Giuna Namo Pagpangita ang Gingharian

SUMALA SA GIASOY NI OLIVE SPRINGATE

Mao pay pagpalong ni Mama sa kandila ug pagbiya sa kuwarto tapos paminawi ang among mga pag-ampo. Ang akong manghod nga lalaki nangutana dayon kanako: “Olive, unsaon pagkakita ug pagkadungog sa Diyos kanato lapos sa tisa nga mga pader?”

“SI MAMA nag-ingon nga molapos ang iyang panan-aw sa bisan unsang butang,” ako mitubag, “bisan lapos sa atong kasingkasing.” Si Mama maoy mahadlokon-sa-Diyos nga babaye ug himasa kaayo sa Bibliya, ug siya nagsilsil kanamong mga anak ug usa ka dulot nga pagtahod sa Diyos ug sa mga prinsipyo sa Bibliya.

Ang among mga ginikanan maoy mga membro sa Anglican Church sa gamayng lungsod sa Chatham, Probinsiya sa Kent, Inglaterra. Bisan pag si Mama usa ka regular nga tigsimba, siya nagtuo nga ang pagkahimong Kristohanon nagkahulogan ug labaw pa kay sa pagpaminaw sa wali diha sa simbahan kas-a sa usa ka semana. Siya segurado usab nga ang Diyos may usa ra gayod ka matuod nga iglesya.

Pagpabili sa Kamatuoran sa Bibliya

Niadtong 1918, sa dihang mga singko anyos na ako, si Mama nakakuhag mga tomo nga nag-ulohang Studies in the Scriptures, nga sinulat ni Charles T. Russell, ang unang presidente sa Watch Tower Bible and Tract Society. Pipila ka tuig sa ulahi, samtang nagpuyo sa usa ka gamayng dapit nga gitawag ug Wigmore, si Mama naduaw sa usa sa mga Estudyante sa Bibliya, ingon sa pag-ila kaniadto sa mga Saksi ni Jehova. Siya midawat sa tabang sa pagtuon sa Bibliya nga The Harp of God, ug gikan niana siya nagsugod pagkakaplag ug mga tubag sa daghan niyang mga pangutana sa Bibliya. Matag semana usa ka rosa nga kard nga may pinatik nga mga pangutana sa matag kapitulo moabot pinaagig koreo. Ang kard nagpakita usab kon asa sa libro makaplagan ang mga tubag.

Niadtong 1926 ang akong mga ginikanan, akong igsoong babaye nga si Beryl, ug ako mihunong sa pagtambong sa Anglican Church tungod kay kami napikal sa pakiglangkit sa simbahan sa politika, maingon man sa daghan niining dili makataronganong mga pagtulon-an. Usa ka iladong pagtulon-an mao nga ang Diyos magsakit sa mga tawo sa walay kataposan diha sa impiyerno nga kalayo. Ang akong mama, kinsa tinuod gayod nga nangita sa kamatuoran sa Bibliya, nakombinsir nga ang Anglican Church dili mao ang tinuod nga iglesya.

Wala madugay sa ulahi, ingong tubag sa tim-os nga mga pag-ampo ni Mama, si Gng. Jackson, usa ka Estudyante sa Bibliya, miduaw kanamo. Sa halos duha ka oras, nakigsulti siya kang Mama ug kanako, nga nagtubag sa among mga pangutana gikan sa Bibliya. Kami nalipay sa pagkat-on, lakip sa ubang mga butang, nga ang among mga pag-ampo kinahanglang itumong kang Jehova nga Diyos, ang Amahan ni Jesu-Kristo, ug dili ngadto sa usa ka misteryosong Trinidad. (Salmo 83:18; Juan 20:17) Apan alang kanako ang labing dili makalimtang pangutana nga gisukna ni Mama mao kini: “Unsay kahulogan sa pagpangita pag-una sa Gingharian?”​—Mateo 6:33.

