Si Enoc—Maisogon Bisan pa sa Tanang Kalisdanan

ALANG sa usa ka maayong tawo, kadto mao ang hilabihan ka daotan sa mga panahon. Ang pagkadili-diyosnon mitugob sa yuta. Nagkadaot ang moral nga kahimtang sa katawhan. Sa pagkatinuod, gikaingon kini sa wala madugay: “Nakita ni Jehova nga ang pagkadaotan sa tawo dagaya sa yuta ug ang matag kiling sa mga hunahuna sa iyang kasingkasing daotan lamang sa tanang panahon.”​—Genesis 6:5.

Si Enoc, ang ikapitong tawo sa linya sa kaliwatan gikan kang Adan, nakabaton sa kaisog nga magpalahi. Mibarog siyang malig-on alang sa pagkamatarong bisan unsa pay mahitabo. Ang mensahe ni Enoc nakapalagot pag-ayo sa dili-diyosnong mga makasasala mao nga gibaharan siyang patyon, ug si Jehova lamang ang makatabang kaniya.​—Judas 14, 15.

Si Enoc ug ang Unibersohanong Isyu

Dugay na una pa sa pagkatawo ni Enoc, ang isyu sa unibersohanong pagkasoberano gipatungha. Ang Diyos ba adunay katungod sa pagmando? Sa ingon, si Satanas nga Yawa miingong wala. Gibarogan niyang ang intelihenteng mga linalang magmaayo ra kon sila independente sa pagtultol sa Diyos. Gisulayan ni Satanas nga lig-onon ang iyang pamatuod batok kang Jehova nga Diyos pinaagig malipatlipatong pagmaniobra sa mga tawo dapig sa iyang kiliran. Si Adan, ang iyang asawang si Eva, ug ang ilang unang anak nga lalaki, si Cain, ilado sa ilang pagdapig sa kiliran ni Satanas pinaagig pagpili sa pagmando-sa-kaugalingon inay kay sa pagmando-sa-Diyos. Ang unang tawhanong parisan naghimo niini pinaagig pagkaon sa prutas nga gidili sa Diyos, ug si Cain naghimo niini pinaagig tinuyong pagpatay sa iyang matarong nga igsoon, si Abel.​—Genesis 3:​4-6; 4:8.

Si Abel maisogong mibarog dapig sa kiliran ni Jehova. Sanglit ang pagkamaunongon ni Abel nagpalambo sa putling pagsimba, sa walay duhaduha si Satanas nahimuot sa pagkakitang si Cain mipahungaw sa iyang mabunoong kasilag ngadto kaniya. Sukad niadtong panahona, si Satanas migamit sa “kahadlok sa kamatayon” ingong hinagiban sa paghadlok. Buot niyang itisok ang kahadlok sa kasingkasing sa matag usa nga mahiligon sa pagsimba sa matuod nga Diyos.​—Hebreohanon 2:​14, 15; Juan 8:​44; 1 Juan 3:12.

Sa pagkatawo ni Enoc, ang panglantaw ni Satanas nga ang mga tawo dili mobayaw sa pagkasoberano ni Jehova maorag gipaluyohan pag-ayo. Si Abel patay na, ug ang iyang matinumanong panig-ingnan wala sunda. Apan, gipamatud-an ni Enoc ang iyang kaugalingon nga lahi. Siya may malig-ong pasukaranan sa pagtuo, kay nahibalo siya pag-ayo sa mga panghitabo nga nahitabo sa tanaman sa Eden.a Pagkadako gayod sa iyang pagpabili sa tagna ni Jehova nga nagpaila nga ang usa ka sinaad nga Binhi magtapos kang Satanas ug sa iyang mga laraw!​—Genesis 3:15.

Tungod niining paglaoma nga anaa kanunay kaniya, si Enoc wala mahadlok sa makasaysayanhong dinasig-sa-Yawa nga pagbuno kang Abel. Hinunoa, nagpadayon siya sa paglakaw uban kang Jehova, nga nangab-ot sa tibuok-kinabuhing kurso sa pagkamatarong. Si Enoc naghupot sa iyang kaugalingon nga bulag gikan sa kalibotan, nga nagsalikway sa independenteng espiritu niini.​—Genesis 5:​23, 24.

Dugang pa, si Enoc maisogong misulti ug nagpatin-aw nga ang daotang mga buhat sa Yawa mapakyas gayod. Ubos sa impluwensiya sa balaang espiritu sa Diyos, o aktibong gahom, si Enoc nagtagna maylabot sa daotan: “Tan-awa! Si Jehova miabot uban ang iyang balaang mga tinagpulo-ka-libo, aron ipahamtang ang paghukom batok sa tanan, ug aron hukmang sad-an ang tanang dili-diyosnon labot sa tanan nilang dili-diyosnong mga buhat nga ilang gihimo sa dili-diyosnong paagi, ug labot sa tanang makapakugang nga mga butang nga gipamulong sa dili-diyosnong mga makasasala batok kaniya.”​—Judas 14, 15.

