“Dayegon Ninyo si Jah!”
“Tanang buhing butang—ipadayeg si Jah.”—SALMO 150:6.
1, 2. (a) Sa unsang gidak-on ang matuod nga Kristiyanidad miusbaw sa unang siglo? (b) Unsang pasidaan ang gihatag sa mga apostol? (c) Sa unsang paagi naugmad ang apostasiya?
SI Jesus nag-organisar sa iyang mga tinun-an ngadto sa Kristohanong kongregasyon, nga miusbaw sa unang siglo. Bisan pa sa mapait nga relihiyosong pagsupak, ang “maayong balita . . . gikawali na sa tibuok nga kalalangan ilalom sa langit.” (Colosas 1:23) Apan sa pagkamatay sa mga apostol ni Jesu-Kristo, si Satanas sa pagkamalinglahon nagpasiugda sa apostasiya.
2 Ang mga apostol naghatag ug abanteng pasidaan bahin niini. Pananglitan, si Pablo misulti sa mga ansiano sa Efeso: “Tagda ang inyong kaugalingon ug ang tanan nga panon, nga diha niana kamo gikatudlo sa balaang espiritu nga mga magtatan-aw, aron magbantay sa kongregasyon sa Diyos, nga iyang gipalit pinaagi sa dugo sa iyang kaugalingon nga Anak. Ako nahibalo nga human sa akong pagbiya ang malupigong mga lobo mosulod sa taliwala kaninyo ug dili magtratar sa panon uban ang kalumo, ug gikan sa taliwala kaninyo mismo may mga tawo nga motungha ug magasultig tinuis nga mga butang aron ipahilayo ang mga tinun-an sunod sa ilang kaugalingon.” (Buhat 20:28-30; tan-awa usab ang 2 Pedro 2:1-3; 1 Juan 2:18, 19.) Busa, sa ikaupat nga siglo, ang apostatang Kristiyanidad misugod sa pagpakig-usa ug pagpakigtambayayong sa Romanhong Empiryo. Pila ka siglo sa ulahi ang Balaang Romanhong Empiryo, nga may kalangkitan sa papa sa Roma, nagmando sa dakong bahin sa katawhan. Ngadtongadto, ang Protestanteng Repormasyon mirebelde batok sa tuman-kadaotan nga mga pagpatuyang sa Iglesya Katolika, apan napakyas kana sa pagpasig-uli sa matuod nga Kristiyanidad.
3. (a) Kanus-a ug sa unsang paagi ang maayong balita gikawali sa tanang kalalangan? (b) Unsang gipasikad-sa-Bibliya nga mga pagdahom ang natuman sa 1914?
3 Bisan pa niana, samtang naghinapos ang ika-19ng siglo, usa ka sinserong grupo sa mga Estudyante sa Bibliya ang napuliki pag-usab sa pagsangyaw ug pagpaabot sa ‘tibuok nga kalalangan ilalom sa langit sa paglaom sa maayong balita.’ Pinasikad sa ilang pagtuon sa tagna sa Bibliya, gipunting niining grupoha kapig 30 ka tuig nga abante ang tuig 1914 ingong nagtimaan sa kataposan sa “tinudlong mga panahon sa mga nasod,” usa ka yugto sa “pito ka panahon,” o 2,520 ka tuig, nga nagsugod sa pagkalaglag sa Jerusalem sa 607 W.K.P. (Lucas 21:24; Daniel 4:16) Ingong katumanan sa ilang mga pagdahom, ang 1914 maoy punto sa kausaban sa mga kahikayan sa tawo sa yuta. Ang makasaysayanhong mga panghitabo sa langit nahitabo usab. Gipahimutang niadto sa Hari sa kahangtoran ang iyang kaubang Hari, si Jesu-Kristo, sa usa ka langitnong trono, nga pasiuna sa paglampornas sa tanang tuman nga pagkadaotan gikan sa nawong niining yutaa ug pagpasig-uli sa Paraiso.—Salmo 2:6, 8, 9; 110:1, 2, 5.
Tan-awa ang Mesiyanikong Hari!
