Malipayon Kadtong Nagapabiling Nagatukaw!
“Tan-awa! Ako moabot ingon sa usa ka kawatan. Malipayon ang usa nga pabiling nagatukaw ug nagabantay sa iyang panggawas nga mga besti.”—PINADAYAG 16:15.
1. Sanglit haduol na ang adlaw ni Jehova, unsay atong madahom?
ANG dakong adlaw ni Jehova haduol na, ug kana nagpasabot ug gubat! Diha sa panan-awon, si apostol Juan nakakita ug samag-baki nga “mga pahayag nga inspirado sa mga demonyo” nga nangadto sa tanang “mga hari,” o mga magmamando, sa yuta. Aron sa paghimog unsa? Aw, “aron sa pagtigom kanila ngadto sa gubat sa dakong adlaw sa Diyos nga Labing-Gamhanan”! Si Juan midugang: “Ilang gitigom sila ngadto sa dapit nga gitawag sa Hebreo nga Har–Magedon.”—Pinadayag 16:13-16.
2. Kinsa si Gog sa Magog, ug unsay mahitabo sa dihang iyang sulongon ang katawhan ni Jehova?
2 Sa dili madugay, palihokon ni Jehova kining politikanhong elemento niining sistemaha sa paglaglag sa Dakong Babilonya, ang kalibotang imperyo sa bakak nga relihiyon. (Pinadayag 17:1-5, 15-17) Unya tigomon ni Gog sa Magog, si Satanas nga Yawa nga gitambog sa kahawanan sa yuta, ang iyang mga panon ug mosulong sa bug-os batok sa malinawon, daw walay-panalipod nga katawhan ni Jehova. (Ezequiel 38:1-12) Apan ang Diyos molihok sa pagluwas sa iyang katawhan. Kana magtimaan sa pagsugod “sa dako ug makapukawg-kalisang nga adlaw ni Jehova.”—Joel 2:31; Ezequiel 38:18-20.
3. Unsaon nimo paghubit ang mga hitabo nga gitagna diha sa Ezequiel 38:21-23?
3 Oo, luwason ni Jehova ang iyang katawhan ug maglaglag sa matag kataposang timaan sa sistema ni Satanas sa dihang kita makaabot sa kahimtang sa kalibotan nga gitawag ug Har–Magedon, o Armageddon. Basaha ang matagnaong mga pulong diha sa Ezequiel 38:21-23, ug handurawa ang talan-awon. Gamiton ni Jehova ang iyang gahom sa pagpakanaog sa bul-og sa ulan, makamatayng mga ulan nga yelo, nagdilaab nga kalayo, malaglagong kamatay. Maghari ang kalisang sa tibuok-kalibotan samtang ang mga panon ni Gog magkaguliyang, nga mag-awayay batok sa usag usa. Ang si bisan kinsang mga kaaway sa Diyos nga Labing-Gamhanan nga buhi pa pagalaglagon samtang gamiton ni Jehova ang dili-kinaiyanhong mga paagi sa pagluwas sa iyang mga alagad. Sa dihang matapos na ang gitagnang “dakong kasakitan,” wala gayoy butang nga mabilin sa dili-diyosnong sistema ni Satanas. (Mateo 24:21) Apan, bisag nagpinal na sila, ang daotan makaila kon kinsa ang responsable sa ilang katalagman. Ang atong madaogong Diyos mismo nag-ingon: “Sila makaila nga ako mao si Jehova.” Kining talagsaon kaayong mga hitabo mahitabo sa atong adlaw, sa panahon sa presensiya ni Jesus.
Moabot Sama sa Kawatan
4. Sa unsang paagi si Jesus moabot aron sa paglaglag niining daotang sistema sa mga butang?
4 Ang nahimayang Ginoong Jesu-Kristo nag-ingon: “Tan-awa! Ako moabot ingon sa usa ka kawatan.” Ang samag-kawatan nga pag-abot maoy kalit, sa wala dahoma nga panahon, sa dihang ang kadaghanang tawo nangatulog. Sa dihang moabot si Jesus sama sa kawatan sa paglaglag niining daotang sistema, iyang pagaluwason kadtong tinuod gayod nga nagatukaw. Iyang gisultihan si Juan: “Malipayon ang usa nga pabiling nagatukaw ug nagabantay sa iyang panggawas nga mga besti, aron nga dili siya magalakaw nga hubo ug ang mga tawo managtan-aw sa iyang kaulawan.” (Pinadayag 16:15) Unsay buot ipasabot niadtong mga pulonga? Ug sa unsang paagi kita makapabiling nagatukaw sa espirituwal?
