Mga Magmamantala sa Gingharian Nagtaho
Pagkalagiw Ngadto sa Teokratikanhong Organisasyon ni Jehova
DUGAY na kanhi si propetang Isaias natukmod sa pagpahayag: ‘Kinahanglang himayaon nila si Jehova diha sa kaislahan sa dagat.’ (Isaias 24:15) Ang mga Saksi ni Jehova nag-isip sa kaislahan sa dagat ingong bahin “sa gipuy-ang yuta” nga giingon ni Jesus nga “ang maayong balita kinahanglan nga mawali.”—Mateo 24:14; Marcos 13:10.
Ang Kaislahan sa Marquesas nahimutang sa mga 1,400 kilometros amihanan-sidlakan sa Tahiti. Kini sila maoy bahin sa hilit nga grupo sa mga isla sa Habagatang Pasipiko nga gitawag ug French Polynesia. Adunay tabunok, bolkanikong yuta ug mainit, umogong klima, ang tanom nagalambo niining mga islaha. Apan, ang Marquesas nagapamunga usab ug laing matang sa bunga. Tagda ang kaso sa usa ka pamilya nga misanong sa mensahe sa Gingharian diha sa isla sa Hiva Oa.
Si Jean ug ang iyang asawa, si Nadine, wala malipay sa gitawag ug sibilisadong katilingban sa Kasadpang Uropa diin sila nagpuyo. Busa mihukom sila sa pagbiya sa puliki nga estilo sa kinabuhi ug mibalhin uban sa ilang anak sa Kaislahan sa Marquesas. Ang ilang bag-ong balay, nga hinimo sa kawayan, nahimutang sa usa ka hilit nga walog. Aron maabot ang ilang kinadul-ang mga silingan, kinahanglan silang mobaktas sa batoon nga dalandalan sa bukid sa duha ka oras. Ang kinadul-ang balangay nga may doktor, eskuylahan, ug tindahan maoy tulo ka oras ang gilay-on pinaagig dyip.
Si Jean ug Nadine walay interes sa relihiyon. Sila, hinunoa, makig-estorya bahin sa tuboran sa kinabuhi. Kasagaran, ilang idetalye ang komplikadong mga teoriya sa ebolusyon. Apan walay usa sa ilang mga teoriya ang nakapatagbaw kanila.
Human magpahilit sulod sa unom ka tuig, sila natingala nga giduaw sa duha ka Saksi ni Jehova. Ang mga Saksi nahibalo bahin sa kahimtang ni Jean ug Nadine gikan sa ilang sikbit nga mga kabalangay. Siyempre, ang kabildohay mitultol ngadto sa panaghisgot sa teoriya sa ebolusyon. Sa kalipay sa magtiayon, ang mga Saksi nagdala ug kopya sa librong Life—How Did It Get Here? By Evolution or by Creation?, nga gipatik sa mga Saksi ni Jehova. Si Jean ug Nadine nalipay nga nakabaton ug libro nga nagpresentar ug bug-os nga pagsusi kon sa unsang paagi ang kinabuhi mitungha dinhi.
Wala madugay, nasugdan ang usa ka pagtuon sa Bibliya. Sulod sa mga tulo ka tuig, si Jean ug Nadine nagpadayon sa pag-uswag. Nakombinsir sila nga sa dili madugay ang tibuok yuta himoong paraiso. Human madugangi ang ilang pamilya ug tulo ka anak, ang pagbiyahe sa upat ka oras aron sa pagtambong sa Kristohanong mga tigom diha sa Kingdom Hall nahimong lisod kaayo. Hinunoa, wala kana magpugong kanila sa pagtambong. Sa ngadtongadto si Jean ug Nadine nagpasimbolo sa ilang pahinungod kang Jehova pinaagi sa bawtismo sa tubig. Gihimo nila kini sa usa ka kombensiyon nga gihimo diha sa kinadak-ang balangay, diin ang kinatas-ang tumatambong maoy 38 ka tawo!
Aron matabangan ang gamayng grupo sa mga magmamantala sa Gingharian, ang pamilya mihukom sa pagbiya sa ilang hilit nga pinuy-anan. Mibalhin sila ngadto sa usa ka balangay nga may mga usa ka libong molupyo, diin si Jean karon nag-alagad ingong ministeryal nga alagad sa lokal nga kongregasyon sa mga Saksi ni Jehova. Kining pamilyaha, nga mikalagiw kanhi ngadto sa kaislahan aron sa paglikay sa sibilisasyon, nag-isip nga pribilehiyo nga nakakaplag sa bugtong matuod nga dangpanan, ang teokratikanhong organisasyon ni Jehova.