawhan. Apan kanus-a moabot kining mas maayong kinabuhi?

Usa ka Mas Maayong Kinabuhi​—Kanus-a?

Usa ka mas maayong kinabuhi moabot sa dili madugay! Makaseguro kita niana tungod kay ang Bibliya nag-ingon nga daghang daotang butang ang mahitabo sa yuta sa dili pa ipasulod ang usa ka mas maayong kinabuhi sa Paraiso. Kadtong daotang mga butang nagakahitabo na karon.

Pananglitan, si Jesu-Kristo mitagna nga aduna unyay dagkong mga gubat. Siya miingon: “Ang nasod motindog batok nasod ug gingharian batok gingharian.” (Mateo 24:7) Kining tagnaa natuman. Sa katuigang 1914 hangtod sa 1945, dihay duha ka gubat sa kalibotan, ug kini nasundan ug daghang ubang mga gubat diin ang mga nasod nagsangkaay sa usag usa. “Sa tinuig nga aberids, ang gidaghanon sa nangamatay sa gubat niining yugtoa [sukad sa Gubat Kalibotan II] milabaw sa duha ka pilo sa mga nangamatay sa ika-19ng siglo ug pito ka pilo nga mas daghan kay sa ika-18ng siglo.”​—World Military and Social Expenditures 1993.

Ang pagkaylap sa sakit maoy laing ebidensiya sa pagkaduol sa usa ka mas maayong kinabuhi sa Paraiso. Gitagna ni Jesus nga aduna unyay ‘mga kamatay sa usa ka dapit ngadto sa lain.’ (Lucas 21:11) Natuman ba kining tagnaa? Oo. Human sa unang gubat sa kalibotan, ang trangkaso Espanyola nakapatay ug kapin sa 20 ka milyong tawo. Sukad niadto, ang kanser, sakit sa kasingkasing, malaria, AIDS, ug ubang mga sakit mipatay ug milyonmilyong mga tawo. Sa nagakaugmad nga kanasoran, ang mga sakit gumikan sa hugawng tubig (lakip ang kalibang ug mga impeksiyon tungod sa bitok sa tiyan) nakapatayg milyonmilyong mga kinabuhi matag tuig.

Si Jesus usab miingon: “Aduna unyay mga kakulang sa pagkaon.” (Mateo 24:7) Sama sa giingon sa nag-unang artikulo, ang kabos sa kalibotan walay igong pagkaon. Kini maoy laing bahin sa ebidensiya nga ang usa ka mas maayong kinabuhi sa Paraiso moabot na sa dili madugay.

“Aduna unyay dagkong mga linog,” matod ni Jesus. (Lucas 21:11) Kini natuman usab sa atong panahon. Sukad sa 1914 ang kagun-oban sa malaglagong mga linog nakahunos sa ginatos ka linibong kinabuhi.

Ang Bibliya dugang nag-ingon nga ang “kataposang mga adlaw” pagatiman-an ug kausaban diha mga tawo. Sila mahimong “mahigugmaon sa kaugalingon” ug “mga mahigugmaon sa salapi,” ug ang kabataan mahimong “dili-masinugtanon sa mga ginikanan.” Ang katawhan sa katibuk-an mahimong “mga mahigugmaon sa kalipayan inay nga mga mahigugmaon sa Diyos.” (2 Timoteo 3:1-5) Dili ka ba mouyon nga daghan ang mohaom niini nga kahubitan?

Samtang nagkadaghang tawo ang nagbuhat ug daotang mga butang, adunay pag-uswag sa kalapasan. Kini usab gitagna. Sumala sa Mateo 24:12, si Jesus naghisgot bahin sa “pag-uswag sa kalapasan.” Malagmit mouyon ka nga ang krimen mapintas karon kay sa mga tuig nga miagi. Ang mga tawo bisan diin nangahadlok nga sila kawatan, limbongan, o daoton sa ubang paagi.