5. Unsang kahikayan sa pag-alagad sa templo ang ginahimo sa dihang dinhi pa si Jesus sa yuta?
5 Kasagaran, ang guwardiya dili huboan kon siya makatulog samtang nagguwardiya. Apan mao kanay nahitabo sa templo sa Jerusalem sa dihang si Jesus dinhi pa sa yuta ug ang mga pundok sa mga saserdote ug mga Levihanon nag-alagad sa templo sa Jerusalem. Niadtong ika-11ng siglo W.K.P. nga si Haring David naghikay sa Israel ug gatosan ka saserdote ug ilang libolibong mga katabang nga mga Levihanon sa pagkahimong usa ka organisasyon nga gilangkoban sa 24 ka pundok. (1 Cronicas 24:1-18) Ang matag pundok nga kapin sa usa ka libong hanas nga mga mamumuo nagpulipuli sa pag-atiman sa mga bahin sa pag-alagad sa templo labing menos duha ka beses sa usa ka tuig sa usa ka tibuok semana sa tagsa ka higayon. Apan, diha sa Pista sa mga Balongbalong, ang tanang 24 ka pundok presente aron sa pag-atiman sa buluhaton. Dugang tabang gikinahanglan usab sa mga pista sa Paskuwa.
6. Unsa kahay gipasabot ni Jesus sa dihang siya miingon, “Malipayon ang usa nga pabiling nagatukaw ug nagabantay sa iyang panggawas nga mga besti”?
6 Sa dihang si Jesus miingon, “Malipayon ang usa nga pabiling nagatukaw ug nagabantay sa iyang panggawas nga mga besti,” ang iyang gipasabot tingali mao ang paagi nga gisunod niadto nga naglakip sa pagbantay sa templo. Ang Hudiyohanong Mishnah nag-ingon: “Ang mga saserdote nagpadayon sa pagbantay sa tulo ka dapit sa Templo: sa Lawak sa Abtinas, sa Lawak sa Kalayo, ug sa Lawak sa Daoban; ug ang mga levihanon diha sa kawhaan-ug-usa ka dapit: lima sa lima ka ganghaan sa Bukid sa Templo, upat sa upat ka eskina niini sa sulod, lima sa lima ka ganghaan sa Sawang sa Templo, upat sa upat ka eskina niini sa gawas, ug usa sa Lawak sa mga Halad, ug usa sa Lawak sa Tabil, ug usa sa likod sa luna sa Lingkoranan sa Kaluoy [sa gawas sa bungbong sa likod sa Labing Balaan]. Liboton sa opisyal sa Bukid sa Templo ang matag magbalantay nga may dala nga nagsigang sulo sa atubangan kaniya, ug kon may si bisan kinsa nga magbalantay nga dili motindog ug moingon kaniya, ‘Oh opisyal sa Bukid sa Templo, maanaa kanimo ang kalinaw!’ ug timaan kana nga siya natulog, iyang latigohon siya sa iyang sungkod, ug siya may katungod sa pagsunog sa iyang mga besti.”—The Mishnah, Middoth (“Mga Sukod”), 1, parapo 1-2, gihubad ni Herbert Danby.
7. Nganong ang mga saserdote ug mga Levihanon nga nagbantay sa templo kinahanglang magpabiling nagatukaw?
7 Ang daghang Levihanon ug mga saserdote nga sakop sa pundok nga nag-alagad nagpabiling nagtukaw sa tibuok gabii aron magbantay ug aron mapugngan ang si bisan kinsa nga mahugaw sa pagsulod sa mga sawang sa templo. Sanglit liboton man sa “opisyal sa Bukid sa Templo,” o sa “kapitan sa templo,” ang tanang 24 ka estasyon panahon sa pagbantay sa kagabhion, ang matag magbalantay kinahanglang nagpabiling nagtukaw sa iyang puwesto kon dili niya buot masakpan nga wala magbantay.—Buhat 4:1.