4. Sa unsang paagi si Jesus nagkinabuhi sumala sa kahulogan sa iyang ngalang Miguel?
4 Niadtong 1914 kining Mesiyanikong Hari, si Jesus, misugod paglihok. Sa Bibliya ginganlan usab siyag Miguel, nga nagkahulogan nga “Kinsa ang Sama sa Diyos?,” kay determinado siya nga mobayaw sa pagkasoberano ni Jehova. Sumala sa gisulat sa Pinadayag 12:7-12, si apostol Juan nagbatbat diha sa panan-awon kon unsay mahitabo: “Miulbo ang gubat sa langit: Si Miguel ug ang iyang mga manulonda nakiggubat sa dragon, ug ang dragon ug ang mga manulonda niini nakiggubat apan kini wala makadaog, ni may dapit pang nakaplagan alang kanila sa langit. Busa gitambog ang dakong dragon, ang orihinal nga halas, ang usa nga gitawag Yawa ug Satanas, kinsa nagapahisalaag sa tibuok gipuy-ang yuta; siya gitambog sa yuta, ug ang iyang mga manulonda gitambog uban kaniya.” Dako gayod nga pagkahagbong!
5, 6. (a) Human sa 1914, unsang makalipay nga pagmantala ang gihimo gikan sa langit? (b) Sa unsang paagi ang Mateo 243-13 nalangkit niini?
5 Unya mipatugbaw ang usa ka makusog nga tingog sa langit: “Karon napahinabo ang kaluwasan ug ang gahom ug ang gingharian sa atong Diyos ug ang awtoridad sa iyang Kristo, tungod kay ang magsusumbong sa atong mga igsoon gitambog na, kinsa nagasumbong kanila sa adlaw ug gabii atubangan sa atong Diyos! Ug sila [matinumanong mga Kristohanon] nakadaog kaniya tungod sa dugo sa Kordero [Kristo Jesus] ug tungod sa pulong sa ilang pagpanaksi, ug wala nila higugmaa ang ilang mga kalag bisan sa atubangan sa kamatayon.” Kini nagkahulogan sa kaluwasan alang sa mga maghuhupot sa integridad, kinsa nagpakitag pagtuo sa bililhong halad lukat ni Jesus.—Proverbio 10:2; 2 Pedro 2:9.
6 Ang makusog nga tingog sa langit nagpadayon sa pagpahayag: “Gumikan niini panagsaya, kamong mga langit ug kamong nagapuyo niini! Alaot alang sa yuta ug sa dagat, tungod kay ang Yawa nanaog kaninyo, nga may dakong kasuko, kay nahibalo nga siya may hamubo nga yugto sa panahon.” Ang ‘kaalaotan’ nga gitagna sa ingon alang niining yutaa napadayag diha sa mga gubat sa kalibotan, mga kagutmanan, mga kamatay, mga linog, ug pagkamalapason nga nagsakit sa yuta niining sigloha. Sumala sa giasoy sa Mateo 24:3-13, si Jesus mitagna nga kini sila mahimong bahin sa ‘ilhanan sa katiklopan sa sistema sa mga butang.’ Ingong katumanan sa tagna, sukad 1914 ang katawhan sa yuta nakasinatig kaalaotan nga walay ingon sa tibuok nangaging kasaysayan sa tawo.
