Mga Kasal nga Nagpasidungog Kang Jehova

Ang Mosunod Nga Artikulo Bahin Sa Kristohanong Mga Kasal Sa Orihinal Giandam Sa Etiopia Sa Pagtagana Ug Makatabang Nga Pagtultol Sa Amharic Nga Pinulongan Alang Sa Daghan Nianang Yutaa Nga Niining Bag-o Pa Nahimong Mga Saksi Ni Jehova. Kini Naghisgot Sa Pipila Ka Lokal Nga Mga Kostumbre Ug Mga Batasan Nga Tingali Lahi Gikan Sa Dapit Nga Imong Gipuy-an. Ikaw Lagmit Makakaplag Sa Kalainan Nga Makaiikag. Sa Samang Higayon, Ang Artikulo Nagpresentar Sa Timbang Nga Tambag Sa Bibliya Nga Imong Makita Nga Mapadapat Bisan Kon Ang Mga Batasan Sa Mga Kasal Lahi Sa Imong Dapit.

“KRISTOHANONG mga Kasal nga Makahatag Kalipay” mao ang ulohan sa usa ka maayong artikulo diha sa Ang Bantayanang Torre sa Oktubre 15, 1984. Ang sunod nga artikulo niana nga isyu nag-ulohang “Pagkaplag sa Timbang nga Kalipay sa mga Kombira sa Kasal.” (Alang kang bisan kinsa nga naghunahuna sa pagminyo, adunay dugang maalamong tambag diha sa mga librong Paghimo sa Imong Pamilyahanong Kinabuhi nga Malipayon, kapitulo 2, ug Ang Imong Pagkabatan-on​—Pagpahimulos sa Labing Maayo Niini, kapitulo 19 ug 20.)a Daghan ang nahimong mga Saksi ni Jehova sukad mitungha kadtong mga artikuloha, busa buot namong sublion ang pipila ka puntos nga sa partikular mapadapat sa atong lugar, ingon man sa ubang nahiangay nga mga punto nga motabang kanato sa paghimo sa mga okasyon sa mga kasal nga magpasidungog kang Jehova, ang Magmumugna sa kaminyoon.

Ang pangutana nga tingali pagatagdon pag-una mao, Kanus-a angayng himoon ang kasal? Angay bang ang petsa mag-agad sa petsa sa tradisyonal lokal nga panahon sa kasal? Ang lokal nga pagtuo nga ang bisan unsang kaminyoon nga himoon sa ubang panahon sa tuig dili magmalamposon. Kini maoy usa ka patuotuo nga walay pasukaranan, kay daghang magtiayon ang malipayon ug nahiusa sa pag-alagad kang Jehova wala magminyo sulod sa tradisyonal nga panahon. Dili kita motuo sa maayo o dili maayong suwerte. (Isaias 65:11; Colosas 2:8) Dili nato matabangan ang dili magtutuong mga paryente nga makita ang kalainan tali sa kamatuoran ug kabakakan kon atong iagad ang petsa sa kasal sumala sa ilang mga patuotuo. Ang kamatuoran mao, ang mga Kristohanon makaminyo sa bisan unsang bulan.

Sa dihang ang pakigpulong sa kasal gihikay human sa gikinahanglang sibil nga seremonyas, maalamon nga walay kal-ang sa panahon sa daghang adlaw tali sa duha ka okasyon. Kon buot sa magtiayon nga adunay pakigpulong sa kasal diha sa Kingdom Hall, sila moduol sa mga ansiyano sa kongregasyon nga abante pa aron hangyoon ang paggamit sa tigomanan. Paneguroon sa lokal nga mga ansiyano nga ang mga kahikayan sa seremonyas mohatag kanilag hinlong mga tanlag. Ang panahon angayng tinoon aron dili makababag sa bisan unsang kalihokan sa kongregasyon. Ang igsoon nga gipili sa paghatag ug pakigpulong sa kasal makigkita una sa umaabot nga pamanhonon ug pangasaw-onon aron makatanyag ug makatabang nga tambag ug aron maseguro nga walay moral o legal nga mga problema sa kaminyoon ug nga siya uyon sa mga plano alang sa bisan unsang sosyal nga panagtapok nga mosunod. Ang pakigpulong sa kasal angayng mga tunga sa oras lamang ang gitas-on ug ihatag sa dungganong paagi, nga nagapasiugda sa espirituwal nga bahin. Ang pakigpulong sa kasal tinong labawng hinungdanon kay sa bisan unsang salosalo nga mahimong mosunod.

