“Padayon sa Pagtukaw”

¹ Human hubita ang dagkong mga hitabo nga magtimaan sa kataposang mga adlaw niining sistemaha sa mga butang, giagda ni Jesus ang iyang mga tinun-an nga “padayon sa pagtukaw.” (Mar. 13:33) Nganong ang mga Kristohanon kinahanglang magpadayon sa pagtukaw? Kay kita nagkinabuhi na sa labing peligrosong panahon sa tawhanong kasaysayan. Dili kita makatugot nga magduka sa espirituwal. Kana mosangpot sa atong kapakyasan sa pagpabili sa buluhaton nga gihatag ni Jehova kanato nga himoon niining panahon sa kataposan. Unsa man kanang buluhatona?

² Gisugo ni Jehova ang iyang katawhan nga imantala sa tibuok yuta ang maayong balita bahin sa iyang Gingharian​—ang bugtong paglaom sa katawhan. Ang atong suod nga pagbuhat duyog sa organisasyon sa Diyos magpaila kanato ingong tinuod nga mga Kristohanon, nga mahunahunaon sa mga panahon ug sa panginahanglan sa pagtabang sa uban nga makadungog sa “mga pamulong sa kinabuhing walay-kataposan.” (Juan 6:68) Pinaagi sa masibotong pagpakig-ambit niining hinungdanon kaayong buluhaton, kita nagahatag ug ebidensiya nga nagtukaw sa espirituwal.

³ Napalihok sa Pagsangyaw: Ingong mga Saksi ni Jehova, kinahanglang kita positibo bahin sa atong ministeryo. Ang gugma sa Diyos ug sa silingan magpalihok kanato sa personal aron magpakig-ambit sa buluhatong pagsangyaw. (1 Cor. 9:​16, 17) Sa pagbuhat sa ingon, maluwas nato ang atong kaugalingon maingon man kadtong maminaw kanato. (1 Tim. 4:16) Hinaot nga maoy atong determinasyon ang pagpakig-ambit nga regular kutob sa mahimo ug segun sa panginahanglan diha sa pagsangyaw bahin sa kinamaayohang kagamhanan nga mabatonan sa katawhan sukad​—ang Gingharian sa Diyos!

⁴ Ang pagkadinalian sa atong ministeryo gipasiugda kanato pinaagi sa hinungdanong kamatuoran​—ang pagsiak sa dakong kasakitan modangat samtang nagpakig-ambit pa kita niining buluhatona. Ang atong pagkawala-mahibalo sa adlaw ug takna nanginahanglan nga kita mopadayon sa pagtukaw ug pag-andam sa tanang panahon, nga maampoong nagasalig kang Jehova. (Efe. 6:18) Ang gilapdon sa buluhatong pagsangyaw magpadayon sa pagdako. Apan usa ka adlaw sa di madugay, ang kinadak-ang buluhaton sa pagsangyaw sa tawhanong kasaysayan matapos.

⁵ Sunda nga matinumanon ang sugo ni Jesus nga “padayon sa pagtukaw.” Kini mas hinungdanon karon kay sa sukad masukad. Hinaot nga mosanong kita uban ang pagbati sa pagkadinalian. Karon ug sa matag adlaw, magpabilin kitang ugdang, igmat, ug aktibo sa espirituwal diha sa pag-alagad kang Jehova. Oo, hinaot “managtukaw kita ug managhupot sa atong panimuot.”​—1 Tes. 5:6.