Ang binase-sa-Bibliya nga tubag dulot nga nag-apektar sa among mga kinabuhi. Gikan niadtong maong semana, kami misugod pagtambong sa mga tigom sa mga Estudyante sa Bibliya ug sa pagpakig-ambit sa mga butang nga among nakat-onan sa uban. Kami nakombinsir nga among nakaplagan ang kamatuoran. Pila ka bulan sa ulahi, sa 1927, si Mama nabawtismohan ingong simbolo sa iyang pagpahinungod nga moalagad kang Jehova, ug niadtong 1930, ako usab nabawtismohan.

Pagsulod sa Payunir nga Pag-alagad

Ang among pamilya mitambong sa Kongregasyon sa Gillingham, nga nalangkoban sa mga 25 ka tawo. Daghan kanila maoy bug-os-panahong mga ministro, nga gitawag ug mga payunir, ug ang tanan may langitnong paglaom. (Filipos 3:14, 20) Ang ilang Kristohanong kasibot makatakod. Bisag tin-edyer pa, ako nagpayunir sulod sa mubong panahon sa Belgium sa sayong katuigan sa 1930. Kini nagdasig sa akong tinguha alang sa dugang pag-alagad sa Gingharian. Niadtong panahona kami nakig-ambit sa pagpanagtag ngadto sa tanang klerigo sa kopya sa pulyetong The Kingdom, the Hope of the World.

Ngadtongadto ang akong papa nahimong magsusupak sa among Kristohanong kalihokan, ug sa bahin tungod niini, ako mibalhin sa London niadtong 1932 aron sa pag-eskuyla sa kolehiyo. Sa ulahi ako nagtudlo sulod sa upat ka tuig ug sulod nianang panahona nakig-uban sa Kongregasyon sa Blackheath, usa sa upat lamang ka kongregasyon sa London niadtong panahona. Maoy niadtong panahona nga nakadungog kamig mga taho sa pagkabilanggo ug pag-antos sa among Kristohanong mga igsoong lalaki ug babaye sa Alemanya ni Hitler tungod kay sila midumili sa pagpaluyo sa mga paningkamot ni Hitler sa gubat.

Sa 1938, ang bulan nga natapos nako pagbayad ang utang sa mga libro nga akong nakuha, ako mibiya sa akong trabaho aron sa pagtuman sa akong tinguha nga mahimong payunir. Ang akong igsoong babaye nga si Beryl misugod pagpayunir sa London sa samang panahon, apan nagpuyo siya sa laing puy-anan sa mga payunir. Ang akong unang kauban nga payunir mao si Mildred Willett, kinsa sa ulahi naminyo kang John Barr, nga karon usa ka membro sa Nagamandong Lawas sa mga Saksi ni Jehova. Kuyog sa uban diha sa among grupo, magbisikleta kami ngadto sa teritoryo ug magpabilin didto sa tibuok adlaw, sagad bisan pag nag-ulan.

Hapit na mobuto niadto ang gubat sa Uropa. Ang mga pagbansaybansay sa pagsul-ob ug gas-mask gihimo alang sa mga molupyo, ug ang mga pagpangandam nagsugod aron sa pagpabakwet sa mga bata ngadto sa mga banika sa Inglaterra o ngadto sa gagmayng mga lungsod iniggubat na. May natigom akong kuwarta nga igo rang ipalit ug sapatos, ug walay purohan sa pinansiyal nga tabang gikan sa akong mga ginikanan. Apan wala ba mag-ingon si Jesus, ‘Kining tanang butang igadugang kon unahon ninyo pagpangita ang gingharian?’ (Mateo 6:33) Ako may bug-os nga pagtuo nga si Jehova motagana sa tanan nakong panginahanglan, ug iyang gibuhat kana nga madagayaon latas sa katuigan. Panahon sa gubat dugangan nako ang akong diyutay nga pagkaon ug mga utanon nga mahulog gikan sa mga trak. Ug makakuha ako ug pagkaon pinaagi sa pagbaylo sa literatura sa Bibliya ug mga prutas ug mga utanon.