Ang Kristohanong kasal maoy usa ka maayong higayon nga ipakita nga kita “dili bahin sa kalibotan.” (Juan 17:​14; Santiago 1:27) Ang atong pagkahapsay angayng mangibabaw. Kini nagpasabot nga kita kinahanglang maanaa sa untop nga panahon imbes nga pahulaton ang mga tawo, lagmit nga makababag pa sa mga kalihokan sa kongregasyon. Ilabinang tagdon kining butanga sa pangasaw-onon, sanglit ang kalibotanong mga paryente basin moawhag kaniya nga magpaulahi​—ingon sa daw magpadako sa iyang importansiya. Pinaagi sa pagkaanaa sa untop nga panahon ang usa ka hamtong Kristohanong sister makapasundayag nga ang espirituwal nga mga hiyas, sama sa kamapainubsanon ug konsiderasyon, maoy hinungdanon alang kaniya! Lain pa, sa dihang magdapit ug letratista aron irekord ang okasyon, ang pagkahapsay hinungdanon. Maayong hangyoon ang letratista nga mamesting pormal ug nga siya dili makasagabal sa pakigpulong sa dihang mokuhag mga letrato. Walay letrato ang kuhaon sa panahon sa pag-ampo. Ang atong pagkahapsay magpasidungog kang Jehova ug mohatag ug maayong pamatuod. Dili na kinahanglang mosulay sa pagpahiuyon sa kalibotanong mga kostumbre sa kasal nga magpangiob sa tinuod nga kahulogan sa okasyon.

Ang usa ka salosalo dili usa ka kinahanglanon alang sa usa ka malamposong kasal, apan dili supak sa Kasulatan ang maong malipayong okasyon. Bisan pa niana, ang maong salosalo alang sa matuod nga mga Kristohanon kinahanglang malahi gikan sa kalibotanong mga salosalo nga gitiman-an sa paghingapin, kusog nga pag-inom, hinobrang pagkaon, banhang musika, masugyotong sayaw, ug bisan mga away. Ang Bibliya nagklasipikar sa “mga hudyaka” uban sa mga buhat sa unod. (Galacia 5:21) Mas daling mabatonan ang hustong pagkontrolar kon dili kaayo dako ang panagtapok. Dili na kinahanglang magpatindog ug tolda aron matagbaw ang popular nga mga kostumbre. Kon ang pipila mohukom nga mogamit ug tolda tungod sa mga katarongan sa espasyo o panahon, kini maoy usa ka personal nga butang.

Ang kasinatian nagpakita nga ang maayong paagi sa paglimite sa gidaghanon sa mga bisita mao ang paggamit ug espesipikong sinulat nga mga imbitasyon. Mas maalamon ang pagdapit sa mga indibiduwal imbes sa tibuok kongregasyon, ug ingong mahapsay nga mga Kristohanon, kita angayng motahod sa maong paglimite. Ang sinulat nga mga imbitasyon usab motabang kanato nga malikayan ang kaulawan nga adunay tawong napalagpot nga moanha sa salosalo, kay kon kana mahitabo, daghang igsoong lalaki ug babaye ang mopili sa pagbiya. (1 Corinto 5:​9-​11) Kon ang magtiayon modapit sa dili magtutuong mga paryente o mga kaila, kini sila sa walay duhaduha limitado lamang sa gidaghanon, nga maghatag ug labawng importansiya niadtong “iglabot nato sa pagtuo.” (Galacia 6:10) Ang pipila mipili sa pagdapit sa kalibotanong mga kaila o dili magtutuong mga paryente sa pakigpulong sa kasal kay sa salosalo. Ngano? Aw, dihay mga kaso nga ang kalibotanong mga paryente nakahimog makauulaw nga kahimtang sa salosalo sa kasal nga daghang igsoong lalaki ug babaye mibati nga sila dili makapabilin. Ang pipila ka magtiayon naghikay nga mag-andam ug gamayng panihapon uban lamang sa suod nga mga membro sa pamilya ug Kristohanong mga higala.

