Unsay Angay Natong Buhaton Aron Maluwas?

USA ka tawo kanhi nangutana kang Jesus: “Ginoo, diyutay ra ba kadtong mga ginaluwas?” Sa unsang paagi mitubag si Jesus? Siya ba miingon: ‘Dawata lamang ako ingong inyong Ginoo ug Manluluwas, ug kamo mamaluwas’? Wala! Si Jesus miingon: “Kusganong panlimbasogi ninyo ang pagsulod agi sa sigpit nga pultahan, tungod kay daghan, sultihan ko kamo, ang maninguha sa pagsulod apan dili makahimo.”​—Lucas 13:23, 24.

Napakyas ba si Jesus sa pagtubag sa pangutana sa maong tawo? Wala, ang maong tawo wala mangutana kon unsa ka lisod nga maluwas; nangutana siya kon ang gidaghanon diyutay ra ba. Busa gipakita lamang ni Jesus nga mas diyutayng tawo kay sa dahomon sa usa ang kusganong manlimbasog mismo sa pagdawat niining kahibulongang panalangin.

‘Dili kana mao ang gisulti kanako,’ mosupak tingali ang pipila ka magbabasa. Kini sila mokutlo tingali sa Juan 3:16, nga nag-ingon: “Kay gihigugma pag-ayo sa Diyos ang kalibotan, nga iyang gihatag ang iyang bugtong Anak, aron nga ang tanan nga magatuo kaniya dili malaglag, kondili makabaton ug kinabuhing walay kataposan.” (King James Version) Apan, kami motubag: ‘Nan, unsa ang angay natong tuohan? Nga si Jesus aktuwal nga nabuhi? Siyempre. Nga siya ang Anak sa Diyos? Kinahanglan gayod! Ug sanglit ang Bibliya nagtawag kang Jesus nga “Magtutudlo” ug “Ginoo,” dili ba angay usab kitang motuo sa iyang gitudlo, sugton siya, ug sundon siya?’​—Juan 13:13; Mateo 16:16.

Pagsunod Kang Jesus

Ah, dinhi motungha ang suliran! Daghang tawo nga giingnang sila “naluwas na” daw walay tuyo nga sundon o sugton si Jesus. Sa pagkatinuod, usa ka Protestanteng klerigo misulat: “Siyempre, ang atong pagtuo ni Kristo kinahanglang magpadayon. Apan ang pangangkon nga kini absoluto gayod, o kinahanglang magpadayon gayod, wala gayod ing pagpaluyo sa Bibliya.”

Sa kaatbang, ang Bibliya naglista sa imoral nga mga binuhatan nga komon taliwala sa pipila ka tawo nga naghunahuna nga sila “naluwas.” Mahitungod sa usa nga nagpadayon sa maong mga dalan, kini nagsugo sa mga Kristohanon: “Kuhaa ang tawo nga tuman-kadaotan gikan sa inyong taliwala.” Seguradong dili buot sa Diyos nga ang tuman-kadaotang tawo maghugaw sa iyang Kristohanong kongregasyon!​—1 Corinto 5:11-13.

Nan, unsay kahulogan sa pagsunod kang Jesus, ug sa unsang paagi nato mahimo kana? Aw, unsay gibuhat ni Jesus? Siya ba imoral? usa ka makihilawason? usa ka palahubog? usa ka bakakon? Siya ba dili-matinud-anon sa negosyo? Dili gayod! ‘Apan,’ mangutana ka tingali, ‘kinahanglan ko bang kuhaon kanang tanang butang gikan sa akong kinabuhi?’ Alang sa tubag, tagda ang Efeso 4:17 hangtod sa 5:5. Wala kini mag-ingon nga ang Diyos modawat kanato bisan unsay atong buhaton. Hinunoa, giingnan kita niini nga mahimong lahi gikan sa kalibotanong mga nasod kinsa ‘nawad-an na sa tanang moral nga pagbati, . . . apan wala ninyo hikat-oni ang Kristo nga ingon niana . . . Hukasa ang daan nga pagkatawo nga nahiuyon sa kanhi ninyong paagi sa panggawi . . . Ayaw na papangawata ang kawatan . . . Ayaw tugoti bisan na lang gani nga mahisgotan taliwala kaninyo ang pakighilawas ug ang tanang matang sa pagkadili-hinlo o pagkadalo, ingon gayod sa nahiangay sa mga balaan . . . Kay inyong nahibaloan kini, nga nagaila niini sa inyong kaugalingon, nga walay makihilawason o tawong dili-hinlo o tawong dalo​—nga nagakahulogan ug pagkahimong tigsimbag idolo​—nga may bisan unsang panulundon sa gingharian sa Kristo ug sa Diyos.”

