Sa Dihang ang Pagpihigpihig Wala Na!

GIKATAHO, ang siyentipiko nga si Albert Einstein kas-a miingon nga niining makapasubong kalibotan, mas lisod ang pagbuntog sa pagpihigpihig kay sa pagsip-ak sa usa ka atomo. Sa susama, si Edward R. Murrow, usa ka magsusulat nga nabantog panahon sa Gubat sa Kalibotan II ug sa ulahi maoy direktor sa Ahensiya sa Impormasyon sa T.B., miingon nga “walay usa nga makapapas sa mga pagpihigpihig​—makaila lamang sila niini.”

Maora bag tinuod kining mga pulonga? Imposible ba ang pagpapas sa diskriminasyon ug rasismo? Unsay pagbati sa Diyos mahitungod sa pagpihigpihig?

Ang Diyos Dili Madapigon

Ang Bibliya maoy supak sa pagkamadapigon. (Proverbio 24:23; 28:21) Kini nag-ingon nga “ang kaalam gikan sa itaas maoy una sa tanan putli, unya makigdaiton, makatarunganon, andam mosunod, puno sa kaluoy ug maayong mga bunga, dili mohimo ug pagpihigpihig, dili salingkapaw.” (Santiago 3:17) Ang maong kaalam gipasiugda ngadto sa mga maghuhukom sa karaang Israel. “Kinahanglang dili kamo mohimog inhustisya sa paghukom,” gipahimangnoan sila. “Kinahanglang dili ninyo tratahon ang timawa nga may pagkamadapigon, ug kinahanglang dili ninyo palabihon ang pagkatawo sa usa nga dako.”​—Levitico 19:15.

Ang lig-ong baroganan sa Bibliya batok sa pagkamadapigon ug pagpihigpihig gipasiugda ni Jesu-Kristo ug sa iyang mga apostol nga si Pedro ug Pablo. Si Jesus walay pinalabi labot niadtong si kinsa “pinanitan ug binalibag samag mga karnero nga walay pastol.” (Mateo 9:36) Siya mitudlo: “Hunong na sa pagpanghukom pinasukad sa panggawas nga panagway, apan panghukom uban ang matarong nga paghukom.”​—Juan 7:24.

Si Pedro ug Pablo nagpasalig kanato nga si Jehova nga Diyos mismo walay pinalabi. Si Pedro nagpahayag: “Sa tino naila ko nga ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.” (Buhat 10:34, 35) Si apostol Pablo nagsulti kanato: “Walay pagpalabi sa Diyos.”​—Roma 2:11.

Ang Impluwensiya sa Bibliya

Ang Bibliya adunay gahom sa pag-usob sa mga personalidad niadtong gigiyahan niini. Ang Hebreohanon 4:12 nag-ingon: “Ang pulong sa Diyos buhi ug gamhanang nagalihok.” Sa tabang ni Jehova ang usa ka tawong mapihigon makausob gani sa iyang panghunahuna ug mahimong walay pinalabi sa iyang mga pagpakiglabot sa uban.

Tagda, pananglitan, ang kaso ni Saulo sa Tarso. Sumala sa asoy sa Bibliya, sa usa ka panahon siya mapintasong misupak sa Kristohanong kongregasyon tungod kay mapig-oton siyang nagsunod sa relihiyosong mga tradisyon. (Buhat 8:1-3) Bug-os siyang kombinsido tungod sa Hudiyonhong tradisyon nga ang tanang Kristohanon maoy mga apostata ug mga kaaway sa matuod nga pagsimba. Ang iyang pagkamapihigon miagak kaniya sa pagpaluyo sa pagpatay sa mga Kristohanon. Ang Bibliya nag-ingon nga siya “nagapangusmo pa gihapon ug hulga ug pagbuno batok sa mga tinun-an sa Ginoo.” (Buhat 9:1) Samtang nagbuhat niana, siya naghunahuna nga siya naghimog sagradong pag-alagad ngadto sa Diyos.​—Itandi ang Juan 16:2.

Bisan pa niana, si Saulo sa Tarso nakaarang sa pagpapas sa iyang hingaping pagpihigpihig. Siya nahimo pa nga Kristohanon mismo! Sa ulahi, ingong si Pablo, usa ka apostol ni Jesu-Kristo, siya misulat: “Kanhi ako usa ka tigpasipala ug maglulutos ug tawong bagis. Bisan pa, ako gipakitaan ug kaluoy, tungod kay ako walay-alamag ug milihok uban ang kawalay pagtuo.”​—1 Timoteo 1:13.

