‘Sila Nagsunod sa Ilang Relihiyosong Pagbansay’

USA ka babaye gikan sa Miami, Florida, T.B.A., nagpadala sa mosunod nga sulat sa usa ka lokal nga mantalaan: “Niadtong Dis. 10 ang pitaka sa akong anak nga lalaki gikuot sa iyang bulsa diha sa usa ka tiyanggihan. Nasudlan kini sa iyang lisensiya sa pagmaneho, kard sa Social Security, ubp., ingon man sa $260.

“Human itaho ang nawala ngadto sa manedyer, siya mipauli sa balay. Sa sayong gabii siya nakadawat ug tawag sa telepono gikan sa Katsila-ug-sinultihang babaye kinsa, uban sa usa ka operetor sa [telepono] ingong tighubad, misulti kaniya nga iyang nakit-an ang iyang pitaka.

“Gihatag sa babaye kaniya ang iyang adres. . . . Gihatag kaniya ang pitaka, nga wala ka hilabti, lakip ang $260.

“Nakit-an sa babaye ang nagkuot sa pitaka ug misinggit. Gihulog sa kawatan ang pitaka ug midagan. Niadtong tungora wala na niya makita ang akong anak, busa gidala niya ang pitaka sa balay ug mitawag.

“Ang babaye ug ang iyang pamilya maoy mga Saksi ni Jehova. Sila dayag nga nagsunod sa ilang relihiyosong pagbansay.”

Wala ipasundayag sa mga Saksi ni Jehova ang pagkamatinud-anon aron makadawat ug pagdayeg gikan sa mga tawo. (Efeso 6:7) Hinunoa, sila kinasingkasing nga nagtinguha sa paghatag ug pagdayeg sa ilang langitnong Amahan, si Jehova. (1 Corinto 10:31) Ang ilang gugma sa Diyos ug sa silingan nagtukmod kanila sa pagmantala sa “maayong balita” bahin sa Gingharian sa Diyos. (Mateo 24:14) Pinaagi sa Gingharian, ang Diyos nagsaad sa pagbag-o sa yuta ngadto sa usa ka matahom nga paraiso. Unya ang yuta mahimong usa ka dapit dili lamang sa pisikal nga katahom kondili usab sa maayong panggawi diin ang pagkamatinud-anon mangibabaw sa walay kataposan.​—Hebreohanon 13:​18; 2 Pedro 3:13.