Kita ba nagasunod kang Jesus kon labing menos wala kita maningkamot sa pagkinabuhi nga kaharmoniya sa iyang panig-ingnan? Dili ba kinahanglang maningkamot kita nga himoon ang atong mga kinabuhi nga mas sama kang Kristo? Kanang mahinungdanong pangutana talagsa ra, kon gihunahuna man, sa mga tawo kinsa nag-ingon, sama sa giingon sa usa ka relihiyosong tract: “Dumuol kamo kang Kristo karon​—sumala sa kon unsa kamo karon.”

Usa sa mga tinun-an ni Jesus nagpasidaan nga ang dili-diyosnong mga tawo “nagahimo sa dili-takos nga kalulot sa atong Diyos nga katarungan alang sa malaw-ayng panggawi ug nagapamatuod ingong bakak ngadto sa atong bugtong Tag-iya ug Ginoo, si Jesu-Kristo.” (Judas 4) Sa pagkatinuod, sa unsang paagi kita maghimo sa kaluoy sa Diyos “nga katarungan alang sa malaw-ayng panggawi”? Mahimo nato kana pinaagi sa paghunahuna nga ang halad ni Kristo nagtabon sa tinuyo nga kasal-anan nga atong giplanong padayong buhaton inay ang kasal-anan sa tawhanong pagkadili-hingpit nga atong gipaningkamotang biyaan. Sa pagkatinuod dili kita buot nga mouyon sa usa sa labing-iladong mga ebanghelista sa Amerika, kinsa miingon nga dili ka kinahanglang “maghinlo, mohunong, o magbag-o.”​—Itandi ang Buhat 17:30; Roma 3:25; Santiago 5:19, 20.

Ang Pagtuo Magapalihok

Daghang tawo ang giingnan nga ang “pagtuo kang Jesus” kas-a lang buhaton ug nga ang atong pagtuo dili na kinahanglang may igong kalig-on nga mopalihok sa pagkamatinumanon. Apan ang Bibliya dili mouyon. Wala mag-ingon si Jesus nga ang mga tawo nga nagsugod sa Kristohanong dalan naluwas. Hinunoa, siya miingon: “Siya nga nakalahutay hangtod sa kataposan mao ang maluwas.” (Mateo 10:22) Ang Bibliya nagpakasama sa atong Kristohanong dalan sa usa ka lumba, nga ang kaluwasan maoy ganti sa kataposan niini. Ug kini nag-awhag: “Dagan sa paagi nga inyong makab-ot kini.”​—1 Corinto 9:24.

Busa, ang “pagdawat kang Kristo” naglangkit ug labaw pa kay sa pagdawat lamang sa mga panalangin nga gitanyag sa kinalabwang halad ni Jesus. Gikinahanglan ang pagkamasinugtanon. Si apostol Pedro nag-ingon nga ang paghukom magsugod “diha sa balay sa Diyos,” ug midugang: “Karon kon kini unang magsugod kanato, unsa man unya ang kataposan nilang dili masinugtanon sa maayong balita sa Diyos?” (1 Pedro 4:17) Busa mobuhat kita ug labaw pa kay sa yanong pagpatalinghog ug pagtuo. Ang Bibliya nag-ingon nga kinahanglan kitang ‘mahimong magbubuhat sa pulong, ug dili tigpaminaw lamang, nga nagalimbong sa [atong] kaugalingon pinaagi sa dili-mao nga pangatarungan.’​—Santiago 1:22.

Ang Kaugalingong mga Mensahe ni Jesus

Ang basahon sa Bibliya sa Pinadayag naundan sa mga mensahe gikan ni Jesus, nga gipasa pinaagi ni Juan ngadto sa pito ka unang Kristohanong mga kongregasyon. (Pinadayag 1:1, 4) Nag-ingon ba si Jesus nga sanglit ang katawhan niining mga kongregasyona “midawat na” kaniya, kadto igo na? Wala. Iyang gidayeg ang ilang mga binuhatan, ilang paghago ug ilang pag-agwanta ug naghisgot bahin sa ilang gugma, pagtuo, ug ministeryo. Apan siya miingon nga ang Yawa magbutang kanila sa pagsulay ug nga sila gantihan “ang tagsa-tagsa sumala sa [ilang] mga buhat.”​—Pinadayag 2:2, 10, 19, 23.

