Nahadlok Ka ba nga Mosalig sa Uban?

‘WALA akoy kasumbongan. Ang mga tawo dili mosabot. Puliki kaayo sila sa ilang kaugalingong mga suliran. Wala silay panahon para sa akoa.’ Daghan ang mibati nianang paagiha, busa giluom nila ang ilang gibati. Kon ang uban mangomosta kanila, kasagaran gusto nilang sultihan sila, apan wala nila sultii. Dili gayod sila makapahayag sa ilang kaugalingon.

Tinuod, anaa kadtong dili buot ug tabang gikan sa uban. Bisan pa niana, daghan ang buot gayod ug tabang apan nahadlok sa pagpadayag sa ilang personal kaayo nga mga hunahuna, mga pagbati, ug mga kasinatian. Usa ka ba kanila? Wala ba gayoy imong kasaligan?

Pagsabot sa Kahadlok

Sa kalibotan karon naglungtad ang kawalay-pagsalig. Ang mga batan-on dili makigsulti sa ilang mga ginikanan. Ang mga ginikanan dili makapakigsulti sa usag usa. Diyutay lang ang andam nga makigsulti niadtong anaa sa awtoridad. Kay dili makasugid sa uban, ang pipila modangop sa alkoholikong ilimnon, mga droga, o luag nga estilo sa kinabuhi sa pagsulay nga malimot sa ilang mga suliran.​—Proverbio 23:​29-35; Isaias 56:12.

Ang pagsalig sa mga tawong may awtoridad, sama sa mga klerigo, mga doktor, mga terapista, ug mga magtutudlo, gipahuyang sa daghang gipadayag nga pagkadili-matinud-anon ug imoralidad. Pananglitan, usa ka banabana nag-ingon nga kapin sa 10 ka porsiyento sa mga klerigo ang nalangkit sa seksuwal nga kahiwian. Kining “tigwagtang sa pagsalig,” miingon ang usa ka magsusulat, “nagmugna ug dagkong mga kal-ang diha sa tawhanong relasyon.” Sa unsang paagi naapektohan niini ang ilang mga kongregasyon? Kana nagwagtang sa pagsalig.

Ang kaylap nga pagkahugno sa moral mitultol usab sa krisis sa pamilya, sa punto nga ang gubot nga mga pamilya halos maoy naandan, dili eksepsiyon. Ang panimalay kanhi maoy usa ka kalikopan nga nagamatuto. Karon kasagarang sama na lang kini sa usa ka tubilanan ug gasolina panahon sa tingkaon. Sa dihang ang usa ka bata magtubo sa usa ka pamilya diin “walay kinaiyanhong pagbati,” ang komon nga resulta mao ang pagkadili-mosalig sa uban inigkahamtong.​—2 Timoteo 3:3.

Dugang pa, samtang magakagrabe ang mga kahimtang sa kalibotan, kita labi pang maladlad sa lagmit makadaot nga mga kasinatian. Sa susamang kahimtang, ang propetang si Miqueas misulat: “Ayaw kamo pagsalig sa usa ka suod nga higala.” (Miqueas 7:5) Mahimong bation nimo ang ingon tapos sa diyutay nga kahigawad, pagluib, o dakong naghulga-sa-kinabuhi nga hitabo. Malisdan ka sa pagsalig pag-usab sa uban ug mahimong dili-mobati, nga magkinabuhi sa matag adlaw luyo sa emosyonal nga babag. (Itandi ang Salmo 102:​1-7.) Tinuod, ang maong tinamdan mahimong motabang kanimo sa paghimo sa imong buluhaton, apan ang imong “kasubo sa kasingkasing” maghikaw kanimo sa bisan unsang tinuod nga kalipay sa kinabuhi. (Proverbio 15:13) Ang kamatuoran mao, aron ikaw mahimong himsog sa espirituwal, emosyonal, mental, ug pisikal, kanang maong babag kinahanglang malumpag ug kinahanglang makakat-on ka sa pagsalig sa uban. Posible ba kana? Oo.

Nganong Kinahanglang Malumpag ang Babag?

