Mga Magmamantala sa Gingharian Nagtaho
Siya Nakakaplag ug Usa ka “Perlas nga Taas ug Bili”
“ANG gingharian sa mga langit maoy sama sa usa ka nagabiyaheng magpapatigayon nga nangitag maayong mga perlas. Sa pagkakaplag ug usa ka perlas nga taas ug bili, milakaw siya ug gibaligya dayon ang tanang butang nga nabatonan niya ug gipalit kini.” Pinaagi niining mga pulonga, gihubit ni Jesus ang talagsaong bili sa Gingharian sa Diyos. (Mateo 13:45, 46) Kadtong nakaila sa bili sa Gingharian kasagarang mohimog dagkong personal nga mga sakripisyo aron makuptan kini. Kini gipakita sa mosunod nga kasinatian gikan sa Probinsiya sa Pingtung, Taiwan.
Niadtong 1991, si G. ug Gng. Lin nagsugod sa pagtuon sa Bibliya uban sa mga Saksi ni Jehova. Sa dihang ang lokal nga pari nakahibalo niini, siya naningkamot nga paapilon sila sa iyang iglesya. Tungod kay ang mga Lin dunay negosyo nga pagpamaligya ug dugo sa baboy ug pato didto sa lokal nga tiyanggihan, nakahukom sila nga mangutana sa tinamdan sa pari kabahin niining butanga. “Ang tanang binuhat sa Diyos mahimong pagkaon sa tawo,” mitubag siya. Ang mga Saksi, sa laing bahin, nagdasig kanila nga palandongon kon unsay ikaingon sa Pulong sa Diyos niini. Ilang nakat-onan nga si Jehova nga Diyos nag-isip sa dugo nga sagrado, tungod kay “ang kinabuhi sa linalang mao ang dugo.” (Levitico 17:10, 11, The New English Bible) Busa ang matuod nga mga Kristohanon kinahanglang “mag-ayad . . . gikan sa dugo.” (Buhat 15:20) Ingong sangpotanan sa pagsusi sa mga Kasulatan mahitungod niining butanga, ang mga Lin nakahukom nga mohunong sa pagpamaligya ug dugo, bisan pag kini ang labing dakong gigikanan sa ilang kinitaan. Apan, wala madugay sila miatubang ug mas dako pang pagsulay.
Sa wala pa makakat-on sa kamatuoran, ang mga Lin mitanom ug 1,300 ka punoan sa bunga sa ilang yuta. Bisag mokabat pag lima ka tuig usa pa ang mga punoan masapian, sa dihang kini mamunga na tanan, ang mga Lin makapaabot nga mokita ug $77,000 kada tuig. Sa dihang nagkaduol na ang unang pagpangani, ang mga Lin kinahanglang mohimo ug hinungdanong desisyon. Ilang nakat-onan pinaagi sa ilang pagtuon sa Bibliya nga ang mga Kristohanon kinahanglang manghinlo sa ilang kaugalingon “sa tanang kahugawan sa unod ug espiritu” pinaagig paglikay sa paggamit, o pagpasiugda, sa maong hugawng mga batasan sama sa pagpanabako, pag-abuso sa mga droga, ug pagmama. (2 Corinto 7:1) Unsay ilang himoon?
Kay nailalom sa pagpiit gumikan sa nahasol nga tanlag, si G. Lin nakahukom nga hunongon ang iyang pagtuon sa Bibliya. Sa kasamtangan, si Gng. Lin mibaligya sa mga bunga gikan sa pipila sa mas gulang nilang mga punoan ug miganansiya ug kapin sa $3,000. Pasiuna lamang kini kon pila unyay ilang masapi kon ilang huptan ang ilang mga punoan. Bisan pa niini, ang tanlag ni G. Lin padayon nga nagtulisok kaniya.
Siya nakigbisog sa isyu hangtod usa ka adlaw iyang gihangyo ang lokal nga mga Saksi nga pamutlon ang iyang mga punoan sa bunga alang kaniya. Ang mga Saksi mipatin-aw nga siya ang mohimo sa desisyon; busa, angay siyang ‘mopas-an sa iyang kaugalingong luwan’ ug siya mismo ang moputol sa mga punoan. (Galacia 6:4, 5) Sila nagdasig kaniya nga hinumdoman ang saad sa 1 Corinto 10:13, nga nag-ingon: “Walay tentasyon nga midangat kaninyo gawas sa unsay sagad diha sa mga tawo. Apan ang Diyos kasaligan, ug dili niya itugot nga tentalon kamo labaw sa kon unsay inyong maagwanta, apan uban sa tentasyon siya usab maghimog kalingkawasan aron kamo makahimo sa pag-agwanta niini.” Ang mga Saksi nangatarongan usab kaniya, nga nag-ingon: “Kon kami ang magputol sa punoan alang kanimo, basin mahayan mo kini ug basolon kami tungod sa kapildihan.” Wala madugay sa ulahi, si Gng. Lin mimata usa ka buntag niana tungod sa kasaba sa serotso. Ang iyang bana ug mga anak namutol sa mga punoan sa bunga!
Napamatud-an ni G. Lin nga si Jehova maminatud-on sa Iyang saad. Siya nakabaton ug trabaho nga naghatag kaniya ug hinlong tanlag, nga nagpaposible kaniya nga mahimong magdadayeg ni Jehova. Siya nabawtismohan sa usa ka sirkitong asembliya sa mga Saksi ni Jehova niadtong Abril 1996.
Oo, si G. Lin sa pagkatinuod ‘nagbaligya dayon sa tanang butang nga nabatonan niya’ ug mipalit ug usa ka “perlas nga taas ug bili.” Karon siya adunay dili masukod nga pribilehiyo nga mao ang pagbaton ug personal nga relasyon uban kang Jehova nga Diyos ug nag-alagad alang sa intereses sa Iyang Gingharian.