7. Nganong ang mga Saksi ni Jehova nagsangyaw nga dinalian?
7 Niining panahona sa satanasnong kaalaotan, ang katawhan ba makakaplag ug paglaom alang sa umaabot? Aw, oo, kay ang Mateo 12:21 nag-ingon bahin kang Jesus: “Sa pagkatinuod, diha sa iyang ngalan ang kanasoran magalaom”! Ang makapasakit nga mga kahimtang taliwala sa mga nasod nagtimaan dili lamang sa ‘ilhanan sa katiklopan sa sistema sa mga butang’ kondili sa ‘ilhanan sa pagkaanaa ni Jesus’ usab ingong langitnong Hari sa Mesiyanikong Gingharian. Mahitungod sa maong Gingharian, si Jesus dugang nag-ingon: “Kining maayong balita sa gingharian igawali sa tibuok nga gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:14) Kinsay usa ka katawhan sa yuta karong adlawa ang nagawali sa talagsaong paglaom sa pagmando sa Gingharian sa Diyos? Mga Saksi ni Jehova! Sa pagkadinalian, sila nagmantala sa katilingbanon ug sa balay-balay nga ang Gingharian sa Diyos sa pagkamatarong ug pakigdait hapit nang mopuli pagdumala sa mga kahikayan sa yuta. Nagapakig-ambit ka ba sa maong ministeryo? Wala nay labaw nga pribilehiyo nga imong maangkon!—2 Timoteo 4:2, 5.
Sa Unsang Paagi “ang Kataposan” Moabot?
8, 9. (a) Sa unsang paagi ang paghukom nagsugod “diha sa balay sa Diyos”? (b) Sa unsang paagi ang Kakristiyanohan naglapas sa Pulong sa Diyos?
8 Ang katawhan nakasulod sa usa ka yugto sa paghukom. Kita gipahibalo sa 1 Pedro 4:17 nga ang paghukom nagsugod “diha sa balay sa Diyos”—usa ka paghukom sa nag-angkong Kristohanong mga organisasyon nga nadayag sukad nagsugod ang “kataposang mga adlaw” uban sa pagpamatay sa Gubat sa Kalibotan I sa 1914-18. Unsay kahimtang sa Kakristiyanohan sa maong paghukom? Aw, tagda ang baroganan sa mga simbahan sa pagpaluyo sa mga gubat sukad 1914. Dili ba ang klero namantsahan sa “mga timaan sa dugo sa mga kalag sa walay-sala nga mga timawa” nga giawhag nila diha sa wali nga moentra sa gubat?—Jeremias 2:34.
9 Sumala sa Mateo 26:52, si Jesus nag-ingon: “Ang tanang mogamit sa espada mamatay pinaagi sa espada.” Pagkatinuod kini diha sa mga gubat niining sigloha! Giawhag sa klero ang batan-ong mga lalaki sa pagtigbak sa ubang batan-ong mga lalaki, bisan kadtong sakop sa ilang kaugalingong relihiyon—Katoliko nagpatay sa Katoliko ug Protestante nagpatay sa Protestante. Gibayaw ang nasyonalismo nga labaw sa Diyos ug kang Kristo. Karong bag-o pa, sa pila ka Aprikanhong mga nasod, ang etnikong mga koneksiyon giuna kay sa mga prinsipyo sa Bibliya. Sa Rwanda, diin ang kinabag-an sa populasyon maoy Katoliko, labing menos katunga sa milyon ang gipatay tungod sa etnikong kapintasan. Giadmiter sa papa diha sa Batikanong mantalaang L’Osservatore Romano: “Kini bug-os gayod nga rasanhong pagpanglaglag, nga niana ikasubong bisan ang mga Katoliko adunay tulubagon.”—Itandi ang Isaias 59:2, 3; Miqueas 4:3, 5.
10. Unsang paghukom ang ipatuman ni Jehova diha sa bakak nga relihiyon?
10 Unsay pag-isip sa Hari sa kahangtoran sa mga relihiyon nga nagdasig sa mga tawo nga magpinatyanay sa usag usa o magabarog lamang nga walay gibuhat samtang ang mga membro sa ilang panon nagpatay sa ubang mga membro? Mahitungod sa Dakong Babilonya, ang tibuok-kalibotang sistema sa bakak nga relihiyon, ang Pinadayag 18:21, 24 nagtug-an kanato: “Usa ka kusgang manulonda mialsa ug usa ka bato nga samag usa ka dakong galingang bato ug nagtambog niini sa dagat, nga nag-ingon: ‘Sa ingon sa usa ka kusog nga paglabog ang dakong siyudad nga Babilonya igatambog, ug siya dili na gayod makaplagan pag-usab. Oo, diha kaniya nakaplagan ang dugo sa mga propeta ug sa mga balaan ug sa tanan kanila nga gipamatay ibabaw sa yuta.’”