Ang pagsugid ngadto sa uban magdala ug kahupayan sa usa ka magul-anong kasingkasing. Nakasinati si Ana niini. Siya may maayong kaminyoon, usa ka lig-on nga panimalay, apan sila naguol pag-ayo. Bisan tuod “mapait ang kalag” niya, maalamon siyang “misugod sa pag-ampo kang Jehova” uban ang kamainiton nga nakapakibotkibot sa iyang mga ngabil. Oo, siya misugid kang Jehova. Unya siya misugilon sa iyang suliran sa hawas sa Diyos nga si Eli. Uban sa unsang resulta? “[Si Ana] milakaw sa iyang dalan ug mikaon, ug ang iyang pamayhon wala na magmasulub-on.”​—1 Samuel 1:​1-18.

Kadaghanang kultura nahibalo sa mga kaayohan sa pribadong pakigsulti. Pananglitan, ang pagpakig-ambit ug mga ideya ug mga kasinatian niadtong nakasinati sa susamang mga kahimtang makaayo. Ang mga tigdukiduki mihinapos: “Ang pagluom sa pagbati makapatunghag sakit​—kinahanglan kitang mopadayag aron magpabiling maayo ang pangisip.” Ang nagakadaghang hugpong sa siyentipikanhong pagdukiduki nagpalig-on sa kamatuoran sa dinasig nga proverbio nga nag-ingon: “Kadtong nagalain sa iyang kaugalingon nagapangita sa iyang kaugalingong hakog nga tinguha; siya nakiglantugi batok sa tanang praktikal nga kaalam.”​—Proverbio 18:1.

Kon dili ka mosugilon sa uban, sa unsang paagi sila makatabang kanimo? Bisan tuod si Jehova nga Diyos makabasa sa kasingkasing, ang imong kinailadmang mga hunahuna ug mga pagbati wala mahibaloi sa pamilya ug mga higala​—gawas kon mosugilon ka. (1 Cronicas 28:9) Sa dihang ang suliran nalangkit sa paglapas sa balaod sa Diyos, ang pag-unya-unya sa pagsugid sa usa ka butang makapagrabe lamang niana.​—Proverbio 28:13.

Sa pagkatinuod, ang mga kaayohan sa pagsugilon sa kagul-anan sa uban molabaw pa sa mga risgo nga masakitan. Siyempre, wala kana magkahulogan nga ibutyag nato ang personal nga mga detalye kang bisan kinsa. (Itandi ang Maghuhukom 16:​18; Jeremias 9:​4; Lucas 21:16.) “Adunay mga kauban nga mahiligon sa pagdaot sa usag usa,” mipasidaan ang Proverbio 18:​24 apan dayon midugang: “Adunay usa ka higala nga mopabilin labaw pa kay sa usa ka igsoon.” Asa ka man makakaplag nianang matanga sa higala?

Salig sa Imong Pamilya

Kon may problema ka, nasulayan na ba nimong hisgotan kana uban sa imong kapikas sa kaminyoon o sa imong mga ginikanan? “Alang sa daghang suliran, ang dulot nga kabildohay mao lamay gikinahanglan,” miangkon ang usa ka batid nga magtatambag. (Proverbio 27:9) Ang Kristohanong mga bana nga ‘nahigugma sa ilang mga asawa sama sa ilang mga kaugalingon,’ mga asawa nga ‘nagpasakop sa ilang mga bana,’ ug mga ginikanan nga nag-isip nga ugdang ang ilang tinudlo-sa-Diyos nga responsabilidad nga ‘matutoon ang ilang mga anak sa mapasiboong-pagdumala sa kaisipan ni Jehova’ naningkamot pag-ayo nga mahimong may-empatiyang mga mamiminaw ug makatabang nga mga magtatambag. (Efeso 5:​22, 33; 6:4) Bisan tuod wala siyay asawa ni mga anak sa unodnong diwa, pagkamaayong panig-ingnan ang gipakita ni Jesus niining bahina!​—Marcos 10:​13-16; Efeso 5:​25-27.