Si Pablo dili mao lamang ang mihimog ingong dagkong kausaban sa iyang panghunahuna. Sa iyang sulat kang Tito, usa ka isigka-ebanghelista, si Pablo mitambag sa mga Kristohanon “nga dili mamulong nga madaoton labot kang bisan kinsa, dili magpalaaway, magmakatarunganon, magapasundayag ug bug-os nga kalumo ngadto sa tanang tawo. Kay bisan gani kita kanhi mga walay-salabotan, dili-masinugtanon, ginapahisalaag, mga ulipon sa nagkadaiyang mga tinguha ug mga kalipayan, nanagpadayon sa pagkadaotan ug kasina, takos kasilagan, nanagdumot sa usag usa.”​—Tito 3:2, 3.

Pagbungkag sa Mapihigon nga mga Babag

Karong adlawa, ang tinuod nga mga Kristohanon naningkamot sa pagsunod nianang tambaga. Buot nilang likayan ang paghukom sa mga tawo pinasukad sa pangibabaw nga mga panghunahuna. Kining tinamdana mopugong kanila sa ‘pagpamulong nga madaoton’ mahitungod sa uban. Gipahimuslan nila ang internasyonal nga panag-igsoonay nga mokaylap sa tanang nasyonalistikanhon, etniko, ug rasanhong mga utlanan niining kalibotana.

Tagda ang kasinatian ni Henrique, usa ka tabunon nga Braziliano. Usa ka biktima mismo sa rasanhong pagpihigpihig, nakaugmad siyag dulot nga pagdumot alang sa mga tawong puti. Misaysay siya: “Duha ka pution nga mga Saksi ang mianha sa akong balay aron makigsulti bahin sa ngalan sa Diyos. Sa sinugdan dili nako gustong mamati tungod kay wala koy pagsalig sa mga tawong puti. Apan sa taodtaod akong nasabtan nga ang ilang mensahe daw mao ang kamatuoran. Aw, gidawat ko ang usa ka pagtuon sa Bibliya. Ang unang pangutana nako mao, ‘Duna bay daghang itom nga mga tawo sa inyong simbahan?’ Mitubag sila, ‘Oo.’ Dayon ilang gipakita kanako ang kataposang hulagway diha sa librong Akong Basahon sa mga Estorya sa Bibliya,a nga naghulagway sa mga batan-ong may lainlaing mga rasa. Nahilakip ang usa ka itom nga batang lalaki, ug kini nagdasig kanako. Sa ulahi ako mibisita sa Kingdom Hall sa mga Saksi ni Jehova, diin nakita nako ang mga tawo sa lainlaing mga rasa nga nagtahoray sa usag usa. Kadto hinungdanon kaayo alang kanako.”

Karon, ingong usa sa mga Saksi ni Jehova, si Henrique nalipay nga masakop sa usa ka tinuod nga Kristohanong panag-igsoonay. Iyang nasabtan nga ang kadungganan dili moadto kang bisan kinsang tawo. Siya nag-ingon: “Karong adlawa ako mapasalamaton kang Jehova ug kang Jesus alang sa tanan nga ilang nahimo alang kanako. Ako nagbuhat uban sa minilyong maunongong mga alagad ni Jehova sa tanang rasa, kolor, ug kagikan, nga nahiusa sa usa ka katuyoan.”

Samtang nagdako, si Dario maoy laing biktima sa pagpihigpihig. Sa edad nga 16, misugod siya sa pagtuon sa Bibliya uban sa mga Saksi ni Jehova. Siya miingon: “Taliwala sa mga Saksi, akong nakaplagan nga walay mga pagbati sa rasanhong pagkalabaw.” Nakadayeg siya sa atmospera nga may tinuod nga gugma. Namatikdan niya ilabina nga ang mga tawo sa lainlaing mga rasa nag-alagad sa responsableng mga katungdanan sulod sa kongregasyon. Sa dihang siya makaagom ug usa ka matang sa pagpihigpihig o diskriminasyon pinaagi sa mga tawo nga gawas sa kongregasyon, si Dario mahinumdom nga nahigugma si Jehova sa mga tawo sa tanang nasod, mga tribo, ug mga pinulongan.

