Gituman Nila ang Kabubut-on ni Jehova
Nagpatalinghog sa mga Pulong sa Pagpanamilit ni Jesus
SA GABII sa Nisan 14, 33 K.P., si Jesu-Kristo ug ang iyang matinumanong 11 ka apostoles misampig sa lamesa sa itaas nga lawak diha sa Jerusalem. Nahibalo nga hapit na ang iyang kamatayon, siya miingon kanila: “Ako uban kaninyo sa makadiyot pa.” (Juan 13:33) Ngani, si Judas Iscariote mipaingon na sa pakigkunsabo sa daotang mga lalaki nga nagtinguha nga mapatay si Jesus.
Walay usa niadtong anaa sa itaas nga lawak ang nakamatikod sa pagkadinalian sa kahimtang labaw kay kang Jesus. Nahibalo gayod siya nga siya hapit nang mag-antos. Nahibalo usab si Jesus nga biyaan siya sa iyang mga apostol nianang mismong gabhiona. (Mateo 26:31; Zacarias 13:7) Sanglit kini maoy kataposang higayon ni Jesus una pa sa iyang kamatayon sa pagpakigsulti sa iyang mga apostol, makaseguro kita nga ang iyang mga pulong sa pagpanamilit nasentro sa mga butang nga hinungdanon kaayo.
“Padayong Buhata Kini sa Paghandom Kanako”
Uban sa iyang matinumanong mga apostol, gisugdan ni Jesus ang bag-ong pagsaulog nga mopuli sa Hudiyohanong Paskuwa. Gitawag kini ni apostol Pablo nga “panihapon sa Ginoo.” (1 Corinto 11:20) Mikuhag usa ka buok nga tinapay nga walay lebadura, si Jesus miampo. Dayon iyang gipikaspikas ang tinapay ug gihatag kini sa iyang mga apostol. “Pagkuha kamo, kaon. Kini nagakahulogan sa akong lawas,” siya miingon. Unya mikuha siyag usa ka kopa sa bino, mitanyag ug pag-ampo sa pagpasalamat ug gihatag kini sa mga apostol, nga nag-ingon: “Uminom gikan niini, kamong tanan; kay kini nagakahulogan sa akong ‘dugo sa kasabotan,’ nga igabubo alang sa daghan sa kapasayloan sa mga sala.”—Mateo 26:26-28.
Unsay kahulogan niining okasyona? Ingon sa gipaila ni Jesus, ang tinapay naghawas sa iyang lawas nga walay sala. (Hebreohanon 7:26; 1 Pedro 2:22, 24) Ang bino nagsimbolo sa giulang dugo ni Jesus, nga magpaposible sa kapasayloan sa mga sala. Ang iyang hinalad nga dugo nagpabalido usab sa bag-ong pakigtugon tali kang Jehova nga Diyos ug sa 144,000 ka tawo, nga sa dili madugay magmando uban ni Jesus sa langit. (Hebreohanon 9:14; 12:22-24; Pinadayag 14:1) Pinaagi sa pagdapit sa iyang mga apostol sa pag-ambit niini nga pagkaon, gipaila ni Jesus nga sila makigbahin uban kaniya sa langitnong Gingharian.
Mahitungod niining halandomong pangaon, si Jesus nagsugo: “Padayong buhata kini sa paghandom kanako.” (Lucas 22:19) Oo, ang Panihapon sa Ginoo maoy tinuig nga okasyon, sama sa Paskuwa. Samtang ang Paskuwa nagpahinumdom sa kaluwasan sa mga Israelinhon gikan sa pagkaulipon sa Ehipto, ang Panihapon sa Ginoo nagpunting sa usa ka mas dakong kaluwasan—nianang sa malukat nga katawhan gikan sa pagkaulipon sa sala ug kamatayon. (1 Corinto 5:7; Efeso 1:7) Dugang pa, kadtong nakig-ambit sa mga emblema nga tinapay ug bino mapahinumdoman sa ilang mga pribilehiyo sa umaabot ingong mga hari ug mga saserdote sa Diyos sa langitnong Gingharian.—Pinadayag 20:6.