Ang mga gubat, pagkaylap sa sakit, mga kanihit sa pagkaon, mga linog, nag-uswag nga krimen, ug kausaban sa ikadaot sa tawhanong mga relasyon​—kining tanan maoy dayag karon, sumala gayod sa gitagna sa Bibliya. ‘Apan dili ba kining mga butanga nahitabo man sa tibuok nga kasaysayan sa tawo?’ ikaw tingali mangutana. ‘Unsay nakalahi sa atong adlaw?’

Adunay pipila ka talagsaon kaayong mga bahin sa nagakahitabo karon. Ang Bibliya walay giingon nga ang bisan unsang usa ka bahin, sama sa mga kanihit sa pagkaon, ang sa kaugalingon niini mahimo unyang pamatuod nga kita nagkinabuhi na sa panahon sa kataposan ug nga ang usa ka mas maayong kinabuhi haduol na. Ang mga tagna sa Bibliya bahin sa panahon sa kataposan mamatuman diha sa walay-diyos nga kaliwatan.​—Mateo 24:34-39; Lucas 17:26, 27.

Dugang pa, talagsaon gayod nga ang pipila ka bahin sa tagna ni Jesus​—ilabina niadtong bahin sa mga kanihit sa pagkaon ug pagkaylap sa sakit​—nagakatuman karon. Ngano? Tungod kay ang mga kauswagan sa siyensiya mas dako karon. Ang kahibalo sa medisina ug mga matang sa pagtambal mas uswag o kaylap karon. Ang Diyos lamang ang makatagna diha sa iyang Pulong, ang Bibliya, nga sa maong panahon, ang sakit ug kagutmanan mosamot pa, dili moarang-arang.

Sanglit ang tanang tagna sa Bibliya mahitungod sa panahon sa kataposan, o “sa kataposang mga adlaw,” nagakatuman na, unsay atong ikahinapos? Nga ang usa ka mas maayong kinabuhi haduol na! Apan sa unsang paagi moabot kini?

Usa ka Mas Maayong Kinabuhi—Sa Unsang Paagi?

Nagtuo ka ba nga ang tawo makapatunghag Paraiso? Sa tibuok kasaysayan hangtod niining adlawa, adunay daghang matang sa tawhanong gobyerno. Ang uban naningkamot pag-ayo sa pagtagbaw sa mga panginahanglan sa mga tawo. Bisan pa niana, daghang problema ang misamot pa. Sa adunahang mga nasod ug sa kabos nga mga nasod, ang mga gobyerno nakigbisog batok sa pag-abuso sa droga, dili maayong pamalay, kakabos, krimen, kawalay-trabaho, ug panaggubat.

Bisan kon ang mga gobyerno makasulbad sa pipila niining mga problemaha, sila dili gayod makatagana ug bug-os nga kagawasan gikan sa daot nga panglawas; ni makatapos sila sa pagkatigulang ug kamatayon. Tin-aw, ang tawo dili gayod makapatunghag Paraiso niining yutaa.

Ang Bibliya maalamong nag-ingon: “Ayawg ibutang ang imong pagsalig sa mga dungganon, ni diha sa anak nga lalaki sa yutan-ong tawo, nga kaniya walay kaluwasan.” Nan, kang kinsa nato ibutang ang atong pagsalig? Ang Bibliya mitubag: “Malipayon ang usa kinsa nakabaton sa Diyos ni Jacob nga iyang tabang, kansang paglaom anaa kang Jehova nga iyang Diyos.” (Salmo 146:3, 5) Kon ibutang nato ang atong paglaom diha kang Jehova nga Diyos, dili gayod kita mahigawad.

Sa pagkatinuod ang Usa nga may kaalam ug gahom sa paglalang sa yuta, sa adlaw, ug sa mga bituon makahimo usab sa yuta nga usa ka paraiso. Siya makahimo sa tawo sa pagtagamtam ug mas maayong kinabuhi. Bisan unsa pa ang buot buhaton ni Jehova nga Diyos, siya makabuhat ug makatuman niana. Ang iyang Pulong nag-ingon: “Tungod kay sa Diyos walay kapahayagan nga maimposible.” (Lucas 1:37) Apan sa unsang paagi ipatungha sa Diyos ang usa ka mas maayong kinabuhi?

