Mga Magmamantala sa Gingharian Nagtaho
“Himoa ang Buluhaton sa Usa ka Tig-ebanghelyo”
UNSAY kahulogan sa pagkahimong tig-ebanghelyo? Ang pulong maoy hubad sa Gregong eu·ag·ge·li·stesʹ, nga suod nga nalangkit sa pulong nga eu·ag·geʹli·on, nga nagkahulogang “maayong balita.” Busa, ang tig-ebanghelyo maoy usa ka magsasangyaw, o mensahero, sa maayong balita.
Ang tanang tinuod nga Kristohanon maoy mga tig-ebanghelyo tungod kay sila nagmantala sa maayong balita mahitungod sa Gingharian sa Diyos. Sa kahaom, si apostol Pablo nagtambag kang Timoteo nga “himoa ang buluhaton sa usa ka tig-ebanghelyo.” Kinahanglang magmasinsero si Timoteo sa iyang buluhaton. Giawhag siya ni Pablo nga ‘huptan ang iyang panimuot sa tanang butang’ ug ‘buhaton sa bug-os ang iyang ministeryo.’—2 Timoteo 4:5.
Ingong mga tig-ebanghelyo kita usab magmasinsero sa atong ministeryo ug ‘huptan ang atong panimuot,’ o magpabiling alisto sa pagpakig-ambit sa maayong balita sa tanang kahigayonan. Sa ingon daghan ang nakaila kang Jehova ug sa iyang mga saad human makontak sa mga Saksi ni Jehovah diha sa di-pormal nga pagsangyaw. Mao kini ang nahitabo kang Seymore, nga usa ka lalaki sa Barbados.
Si Seymore maoy usa ka magtutudlo sa publikong tunghaan. Si Charles, nga usa ka dili-bug-os-panahong magtutudlo sa samang tunghaan ug usa sa mga Saksi ni Jehova, maoy alistong tig-ebanghelyo. Siya maoy bug-os-panahong ministro, o payunir, ug naggamit sa tanang kahigayonan sa pagpakig-ambit sa maayong balita sa uban. Maoy pinaagi sa di-pormal nga pagsangyaw ni Charles nga si Seymore nakadungog sa mensahe sa Gingharian sa unang higayon.
Wala madugay si Seymore determinado usab nga ipaambit ang mga kamatuoran sa Bibliya uban sa daghang tawo kutob sa maarangan. Busa siya misugod ug di-pormal nga mga kabildohay uban sa mga tawo sa iyang trabahoan, ilabina sa iyang mga estudyante. Bisan tuod sa ubang nasod ang relihiyon kinahanglang dili itudlo sa publikong mga tunghaan, kining tawhana giasayn nga magtudlo ug relihiyoso ug moral nga mga prinsipyo. Apan niadtong tungora ang kanhing mga panghunahuna ni Seymore niining mga butanga napulihan sa iyang bag-ong nabatonang kahibalo sa Bibliya. Panahon sa mga yugto sa pagpahulay, makigsulti siya sa iyang mga estudyante mahitungod sa saad sa Diyos sa usa ka bag-ong kalibotan ug sa paglaom sa walay-kataposang kinabuhi.
Unsay sanong sa mga bata? Daghan ang nagpakita ug tinuod nga interes sa maayong balita sa Gingharian ni Jehova. Sa paglabay sa panahon, si Seymore misugod sa pagdumala ug mga panagtuon sa Bibliya uban sa 13 sa iyang mga estudyante. Hilabihan gayod ang ilang interes nga gihikay nila nga magtuon sa Bibliya kaduha sa usa ka semana. Ngadtongadto kadaghanan kanila nagsugod sa pagtambong sa Kristohanong mga tigom sa lokal nga Kingdom Hall sa mga Saksi ni Jehova. Hangtod karon siyam kanila ang nahimong dedikado ug bawtismadong mga Saksi ni Jehova. Bahin kang Seymore, gibuhat niya sa bug-os ang iyang ministeryo karon pinaagi sa pag-alagad ingong regular payunir ug ansiano sa usa ka kongregasyon sa mga Saksi ni Jehova sa Barbados.
Usa lamang kini ka pananglitan kon sa unsang paagi ang mga Saksi ni Jehova sa tibuok kalibotan ‘nagbuhat sa buluhaton sa mga tig-ebanghelyo,’ sa bahin pinaagi sa di-pormal nga pagsangyaw. Gisunod nila ang tambag sa Bibliya nga makaplagan sa Colosas 4:5, 6, nga nag-ingon: “Padayon sa paglakaw diha sa kaalam ngadto kanilang anaa sa gawas, nga magapalit sa nahiangayng panahon alang sa inyong kaugalingon. Himoa ang inyong pamulong nga kanunay may pagkamadanihon, tinimplahan ug asin, aron mahibaloan kon sa unsang paagi angay kamo magahatag ug tubag ngadto sa matag usa.”