Kon Unsaon Pagsagubang

Kitang tanan gustong tagdon uban ang dignidad ug pagtahod. Kanay hinungdan nga ang pagkabiktima sa pagpihigpihig maoy lisod nga pagsulay nga antoson. Ang Kristohanong kongregasyon dili manalipod kanato gikan sa tanang pagkaladlad ngadto sa mapihigong mga tinamdan niining tuman-kadaotang kalibotan. Samtang si Satanas nga Yawa ang nagamando sa mga kahikayan sa kalibotan, aduna gayod ing mga inhustisya. (1 Juan 5:19) Ang Pinadayag 12:12 nagpasidaan kanato: “Alaot ang yuta ug dagat, tungod kay ang Yawa nanaog kaninyo, nga may dakong kasuko, kay nahibalo nga siya may mubo nga yugto sa panahon.” Dili lamang magpahinabog kalisdanan ang iyang tuyo. Gitandi siya ngadto sa usa ka manunukob nga hayop. Si apostol Pedro nagsugid kanato: “Ang inyong kontra, ang Yawa, nagasuroysuroy sama sa usa ka leon nga nagangulob, nga nagapangita ug usa nga matukob.”​—1 Pedro 5:8.

Ang Bibliya nagsulti usab kanato: “Busa, magpasakop kamo sa Diyos; apan sukli ang Yawa, ug siya mokalagiw gikan kaninyo.” (Santiago 4:7) Usa ka labing maayong tabang sa pagsagubang sa pagpihigpihig mao ang pagsalig sa Diyos alang sa panalipod, sama sa gihimo ni Haring David: “Oh akong Diyos, itagana kanako ang kaikyasan gikan sa kamot sa tuman-kadaotang usa, gikan sa palad sa usang nagalihok nga dili matarong ug malupigon.” (Salmo 71:4) Kita mahimo pa ganing moampo sama sa salmista: “Pakitai ako ug pabor, Oh Diyos, tungod kay ang tawong himalatyon misinghag kanako. Nga nakig-away sa tibuok nga adlaw, siya nagapadayon sa pagdaogdaog kanako.”​—Salmo 56:1.

Sa unsang paagi ang Diyos motubag sa maong mga pag-ampo? Ang Bibliya nagtubag: “Siya magaluwas sa usang kabos nga nagatuaw alang sa tabang, ang usa usab nga sinakit ug si bisan kinsa nga walay magtatabang. Siya mobatig kaluoy sa usang timawa ug sa usang kabos, ug iyang pagaluwason ang mga kalag sa mga kabos.” (Salmo 72:12, 13) Pagkamaayo nga mahibalo nga sa nahaigong panahon si Jehova maghatag ug kahupayan sa tanan nga mga biktima sa inhustisya!

“Dili Sila Mohimo sa Bisan Unsang Kadaot”

Ang mga gobyerno niining kalibotana mahimong magpadayon sa pagpakigbisog sa pagpihigpihig pinaagi sa ilang mga balaod ug mga programa. Sila mahimong magpadayon sa pagsaad sa pagkamanagsama ug pag-angay-angay. Apan dili mahimong molampos sila. (Salmo 146:3) Diyos lamang ang makaarang ug mopapas sa tanang mapihigong pagtratar. Iyang usbon ang katawhan ngadto sa usa ka nahiusang pamilya. “Usa ka dakong panon sa katawhan, nga walay tawong makaihap, gikan sa tanang kanasoran ug mga tribo ug katawhan ug mga dila” ang makalabang-buhi sa kataposan niining tuman-kadaotang sistema ug magkalipay sa pagkinabuhing makigdaiton.​—Pinadayag 7:9, 10.

Papason ni Jehova ang tanang kadaot nga gipahinabo sa rasanhon ug katilingbanong pagpihigpihig. Tiaw na, wala nay usa nga pagatratahon sa dili-matarong nga paagi! “Sila magalingkod gayod, ang matag usa ilalom sa iyang paras ug ilalom sa iyang kahoy nga igos, ug walay magapakurog kanila.” (Miqueas 4:4) Ug ang Isaias 11:9 nag-ingon: “Dili sila mohimo sa bisan unsang kadaot.”

Kon biktima ka sa pagpihigpihig karon, kining kahibulongang paglaom sa umaabot mopalig-on sa imong relasyon uban kang Jehova. Kini motabang kanimo sa pag-antos sa mga inhustisya niining tuman-kadaotang kalibotan. Samtang nagsagubang ka sa pagpihigpihig ug nagatan-aw sa unahan, sunda ang maalamong tambag sa Bibliya: “Magmaisogon, ug magmalig-on unta ang inyong kasingkasing, kamong tanan nga nagahulat kang Jehova.”​—Salmo 31:24.

[Footnote]

[Picture Credit Line sa panid 4]

Letrato sa U.S. National Archives