Busa si Jesus nagbatbat ug mas dako pang obligasyon kay sa nasabtan sa kadaghanang tawo sa dihang giingnan sila nga ang ilang kaluwasan maoy usa ka “natapos nga buluhaton” sa dihang “gidawat” nila siya diha sa usa ka relihiyosong miting. Si Jesus miingon: “Kon si bisan kinsa buot mosunod kanako, padumilia siya pag-angkon sa iyang kaugalingon ug paalsaha sa iyang sakitanang estaka ug sa mapinadayonon mosunod kanako. Kay ang bisan kinsa nga buot moluwas sa iyang kalag mawad-an niini; apan ang bisan kinsa nga mawad-an sa iyang kalag tungod ug alang kanako makakaplag niini.”​—Mateo 16:24, 25.

Pagdumili sa atong kaugalingon? Padayong sundon si Jesus? Magkinahanglan kana ug paningkamot. Magbag-o kana sa atong mga kinabuhi. Bisan pa niana, nag-ingon ba gayod si Jesus nga basin ang pipila kanato ‘mawad-an sa atong mga kalag’​—mamatay alang kaniya? Oo, kanang matanga sa pagtuo naggikan lamang sa kahibalo sa hamiling mga butang nga imong makat-onan gikan sa pagtuon sa Pulong sa Diyos. Dayag kini sa adlaw nga si Esteban gibato sa relihiyosong mga panatiko nga “dili makasugakod batok sa kaalam ug sa espiritu nga uban niana siya namulong.” (Buhat 6:8-12; 7:57-60) Ug ang maong pagtuo gipasundayag sa atong panahon sa ginatos nga mga Saksi ni Jehova nga nangamatay sa Nazing mga kampo konsentrasyon inay lapason ang ilang nabansay-sa-Bibliyang mga tanlag.a

Kristohanong Kasibot

Kinahanglang huptan nato ang atong Kristohanong pagtuo tungod kay, kasukwahi sa imo tingaling madunggan sa pipila ka iglesya o sa relihiyosong mga programa sa telebisyon, ang Bibliya nag-ingon nga kita mahimong mahulog. Naghisgot kini sa mga Kristohanon nga mibiya “sa tul-id nga dalan.” (2 Pedro 2:1, 15) Busa gikinahanglan natong ‘padayong panlimbasogan ang atong kaugalingong kaluwasan uban ang kahadlok ug pagpangurog.’​—Filipos 2:12; 2 Pedro 2:20.

Mao ba kini ang pagsabot niining butanga sa unang-siglong mga Kristohanon, ang katawhang aktuwal nga nakadungog kang Jesus ug sa iyang mga apostol nga nanudlo? Oo. Sila nasayod nga kinahanglang may buhaton sila. Si Jesus miingon: “Busa panglakaw kamo ug paghimog mga tinun-an sa katawhan sa tanang kanasoran, . . . nga magatudlo kanila sa pagsunod sa tanang butang nga akong gisugo kaninyo.”​—Mateo 28:19, 20.

Duha ka bulan human si Jesus moingon niana, 3,000 ka tawo ang nabawtismohan sa usa lamang ka adlaw. Ang gidaghanon sa mga magtutuo kalit nga mitubo ngadto sa 5,000. Kadtong nanuo nanudlo sa uban. Sa dihang ang paglutos nagpatibulaag kanila, nagpakaylap lamang kadto sa ilang mensahe. Ang Bibliya nag-ingon nga dili lamang pipila ka lider kondili “kadtong mga nangatibulaag milatas sa kayutaan nga nagapahayag sa maayong balita bahin sa pulong.” Mga 30 ka tuig sa ulahi, si apostol Pablo sa ingon makasulat nga ang maayong balita “gikawali diha sa tibuok kalalangan ilalom sa langit.”​—Buhat 2:41; 4:4; 8:4; Colosas 1:23.

Si Pablo wala mangabig, sama sa gibuhat sa pipila ka ebanghelista sa TV, pinaagi sa pag-ingong: ‘Dawata si Jesus karon dayon, ug ikaw maluwas sa walay kataposan.’ Ni nabatonan niya ang pagsalig sa usa ka Amerikanong klerigo nga misulat: “Sa bayongbayong pa ako, . . . ako naluwas na.” Kapin sa 20 ka tuig human pilia mismo ni Jesus si Pablo sa pagdala sa Kristohanong mensahe ngadto sa katawhan sa kanasoran, kining kugihang apostol misulat: “Ginamakmak ko ang akong lawas ug gihimo kini nga samag usa ka ulipon, aron, human ako makawali sa uban, ako mismo sa unsa mang paagi dili mahimong dili-inuyonan.”​—1 Corinto 9:27; Buhat 9:5, 6, 15.