Gumikan sa maisogong mga pahayag ni Enoc, si apostol Pablo, sa pagsulat ngadto sa Hebreohanong mga Kristohanon, naglakip kaniya taliwala sa dakong “panganod sa mga saksi” nga nagpakitag maayong panig-ingnan sa pagtuo nga nagalihok.b (Hebreohanon 11:​5; 12:1) Ingon nga tawo sa pagtuo, si Enoc milahutay sa usa ka dalan sa integridad kapin sa 300 anyos. (Genesis 5:22) Nakapayugot gayod ang pagkamatinumanon ni Enoc alang sa mga kaaway sa Diyos sa langit ug yuta! Ang matulisokong tagna ni Enoc nag-agni sa pagdumot ni Satanas, apan nagdala kadto sa panalipod ni Jehova.

Ang Diyos Nagkuha Kang Enoc —Sa Unsang Paagi?

Si Jehova wala magtugot kang Satanas o sa iyang yutan-ong mga alagad sa pagpatay kang Enoc. Hinunoa, ang dinasig nga talaan nag-ingon: “Ang Diyos nagkuha kaniya.” (Genesis 5:​24) Si apostol Pablo naghubit sa mga butang niining paagiha: “Tungod sa pagtuo si Enoc gilalin aron dili makakitag kamatayon, ug wala na siya makaplagi tungod kay ang Diyos milalin man kaniya; kay sa wala pa ang paglalin kaniya siya nakabaton ug pagsaksi nga iyang napahimut-an pag-ayo ang Diyos.”​—Hebreohanon 11:5.

Sa unsang paagi si Enoc “gilalin aron dili makakitag kamatayon”? O ingon sa pagbatbat sa hubad ni R. A. Knox, sa unsang paagi si Enoc “gisakmit nga wala makasinati ug kamatayon”? Ang Diyos malinawong nagtapos sa kinabuhi ni Enoc, nga nagluwas kaniya sa mga pagtinga sa kamatayon gumikan kaha sa sakit o kapintasan sa mga kamot sa iyang mga kaaway. Oo, si Jehova nagpamubo sa kinabuhi ni Enoc sa pangedaron nga 365​—batan-on pa kaayo kon itandi sa iyang mga katalirongan.

Sa unsang paagi si Enoc gihatagan ug usa ka “pagsaksi nga iyang napahimut-an pag-ayo ang Diyos”? Unsa may pamatuod nga iyang nabatonan? Lagmit, gipapunawan sa Diyos si Enoc, sama nga si apostol Pablo “gisakgaw,” o gibalhin, nga dayag nakadawat ug panan-awon sa umaabot nga espirituwal nga paraiso sa Kristohanong kongregasyon. (2 Corinto 12:​3, 4) Ang pamatuod, o ebidensiya, nga si Enoc nakapahimuot sa Diyos lagmit naglangkit ug daklit nga panan-awon sa umaabot nga yutan-ong Paraiso nga niana ang tanang buhi mopaluyo sa pagkasoberano sa Diyos. Lagmit kadto maoy sa dihang si Enoc nakasinati sa usa ka mahimayaong panan-awon nga ang Diyos nagkuha kaniya sa walay sakit nga kamatayon aron matulog hangtod sa adlaw sa iyang pagkabanhaw. Maorag, sama sa kahimtang ni Moises, si Jehova naglubong sa lawas ni Enoc, kay “wala na siya makaplagi.”​—Hebreohanon 11:​5; Deuteronomio 34:​5, 6; Judas 9.

Ang Tagna Natuman

Karong adlawa, ang mga Saksi ni Jehova nagapahayag sa diwa sa tagna ni Enoc. Gikan sa Kasulatan, ilang ginapakita kon sa unsang paagi kini matuman sa dihang laglagon sa Diyos ang mga dili-diyosnon sa duol nga umaabot. (2 Tesalonica 1:​6-​10) Ang ilang mensahe nakapahimo kanilang dili ilado, kay kini lahi kaayo gikan niining kalibotanong mga panglantaw ug mga tumong. Ang pagsupak nga ilang ginasagubang wala makapahibulong kanila, kay si Jesus nagpasidaan sa iyang mga sumusunod: “Mahimo kamong mga dulumtanan sa tanang katawhan tungod sa akong ngalan.”​—Mateo 10:22; Juan 17:14.

Sama kang Enoc, hinunoa, ang presentengadlaw nga mga Kristohanon gipasaligan sa umaabot nga kagawasan gikan sa ilang mga kaaway. Si apostol Pedro misulat: ‘Si Jehova mahibalo kon unsaon sa pagpahigawas sa katawhan nga may diyosnong pagkamahinalaron gikan sa pagsulay, apan sa pagtagana sa katawhang dili-matarong alang sa adlaw sa paghukom aron pagaputlon.’ (2 Pedro 2:9) Hayan makita sa Diyos nga haom ang pagsulbad sa usa ka suliran o sa usa ka masulayong kahimtang. Ang paglutos mahimong matapos. Apan kon dili, mahibalo siya kon unsaon “maghimog kalingkawasan” aron ang iyang katawhan makalahutay sa ilang mga pagsulay nga malamposon. Si Jehova nagatagana pa ngani ug “gahom nga labaw sa kasarangan” kon gikinahanglan.​—1 Corinto 10:​13; 2 Corinto 4:7.

