Sila Nagtigom Ingong Malipayong mga Magdadayeg
ANG karaang katawhan ni Jehova nga Diyos gisugo nga “magmalipayon” sa dihang sila nagkatigom alang sa pagsimba. (Deuteronomio 16:15) Ang “Malipayong mga Magdadayeg” Distritong mga Kombensiyon sa 1995/96 sa pagkatinuod naghatag sa mga Saksi ni Jehova ug maayong mga katarongan sa pagkalipay.Sukad nga nagsugod kining seryal sa mga kombensiyon, naglig-on sila sa pagtuo. Gipakita usab nila kon sa unsang paagi makaplagan ang kalipay diha sa walay-kalipay nga kalibotan. Tagdon nato ang kombensiyon sa matag adlaw.
‘Dayega Ninyo si Jehova . . . Magmalipayon!’
Ang tema sa itaas sa unang adlaw sa kombensiyon gipasukad diha sa Salmo 1491, 2. Ang diskurso nga “Kita Adunay Katarongan sa Pagsinggit sa Kalipay” nagsusi sa aplikasyon sa tagna sa Isaias kapitulo 35. Kini natuman sa karaang Israel ug ilabina sa atong adlaw sa napasig-uli ang mga magsisimba ni Jehova ngadto sa kauswagan ug maayong panglawas diha sa usa ka espirituwal nga paraiso. Busa, ang mga kombensiyonista may katarongan sa pagsinggit sa kalipay tungod sa gimbut-an sa Diyos alang sa iyang katawhan diha sa usa ka espirituwal nga paraiso ug sa umaabot pisikal nga Paraiso nga haduol na kaayo.
Ang yawing pakigpulong, “Nahimulag Ingong Malipayong mga Magdadayeg sa Tibuok-Yuta,” nagtubag sa pangutana: Unsay nagpahimulag kanato gikan niining kalibotana? Kini mao ang atong nahiusang pagsimba kang Jehova. Bisag asa pang dapita nagpuyo ang mga Saksi ni Jehova niining yutaa, sila nagasulti ug nagatudlo nga may panag-uyon. Sila malipayon, usab, sa dakong katuyoan ni Jehova sa pagbalaan sa iyang balaang ngalan ug sa pagbindikar sa iyang pagkasoberano pinaagi sa iyang Gingharian. Apan, sa unsang paagi tabangan kita ni Jehova nga makabatog dapit diha sa iyang katuyoan? Kita iyang gipiyalan sa kamatuoran sa iyang balaang Pulong. Kita gihatagan sa Diyos sa iyang balaang espiritu. Kita iyang gipanalanginan ug tibuok-yuta nga panag-igsoonay ug kahikayan alang sa putling pagsimba. Ang atong internasyonal nga pamilya nagtabang kanato sa pag-alagad kang Jehova nga may dakong kalipay sa kasingkasing.
Ang “Paghupot nga Bulag ug Walay Buling Gikan sa Kalibotan” nagpasiugda sa panginahanglan sa paglikay sa mga lama sa pagpihig ug mga paniglain sa klase sa pagkatawo. (Santiago 2:5-9) Ang pipila tingali makig-uban lamang sa mga tawo nga samag kagikan o pagkabutang, nga dili-magtagad sa isigka-Kristohanon nga mga kabos o nagkalisodlisod. Ang uban tingali kiling sa paghatag ug pabor niadtong adunay mga posisyon sa kaakohan diha sa kongregasyon. Nalimtan nila nga ang kinadak-ang pribilehiyo nga mabatonan ni bisan kinsa mao ang pagkahimong usa ka Saksi ni Jehova. Busa, kinahanglang dili nato tugotan nga ang kalibotanong mga kiling maghugaw kanato ug magdaot sa kalinaw sa kongregasyon.—2 Pedro 3:14.