Ang kaluwasan maoy libreng gasa gikan sa Diyos. Dili kini mabatonan tungod sa paghago. Bisan pa niana nagkinahanglan kinig paningkamot sa atong bahin. Kon may usa ka tawo nga naghatag kanimo ug usa ka bililhong gasa ug wala ka magpakitag igong presasyon sa pagkuha niana ug dad-on kana, ang imong kakulang sa pagkamapasalamaton mahimong magtukmod sa maghahatag nga itanyag kana ngadto sa lain. Aw, unsa ka bililhon ang dugo ni Jesu-Kristo? Kana usa ka libreng gasa, apan kinahanglang ipasundayag nato ang halalom nga apresasyon alang niana.

Ang tinuod nga mga Kristohanon anaa sa naluwas nga kahimtang sa paagi nga sila anaa sa inuyonang kahimtang atubangan sa Diyos. Ingong grupo, ang ilang kaluwasan segurado na. Sa indibiduwal, kinahanglang kab-oton nila ang mga kinahanglanon sa Diyos. Bisan pa niana, mahimong mapakyas kita, kay si Jesus miingon: “Kon ang kinsa man dili magapabilin nga nahiusa kanako, siya isalibay ingong usa ka sanga ug malaya.”​—Juan 15:6.

“Ang Pulong sa Diyos Buhi”

Ang kabildohay nga gihisgotan sa sinugdanan sa nag-unang artikulo nahitabo duolan sa 60 ka tuig kanhi. Si Johnny nagtuo gihapon nga ang kaluwasan modangat lamang pinaagi ni Jesu-Kristo, apan iyang naamgohan nga kinahanglang kab-oton nato kana. Siya kombinsido gihapon nga ang Bibliya nagpunting sa bugtong tinuod nga tuboran sa paglaom alang sa katawhan ug nga kinahanglang magtuon kita nianang kahibulongang libro, mapalihok niana, ug pasagdan kana nga magpalihok kanato sa mga buhat sa gugma, pagtuo, kalulot, pagkamasinugtanon, ug pag-agwanta. Iyang gimatuto ang iyang mga anak sa pagtuo sa samang mga butang, ug karon siya nalipay sa pagtan-aw kanila nga sa baylo nagmatuto sa ilang mga anak sa samang paagi. Nanghinaot siya nga ang tanan makabaton nianang matanga sa pagtuo, ug iyang buhaton ang bisan unsa nga iyang maarangan sa pagtisok niana diha sa mga kasingkasing ug hunahuna sa uban.

Si apostol Pablo nadasig sa pagsulat nga “ang pulong sa Diyos buhi ug gamhanang nagalihok.” (Hebreohanon 4:12) Makausab kini sa mga kinabuhi. Makapalihok kini kanimo sa kinasingkasing nga mga buhat sa gugma, pagtuo, ug pagkamasinugtanon. Apan kinahanglang mobuhat ka ug dugang pa kay sa “pagdawat” lamang sa hunahuna kon unsay giingon sa Bibliya. Tun-i kana ug pasagdi ang imong kasingkasing nga mapalihok niana. Pasagdi ang kaalam niana nga magagiya kanimo. Mga 5,000,000 ka andam nga mga Saksi ni Jehova sa kapin sa 230 ka kayutaan ang nagtanyag ug libreng mga panagtuon sa Bibliya sa balay. Aron makita kon unsay imong makat-onan gikan sa maong panagtuon, pagsulat ngadto sa mga magpapatik niining magasina. Ang pagtuo ug espirituwal nga kalig-on nga imong mabatonan makapahimuot kanimo!

[Footnote]

[Kahon sa panid 7]

Nganong “Kusganong Makigbugno Alang sa Pagtuo”?

