Pangutana

◼ Kon ang kaslonon gustong magpakasal sa Kingdom Hall, unsay kinahanglan nilang ipakighisgot sa mga ansiyano?

Ang kasal nga nahiuyon sa mga prinsipyo sa Bibliya nagpasidungog kang Jehova. Tinuod kini ilabina sa mga kasal nga gihimo sa Kingdom Hall tungod kay giisip sa mga tawo nga ang mga programa nga ginahimo dinhi nagbanaag sa atong organisasyon. Aron mahimo ang “tanang butang nga may kahapsay ug pinaagig kahikayan,” angay lamang nga makig-estorya sa mga ansiyano kon gamiton ang Kingdom Hall alang sa kasal.​—1 Cor. 14:40.

Ang kaslonon nga gustong mogamit sa Kingdom Hall angayng magsulat ngadto sa komite sa pag-alagad sa kongregasyon nga naggamit sa maong Kingdom Hall. Angayng ilakip sa maong sulat ang petsa ug oras kon kanus-a kini gamiton, ug ipadala ang maong sulat nga abante. Angay nilang hinumdoman nga dili usbon sa mga ansiyano ang oras sa mga tigom aron lamang mapahigayon ang kasal. Dugang pa, ang kaslonon kinahanglan nga maayog baroganan ug nagkinabuhi uyon sa mga prinsipyo sa Bibliya ug sa matarong nga mga sukdanan ni Jehova.

Aron maseguro nga ang kasal magpasidungog sa atong balaang Diyos, ang kaslonon angayng makighisgot una sa komite sa pag-alagad bahin sa kahikayan sa ilang kasal sa dili pa kini ipahigayon. Dili ipugos sa mga ansiyano ang ilang personal nga opinyon, apan kon dunay mga plano nga dili subay sa mga prinsipyo sa Bibliya, ang kaslonon angayng mohimog mga kausaban. Ang mga musika lamang gikan sa Kingdom Melodies o songbook ang mahimong gamiton. Ang bisan unsang dekorasyon sa Kingdom Hall o pagplastar sa mga bangko angay usab nga aprobahan. Kon ang kasal kuhaan ug letrato o video, angay nga dili kini makawala sa pagkasagrado sa maong okasyon. Mahimong itugot usab sa mga ansiyano ang pag-ensayo diha sa Kingdom Hall kon dili kini makabalda sa ubang mga kahikayan sa kongregasyon. Dili angayng ipaskin diha sa information board ang imbitasyon. Apan, ang mga ansiyano makahimo sa paghatag ug mubong pahibalo panahon sa Tigom sa Pag-alagad aron masayod ang kongregasyon nga adunay himoon nga kasal sa Kingdom Hall.

Bisan tuod dili kinahanglan nga ang tanang mosalmot sa seremonyas maoy mga bawtismado, dili haom nga ilakip sa seremonyas ang mga indibiduwal nga nagkinabuhing supak sa mga prinsipyo sa Bibliya o kaha ang mga tawo nga makapandol sa mga nanambong. Ang kasal angayng dumalahon sa usa ka ansiyano nga awtorisado sa pagkasal. Ang maong mga ansiyano takos gayod sa paghisgot sa Kasulatanhong mga prinsipyo nga mapadapat sa maong okasyon.​—1 Tim. 3:2.

Sanglit ang maong seremonyas makaapektar usab sa ansiyano nga mokasal, angay siyang pahibaloon nga abante bahin sa kahikayan sa kasal. Siya makig-estorya sa kaslonon aron sa pagpakisayod sa ilang moral nga panggawi ilabina panahon sa ilang panagtrato; haom lamang nga magmatinuoron ang kaslonon nianang tungora. Kon ang usa kanila minyo sa miagi, angay niyang pamatud-an nga siya duna nay Kasulatanhon ug legal nga kagawasan sa pagminyo pag-usab. (Mat. 19:9) Lakip niini ang pagpakitag kopya sa final divorce decree, kon ang pagdiborsyo nahitabo sa laing nasod.

Kon ang kaslonon andam makighisgot ug makigtambayayong sa mga ansiyano, ang kasal mahimong usa ka malipayong okasyon alang sa tanan.​—Prov. 15:22; Heb. 13:17.