Ang pakigpulong nga “Andam na ba Akong Magminyo?” nagpasiugda nga daghan ang nagdalidali sa pagminyo. Ang pipila nagminyo aron makalingkawas sa malisod nga kahimtang sa panimalay o tungod kay ang ilang mga isigkaingon magminyoay na. Hinunoa, ang tinuod nga mga katarongan sa pagminyo naglakip sa tinguha nilang duha sa pagpangagpas ug teokratikanhong mga tumong, tiunay nga gugma, panginahanglan sa pag-ubanay ug seguridad, ug tinguha nga makabaton ug anak. Ang espirituwal nga pagbansay hinungdanon sa pagpangandam sa kaminyoon. Lakip sa ubang mga butang, adunay panginahanglan sa pagtukod ug tilinguhaong mga hiyas pinaagi sa pagsul-ob ug bag-ong personalidad. Maalamon usab ang pagtino kon ang umaabot nga kapikas makahatag ug pamatuod nga adunay tinuod nga relasyon uban kang Jehova ug nakiglabot nga matinahoron sa uban. Maalamon usab ang pagpangayog tambag gikan sa hamtong nga mga Kristohanon.—Proverbio 11:14.
Kining impormatibong pakigpulong gisundan sa usa nga nag-ulohang “Mga Ginikanan nga Nakakaplag ug Kahimuot Diha sa Ilang mga Anak.” Ang pagkatawo sa usa ka bata maoy sagad usa ka panahon sa dakong paglipay. Apan, ang pagbatog anak usab adunay dakong kaakohan. (Salmo 127:3) Busa, hinungdanon nga ang mga anak tudloan sa paghigugma kang Jehova. Mahimo kini sa mga ginikanan pinaagi sa kanunayng paghisgot bahin kang Jehova ngadto sa ilang mga anak ug pinaagi sa pagpadapat sa mga prinsipyo sa iyang Pulong diha sa pamilya.
Ang unang adlaw sa kombensiyon natapos uban ang usa ka sorprisa—ang pagluwat sa bag-ong brosyur nga Mga Saksi ni Jehova ug Edukasyon. Tin-awng gibatbat niini nga ang mga Saksi “nagdasig sa ilang mga anak sa pagpaningkamot ug maayo ug sa pagtagad ug maayo sa mga buluhaton nga gihatag kanila sa tunghaan.” Kining publikasyona nagpatin-aw usab sa talagsaong mga resulta sa mga saring sa literasiya sa mga Saksi ni Jehova nga gidumala sa daghang katuigan sa Nigeria, Mexico, ug sa ubang kanasoran. Ang brosyur makatabang gayod sa mga edukador sa pagkakita nga atong gihatagan ug dakong importansiya ang edukasyon.
“Managtanyag Kanunay sa Diyos ug Halad sa Pagdayeg”
Ang nag-una nga tema sa ikaduhang adlaw gipasukad diha sa Hebreohanon 13:15. Ang programa sa buntag nagpresentar sa simposyum bahin sa “Pagtubag sa Panawag sa Pagdayeg Kang Jehova.” Ang pangedaron dili babag sa pagtubag niining panawaga. Ang Salmo 148:12, 13 nag-awhag sa mga batan-ong lalaki, mga ulay, mga tigulang nga lalaki, ug mga batang lalaki sa pagdayeg kang Jehova. Daghan sa malipayong mga alagad ni Jehova nakahimo sa pagpauswag sa ilang pagdayeg. Sa tibuok yuta, kapin sa 600,000 ang nakigbahin sa bug-os-panahong pagsangyaw nga kalihokan, o payunir nga pag-alagad. Kapin sa 15,000 ang nakigbahin sa espesyal payunir nga buluhaton, ug kapin sa 15,000 ang nag-alagad sa Bethel.