8. Unsa ang mahulagwayong panggawas nga mga besti sa Kristohanon?
8 Ang dinihogang mga Kristohanon ug ang ilang kaubang mga alagad kinahanglang magpabiling nagatukaw ug nagasul-ob sa ilang mahulagwayong panggawas nga mga besti. Kini maoy panggawas nga mga pamatuod sa atong pagkatinudlo sa pag-alagad diha sa espirituwal nga templo ni Jehova. Sa pag-ila niini, anaa kanato ang balaang espiritu, o aktibong gahom, sa Diyos sa pagtabang kanato sa paghimo sa atong mga buluhaton ug sa pagtuman sa atong mga pribilehiyo ingong mga magwawali sa Gingharian. Ang pagkatulog diha sa atong mga puwesto ingong mga ministro sa Diyos magpameligro kanato nga masakpan ni Jesu-Kristo, ang Kapitan sa dakong espirituwal nga templo. Kon kita natulog sa espirituwal nianang panahona, kita sa mahulagwayon pagahuboan ug ang atong simbolikong mga besti pagasunogon. Busa sa unsang paagi kita makapabiling nagatukaw sa espirituwal?
Kon sa Unsang Paagi Kita Makapabiling Nagatukaw
9. Nganong ang pagtuon sa Bibliya uban sa tabang sa Kristohanong mga publikasyon hinungdanon kaayo?
9 Ang makugihong pagtuon sa Kasulatan uban sa tabang sa Kristohanong mga publikasyon maoy usa ka tigpadasig sa espirituwal nga pagkamatukawon. Ang maong pagtuon magsangkap kanato alang sa ministeryo, magtabang kanato sa pagsagubang sa kalisod, ug magpakita kanato sa dalan sa walay kataposang kalipay. (Proverbio 8:34, 35; Santiago 1:5-8) Ang atong pagtuon kinahanglang bug-os ug mauswagon. (Hebreohanon 5:14–6:3) Ang sustansiyadong pagkaon nga pagakaonong regular makatabang kanato nga makapabiling nagatukaw ug alisto kanunay. Kini makapugong sa pagduka nga tingali maoy usa ka timaan sa kakulag sustansiya. Kita walay katarongan nga makulangan ug sustansiya sa espirituwal nga paagi ug katulogon, kay ang Diyos abundang nagtagana ug espirituwal nga pagkaon pinaagi sa dinihogang “kasaligan ug mabuot nga ulipon.” (Mateo 24:45-47) Ang regular nga pagkaon ug espirituwal nga kalan-on pinaagi sa pagtuon sa personal ug sa pamilya maoy usa ka paagi aron makapabiling nagatukaw ug “mamahimsog diha sa pagtuo.”—Tito 1:13.
10. Nganong ang Kristohanong mga tigom, mga asembliya, ug mga kombensiyon magtabang kanato nga makapabiling nagatukaw sa espirituwal?
10 Ang Kristohanong mga tigom, mga asembliya, ug mga kombensiyon makatabang sa pagpabilin kanato nga nagatukaw sa espirituwal. Kini naghatag ug pagdasig ug mga higayon ‘sa pagpasibot sa usag usa sa paghigugma ug sa maayong mga buhat.’ Ilabinang angay nga kita regular nga makigtigom samtang atong “nakita nga ang adlaw nagakaduol na.” Kanang adlawa haduol na gayod kaayo. Kini mao ang “adlaw ni Jehova,” sa dihang iyang pagabayawon ang iyang pagkasoberano. Kon kanang adlawa tinuod gayod nga hinungdanon kanato—ug angay gayod—dili nato ‘talikdan ang atong mga panagkatigom.’—Hebreohanon 10:24, 25; 2 Pedro 3:10.
11. Nganong ikaingon nga ang Kristohanong ministeryo hinungdanon sa pagpabiling nagatukaw sa espirituwal?
11 Ang kinasingkasing nga pagpakigbahin sa Kristohanong pag-alagad hinungdanon aron makapabiling nagatukaw sa espirituwal. Ang regular ug madasigong pagpakigbahin sa pagsangyaw sa maayong balita magpaalisto kanato. Ang atong ministeryo naghatag kanato ug daghang higayon sa pagpakigsulti sa mga tawo bahin sa Pulong sa Diyos, sa iyang Gingharian, ug sa iyang mga katuyoan. Makapalipay ang pagpamatuod gikan sa balay ug balay, paghimog mga pagbalik-duaw, ug pagdumalag mga pagtuon sa Bibliya diha sa balay sa mga publikasyong sama sa Kahibalo nga Motultol sa Kinabuhing Walay Kataposan. Ang mga ansiyano sa karaang Efeso nakapamatuod nga gitudloan sila ni Pablo “sa publiko ug sa balay ug balay.” (Buhat 20:20, 21) Siyempre, ang ubang matinumanong mga Saksi ni Jehova adunay seryosong mga suliran sa panglawas nga nakapugong sa ilang pag-alagad sa usa ka paagi, apan sila nangita ug mga paagi sa pagsulti sa uban bahin kang Jehova ug sa iyang pagkahari ug nakabaton ug dakong kalipay sa pagbuhat niini.—Salmo 145:10-14.