11. Unsang makalilisang nga mga butang ang nagakahitabo sa Kakristiyanohan?
11 Ingong katumanan sa tagna sa Bibliya, ang makalilisang nga mga butang nagakahitabo sa Kakristiyanohan. (Itandi ang Jeremias 5:30, 31; 23:14.) Tungod ilabina sa matinugotong tinamdan sa klero, ang ilang mga panon gitusaktusak sa imoralidad. Sa Tinipong Bansa, nga gituohang usa ka Kristohanong nasod, mga katunga sa tanang kaminyoon mosangpot sa diborsiyo. Ang pagmabdos sa mga tin-edyer ug homoseksuwalidad labihan ka daghan taliwala sa mga membro sa simbahan. Ang mga pari nag-among-among sa seksuwal nga paagi sa mga bata—ug sa daghang higayon. Gikaingon nga ang mga bayranan nga gipahamtang sa korte langkit nianang mga asuntoha mokostar sa Iglesya Katolika sa Tinipong Bansa ug usa ka bilyong dolyares sulod sa napulo ka tuig. Ang Kakristiyanohan wala magtagad sa pasidaan ni apostol Pablo nga makaplagan sa 1 Corinto 6:9, 10: “Unsa! Wala ba kamo mahibalo nga ang mga tawong dili-matarong dili makapanunod sa gingharian sa Diyos? Ayaw kamo pagpahisalaag. Walay mga makihilawason, ni mga tigsimbag idolo, ni mga mananapaw, ni mga lalaking nahuptan alang sa dili-kinaiyanhong mga katuyoan, ni mga lalaki nga nakigdulog sa mga lalaki, ni mga kawatan, ni mga tawong dalo, ni mga palahubog, ni mga tigsultig pasipala, ni mga tikasan magapanunod sa gingharian sa Diyos.”
12. (a) Sa unsang paagi ang Hari sa kahangtoran molihok batok sa Dakong Babilonya? (b) Kasukwahi sa Kakristiyanohan, tungod sa unsang katarongan nga ang katawhan sa Diyos moawit sa “Hallelujah” nga mga koro?
12 Sa haduol na, ang Hari sa kahangtoran, si Jehova, nga naglihok pinaagi sa iyang langitnong Mariskal del Kampo, si Kristo Jesus, magbuhi sa dakong kasakitan. Una, ang Kakristiyanohan ug tanang ubang mga sanga sa Dakong Babilonya makaagom sa katumanan sa hukom ni Jehova. (Pinadayag 17:16, 17) Ilang gipadayag ang ilang kaugalingon nga dili-takos sa kaluwasan nga gitagana ni Jehova pinaagi sa halad lukat ni Jesus. Ilang gitamay ang balaang ngalan sa Diyos. (Itandi ang Ezekiel 39:7.) Pagkadakong pagbugalbugal nga sila nag-awit ug “Hallelujah” nga mga koro diha sa ilang maartehong mga simbahan! Giwagtang nila ang bililhong ngalan ni Jehova gikan sa ilang mga hubad sa Bibliya apan daw nalimot sa kamatuoran nga ang “Hallelujah” nagkahulogang “Dayega si Jah”—nga ang “Jah” maoy pinamubo nga dagway sa “Jehovah.” Sa kahaom, ang Pinadayag 19:1-6 nagtala sa “Hallelujah” nga mga koro nga duol nang awiton sa pagsaulog sa pagpatuman sa hukom sa Diyos diha sa Dakong Babilonya.
13, 14. (a) Unsang halandumong mga hitabo ang sunod nga mahitabo? (b) Unsa ang malipayong sangpotanan alang sa mga tawong may kahadlok sa Diyos?