Ipatungha ni Jehova sa katawhan ang usa ka mas maayong kinabuhi pinaagi sa iyang Gingharian. Ug unsa ang Gingharian sa Diyos? Kini maoy usa ka tinuod nga gobyerno nga may tinudlo-sa-Diyos nga Magmamando, si Jesu-Kristo. Ang Gingharian sa Diyos nahimutang sa langit, apan kini sa dili madugay magdalag kahibulongang mga panalangin ug usa ka mas maayong kinabuhi alang sa mga molupyo sa Paraisong yuta.​—Isaias 9:6, 7.

Ikaw tingali pamilyar na sa sulondang pag-ampo ni Jesus, nga makita diha sa Bibliya sa Mateo 6:9-13. Ang bahin niana nga pag-ampo ngadto sa Diyos nag-ingon: “Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” Nahiuyon niana nga pag-ampo, ang Gingharian sa Diyos “moanhi” sa pagtuman sa katuyoan ni Jehova nga Diyos alang sa yuta. Ug maoy iyang katuyoan nga ang yuta mahimong usa ka paraiso.

Motungha ang kataposang usa ka pangutana: Unsay kinahanglan nimong buhaton aron matagamtam ang usa ka mas maayong kinabuhi diha sa umaabot nga Paraiso?

Kon Unsay Kinahanglan Nimong Buhaton

Si Jehova nga Diyos mahigugmaong nagtaganag palaaboton nga usa ka mas maayong kinabuhi sa Paraiso alang sa tanan nga motuman sa iyang kabubut-on. Ang Bibliya nag-ingon kanato: “Ang mga matarong magapanunod sa yuta, ug sila magapuyo diha niana sa walay kataposan.” (Salmo 37:29) Apan unsay maghimo sa usa ka tawo nga matarong sa panan-aw sa Diyos?

Aron pahimut-an si Jehova kinahanglan kitang magtuon ug dugang kon unsay buot niya nga atong buhaton. Kon mokuha kitag kahibalo sa Diyos ug ipadapat kini sa atong mga kinabuhi, kita mabuhi nga walay kataposan. Sa pag-ampo ngadto sa Diyos, si Jesus miingon: “Kini nagakahulogan ug kinabuhing walay-kataposan, ang ilang pagkuha ug kahibalo kanimo, ang bugtong matuod nga Diyos, ug sa usa nga imong gipadala, si Jesu-Kristo.”​—Juan 17:3.

Ang basahon nga nagtug-an kanato bahin kang Jehova nga Diyos ug kang Jesu-Kristo mao ang Pulong sa Diyos, ang Bibliya. Usa kini sa labing bililhong mga gasa ni Jehova. Ang Bibliya maoy samag usa ka sulat gikan sa usa ka mahigugmaong amahan ngadto sa iyang mga anak. Kini nagtug-an kanato bahin sa saad sa Diyos sa pagtaganag usa ka mas maayong kinabuhi alang sa katawhan ug nagpakita kanato kon sa unsang paagi kita makabaton niana. Ang Bibliya nagpahibalo kanato kon unsay gibuhat sa Diyos sa nangagi ug kon unsay iyang pagabuhaton sa umaabot. Kini naghatag usab kanatog praktikal nga tambag bahin sa kon unsaon sa pag-atubang nga malamposon ang atong mga problema karon. Sa pagkatinuod, ang Pulong sa Diyos nagtudlo kanato kon sa unsang paagi makaplagan ang usa ka sukod sa kalipay bisan diha niining gubot nga kalibotan.​—2 Timoteo 3:16, 17.

Ang mga Saksi ni Jehova malipay sa paghikay ug usa ka libreng pagtuon sa Bibliya alang kanimo. Tun-i kon sa unsang paagi mabatonan nimo ang usa ka mas malipayong kinabuhi karon, uban sa palaaboton nga usa ka mas maayong kinabuhi sa haduol nga umaabot.

[Hulagway sa panid 5]

Ang mga tagna sa Bibliya nagpakita nga haduol na ang mas maayong kinabuhi

[Hulagway sa panid 7]

Itagana sa Gingharian sa Diyos ang usa ka mas maayong kinabuhi alang sa katawhan