12, 13. Alang sa unsang mga katarongan nga atong likayan ang paghinobra sa pagkaon ug pag-inom?
12 Ang paglikay sa paghinobra makatabang kanato sa pagpabiling nagatukaw sa espirituwal. Sa dihang naghisgot bahin sa iyang presensiya, giawhag ni Jesus ang iyang mga apostoles: “Tagda ang inyong kaugalingon nga ang inyong mga kasingkasing dili gayod mabug-atan sa pagpalabig kaon ug pagpalabig inom ug sa mga kabalaka sa kinabuhi, ug sa kalit kanang adlawa dihadiha modangat nganha kaninyo ingon nga usa ka lit-ag. Kay moabot kini nganha sa tanang nagapuyo ibabaw sa nawong sa tibuok nga yuta.” (Lucas 21:7, 34, 35) Ang pagkalaog sa pagkaon ug paghuboghubog maoy supak sa mga prinsipyo sa Bibliya. (Deuteronomio 21:18-21) Ang Proverbio 23:20, 21 nag-ingon: “Ayaw pagtipon sa mga palainom sa bino, taliwala niadtong mga ulitan nga kumakaon sa unod. Kay ang palahubog ug ang ulitan modangat sa kawalad-on, ug ang pagkahingatulog magasapot sa usa ka tawo sa mga nuog.”— Proverbio 28:7.
13 Bisan pa kon ang pagpalabig kaon ug pagpalabig inom wala makaabot hangtod nianang puntoha, hinunoa, kini makahimo sa tawo nga katulogon, nga mahimo pang tapolan ug mapinasagdanon sa pagtuman sa kabubut-on sa Diyos. Siyempre, adunay mga kabalaka labot sa panimalaynong kinabuhi, panglawas, ug uban pa. Bisan pa niana, kita mahimong malipayon kon atong unahon ang intereses sa Gingharian diha sa kinabuhi ug makasalig nga ang atong langitnong Amahan magatagana alang kanato. (Mateo 6:25-34) Kay kon dili, “kanang adlawa” moabot kanato samag “usa ka lit-ag,” tingali ingong natagong bitik nga makadakop kanato nga walay kalibotan o ingong may paon nga laang, sama niadtong nagadani ug unya nagasikop sa dili-mabinantayong mga mananap. Kini dili mahitabo kon kita magpabiling nagatukaw, bug-os nga nahibalo nga kita nagkinabuhi “sa panahon sa kataposan.”—Daniel 12:4.
14. Nganong angayng mag-ampo kita nga kinasingkasing?
14 Ang kinasingkasing nga pag-ampo maoy laing tabang sa pagpabiling nagatukaw sa espirituwal. Diha sa iyang dakong tagna, si Jesus dugang nag-awhag: “Nan, padayong magtukaw, nga sa tanang panahon magapangamuyo nga kamo molampos sa pag-ikyas niining tanang butanga nga gikatinong mahitabo, ug sa pagbarog atubangan sa Anak sa tawo.” (Lucas 21:36) Oo, mag-ampo kita nga kita unta kanunayng anaa sa kiliran ni Jehova ug nagatagamtam ug usa ka inuyonang baroganan sa dihang si Jesus, ang Anak sa tawo, moabot sa paglaglag niining daotang sistema sa mga butang. Alang sa atong kaayohan ug alang sa kaayohan sa isigkamagtutuo nga kanila kita nagaampo, kita kinahanglang ‘magpabiling magmata diha sa pag-ampo.’—Colosas 4:2; Efeso 6:18-20.