Ang kamatayon ni Jesu-Kristo mao gayod ang labing hinungdanong okasyon sa kasaysayan sa tawo. Kadtong nagpabili sa gibuhat ni Jesus motuman sa iyang gisugo bahin sa Panihapon sa Ginoo: “Padayong buhata kini sa paghandom kanako.” Saulogon sa mga Saksi ni Jehova ang kamatayon ni Jesus matag tuig sa petsa nga motumbas sa Nisan 14. Sa 1996 kining petsaha mahulog sa Abril 2, human sa pagsalop sa adlaw. Ikaw mainitong gidapit sa pagtambong sa Kingdom Hall sa imong dapit.
‘Ako Maghatag Kaninyo ug Usa ka Bag-ong Sugo’
Gawas pa sa pagsugod sa Panihapon sa Ginoo, si Jesus mihatag ug pipila ka panamilit nga tambag sa iyang mga apostol. Bisan pa sa ilang maayong pagbansay, kining mga tawhana daghan pag pagakat-onan. Wala pa nila masabti sa bug-os ang katuyoan sa Diyos alang kang Jesus, alang kanila, o alang sa umaabot. Apan si Jesus wala mosulay sa pagpatin-aw niining tanang mga butanga niining tungora. (Juan 14:26; 16:12, 13) Hinunoa, siya naghisgot ug usa ka butang nga labaw pang hinungdanon. “Ako magahatag kaninyo ug usa ka bag-ong sugo,” matod niya, “nga kamo maghigugmaay sa usag usa; ingon sa akong paghigugma kaninyo, nga kamo usab maghigugmaay sa usag usa.” Dayon si Jesus midugang: “Pinaagi niini ang tanan makaila nga kamo akong mga tinun-an, kon kamo adunay gugma taliwala kaninyo.”—Juan 13:34, 35.
Sa unsang paagi kini “usa ka bag-ong sugo”? Buweno, ang Moisesnong Kasugoan nagsugo: “Higugmaon mo ang imong isigkatawo sama sa imong kaugalingon.” (Levitico 19:18) Apan, giawhag ni Jesus ang iyang mga sumusunod sa pagpakitag masakripisyohon-sa-kaugalingong gugma nga moabot hangtod sa punto sa pagtugyan sa kinabuhi sa usa alang sa mga isigka-Kristohanon. Siyempre, ang ‘kasugoan sa gugma’ ikapadapat usab sa dili kaayo seryoso nga mga kahimtang. Sa tanang kahimtang ang usa ka sumusunod ni Jesu-Kristo manguna sa pagpakitag gugma pinaagi sa pagtabang sa uban sa espirituwal ug sa ubang mga paagi.—Galacia 6:10.
Niining kataposang gabii sa yutan-ong kinabuhi ni Jesus, ang gugma maoy nag-agda kang Jesus sa pag-ampo ngadto kang Jehova nga Diyos alang sa iyang mga tinun-an. Sa bahin, siya miampo: “Sila ania sa kalibotan ug ako moanha kanimo. Balaang Amahan, bantayi sila gumikan sa imong kaugalingong ngalan nga imong gihatag kanako, aron nga sila mahimong usa ingon usab kanato.” (Juan 17:11) Maayong matikdan nga niini nga pangaliya ngadto sa iyang Amahan, si Jesus nag-ampo alang sa mahigugmaong panaghiusa sa iyang mga sumusunod. (Juan 17:20-23) Kinahanglang ilang ‘higugmaon ang usag usa sama sa paghigugma ni Jesus kanila.’—Juan 15:12.
Ang matinumanong mga apostol nagpatalinghog sa mga pulong sa pagpanamilit ni Jesus. Kita kinahanglang motuman usab sa iyang mga sugo. Niining makuyaw nga “kataposang mga adlaw,” ang gugma ug panaghiusa taliwala sa matuod nga mga magsisimba labaw pa ka hinungdanon sukad masukad. (2 Timoteo 3:1) Sa pagkatinuod, ang matuod nga mga Kristohanon motuman sa mga sugo ni Jesus ug magpasundayag sa inigsoong gugma. Kini naglakip sa pagtuman sa iyang sugo sa pagsaulog sa Panihapon sa Ginoo.