13 Sunod nga mahitabo mao ang ‘pag-abot’ ni Jesus aron ipahayag ug ipatuman ang hukom diha sa mga nasod ug mga katawhan. Siya mismo mitagna: “Sa dihang moabot ang Anak sa tawo [Kristo Jesus] diha sa iyang himaya, ug ang tanang manulonda uban kaniya, niana siya molingkod sa iyang mahimayaong trono [sa paghukom]. Ug ang tanang kanasoran [sa yuta] tigomon atubangan niya, ug siya maglain sa katawhan gikan sa usag usa, maingon sa usa ka magbalantay nga nagalain sa mga karnero gikan sa mga kanding. Ug iyang igabutang ang mga karnero sa iyang tuong kamot, apan ang mga kanding sa iyang wala. Unya ang hari magaingon niadtong anaa sa iyang tuo, ‘Umari, kamong gipanalanginan sa akong Amahan, panunda ang gingharian nga giandam alang kaninyo sukad sa pagkatukod sa kalibotan.’” (Mateo 25:31-34) Ang bersikulo 46 nagpadayon sa pag-asoy nga ang matang nga kanding ‘mobiya ngadto sa walay-kataposang pagputol, apan ang mga matarong ngadto sa kinabuhing walay kataposan.’
14 Ang basahong Pinadayag sa Bibliya nagbatbat nga ang “Hari sa mga hari ug Ginoo sa mga ginoo,” ang atong langitnong Ginoo, si Jesu-Kristo, sa maong panahon mosakay sa pagpakiggubat panahon sa Armageddon, nga maglaglag sa politikanhon ug komersiyal nga mga elemento sa sistema ni Satanas. Sa ingon si Kristo makabubo na sa “kasuko sa kapungot sa Diyos nga Labing Gamhanan” diha sa tibuok yutan-ong dominyo ni Satanas. Samtang kining ‘unang mga butang moagi na,’ ang mga tawong may kahadlok sa Diyos pasudlon ngadto sa mahimayaong bag-ong kalibotan diin ang Diyos ‘magapahid sa tanang luha gikan sa ilang mga mata.’—Pinadayag 19:11-16; 21:3-5.
Usa ka Panahon sa Pagdayeg Kang Jah
15, 16. (a) Nganong hinungdanon nga kita mamati sa matagnaong pulong ni Jehova? (b) Unsay gipaila sa mga propeta ug mga apostol nga kinahanglang atong buhaton alang sa kaluwasan, ug unsay mahimong ipasabot niini karong adlawa alang sa mga kapid-an?
15 Haduol na kanang adlaw nga ipatuman ang paghukom! Busa, maayo nga kita mamati sa matagnaong pulong sa Hari sa kahangtoran. Ngadto niadtong nalambigit pa sa mga pagtulon-an ug mga kustombre sa bakak nga relihiyon, usa ka langitnong tingog nagpahayag: “Gumula kamo kaniya, katawhan ko, kon dili kamo buot makaambit sa iyang mga sala, ug kon dili kamo buot makadawat ug bahin sa iyang mga hampak.” Apan kinahanglang asa moadto ang mga nangalagiw? Adunay usa lamang ka kamatuoran, busa usa lamang ka matuod nga relihiyon. (Pinadayag 18:4; Juan 8:31, 32; 14:6; 17:3) Ang pag-angkon nato ug kinabuhing dayon nag-agad sa pagkakaplag sa maong relihiyon ug pagsugot sa Diyos niini. Ang Bibliya nagpunting kanato kaniya sa Salmo 83:18, nga mabasa: “Ikaw, kansang ngalan mao lamang si JEHOVA, ikaw ang labing hataas sa tibuok nga yuta.”—King James Version.
16 Hinuon, kinahanglang buhaton nato ang labaw pa kay sa pagkaila lamang sa ngalan sa Hari sa kahangtoran. Kinahanglang kita magtuon sa Bibliya ug kat-onan ang iyang talagsaong mga hiyas ug mga katuyoan. Unya kinahanglang buhaton nato ang iyang kabubut-on alang niining panahona, sumala sa gipaila sa Roma 10:9-13. Si apostol Pablo mikutlo sa dinasig nga mga propeta ug mihinapos: “Ang tanan nga magatawag sa ngalan ni Jehova mamaluwas.” (Joel 2:32; Sofonias 3:9) Mamaluwas? Oo, kay ang kapid-an karon nga nagpakitag pagtuo sa tagana nga halad lukat ni Jehova pinaagi ni Kristo pagaluwason gikan sa umaabot nga dakong kasakitan, sa dihang ipatuman na ang paghukom diha sa dunot nga kalibotan ni Satanas.—Pinadayag 7:9, 10, 14.