Ang akong manghod nga babaye nga si Sonia natawo sa 1928. Nag-edad lamang siya ug siyete anyos sa dihang nagpahinungod siya sa iyang kinabuhi kang Jehova. Si Sonia nag-ingon nga bisan sa maong linghod nga panuigon, ang pagpayunir nahimong iyang tumong. Niadtong 1941, wala madugay tapos niya masimbolohi ang iyang pagpahinungod sa bawtismo sa tubig, iyang nakab-ot ang maong tumong sa dihang siya ug si Mama naasayn ingong mga payunir sa Caerphilly, Habagatang Wales.

Ang Among Ministeryo Panahon sa Gubat

Niadtong Septiyembre 1939, nagsugod ang Gubat sa Kalibotan II, ug ang among Kristohanong mga igsoong lalaki ug babaye sa Britanya nabilanggo gumikan sa samang katarongan nga ang ilang kaubang mga magtutuo sa Nazing Alemanya nabilanggo​—ang ilang neyutral nga baroganan maylabot sa pag-apil sa gubat. Ang pagpamomba sa Inglaterra nagsugod sa tunga-tunga sa 1940. Kada gabii, saba kaayo ang pamomba, apan uban sa tabang ni Jehova kami nakatulog ug nalagsik alang sa pagsangyawng buluhaton sa sunod adlaw.

Usahay moadto kami sa among teritoryo nga sangyawanan sa pagkaplag lamang nga kadaghanan sa mga balay nangagun-ob. Niadtong Nobyembre 1940 usa ka bomba nahulog pipila lamang ka yarda gikan sa balay diin daghan kanamo ang nagpuyo, nga nagpusgay sa mga bintana ngadto sa linibong tipik. Ang bug-at nga pultahan sa atubang natumba, ug ang panghaw nahugno. Tapos magpalabay sa gabii diha sa usa ka trinsera, kami nagbulagbulag ug mipuyo sa mga balay sa lainlaing mga Saksi.

Wala madugay sa ulahi nakadawat ako ug asaynment sa Croydon, sa Dakong London. Ang akong kauban nga payunir mao si Ann Parkin, kansang igsoong lalaki nga si Ron Parkin sa ulahi nahimong koordinetor sa Komite sa Sanga sa Puerto Rico. Human niana mibalhin ako sa Bridgend, Habagatang Wales, diin mipadayon ako pagpayunir, nga nagpuyo sa usa ka karwahe sulod sa unom ka bulan. Gikan didto mobisikleta kami ug unom ka kilometro paingon sa kinadul-ang dakong kongregasyon, sa Port Talbot.

Niadtong panahona ang publiko nahimong masuk-anon na kaayo kanamo, nga nagtawag kanamong mga conchies (matanlagong mga magsusupak). Nagpalisod kini kanamo sa pagpangitag abtanan, apan si Jehova nag-atiman kanamo sumala sa iyang gisaad.

Sa ulahi, walo kanamo ang giasayn ingong mga espesyal payunir sa Swansea, usa ka lungsod nga dunggoanan sa Habagatang Wales. Samtang misamot pa ang gubat, misamot usab ang pagpihigpihig kanamo. Ang mga pulong nga “mga ilaga” ug “mga talawan” gipintal diha sa bungbong sa among puy-anan sa payunir. Kining pagsupak sa kinadak-an nasugnoran sa mga taho sa mantalaan nga nagsaway kanamo tungod sa among neyutral nga baroganan. Sa kataposan, usag usa, ang pito kanamo gipabilanggo. Migugol ako ug usa ka bulan sa bilanggoan sa Cardiff niadtong 1942, ug sa ulahi ang akong igsoong si Beryl migugol usab ug panahon didto. Bisan pag diyutay lang ang among nabatonan sa materyal ug nag-antos sa mga pagbiaybiay ug pagpasipala, kami dato sa espirituwal.