“Pag-alagad nga Maunongon Uban sa Organisasyon ni Jehova” maoy usa ka pakigpulong nga nagpakita nga ang pagkamaunongon hinungdanon sa mga alagad sa Diyos. Ang pagkamaunongon kang Jehova nagpasabot sa pagtapot kaniya uban ang malig-on kaayong debosyon nga kini magsilbing samag pangdikit nga kusog nga mopilit. Gikinahanglan sa pagkamaunongon nga atong likayan ang tinuyong paglapas sa mga sugo sa Bibliya, makita man kita sa uban o dili. Nagkinahanglan usab kini nga atong maunongong paluyohan ang mga pagtulon-an sa Bibliya nga makita diha sa mga magasing Bantayanang Torre ug Pagmata! ingon man usab sa tanang ubang espirituwal nga pagkaon nga gitagana sa Watch Tower Society. Kini nga pakigpulong gisundan sa pakigpulong sa bawtismo. Pagkadako sa kalipay sa dihang gipamatud-an sa mga kandidato sa bawtismo ang ilang pagpahinungod kang Jehova!
Ang mga pulong sa Oseas 4:1-3 maoy sumbanan sa pakigpulong sa hapon nga “Maayong Moral o Bisyo—Hain ang Imong Ginapangagpas?” Bisan pag ang hunahuna sa kalibotan bahin sa maayong moral nagkaus-os, kinahanglang ipakita sa mga Kristohanon ang “matinuorong paningkamot” sa pagtinguhag maayong gawi. (2 Pedro 1:5) Kini magsugod sa kon unsay panghunahuna sa usa ka tawo. Kon maligdong ang iyang mga hunahuna, mosulti siya sa mahinlo, maayo, ug makapalig-ong mga pulong ug maningkamot nga magmatinud-anon sa iyang mga pagpakiglabot sa uban. Ang pagtinguhag maayong moral naglangkit usab sa pagpaningkamot nga magmasinabtanon ug mahangawaon sa isigka-Kristohanon nga nag-antos sa kaguol o depresyon.—1 Tesalonica 5:14.
Ang laing pakigpulong, “Pagbantay Batok sa mga Lit-ag sa Yawa,” nagpasidaan sa mga Kristohanon batok sa pagladlad sa ilang kaugalingon sa mga impluwensiya sa demonyo. Sa natad sa pagtambal sa balatian, ang mga Kristohanon kinahanglang magbantay sa mga paagi, sama sa hipnotismo, nga may timaan sa okulto. Hinuon, kon unsay buhaton sa mga indibiduwal sa pag-atiman sa ilang pisikal nga panglawas maoy usa ka personal nga butang.
Ang ikaduhang adlaw natapos uban sa usa ka malipayong sorprisa—ang pagluwat sa usa ka bag-ong debulsang publikasyon nga gilaraw sa pagtabang sa mga tawong tim-os ug kasingkasing nga mouswag dayon sa pagpahinungod ug bawtismo. Kining bag-ong 192-panid nga libro nag-ulohang Kahibalo nga Motultol sa Kinabuhing Walay Kataposan. Ang librong Kahibalo nagtanyag sa kamatuoran sa makapalig-ong paagi. Wala kini maglanganlangan sa detalyadong pagpanghimakak sa bakak nga mga doktrina. Ang katin-aw sa pinulongan ug lohikal nga pagkahan-ay magpasayon sa paggamit niining libroha sa pagdumala sa mga pagtuon sa Bibliya ug pagtabang sa mga tawo nga makasabot sa makapalipay-sa-kasingkasing nga kahibalo sa Diyos.