17. Unsang dakong paglaom ang angay magtukmod kanato sa pagduyog karon sa pag-awit sa awit ni Moises ug sa Kordero?
17 Unsa ang kabubut-on sa Diyos alang niadtong naglaom nga makalabang-buhi? Kini mao nga kita moduyog bisan karon sa pag-awit sa awit ni Moises ug sa Kordero, nga magadayeg sa Hari sa kahangtoran sa pagpaabot sa iyang kadaogan. Ginabuhat nato kini pinaagi sa pagtug-an sa uban mahitungod sa iyang mahimayaong mga katuyoan. Samtang mouswag kita sa pagsabot sa Bibliya, atong ipahinungod ang atong mga kinabuhi ngadto sa Hari sa kahangtoran. Kana motultol sa atong pagkinabuhi hangtod sa kahangtoran ubos sa kahikayan nga gibatbat niining gamhanang Hari, sumala sa hikaplagan sa Isaias 6517, 18: “Ania ako nagalalang ug bag-ong mga langit [Mesiyanikong Gingharian ni Jesus] ug usa ka bag-ong yuta [usa ka matarong nga bag-ong sosyedad sa katawhan]; ug ang unang mga butang dili na hinumdoman, ni motungha pa kini sila sa kasingkasing. Apan magmaya, kamong katawhan, ug magkalipay sa walay kataposan diha sa akong ginalalang.”
18, 19. (a) Ang mga pulong ni David sa Salmo 145 magatukmod kanato sa pagbuhat sa unsa? (b) Unsay atong madahom nga masaligon diha sa kamot ni Jehova?
18 Ang salmistang David nagbatbat sa Hari sa kahangtoran niining mga pulonga: “Si Jehova dako ug pagadayegon sa hilabihan gayod, ug ang iyang pagkadako dili matugkad.” (Salmo 145:3) Ang iyang pagkadako maoy sama ka dili matugkad sa mga kinutbanan sa wanang ug kahangtoran! (Roma 11:33) Samtang magpadayon kita sa pagkuhag kahibalo bahin sa atong Maglalalang ug sa iyang halad lukat pinaagi sa iyang Anak, si Kristo Jesus, sa dugang ug dugang buot natong dayegon ang atong walay-kataposang Hari. Buot natong buhaton ang sumala sa gilaraw sa Salmo 145:11-13: “Sila magasulti mahitungod sa himaya sa imong pagkahari, ug mahitungod sa imong pagkagamhanan sila magapamulong, aron pagpaila ngadto sa mga anak sa mga tawo sa iyang gamhanang mga buhat ug sa himaya sa katahom sa iyang pagkahari. Ang imong pagkahari maoy usa ka pagkahari sa tanang panahon nga walay tino, ug ang imong pagmando maoy sa tanang sunodsunod nga mga kaliwatan.”
19 Kita sa pagkamasaligon makadahom nga ang atong Diyos magtuman sa iyang saad: “Ginabuklad nimo ang imong kamot ug ginatagbaw ang tinguha sa tanang buhing butang.” Ang Hari sa kahangtoran magaagak nga malumo kanato hangtod sa kataposan niining kataposang mga adlaw, kay si David nagpasalig kanato: “Si Jehova nagabantay sa tanan nga nahigugma kaniya, apan ang tanang tuman-kadaotan iyang pagalaglagon.”—Salmo 145:16, 20.
