Mga Saksi ni Jehova Maghimog Internasyonal nga mga Kombensiyon

Ang Nagamandong Lawas sa mga Saksi ni Jehova nagplano nga maghimog internasyonal nga mga kombensiyon sa 1998. Kining maong pahibalo madasigong gidawat panahon sa tinuig nga miting sa Watch Tower Bible and Tract Society of Pennsylvania, nga gihimo sa Jersey City Assembly Hall sa Sabado, Oktubre 5, 1996.

Duyog sa naandang distritong mga kombensiyon, ubay-ubayng internasyonal nga mga kombensiyon ang pagahimoon sa Amerika del Norte panahon sa tungatunga sa 1998. Gidahom nga kining maong mga panagtigom magtigom sa ginatos ka libong Saksi gikan sa daghang bahin sa yuta. Aron matugotan ang daghang nasod kutob sa maarangan nga mahawasan, ang matag usa sa kapin sa 100 ka sangang buhatan sa Watch Tower Society adunay gahin nga gidaghanon sa mga delegado alang sa gipili nga siyudad sa internasyonal nga kombensiyon sa Amerika del Norte.

Dayag, dili tanan nga buot mobiyahe ngadto sa Amerika del Norte ang makahimo niana. Apan, mahimong posible alang sa linibo nga motambong sa internasyonal nga kombensiyon nga mas duol sa ilang mga nasod. Ang mga kahikayan ginahimo alang sa internasyonal nga mga kombensiyon nga pagahimoon sa duha o tulo ka nasod sa Uropa ug ang uban sa Aprika, Asia, Latin Amerika, sa Habagatang Pasipiko, ug sa Caribbeano.

Sa tukmang panahon, ang mga sangang buhatan sa Sosyedad magpahibalo sa mga kongregasyon sa ilang tagsatagsa ka teritoryo maylabot sa siyudad o mga siyudad nga kombensiyonan diin sila gidapit. Ang impormasyon ihatag maylabot sa mga petsa sa kombensiyon ug sa mga kahikayan alang sa pagpili sa mga delegado. Kadtong nagplanong moaplay alang sa pagpili ug delegado mahimong magsugod na pagtigom sa ilang salapi alang sa maong espesyal nga okasyon.

Ang tanang Saksi ni Jehova sa tibuok kalibotan makalantaw sa unahan sa gitagana niining internasyonal nga mga panagkatigom sa 1998. Ang distritong mga kombensiyon sa tanang nasod adunay susamang programa.