Kasamtangan, si Mama ug si Sonia nagpayunir sa Caerphilly ug nakabaton sa samang mga kasinatian. Ang unang pagtuon sa Bibliya nga gidumala ni Sonia maoy uban sa usa ka babaye nga gihikay niyang duawon sa Biyernes sa gabii. Si Sonia masaligon nga ubanan siya ni Mama, apan misaysay si Mama: “May lain akong kasabot. Gihimo nimo ang kahikayan, busa kinahanglang moadto ka nga mag-inusara.” Bisan pag si Sonia 13 anyos pa lang, siya miadto nga nag-inusara, ug ang babaye mihimo ug maayong pag-uswag sa espirituwal ug sa ulahi nahimong dedikadong Saksi.

Mga Kalihokan Human sa Gubat​—Unya sa Gilead

Sa dihang natapos ang Gubat sa Kalibotan II sa 1945, nagtrabaho ako sa nahilit nga teritoryo sa Whaley Bridge, Derbyshire. Sa buntag nga gipahibalo ang pagpahunong sa pinusilay, giduaw namo ug gihupay ang mga tawo nga niadtong panahona napul-an na sa gubat uban ang mga sangpotanan niini​—mga ilo, mga babayeng balo, ug nangaputol nga mga bahin sa lawas.

Pila ka bulan sa ulahi, ang Sosyedad naghangyo ug mga boluntaryo sa pagsangyaw sa Irlandia, ang Isla nga Esmeralda. Niadtong panahona dihay mga 140 lamang ka Saksi ni Jehova sa isla, busa giisip kadto nga teritoryo sa misyonaryo. Sulod sa pila ka bulan, mga 40 ka espesyal payunir ang giasayn didto, ug ako kauban nila.

Human sa pagtrabaho sulod sa usa ka panahon sa Coleraine ug Cookstown sa amihanan, ako giasayn, kauban sa tulo pa, ngadto sa Drogheda sa sidlakang baybayon. Bisan pag ang mga taga-Irlandia sa kinaiyanhon mahigalaon ug maabiabihon kaayo, hilabihan ang relihiyosong pagpihigpihig. Busa, sulod sa tibuok tuig, kami nakapanagtag lamang sa publiko ug pipila ka tabang sa pagtuon sa Bibliya (sa pagkatinuod usa lamang ka libro ug pipila ka pulyeto).

Panahon sa among pagpuyo sa Drogheda, ako nagbisikleta gikan sa usa ka uma ngadto sa lain sa dihang usa ka batan-ong trabahante sa uma kalit lang nga migula sa kasagbotan ngadto sa dalan. Gianinaw niya ang dalan, dayon nangutana sa hinay nga tingog: “Usa ka ba sa mga Saksi ni Jehova?” Sa dihang mitubag ako nga ako Saksi, siya mipadayon: “Kagabii naglalis kami pag-ayo sa akong pangasaw-onon bahin ninyo nga mga babaye, ug kami nagbulag. Siya miinsistir nga kamo mga Komunista, sumala sa giingon sa Katolikong mga pari ug mga mantalaan, apan ako nangatarongan nga dili mahitabong tinuod kana, sanglit dayag man kamo nga nagduaw gikan sa balay ngadto sa balay.”

Gihatagan ko siyag pulyeto aron basahon, nga iyang gitagoan sa iyang bulsa, ug gihikay namo nga magkita ug mag-estorya ug dugang pa inigkagabii na, sanglit siya miingon: “Kon makita ako nga nakig-estorya nimo, mawad-an ako sa akong trabaho.” Nianang gabhiona duha kanamo nakigkita kaniya ug nagtubag sa daghan niyang pangutana. Daw nakombinsir siya nga kini ang kamatuoran, ug siya misaad nga moduaw sa among balay sa laing gabii aron sa pagkat-on ug dugang. Wala gayod siya mobalik, busa gibati namo nga nailhan siya sa unang gabii sa pila ka nagbisikleta nga milabay ug lagmit nawad-an sa iyang trabaho. Kanunay kaming maghunahuna kon nahimo ba gayod siyang Saksi.

