Mga Magmamantala sa Gingharian Nagtaho

“Ang Tanan Nimong mga Sugo Maoy Kamatuoran”

SA HAPIT na siyang mamatay, giawhag ni Moises ang katawhan sa Israel sa pagtuman sa tanang sugo ni Jehova. Siya miingon: “Ibutang ang inyong kasingkasing sa tanang pulong nga akong ginasulti sa pagpasidaan kaninyo karong adlawa, aron inyong isugo sa inyong mga anak nga paningkamotan ang pagbuhat sa tanang pulong niining balaora. Kay dili kini walay pulos nga pulong alang kaninyo, apan nagkahulogan kini sa inyong kinabuhi.”​—Deuteronomio 32:46, 47.

Gatosan ka tuig sa ulahi, gipasiugda sa salmista ang kahinungdanon sa tanang pagtulon-an sa Diyos sa dihang siya miingon: “Ikaw ania sa haduol, Oh Jehova, ug ang tanan nimong mga sugo maoy kamatuoran.” (Salmo 119:151) Sa unang siglo, si Jesus mismo naghisgot sa bili sa “matag pamulong nga nagagula sa baba ni Jehova.” (Mateo 4:4) Ug ubos sa pagtultol sa Diyos si apostol Pablo misulat nga ang “tibuok Kasulatan inspirado sa Diyos ug mapuslanon.”​—2 Timoteo 3:16.

Dayag, si Jehova nga Diyos nagdahom nga ang iyang mga magsisimba maghatag ug ugdang nga paghunahuna sa tibuok mensahe nga gipasa kanato diha sa mga panid sa iyang Pulong. Walay usa ka teksto sa Bibliya nga dili bililhon. Mao kanay pagbati sa mga Saksi ni Jehova bahin sa Pulong sa Diyos, ingon sa giilustrar sa mosunod nga kasinatian gikan sa Mauritius.

Si G. D​—— nagpuyo sa usa ka hilit nga balangay, diin siya maoy usa ka guwardiya sa panahon sa kagabhion. Sulod sa dugayng panahon, siya sinserong nangita sa hustong paagi sa pagsimba sa Diyos. Sa magabii panahon sa iyang pagguwardiya, misugod siya sa pagbasa sa Bibliya. Ngadtongadto nabasa niya ang tibuok Bibliya. Nahibaloan niya nga ang ngalan sa Diyos maoy Jehova​—usa ka ngalan nga makita sa makadaghan sa iyang Bibliyang Hindi. Iyang nakaplagan nga ang basahong Pinadayag ilabinang makalingaw.

Unya gipangutana niya ang iyang kaugalingon kon may usa ba ka relihiyon nga nagsunod sa tibuok Bibliya. Iyang namatikdan nga ang mga relihiyon nga nasinati niya, labing menos, nagsunod lamang sa mga bahin sa Bibliya. Ang pipila ka relihiyon midawat sa Hebreohanong Kasulatan ug nagsalikway sa Kristohanong Gregong Kasulatan. Ang ubang mga relihiyon wala magtagad sa Hebreohanong Kasulatan, nga naghatag lamang ug praktikal nga bili sa Kristohanong Gregong Kasulatan.

Usa ka adlaw si G. D​—— nakakita ug magtiayon nga nabasa sa ulan ug nagdapit kanila nga mopasilong sa iyang balay. Sila maoy mga Saksi ni Jehova. Ang asawa nagkupot sa librong Pinadayag​—Hingpit nga Sangkoanan Niini Haduol Na!a Dihadiha mihangyo si G. D​—— alang sa libro. Ang mga Saksi mibati nga ang materyal bahin sa tagna sa Pinadayag lisod ra kaayo alang kaniya, busa gitanyagan nila siya ug laing publikasyon. Apan si G. D​—— miinsister nga kuhaon ang librong Pinadayag.

Sa dihang nakuha niya ang iyang kopya, gibasa dayon niya ang libro. Unya midawat siya ug panagtuon sa Bibliya uban sa mga Saksi ni Jehova. Sa wala madugay nakadayeg siya sa kamatuoran nga ang mga Saksi taas ug pagtamod sa tibuok Bibliya. Misugod siya sa pagtambong nga regular sa mga tigom diha sa Kingdom Hall sa mga Saksi ni Jehova, diin ang Hebreohanong Kasulatan ug Gregong Kasulatan gitun-an pag-ayo. Karon siya usa na ka magwawali sa Gingharian ug usa ka bawtismadong membro sa Kristohanong kongregasyon.

[Footnote]