Unsa na man kon ang suliran dili masulbad sulod sa pamilya? Sa Kristohanong kongregasyon, dili gayod kita angayng mag-inusara. “Kinsa man ang maluya, ug ako dili maluya?” miingon si apostol Pablo. (2 Corinto 11:29) Siya nagtambag: “Padayong magpinas-anay sa mga kabug-at sa usag usa.” (Galacia 6:2; Roma 15:1) Taliwala sa atong espirituwal nga mga igsoong lalaki ug babaye, sa walay duhaduha makakaplag kitag labaw sa usa nga “igsoon nga anaa sa panahong adunay kagul-anan.”​—Proverbio 17:17.

Salig sa Kongregasyon

Sa kapin sa 80,000 ka kongregasyon sa mga Saksi ni Jehova sa tibuok yuta, adunay mapainubsanong mga tawo nga nag-alagad ingong “mga isigkamagbubuhat alang sa inyong kangaya.” (2 Corinto 1:24) Kini mao ang mga ansiyano. “Ang matag usa,” misulat si Isaias, “angayng mahimong ingon sa usa ka tagoanan gikan sa hangin ug usa ka tagoanan gikan sa bagyo, ingon sa mga sapa sa tubig sa yuta nga mamala, ingon sa usa ka landong sa usa ka dakong pangpang nga bato sa umaw nga yuta.” Gipaningkamotan sa mga ansiyano nga mahimong ingon niini.​—Isaias 32:2; 50:​4; 1 Tesalonica 5:14.

Ang mga ansiyano mokab-ot sa Kasulatanhong mga kinahanglanon una ‘itudlo sa balaang espiritu.’ Ang pagkahibalo niini magpalig-on sa imong pagsalig kanila. (Buhat 20:​28; 1 Timoteo 3:​2-7; Tito 1:​5-9) Ang imong hisgotan uban sa usa ka ansiyano magpabilin gayong sekreto. Ang pagkakasaligan maoy usa sa iyang mga kuwalipikasyon.​—Itandi ang Exodo 18:​21; Nehemias 7:2.

Ang mga ansiyano sa kongregasyon “padayong nagabantay sa inyong mga kalag ingon nga sila maoy maghatag ug husay.” (Hebreohanon 13:17) Wala ba kini magtukmod kanimo sa pagbutang sa imong pagsalig niining mga tawhana? Natural, dili tanang ansiyano ang maayo kaayo sa samang mga hiyas. Ang uban tingali mas daling duolon, maluloton, o masinaboton kay sa uban. (2 Corinto 12:​15; 1 Tesalonica 2:7, 8, 11) Nganong dili mosugid ngadto sa usa ka ansiyano nga mobati kang komportable?

Kining mga tawhana dili binayrang mga propesyonal. Hinunoa, sila maoy “mga gasa nga mga tawo,” nga gitagana ni Jehova sa pagtabang kanimo. (Efeso 4:​8, 11-13; Galacia 6:1) Sa unsang paagi? Nga mahanasong maggamit sa Bibliya, sila mopadapat sa makaayong gahom niini sa imong personal nga kahimtang. (Salmo 107:​20; Proverbio 12:​18; Hebreohanon 4:​12, 13) Sila moampo uban nimo ug alang nimo. (Filipos 1:​9; Santiago 5:​13-18) Ang tabang gikan nianang mahigugmaong mga magtatambag dakog mahimo sa pag-ayo sa nahasol nga espiritu ug pagpasig-uli sa kalinaw sa hunahuna.

Kon Unsaon Pagtukod ug Masaligong mga Relasyon

Ang pagpangayo ug tabang, tambag, o bisan paghangyo nga pamation dili timailhan sa kahuyangan o kapakyasan. Kana maoy makataronganon lamang nga pag-ila nga kita dili-hingpit ug nga walay nakabaton sa tanang tubag. Sa pagkatinuod, ang kinadak-ang magtatambag ug kasumbongan nato mao ang atong langitnong Amahan, si Jehova nga Diyos. Kita mouyon sa salmista nga misulat: “Si Jehova mao ang akong kusog ug ang akong taming. Kaniya ang akong kasingkasing misalig, ug ako gitabangan.” (Salmo 28:7) Diha sa pag-ampo kita sa walay lipudlipod ‘makabubo sa atong kasingkasing’ kaniya sa bisan unsang panahon, nga masaligon nga siya mamati kanato ug mahangawa kanato.​—Salmo 62:​7, 8; 1 Pedro 5:7.