Ang basahon sa Bibliya nga Judas gitumong ngadto sa “mga tinawag . . . , gitipigan alang kang Jesu-Kristo.” Nag-ingon ba kini nga tungod kay ilang ‘gidawat si Jesus,’ ang ilang kaluwasan maoy segurado? Wala, giingnan ni Judas ang maong mga Kristohanon nga “kusganong makigbugno alang sa pagtuo.” Gihatagan niya silag tulo ka katarongan sa pagbuhat niana. Una, ang Diyos “miluwas sa usa ka katawhan gikan sa yuta sa Ehipto,” apan daghan kanila ang nahulog sa ulahi. Ikaduha, bisan ang mga manulonda mirebelde ug nahimong mga demonyo. Ikatulo, ang Diyos naglaglag sa Sodoma ug Gomora tungod sa pagpatuyang sa seksuwal nga imoralidad nga ginahimo nianang mga siyudara. Gipahayag ni Judas kining maong mga asoy sa Bibliya “ingon nga usa ka pasidaang panig-ingnan.” Oo, bisan ang mga magtutuo nga “gitipigan alang kang Jesu-Kristo” kinahanglang mag-amping nga dili mahulog gikan sa matuod nga pagtuo.​—Judas 1-7.

[Kahon sa panid 8]

Hain ang Husto?

Ang Bibliya nag-ingon: “Ang tawo ipahayag nga matarong pinaagi sa pagtuo nga bulag sa mga buhat sa balaod.” Kini usab nag-ingon: “Ang usa ka tawo igapahayag nga matarong pinaagi sa mga buhat, ug dili pinaagi sa pagtuo lamang.” Hain ang husto? Kita ba ipahayag nga matarong pinaagi sa pagtuo o sa mga buhat?​—Roma 3:28; Santiago 2:24.

Ang magkauyon nga tubag gikan sa Bibliya mao nga ang duha maoy husto.

Sulod sa kasiglohan ang Balaod nga gihatag sa Diyos pinaagi kang Moises nagkinahanglan sa Hudiyong mga magsisimba sa paghimog tinong mga halad ug mga pahinungod, sa pagsaulog sa mga adlaw sa kapistahan, ug sa pagsunod sa mga kinahanglanon sa pagkaon ug ubang mga kinahanglanon. Ang maong “mga buhat sa balaod,” o yanong “mga buhat,” wala na kinahanglana human itagana ni Jesus ang hingpit nga halad.​—Roma 10:4.

Apan ang kamatuoran nga kining maong mga buhat nga gihimo ilalom sa Moisesnong Balaod gipulihan sa kinalabwang halad ni Jesus wala magkahulogan nga dili nato tagdon ang mga instruksiyon sa Bibliya. Kini nag-ingon: “Unsa pa ka labaw nga ang dugo ni Kristo . . . mohinlo sa atong mga tanlag gikan sa [kanhing] patayng mga buhat aron nga kita makahatag ug sagradong pag-alagad ngadto sa buhing Diyos?”​—Hebreohanon 9:14.

Sa unsang paagi kita “makahatag ug sagradong pag-alagad ngadto sa buhing Diyos”? Lakip sa ubang mga butang, ang Bibliya nagsulti kanato sa pagpakigbisog sa mga buhat sa unod, sa pagsalikway sa imoralidad sa kalibotan, ug paglikay sa mga lit-ag niini. Kini nag-ingon: “Bugnoa ang maayong bugno sa pagtuo,” isalikway “ang sala nga daling makalambod kanato,” ug “daganon nga may pag-agwanta ang lumba nga gibutang atubangan kanato, samtang kita nagatutok sa Pangulong Ahente ug Maghihingpit sa atong pagtuo, si Jesus.” Ug giawhag kita sa Bibliya nga dili ‘kapoyon ug mangaluya sa atong mga kalag.’​—1 Timoteo 6:12; Hebreohanon 12:1-3; Galacia 5:19-21.

Dili nato mahagoan ang kaluwasan pinaagi sa pagbuhat niining mga butanga, kay walay tawo nga makabuhat ug igo nga takos nianang katingalahang panalangin. Hinunoa, kita dili takos niining hamiling gasa kon kita mapakyas sa pagpasundayag sa atong gugma ug pagkamasinugtanon pinaagi sa pagbuhat sa mga butang nga giingon sa Bibliya nga buot sa Diyos ug ni Kristo nga atong buhaton. Kon walay mga buhat sa pagpasundayag sa atong pagtuo, ang atong pangangkon nga nagsunod ni Jesus kulang kaayo, kay ang Bibliya tin-awng nag-ingon: “Ang pagtuo, kon kini walay mga buhat, patay sa kaugalingon niini.”​—Santiago 2:17.

[Hulagway sa panid 7]

Tun-i ang Bibliya, ug mapalihok niana