Human makatambong sa distritong kombensiyon sa Brighton sa habagatang baybayon sa Inglaterra sa 1949, daghan kanamo ang nakadawat ug mga pagdapit ngadto sa Watchtower Bible School of Gilead sa New York State. Ang gidaghanon nga 26 gikan sa Britanya ang mitambong sa ika-15ng klase, nga migraduwar sa Hulyo 30, 1950, panahon sa internasyonal nga kombensiyon sa Yankee Stadium.

Ang Among Ministeryo sa Brazil

Sa misunod nga tuig giasayn ako sa São Paulo, Brazil, usa sa kinakusgan-motubong mga siyudad sa kalibotan. Niadtong panahona dihay lima lamang ka kongregasyon sa mga Saksi ni Jehova, apan karon adunay duolan sa 600 kanila! Pagkalahi kana sa among pagtrabaho sa Irlandia! Daghan sa mga balay sa among teritoryo sa São Paulo maoy mga mansiyon, nga gilibotan sa hatag-as nga mga koral nga puthaw nga may matahom sinalsal nga puthawng mga ganghaan. Tawgon namo ang tag-iya sa balay o ang sulugoon pinaagi sa pagpakpak sa among mga kamot.

Samtang milabay ang katuigan, dihay bag-ong mga asaynment. Ako nakapribilehiyo sa pagtabang sa pagporma ug bag-ong mga kongregasyon sa lainlaing mga dapit sa sulod nga bahin sa São Paulo, lakip ang usa sa Jundiaí niadtong 1955 ug ang lain sa Piracicaba niadtong 1958. Sa ulahi, niadtong 1960, ang akong igsoon nga si Sonia nahimong akong kaubang misyonarya, ug kami giasayn sa Pôrto Alegre, ang kaulohan sa estado sa Rio Grande do Sul. Sa unsang paagi, kamo mahibulong, nga siya nakaadto sa Brazil?

Si Sonia ug si Mama mipadayon sa pagpayunir nga magkauban sa Inglaterra human sa Gubat sa Kalibotan II. Ugaling sa sayong katuigan sa 1950, si Mama gioperahan gumikan sa kanser nga nagpaluya kaayo niya nga dili na makaduaw sa balay ngadto sa balay, apan siya makadumala ug panagtuon sa Bibliya ug makasulat. Si Sonia mipadayon sa payunir nga buluhaton, ug sa samang panahon mitabang siya pag-atiman kang Mama. Niadtong 1959, si Sonia nakapribilehiyo sa pagtambong sa ika-33 nga klase sa Gilead ug giasayn sa Brazil. Kasamtangan, si Beryl nag-atiman kang Mama hangtod sa iyang kamatayon sa 1962. Niadtong panahona naminyo na si Beryl, ug siya ug ang iyang pamilya matinumanong nag-alagad kang Jehova.

Sa Brazil, si Sonia ug ako nakatabang sa daghang tawo ngadto sa pagpahinungod ug bawtismo. Hinuon, usa sa mga suliran nga nabatonan sa pila ka Braziliano mao ang pagpalegal sa ilang kaminyoon. Tungod sa kalisod sa pagkuha ug diborsiyo sa Brazil, kasagaran ang mga magtiayon magpuyo-puyo. Kini ilabinang maoy kahimtang sa dihang ang usa sa mga kapikas nabulag gikan sa kanhing legal nga kapikas sa kaminyoon.

