Gipalig-on sa Ilang Labing Dakong Higala
USA ka panaghigalaay ang ilabinang nagpalig-on sa mga Saksi ni Jehova. Kini mao ang ilang bililhong relasyon uban sa ilang labing dakong Higala, si Jehova nga Diyos. (Itandi ang Santiago 2:23.) Siya nagpaluyo kanila sa panahon sa dagkong mga paglutos sa pagtuo.
Ang rekord sa pagkamaunongon sa mga Saksi ubos sa mga rehimen nga diniktador gidayeg sa daghang maniniid. Usa kanila mao si Jiří Krupička, usa ka doktor sa pilosopiya ug sa natural sciences nga mibalhin sa Czechoslovakia niadtong 1968 human nakagugol ug daghang tuig sa mga kampong konsentrasyon sa Komunista. Diha sa iyang librong Renesance rozumu (Renaissance of Intellect), siya mikomento bahin sa pag-antos ug sa pagkamaunongon sa mga Saksi nga napriso tungod sa ilang neyutralidad.
Ubos sa gobyernong Komunista, daghang Saksi ang gisentensiyahan sa pagkabilanggo tungod sa ilang pagtuo. Bisag napriso, midumili sila sa pagminag uranium nga gamiton sa gubat. (Isaias 2:4) Gihubit ni Krupička ang usa ka talan-awon nga iyang nakita sa usa niining mga minahana niadtong 1952. Siya nakakita ug duha ka tawo nga nagbarog nga samag mga estatuwa nga naputos sa yelo tungod sa grabeng tingtugnaw nga klima. Gitabonag metal nga mga barel ang ilang mga ulo ug itaas nga bahin sa mga lawas.
Si Krupička misulat: “Nagbarog sila didto sa gawas sa prisohan nga gision ug mga senina sukad pa sa buntag sayo. Sa unsang paagi nakabarog sila nga dugay kaayo sa nagyelong mga bitiis? Pinaagi sa gahom sa pagtuo. Ang mga barel daan na ug tayaon. Gipansak kinig kusog sa tawong walay puangod diha sa ilang mga ulo ug mga abaga nga ang gansangon nga kilid sa barel milagbas sa dyaket ug sa panit sa usa sa mga lalaki, ug mitulo ang dugo gikan sa iyang bukton.
“Gipahunong sa guwardiya ang among linya sa atubangan kanila, ug ang komander mihatag kanamog mubong pakigpulong. Ang pagdumili sa pagtrabaho, siya miingon, maoy pag-alsa ug silotan sumala niana. Walay binuang nga sentimento bahin sa gubat ug pagpatay ang makatabang niining mga magsusupak, niining mga kaaway sa sosyalismo.”
Gipunit sa komander ang usa ka bara nga metal ug gibunalan ang usa sa mga barel. Ang tawo sa sulod niana natumba nga ang barel nagtabon gihapon sa iyang ulo. Ang sunod nga nahitabo nasilsil pag-ayo sa panumdoman ni Krupička.
Siya miingon: “Dihay miawit gikan sa sulod sa mga barel. Mahinayng mga tingog, hinunghong nga pag-ampo ngadto sa Diyos, nga makadungog ug bisan unsa gikan sa bisan diing dapit—gani misulay sa pag-awit gikan sa sulod sa daan, tayaon nga mga barel sa uranium. Siya makadungog niini nga mas kusog pa kay sa usa ka koro nga nag-awit diha sa usa ka dakong katedral.”
Niadtong Septiyembre 1, 1993, ang buluhaton sa mga Saksi ni Jehova sa Republika sa Czech nakadawat ug opisyal legal nga pag-ila. Ang mga Saksing Czech karon nalipay sa pagpadayon sa ilang Kristohanong edukasyonal nga buluhaton nga may kagawasan. Oo, sila nalipay sa pagsulti sa uban bahin kang Jehova, ang ilang labing dakong Higala.
[Hulagway sa panid 7]
Mga kombensiyonista sa Republika sa Czech