20. Unsay imong sanong sa imbitasyon sa Hari sa kahangtoran, ingon nga gipahayag sa kataposang lima ka salmo?
20 Ang matag usa sa kataposang lima ka salmo sa Bibliya gibuksan ug gitak-opan sa usa ka “Hallelujah” nga imbitasyon. Busa, ang Salmo 146 nagdapit kanato: “Dayega ninyo si Jah! Dayega si Jehova, Oh kalag ko. Pagadayegon ko si Jehova sa tibuok nakong kinabuhi. Ako magaawit ngadto sa akong Diyos samtang ako mao.” Tubagon ba nimo ang maong awhag? Tino nga buot gayod nimong dayegon siya! Hinaot ikaw mahiapil niadtong gibatbat sa Salmo 148:12, 13: “Kamong mga batan-ong lalaki ug usab kamong mga ulay, kamong mga tigulang nga lalaki uban sa mga batang lalaki. Ipadayeg nila ang ngalan ni Jehova, kay ang iyang ngalan lamang maoy hataas uyamot. Ang iyang kahalangdon maoy ibabaw sa yuta ug langit.” Hinaot nga kita motubag nga bug-os kasingkasing sa imbitasyon: “Dayega ninyo si Jah!” Nga magkahiusa, atong dayegon ang Hari sa kahangtoran!
Unsa ang Imong Komento?
◻ Unsay gipasidaan sa mga apostol ni Jesus?
◻ Sugod sa 1914, unsang mahukmanong mga aksiyon ang nahitabo?
◻ Unsang mga paghukom ang hapit nang ipatuman ni Jehova?
◻ Nganong karon mao ang panahon sa tanang panahon sa pagdayeg sa Hari sa kahangtoran?
[Kahon sa panid 19]
Kining Makatalagmanong Panahon sa Kagubot
Nga ang usa ka panahon sa kagubot namanagbanag sayo sa ika-20ng siglo giila sa daghan. Pananglitan, sa pasiuna sa librong Pandaemonium, nga sinulat sa Senador sa T.B. nga si Daniel Patrick Moynihan, nga gipatik sa 1993, ang usa ka komento bahin sa “katalagman sa 1914” mabasa: “Ang gubat miabot ug ang kalibotan nausab—sa hingpit. Karong adlawa aduna lamay walo ka estado sa yuta nga naglungtad sa 1914 ug nga ang ilang matang sa gobyerno wala mausab pinaagi sa kapintasan sukad niadto. . . . Sa nahibiling 170 o labaw pa nga kadungang mga estado, ang pipila bag-o pa kaayong namugna nga nakasinati nag dakong kagubot sa dili pa dugay.” Sa pagkatinuod, ang panahon sukad sa 1914 nakasaksi ug sunodsunod nga katalagman!
Gipatik usab sa 1993 mao ang librong Out of Control—Global Turmoil on the Eve of the Twenty-First Century. Ang awtor mao si Zbigniew Brzezinski, kanhi pangulo sa Konseho sa Nasodnong Seguridad sa T.B. Siya misulat: “Ang pagsugod sa ikakawhaang siglo gidayeg diha sa daghang komentaryo ingon nga tinuod nga sinugdanan sa Panahon sa Pangatarongan. . . . Kaatbang sa panaad niini, ang ikakawhaang siglo nahimong labing dugoon ug punog-pagdumot nga siglo, usa ka siglo sa mahandurawong mga politika ug makalilisang nga mga pagpatay. Ang kapintasan nahimong organisado sa walay-ingon nga sukod, ang pagpatay naorganisar sa pinakyaw nga paagi. Ang kalainan tali sa natagong siyentipikanhong katakos sa kaayohan ug ang politikanhong pagkadaotan nga aktuwal nga gibuhian maoy makapakurat kaayo. Wala pa sukad sa kasaysayan nga ang pagpatay milukop gayod sa kalibotan, wala pa gayod kini maghunos ug daghan kaayong kinabuhi, wala pa gayod nga ang pagpuo sa mga tawo gitinguha uban ang kabug-os sa mapinadayonong paningkamot nga gipasukad nianang mapagarbohon dili-makataronganong mga tumong.” Pagkatinuod gayod niana!
[Hulagway sa panid 17]
Si Miguel nagtambog kang Satanas ug sa iyang mga panon nganhi sa yuta human matukod ang Gingharian sa 1914