Nagakamubo na ang Panahon
15. Unsay mahimo sa atong pag-alagad ingong mga magwawali sa pagkamatarong?
15 Samtang naghulat kita sa dakong adlaw ni Jehova, walay duhaduha nga kita nagtinguha sa pagbuhat kutob sa atong mahimo diha sa iyang pag-alagad. Kon kita kinasingkasing nga moampo kaniya bahin niini, “usa ka dakong pultahan nga nagatultol ngadto sa kalihokan” mahimong mabuksan kanato. (1 Corinto 16:8, 9) Sa tinudlong panahon sa Diyos, si Jesus magpakanaog ug hukom ug maglain sa matarong nga “mga karnero” nga takos sa kinabuhing walay kataposan gikan sa dili-diyosnong “mga kanding” nga takos sa walay kataposang kalaglagan. (Juan 5:22) Dili kita ang maglain sa mga karnero gikan sa mga kanding. Apan ang atong pag-alagad ingong mga magwawali sa pagkamatarong karon naghatag sa mga tawo ug higayon sa pagpilig usa ka kinabuhi sa pag-alagad sa Diyos ug busa makabaton sa paglaom sa pagkahimong malain ngadto sa kinabuhi sa dihang si Jesus “moabot diha sa iyang himaya.” Ang pagkamubo sa panahong nahibilin alang niining sistema sa mga butang nagpasamot sa panginahanglan alang sa mas kinasingkasing nga kalihokan samtang ginapangita nato ang mga tawo nga “sa husto nahimutang alang sa kinabuhing walay-kataposan.”—Mateo 25:31-46; Buhat 13:48.
16. Nganong kita angayng mahimong madasigong mga magwawali sa Gingharian?
16 Nagakamubo ang panahon sa kalibotan sa mga adlaw ni Noe, ug kini nagakamubo na alang niining sistema sa mga butang. Busa magmadinasigon kita nga mga magwawali sa Gingharian. Ang atong buluhatong pagsangyaw nagamauswagon, kay sa matag tuig ginatos ka linibo ang ginabawtismohan agig simbolo sa ilang pagpahinungod sa Diyos. Sila nangahimong bahin sa gipanalanginang organisasyon ni Jehova—“iyang katawhan ug ang mga karnero sa iyang sibsibanan.” (Salmo 100:3) Pagkadakong kalipay ang pagpakigbahin sa buluhaton sa pagsangyaw-sa-Gingharian nga nagadalag paglaom ngadto sa daghan kaayo sa dili pa ang “dako ug makapukawg-kalisang nga adlaw ni Jehova”!
17, 18. (a) Samtang kita nagasangyaw, unsang reaksiyon ang atong madahom gikan sa uban? (b) Unsa ang tinong moagpas sa mga mabiaybiayon?
17 Sama kang Noe, kita adunay tabang ug panalipod sa Diyos. Oo, ang mga tawo, ang nagmateryalisar nga mga manulonda, ug ang Nepilim hayan nangyubit sa balita ni Noe, apan kadto wala magpahunong kaniya. Karong adlawa, ang uban mangyubit sa dihang ipakita nato ang dili-ikalalis nga ebidensiya nga kita nagkinabuhi na “sa kataposang mga adlaw.” (2 Timoteo 3:1-5) Ang ingon niana nga pagbiaybiay maoy katumanan sa tagna sa Bibliya mahitungod sa presensiya ni Kristo, kay si Pedro nagsulat: “Sa ulahing mga adlaw adunay mangabot nga mga mabiaybiayon uban sa ilang mga pagbiaybiay, nga magapadayon sumala sa kaugalingon nilang mga tinguha ug manag-ingon: ‘Asa na man kining gisaad nga pagkaanaa niya? Tan-awa, sukad sa adlaw nga ang atong mga katigulangan nahikatulog sa kamatayon, ang tanang butang nagapadayon nga mao ra gayod sukad sa sinugdan sa kalalangan.’”—2 Pedro 1:16; 3:3, 4.
18 Ang presenteng-adlawng mga mabiaybiayon tingali maghunahuna: ‘Walay butang nga nausab sukad sa kalalangan. Ang kinabuhi nagpadayon, uban sa mga tawo nga nanagpangaon, nanagpanginom, nanagminyo, ug nagapanganak. Bisan kon ania pa si Jesus, dili siya magpahamtang sa paghukom sa akong adlaw.’ Pagkasayop nila! Kon dili sila mamatay gumikan sa ubang mga hinungdan sa kasamtangan, ang makapukawg-kalisang nga adlaw ni Jehova tino nga moagpas kanila, sama ra nga ang makatalagmanong kalaglagan sa Lunop nagtapos sa usa ka daotan nga kaliwatan sa panahon ni Noe.—Mateo 24:34.
Sa Tanang Paagi, Magpabiling Nagatukaw!