Uyon sa Juan 2:​8, 9, mapuslanon ang pagpilig usa ka “tagdumala sa kombira.” Ang pamanhonon buot nga mopili sa usa ka kasaligang Kristohanon nga maoy magtino nga mahuptan ang kahapsay ug hataas nga mga sukdanan. Kon ang mga higala magdalag mga regalo, kini angay himoon nga walay “mapagawalong pagpasundayag.” (1 Juan 2:16) Ang musika mahimong makapalipay nga dili madaot sa kaduhaduhaang mga liriko, sobra kabanha, o mapatuyangong ritmo. Daghan ang nakakaplag nga labing maayo nga adunay ansiyano nga mamati una sa musika sa dili pa ipatokar. Ang sayaw mahimong magdalag mga lit-ag, sanglit daghang tradisyonal nga mga sayaw kinuha gikan sa sayaw sa pagkamaanakon ug nagpakitag dili angayng kamakilawasnon. Ang “panahon sa keyk ug alak nga sampan” usahay mao ang timaan sa kalibotanong mga tawo nga magpatuyang. Ngani, daghang Kristohanong magtiayon mihukom nga dili magbatog bisan unsang alkoholikong ilimnon sa mga salosalo sa kasal, busa nakalikay sa mga problema.

Sanglit buot natong pasidunggan si Jehova, likayan nato ang mapagawalong pasundayag sa pagdani ug sobrang pagtagad sa atong kaugalingon. Bisan ang sekular nga mga publikasyon dili maayog komento sa popular nga tinamdan sa paghinobra. Pagkadili-maalamon alang sa usa ka magtiayon nga magkautang-utang tungod sa paghinobra sa kasal ug unya mag-antos sa kawalad-on sa daghang tuig aron makabayad sa mga galastohan nianang usa ka adlaw! Siyempre, ang bisan unsang sinina nga gisul-ob sa okasyon angayng maligdong ug mahapsay, nga angayan sa usa ka tawong nag-angkong nagpasidungog sa Diyos. (1 Timoteo 2:​9, 10) Ang artikulong “Kristohanong mga Kasal Kinahanglang Magabanaag sa Pagkamakataronganon” (Ang Bantayanang Torre sa Hulyo 15, 1969) mihimo niining makaiikag nga mga komento bahin sa sinina:

“Ang kasal sa usa maoy usa ka espesyal nga okasyon, busa sa kasagaran ginahatagan ug pagtagad ang pagkamalipayon ug pagkamadanihon. Apan kini wala magpasabot nga ang usa kinahanglang magasul-ob sa usa ka pihong matang sa trahe. Maayong konsiderahon sa usa ang mga lokal nga moda, galastohan ug personal nga mga naangayan. . . . Apan, makataronganon ba ang pagpalit sa usa ka mahalon nga sinina ug makapalisod kanila sa salapi o sa uban? . . . Ang ubang mga pangasaw-onon nalipay sa paggamit ug trahe sa usa ka minahal nga higala o paryente. Ang uban nakadawat ug dakong katagbawan gumikan sa paghimo sa ilang kaugalingong sinina sa kasal, lagmit niana nga paagi makabatog sinina nga mahimong magamit sa ubang mga okasyon sa umaabot. Ug nahiangay kaayo alang sa usa ka magtiayon nga makasal sa ilang labing madanihong regular nga sinina . . . Ang uban nga makahimo sa usa ka madayandayanon nga kasal mahimong magtinguha sa personal sa paghimog usa ka ‘hilom nga kasal’ tungod sa kalisod sa mga panahon.”

