Mga Magmamantala sa Gingharian Nagtaho
Mga Kamatuoran sa Bibliya Padayong Giwali sa Irlandia
SA KATUIGANG di pa dugay ang maanindot nga nasod sa Irlandia nahimong talan-awon sa dakong kagubot. Sa samang panahon, ang Irlandes nga katawhan madinawaton sa mensahe sa paglaom sa Bibliya nga gidala kanila sa mga Saksi ni Jehova. Gipamatud-an kini sa mosunod nga mga kasinatian gikan sa Irlandia.
Sa Dublin usa sa mga Saksi ni Jehova ug ang iyang batang babaye nagpakig-ambit sa pultahan-sa-pultahan nga buluhatong pagwali. Nahibalag nila ang usa ka babayeng ginganlan ug Cathy nga nagkapuliki kaayo sa iyang daghang anak. Ang Saksi mihangyo kon ang iyang batang babaye, kinsa nagtuon kon unsaon pagwali, makapaambit bag mubo lamang nga mensahe kaniya. Misugot si Cathy, ug ang batang babaye mihatag ug tin-aw, maayong-pagkahan-ay nga presentasyon. Si Cathy nakadayeg sa dayag nga kasinsero ug pagkamatinahuron sa bata, ug midawat sa gitanyag nga usa ka tract sa Bibliya.
Sa ulahi gipalandong ni Cathy ang maayong pagpangandam ug pamatasan sa iyang batan-ong bisita. “Ako nakadayeg nga ang usa ka batang babaye makapaambit sa ingon ka makaiikag nga mensahe nga wala magdanig pagtagad sa iyang kaugalingon,” matod niya. “Mihukom ako nga sa sunod panahong moduaw ang mga Saksi ni Jehova, ako mamati kanila.”
Kasamtangan si Cathy mibalhin ngadto sa usa ka gamayng lungsod sa habagatan-kasadpang Irlandia duol sa utlanan sa mga distrito sa Cork ug Kerry. Usa ka panahon sa ulahi ang mga Saksi ni Jehova miduaw sa iyang pultahan, ug iya silang gipadayon. Gidawat niya ang regular nga pagtuon sa Bibliya ug karon nagtambong sa mga tigom sa kongregasyon kauban sa ubay-ubay niyang mga anak. Si Cathy mapasalamaton tungod sa tim-os nga tinguha sa batang babaye nga ipakig-ambit ang maayong balita kaniya.
Sa dapit sa Tullamore, ang mga Saksi may mga panaghisgot sa Bibliya uban sa usa ka babayeng ginganlag Jean sulod sa yugtong pito ka tuig. Usahay siya nagpakitag interes ug nagdawat sa literatura, apan sa ubang mga panahon menos ang iyang interes. Usa ka adlaw, sa dihang usa ka Saksing ginganlag Frances ug usa ka kauban miduaw kang Jean, naabtan niya sila nga daotan kaayog buot. “Bisan pag unsay among gisulti,” ang Saksi mitaho, “siya mas napikal. Sa kataposan, iya kaming gisultihan nga molakaw na ug gilamba ang pultahan.”
Si Frances nahibulong nga basin ang dugang nga mga pagduaw makaagda lamang ug susamang sanong. ‘Tingali dili na mapuslanon ang pagduaw kaniya kon dili gayod siya interesado sa mensahe,’ maoy hunahuna ni Frances. Bisan pa niana, siya nakigsulti bahin niana sa iyang bana, si Thomas, ug siya mas malaomon. Sa sunod panahon nga didto sila niadtong dapita, giduaw pag-usab si Jean. Mahigalaon siya ug midawat sa mga kopya sa mga magasing Bantayanang Torre ug Pagmata! Ang dugang nga mga pagduaw maoy sama ka makapahimuot, ug gisugdan ni Thomas ug Frances ang regular nga pagtuon sa Bibliya uban niya.
Nganong may kausaban man? Si Jean misaysay nga sa panahon nga siya nagbinastos sa mga Saksi, siya bag-o pang nanganak ug mao pay paggawas sa ospital. Tungod sa pagpatutoy sa iyang masuso ug paghungit sa pagpakaon sa iyang magulang nga bata, siya nagbaton lamang ug usa ka oras ug tunga nga katulog sa usa ka gabii. “Wala gayod akoy interes niadto sa paghisgot sa relihiyon,” matod ni Jean.
Sulod sa duha ka bulan si Jean nagtambong na sa tanang tigom sa kongregasyon, ug sa upat ka bulan siya nagpakig-ambit na sa ministeryo sa kanataran. Napulo ka bulan gikan sa panahong misugod siya sa iyang pagtuon sa Bibliya, siya nabawtismohan. Karon ang kasinatian mismo ni Jean nagtabang kaniya sa ministeryo. Miasoy siya: “Kon ako makahibalag ug usa nga bastos kaayo, ako mosulay nga mas magmasinabtanon. Ako kanunayng magmatikod niana. Basin pa mausab ang kahimtang inigbalik nako; basin ang maong tawo mas maayo nag paminaw ug mas madinawaton.”