Apan sa unsang paagi makakat-on ka sa pagsalig sa mga ansiyano ug sa uban diha sa kongregasyon? Una, susiha ang imong kaugalingon. Lig-on ba ug pasikaranan ang imong mga kahadlok? Madudahon ka ba sa mga motibo sa uban? (1 Corinto 13:​4, 7) Aduna bay paagi nga mamenosan ang risgo nga masakitan? Oo. Sa unsang paagi? Sulaying masinati ang uban sa personal nga paagi diha sa espirituwal nga kahimtang. Pakigsulti kanila diha sa mga tigom sa kongregasyon. Pakig-ambit nga magkauban diha sa pamalaybalay nga buluhaton. Ang pagsalig, sama sa pagtahod, kinahanglang hagoan. Busa pailob lang. Pananglitan, samtang masinati nimo ang usa ka espirituwal nga magbalantay, ang imong pagsalig kaniya mouswag. Anam-anama pagpadayag ang imong mga kabalaka. Kon siya mosanong sa haom, mabination, ug maalamong paagi, sulayan tingali nimong mobutyag ug dugang pa.

Ang kaubang mga magsisimba ni Jehova, ilabina ang Kristohanong mga ansiyano, naningkamot pag-ayo sa pagsundog sa makapasuod nga mga hiyas sa Diyos diha sa ilang relasyon sa usag usa. (Mateo 5:48) Kini moresulta sa usa ka kahimtang nga adunay pagsalig diha sa kongregasyon. Matod pa sa usa ka dugay nang ansiyano: “Ang mga igsoon kinahanglang masayod sa usa ka butang: Bisan unsay buhaton sa usa ka tawo, ang ansiyano dili mawad-an sa iyang Kristohanong gugma kaniya. Dili tingali magustoan sa ansiyano ang iyang gihimo, apan siya nahigugma gihapon sa iyang igsoon ug buot nga motabang kaniya.”

Busa dili kinahanglang mobati kang nag-inusara sa pagsulbad sa usa ka suliran. Pakigsulti sa usa ka tawo nga adunay “espirituwal nga mga kuwalipikasyon” kinsa makatabang kanimo sa pagpas-an sa imong palas-anon. (Galacia 6:1) Hinumdomi nga “ang kaguol nga anaa sa kasingkasing sa usa ka tawo maoy makapatikuko kaniya,” apan “ang makalilipay nga mga pulong ingon sa usa ka udlan, matam-is sa kalag ug makapalig-on sa mga bukog.”​—Proverbio 12:​25; 16:24.

[Kahon sa panid 26]

Si bisan kinsang Kristohanon tingali hangyoon sa pag-abag sa usa ka paryente, higala, o espirituwal nga igsoon nga may personal nga suliran. Nahibalo ka ba kon unsaon pagtabang?

ANG USA KA EPEKTIBONG MAGTATAMBAG

daling duolon: Mateo 11:​28, 29; 1 Pedro 1:​22; 5:​2, 3

mopili sa hustong kahimtang: Marcos 9:​33-37

maningkamot sa pagsabot sa suliran: Lucas 8:​18; Santiago 1:​19

dili hinobra ang reaksiyon: Colosas 3:​12-14

motabang sa usa sa pagsagubang sa kagul-anan: 1 Tesalonica 5:​14; 1 Pedro 3:​8

moila sa iyang mga limitasyon: Galacia 6:​3; 1 Pedro 5:​5

mohatag ug tinong tambag: Salmo 19:​7-9; Proverbio 24:​26

motagog sekreto: Proverbio 10:​19; 25:​9