Sa susama, ang mga sumasalmot sa kasal (ang mga higala sa pangasaw-onon ug ang babayeng mga kauban sa pangasaw-onon) dili kinahanglang daghan. Sila usab dili buot nga makahatag ug dili-angayng pagtagad sa ilang kaugalingon pinaagi sa ilang mga sinina ug mga lihok. Samtang ang tawong napalagpot mahimong tugotan nga motambong sa pakigpulong diha sa Kingdom Hall, Ang Bantayanang Torre sa Oktubre 15, 1984, miingon: “Dili angayng dapiton sa kombira sa kasal ang mga tawong napalagpot o kansang malaw-ayng paagi sa kinabuhi bug-os nga magkasupak sa mga prinsipyo sa Bibliya.”

Bisag si Jesus mitambong sa kasal, dili kita makahanduraw nga siya mouyon sa popular nga kostumbre nga adunay prosesyon sa mga kotse nga molibot sa lungsod uban ang dakong kabanha; gipamulta gani sa polis ang mga drayber nga nagpabusina diha sa prosesyon sa kasal. (Tan-awa ang Mateo 22:21.) Niining tanan, inay kay sundogon ang mapagawalong pasundayag o naandang mga lihok sa mga tawo sa kanasoran, ang mga Kristohanon kinahanglang magpakitag kaalam nga uban sa tawong maligdong.​—Proverbio 11:2.

Apan komosta ang pagtambong sa mga kasal sa mga silingan, kalibotanong mga kauban sa trabaho, o layo nga mga paryente ug mga kaila? Ang matag Kristohanon kinahanglang personal nga mohukom bahin niini. Maayong hinumdoman nga ang atong panahon bililhon, sanglit kita nagkinahanglan ug panahon alang sa atong ministeryo, personal nga pagtuon, ug ubang mga kalihokan sa pamilya ug sa kongregasyon. (Efeso 5:​15, 16) Sa mga hinapos sa semana, kita adunay mga tigom ug pag-alagad sa kanataran nga dili nato buot nga masayloan. (Hebreohanon 10:​24, 25) Ang panahon sa daghang kasal mobikil sa mga panahon sa asembliya o linaing mga paningkamot sa pag-alagad nga nalangkit sa Panihapon sa Ginoo. Dili nato angayng tugotan ang atong kaugalingon nga malinga gikan sa samang linaing mga paningkamot nga ginahimo sa atong mga igsoon sa tibuok yuta sa pagtambong sa Panihapon sa Ginoo. Sa wala pa makadangat sa kahibalo sa kamatuoran, gigugol nato ang dakong panahon uban sa kalibotanong mga tawo, tingali sa mga kahimtang nga wala magpasidungog sa Diyos. (1 Pedro 4:​3, 4) Karon lahi na ang atong mga prayoridad. Posible kanunay nga manghinaot sa usa ka kalibotanong magtiayon pinaagi sa pagpadalag kard o paghimog mubong pagduaw sa laing adlaw. Ang uban migamit sa maong mga okasyon sa paghatag ug pamatuod, nga nagpaambit sa pipila ka mga kasulatan nga haom sa bag-ong mga kasal.

Ang kasal diin ang espirituwal nga mga bahin nangibabaw kay sa kalibotang mga paagi sa pagkatinuod magpasidungog kang Jehova. Pinaagi sa pagtino nga sila nagpabiling bulag gikan sa kalibotan uban sa mga patuotuo ug mga hinobra niini, pinaagi sa dili pagtugot niini nga mobabag uban sa regular teokratikanhong mga kalihokan, ug pinaagi sa pagpasundayag sa kaligdong inay sa mapagawalong pagpasundayag, ang mga Kristohanon malipay sa okasyon. Dugang pa, sila mahinumdom sa okasyon nga may maayong tanlag ug makapalipay nga mga handomanan. Pinaagi sa pagpasundayag sa kaalam ug pagkamakataronganon, hinaot ang tanan natong Kristohanong mga kasal mohatag ug pamatuod sa tim-os-ug-kasingkasing nga mga tumatan-aw.

[Footnote]

[Mga hulagway sa panid 24]

Ang mga Kristohanon dili maghinobra sa pagsunod sa matag lokal nga kostumbre sa kasal