Ang mga Nag-antos ba Makabatog Paghupay?

BUOT ba nimong makita nga matapos na ang pag-antos, dili lamang sa imong kaugalingon kondili sa tanang katawhan? Tagda kining mga pananglitan:

Si Sonia nag-antos pag-ayo.a Una, nahibaloan niya nga ang iyang bana nanapaw sulod na sa napulo ka tuig. Dayon ang iyang kinamanghorang anak nga lalaki natakboyan ug HIV ug namatay tungod sa AIDS. Duha ka tuig sa ulahi ang iyang laing anak nga lalaki nasakit, ug wala magdugay namatay usab tungod sa AIDS. “Ang kataposang hugna sa iyang sakit milamay ug dugay kaayo,” nahinumdom si Sonia. “Siya nag-antos ug grabeng depresyon, nawad-an sa iyang buhok, ug hanap na ang panan-aw. Makapaguol gayod kadto.”

Si Fabiana, usa ka estudyante sa unibersidad sa Brazil, nabalaka bahin sa sosyal nga mga inhustisya sa kalibotan. Unya nahitabo ang trahedya sa iyang kaugalingong kinabuhi. Ang iyang igsoong lalaki, nga nag-antos sa depresyon, naghikog. Sa dihang si Fabiana nawad-an sa iyang trabaho, usa ka higala misugyot nga siya mangitag usa ka pai-​de-​santo (abat nga mananambal), nga nangatarongan nga si Fabiana nag-antos niana nga kaalaotan tungod kay adunay nagbarang kaniya! Apan ang pai-​de-​santo walay nahatag nga kahupayan. Hinunoa, si Fabiana mibating gisakit, dili makatulog tungod sa iyang kalisdanan.

Ang kasakit ni Ana nagsugod nga mas sayo pa sa kinabuhi. “Sa nag-edad akog usa ka tuig,” siya miasoy, “gibiyaan ako sa akong inahan, busa ako giatiman sa akong apohan nga babaye.” Unya, sa nagtres anyos pa lamang si Ana, namatay ang iyang apohan nga babaye. Si Ana gipadala sa balay-amomahan sa Rio de Janeiro, diin siya nagpabilin hangtod nga siya nag-13 anyos. “Grabe gayod ang pagtratar kanamo didto, ug ako nahimong rebelyoso,” matod niya. “Samtang ako nagdako, ako nakigbisog batok sa halos tanang butang.”

Ang kasakit daw nagaapektar sa matag tawo sa usa ka paagi o sa lain. Sa pagkatinuod, kita makasugat ug mga sugilanon sa tawhanong trahedya kada adlaw​—sa dihang kita magtan-aw, magbasa, o mamati sa mga balita. “Ang atong . . . panahon sa dinaghang komunikasyon magpaimposible kanato nga makalingkawas sa padayong pagdagsang sa daotang mga balita,” misulat si Dr. Mary Sykes Wylie. “Ang mga gubat, kinaiyanhong mga katalagman, kagun-oban sa industriya, ngilngig nga mga aksidente sa dalan, krimen, terorismo, pag-abuso sa sekso, panglugos, kapintasan sa panimalay​—ang tanan naghimo sa mga epekto nga hilabihan ka makalilisang ug adlaw-adlaw nga hilisgotan sa ika-20ng siglo.” Ang Kristohanong apostol Pablo sa pagkamatinud-anon misuma sa tawhanong kasinatian: “Ang tanang kalalangan padayong nagaagulo nga tingob ug tingob nga anaa sa kasakit hangtod karon.”​—Roma 8:22.

Komosta ka man? Nagasinati ka bag kasakit? Unsang paghupay ang imong madahom? Mabatonan ba gayod nimo ang matuod nga pakigdait? Si Sonia, Fabiana, ug Ana nakakaplag ug tinuod nga paghupay ug usa ka tinuod nga sukod sa pakigdait! Imong mabasa ang bahin niini sa mosunod nga artikulo.

[Footnote]