Usa ka babaye, nga ginganlag Eva, diha sa maong kahimtang sa dihang giduaw ko siya. Ang iyang legal nga kapikas mibiya, busa aron makaplagan siya, gipaanunsiyo namo sa radyo. Sa dihang ang iyang bana nakaplagan, giubanan ko siya sa laing siyudad aron papirmahon ang iyang bana sa usa ka papeles nga magpahigawas kaniya aron siya makapalegal sa iyang pagpakigtipon sa dili-minyong lalaki nga iyang gikapuyo. Sa bista atubangan sa huwes, siya naghangyo kang Eva ug kanako sa pagsaysay kon nganong buot niyang tul-iron ang iyang kaminyoon. Ang huwes nagpahayag ug kahibulong ug katagbawan usab sa dihang gisaysay kini kaniya.

Sa laing higayon, miuban ako sa usa sa akong mga estudyante sa Bibliya sa paghikay nga ang usa ka abogado modumala sa iyang kaso. Sa makausa pa ang maayong pamatuod nahatag maylabot sa kaminyoon ug sa moral nga mga sukdanan sa Diyos. Niining kahimtanga ang gasto sa diborsiyo mahal kaayo nga ang magtiayon kinahanglang motrabaho aron makabayad sa mga bayranan. Apan alang niining bag-ong mga estudyante sa Bibliya, takos kadto sa paningkamot. Si Sonia ug ako nakapribilehiyo sa pagkahimong mga saksi sa ilang kasal, ug human niadto, kauban sa ilang tulo ka anak nga tin-edyer, namati kami sa mubo nga pakigpulong sa Bibliya sa ilang balay.

Usa ka Dagaya, Magantihong Kinabuhi

Sa dihang si Sonia ug ako nagpahinungod sa among mga kinabuhi kang Jehova ug nahimong mga payunir, kami nagplano, kon mahimo, nga ang bug-os-panahong ministeryo maoy among karera sa kinabuhi. Wala gayod namo hunahunaa pag-ayo kon unsay mahitabo sa ulahing mga tuig sa among kinabuhi o sa dihang magkasakit o maglisod sa panalapi. Apan, ingon sa gisaad ni Jehova, kami wala gayod biyai.​—Hebreohanon 13:6.

Oo, ang kakulang sa salapi usahay maoy suliran. Usa ka panahon, ang akong kauban ug ako nagkaon ug sandwits nga ang paunod parsley alang sa paniudto sulod sa tibuok tuig, apan wala gayod kami malunosi, ni kami nakulangan sa pangunang mga panginahanglan.

Sa paglabay sa katuigan, nagakaluya kami. Sulod sa tunga-tunga sa katuigang 1980, kaming duha nahiagom sa seryosong mga operasyon nga misangpot sa grabeng pagsulay alang kanamo, sanglit ang among mga kalihokan sa pagsangyaw nakutohan. Niadtong Enero 1987, gidapit kami nga mahimong mga membro sa kawani sa hedkuwarter sa mga Saksi ni Jehova sa Brazil.

Ang among dakong pamilya sa kapin sa usa ka libong ministro nahimutang mga 140 kilometros gawas sa São Paulo sa usa ka matahom nga pundok sa mga tinukod, diin kami nag-imprinta ug mga literatura sa Bibliya alang sa Brazil ug sa ubang mga bahin sa Habagatang Amerika. Dinhi nakadawat kamig mahigugmaong pag-atiman gikan sa debotadong mga alagad sa Diyos. Sa una kong pag-abot sa Brazil niadtong 1951, dihay mga 4,000 ka magsasangyaw sa mensahe sa Gingharian, apan karon adunay kapin sa 366,000! Ang among maluluy-ong langitnong Amahan sa pagkatinuod nakadugang kanamo ‘sa tanang ubang butang’ tungod kay giuna namo pagpangita ang iyang Gingharian.​—Mateo 6:33.

[Hulagway sa panid 22]

Si Olive kauban ni Mildred Willett tupad sa kareton sa impormasyon, 1939

[Hulagway sa panid 25]

Si Olive ug Sonia Springate