“Magmaya, Kamong Katawhan, ug Magmalipayon sa Dayon”
Kining mga pulonga gikan sa Isaias 65:18 mao ang tema sa ikatulong adlaw sa kombensiyon. Ang katumanan sa tagna sa Bibliya nagpunting sa 1914 ingong ang tuig nga misulod kining daotang sistema sa kataposang mga adlaw niini. Busa, ang simposyum sa mga pakigpulong nga nag-ulohang “Malipayong mga Magdadayeg sa Panahon Niining Kataposang Sistema” nakakuhag maidlot nga pagtagad sa mamiminaw. Gipakita sa mga mamumulong kon sa unsang paagi ang bilyonbilyon naimpluwensiyahan pag-ayo sa hakog ug mapintas nga espiritu sa kalibotan. Sa kataposan, sila modangat ngadto sa paghukom ingong bahin sa kalibotan nga si Satanas ang magmamando. Busa, karon mao ang panahon sa paghimog pagpili. Haing kiliran ang buot natong dapigan? Buot ba natong simbahon si Jehova ug paluyohan ang iyang pagkasoberano, o tugotan ba nato si Satanas nga mahimo natong magmamando pinaagi sa pagbuhat sa mga butang nga makapahimuot kaniya? Kitang tanan angayng mobarog gayod dapig sa kiliran ni Jehova.
Ang pakigpulong publiko sa kombensiyon, “Dayega ang Hari sa Walay Kataposan!” naghatag sa tanang tumatambong ug gahing pagkaon sa hunahuna. Bisag ang ideya bahin sa walay kataposan daw dili masabtan sa mahuyang nga mga tawo, si Jehova bug-os nga nakasabot niana. “Si Jehova mao ang Hari sa walay kataposan, bisan hangtod sa kahangtoran,” miawit ang salmista. (Salmo 10:16) Gibuksan niining Hari sa walay kataposan ang dalan aron ang katawhan makapahimulos sa kinabuhing dayon pinaagi sa iyang Anak, si Jesu-Kristo. (Juan 17:3) “Oo, kitang makasasalang katawhan mahimong makabaton ug kinabuhing dayon pinaagi sa diyosnong edukasyon ug pagtuo diha sa halad lukat ni Jesus,” miingon ang mamumulong.
Sa dihang talitapos na ang kombensiyon, ang mga tumatambong napalig-on sa kataposang pakigpulong, nga nag-ulohang “Malipayong Dayega si Jehova sa Adlaw-Adlaw.” Makapadasig ang pagkadawat ug mga taho sa pag-uswag sa buluhatong paghimog tinun-an sa tibuok yuta. Ug ang mga kombensiyonista napukaw sa ‘pagdayeg kang Jehova sa tibuok adlaw ug pagdayeg sa iyang ngalan sa walay kataposan.’—Salmo 145:2.
Ang kalibotan nahikawan ug kalipay tungod sa dili-matukib nga mga buhat sa pagkadilitawhanon. Bisan pa niana, ang mga indibiduwal nga may bug-os nga pagtuo kang Jehova makabaton ug diyosnong kalipay. Ingong tibuok-yutang panag-igsoonay, ang mga Saksi ni Jehova sa ingon makasubli sa mosunod nga mga pulong sa Salmo 3527, 28: “Pasinggita sila sa kalipay ug pagpamayaa ang nagakalipay sa akong pagkamatarong, ug pasultiha sila kanunay: ‘Pasagding si Jehova mabantog, nga malipay sa pakigdait sa iyang alagad.’ Ug pasagding ang akong dila magsulti sa hinay nga tingog sa imong pagkamatarong, sa imong pagdayeg sa tibuok nga adlaw.”
[Hulagway sa panid 7]
Ang mga pamilya makabenepisyo gikan sa brosyur nga “Mga Saksi ni Jehova ug Edukasyon”
[Hulagway sa panid 9]
Ang bag-ong libro, “Kahibalo nga Motultol sa Kinabuhing Walay Kataposan,” nagtanyag sa mga kamatuoran sa Bibliya sa makapalig-ong paagi
[Hulagway sa panid 9]
Daghan ang gibawtismohan sa pagsimbolo sa ilang dedikasyon kang Jehova
[Hulagway sa panid 9]
Ang mga kombensiyonista natandog pag-ayo sa drama nga “Pagpasidungog Niadtong mga Takos Diha sa Ilang Katigulangon”