Ingon nga “tigganti sa mga matinuorong nagapangita kaniya,” si Jehova magapanalangin usab sa iyang matinumanong mga alagad sa kinabuhing walay kataposan. (Hebreohanon 11:6) Alang sa kinabag-an kanila, kini maoy kinabuhing dayon sa usa ka yutan-ong paraiso. Sama kang Enoc, hinaot nga kita maisogong magapahayag sa mensahe sa Diyos. Uban ang pagtuo, buhaton nato kini bisan pa sa tanang kalisdanan.

[Mga footnote]

[Kahon sa panid 30]

Ang Ngalan sa Diyos Gipasipalahan

Mga upat ka siglo una pa kang Enoc, ang apo nga lalaki ni Adan nga si Enos nahimugso. “Niadtong panahona gisugdan ang pagtawag sa ngalan ni Jehova,” nagaingon ang Genesis 4:26. Ang pipila ka Hebreohanon-pinulongan nga mga eskolar nagtuo nga kining bersikuloha angay nga basahong “nagsugod sa mapasipalahong paagi” sa pagtawag sa ngalan sa Diyos o, “dayon ang pagpasipala misugod.” Maylabot nianang yugtoa sa kasaysayan, ang Jerusalem Targum nag-ingon: “Kadto mao ang kaliwatan sa kang kansang mga adlaw sila misugod sa pagkasayop, ug naghimo alang sa ilang kaugalingon ug mga idolo, ug nagngalan sa ilang mga idolo pinaagi sa ngalan sa Pulong sa Ginoo.”

Ang panahon ni Enos nakasaksi sa kaylap nga pagpasipala sa ngalan ni Jehova. Posible nga ang katawhan migamit sa balaang ngalan alang sa ilang kaugalingon o ngadto sa tinong mga tawo pinaagi kang kinsa sila nagpakaaron-ingnon nga moduol kang Jehova nga Diyos sa pagsimba. O sila mahimong naggamit sa balaang ngalan alang sa mga idolo. Bisan hain niana, si Satanas nga Yawa nagbitik pag-ayo sa tawhanong rasa ngadto sa lit-ag sa idolatriya. Sa panahon sa pagkahimugso ni Enoc, talagsaon na ang matuod nga pagsimba. Bisan kinsa nga sama kang Enoc, nga nagkinabuhi sa kamatuoran ug nagsangyaw niana, dili-popular ug busa maoy tumong sa paglutos.​—Itandi ang Mateo 5:​11, 12.

[Kahon sa panid 31]

Si Enoc ba Misaka sa Langit?

“Tungod sa pagtuo si Enoc gilalin aron dili makakitag kamatayon.” Sa ilang pagbatbat niining bahina sa Hebreohanon 11:​5, ang pipila ka hubad sa Bibliya nagpaila nga si Enoc wala gayod mamatay. Pananglitan, ang A New Translation of the Bible, ni James Moffatt, nag-ingon: “Maoy tungod sa pagtuo nga si Enoc gidala ngadto sa langit mao nga siya wala gayod mamatay.”

Mga 3,000 ka tuig tapos sa mga adlaw ni Enoc, hinunoa, si Jesu-Kristo miingon: “Walay tawo nga nakasaka sa langit gawas niya nga nanaog gikan sa langit, ang Anak sa tawo.” (Juan 3:​13) Ang The New English Bible mabasa: “Wala pa gayoy nakasaka sa langit gawas sa usa nga nanaog gikan sa langit, ang Anak sa Tawo.” Sa dihang gilitok ni Jesus kanang mga pulonga, bisan siya wala pa makasaka sa langit.​—Itandi ang Lucas 7:28.

Si apostol Pablo nag-ingon nga si Enoc ug ang uban nga naglangkob sa dakong panganod sa una-Kristohanong mga saksi ‘tanan nangamatay’ ug “wala makabaton sa katumanan sa mga saad.” (Hebreohanon 11:​13, 39) Ngano? Tungod kay ang tanang tawo, lakip na si Enoc, nakapanunod sa sala gikan kang Adan. (Salmo 51:​5; Roma 5:12) Ang bugtong paagi sa kaluwasan maoy pinaagi sa halad lukat ni Kristo Jesus. (Buhat 4:​12; 1 Juan 2:​1, 2) Sa mga adlaw ni Enoc kanang maong lukat wala pa ibayad. Busa, si Enoc wala mosaka sa langit, apan siya natulog sa kamatayon nga naghulat sa usa ka pagkabanhaw sa yuta.​—Juan 5:​28, 29.

[Picture Credit Line sa panid 29]

Hinulad gikan sa Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther’s