19. Sa unsang paagi pagalantawon nato ang atong mga buluhaton sa paghimog tinun-an?
19 Kon kita nagpahinungod kang Jehova, hinaot nga dili gayod kita maganoy sa pagkatulog pinaagi sa sayop nga pangatarongan. Kini mao ang panahon sa pagpabiling nagatukaw, sa pagpasundayag ug pagtuo sa mga tagna sa Diyos, ug sa pagtuman sa atong sugo sa “paghimog mga tinun-an sa katawhan sa tanang kanasoran.” (Mateo 28:19, 20) Samtang nagaatubang kining sistemaha sa kataposan niini, wala nay mas dako pang pribilehiyo nga atong mabatonan kay sa pag-alagad kang Jehova nga Diyos ubos sa pagpangulo ni Jesu-Kristo ug sa pagpakigbahin sa tibuok-kalibotang buluhaton sa pagsangyaw niining “maayong balita sa gingharian” sa dili pa moabot ang kataposan.—Mateo 24:14; Marcos 13:10.
20. Unsang panig-ingnan ang gipakita ni Caleb ug Josue, ug unsay gipadayag sa ilang dalan alang kanato?
20 Ang ubang katawhan ni Jehova nag-alagad kaniya sa daghang dekada, tingali sulod sa tibuok nga kinabuhi. Ug bisan pa kon bag-o pa lang natong gidawat ang matuod nga pagsimba, hinaot nga mahisama kita sa Israelinhong si Caleb, kinsa “misunod kang Jehova sa bug-os.” (Deuteronomio 1:34-36) Siya ug si Josue andam na gayod sa pagsulod sa Yutang Saad wala magdugay human sa kagawasan sa Israel gikan sa pagkaulipon sa Ehipto. Apan, ang hamtong nga mga Israelinhon sa katibuk-an kulag pagtuo ug napugos sa paggugol ug 40 ka tuig diha sa kamingawan, diin didto sila nangamatay. Giantos ni Caleb ug Josue ang kalisod uban kanila sa tanan niadtong panahona, apan sa kataposan kadtong duha ka lalaki misulod sa yutang saad. (Numeros 14:30-34; Josue 14:6-15) Kon atong ‘sundon si Jehova sa bug-os’ ug magpabiling nagatukaw sa espirituwal, atong maangkon ang kalipay sa pagsulod sa gisaad nga bag-ong kalibotan sa Diyos.
21. Unsay atong matagamtam kon kita magpabiling nagatukaw sa espirituwal?
21 Ang ebidensiya klarong nagpamatuod nga kita nagkinabuhi na sa panahon sa kataposan ug nga ang dakong adlaw ni Jehova haduol na. Dili kini panahon sa pagkahimong katulogon ug magmapinasagdanon sa pagtuman sa kabubut-on sa Diyos. Kita pagapanalanginan lamang kon kita magpabiling nagatukaw sa espirituwal ug padayong nagasul-ob sa atong besti sa pag-ila ingong Kristohanong mga ministro ug mga alagad ni Jehova. Hinaot nga magmadeterminado kita nga “magtukaw, barog nga malig-on diha sa pagtuo, magpakalalaki, magmakusganon.” (1 Corinto 16:13) Ingong mga alagad ni Jehova, hinaot ang matag usa kanato magmalahutayon ug magmaisogon. Unya kita mahimong malakip niadtong kinsa andam sa dihang ang dakong adlaw ni Jehova moabot, nga matinumanong nagaalagad kaniya diha sa mga pundok sa mga malipayon kinsa nagapabiling nagatukaw.
Unsay Imong Tubag?
◻ Unsaon nimo pagbatbat sa atong mahulagwayong panggawas nga mga besti, ug sa unsang paagi kita dili mahuboan niini?
◻ Unsa ang pipila ka paagi aron magpabiling nagatukaw sa espirituwal?
◻ Nganong makapaabot kita ug mga mabiaybiayon, ug unsaon nato sila paglantaw?
◻ Sa unsang paagi pagalantawon nato ang atong buluhaton sa paghimog tinun-an niining kataposang mga adlaw?
[Blurb sa panid 16]
Ang mga Kristohanon adunay balaang espiritu sa Diyos nga motabang kanila sa pagpabiling nagatukaw ug sa pagtuman sa ilang mga katungdanan
[Hulagway sa panid 15]
Ikaw ba determinadong magpabiling nagatukaw sa espirituwal ug dili mahuboan sa imong mahulagwayong panggawas nga mga besti?