Tinuod nga Kalipay-Unsa ang Yawi?

KATUYOAN nga ang mga tawo magmalipayon. Nganong makaseguro kita niana? Aw, tagda ang sinugdanan sa tawo.

Gilalang ni Jehova nga Diyos ang unang tawhanong magtiayon uban sa katakos nga magpahimulos sa kalipay. Si Adan ug Eva gibutang sa usa ka paraiso, usa ka tanaman sa kahimuot nga gitawag ug Eden. Ang Maglalalang nagtagana kanila sa tanang gikinahanglang pisikal nga mga butang sa kinabuhi. Diha sa tanaman ang “tanan nga kahoy nga makapahimuot tan-awon sa usa ug maayo nga kalan-on.” (Genesis 2:9) Si Adan ug Eva maoy himsog, kusgan, ug matahom​—sila hingpit ug tinuod nga malipayon.

Apan, unsa ang yawi sa ilang kalipay? Ang ila bang paraisonhong puy-anan o kaha ang ilang pisikal nga kahingpitan? Kining maong mga gasa gikan sa Diyos nakadugang gayod sa ilang kalipay sa kinabuhi. Apan ang ilang kalipay wala magdepende sa maong makitang mga butang. Ang tanaman sa Eden dili lang kay usa ka matahom nga parke. Kadto maoy usa ka santuwaryo, usa ka dapit sa pagsimba sa Diyos. Ang yawi sa ilang walay-kataposang kalipay mao ang ilang katakos sa pagtukod ug paghupot ug mahigugmaong relasyon uban sa Maglalalang. Aron magmalipayon, kinahanglang mahimo una silang espirituwal.​—Itandi ang Mateo 5:3.

Ang Espirituwalidad Motultol sa Kalipay

Sa sinugdan si Adan adunay espirituwal nga relasyon uban sa Diyos. Kadto maoy mahigugmaon, mabinationg relasyon sama nianang tali sa anak ug sa amahan. (Lucas 3:38) Sa tanaman sa Eden, si Adan ug Eva adunay hingpit nga mga kahimtang nga nagtugot kanila sa pagtagbaw sa ilang tinguha sa pagsimba. Pinaagi sa ilang kinabubut-on, mahigugmaong pagsugot kang Jehova, sila magdala ug pasidungog ug himaya sa Diyos nga labaw pa kay sa ikahatag sa kahayopan. Sila sa intelihenteng paagi makadayeg sa Diyos tungod sa iyang kahibulongang mga hiyas ug makapaluyo sa iyang pagkasoberano. Sila usab makapadayon sa pagdawat sa mahigugmaon ug malulotong pag-atiman ni Jehova.

Kining kalambigitan uban sa Maglalalang ug pagsugot sa iyang mga balaod nagdalag tiunay nga kalipay sa atong unang mga ginikanan. (Lucas 11:28) Dili kinahanglang makasinati si Adan ug Eva ug daghang katuigan sa pag-eksperimento una makaplagi ang yawi sa kalipay. Sila malipayon sukad gayod sa paglalang kanila. Ang pagbaton ug pakigdait uban sa Diyos ug pagpasakop sa iyang awtoridad naghimo kanilang malipayon.

Apan, natapos ang maong kalipay sa dihang gisupak nila ang Diyos. Pinaagi sa pagrebelde, gibugto ni Adan ug Eva ang ilang espirituwal nga relasyon uban kang Jehova. Sila dili na mga higala sa Diyos. (Genesis 3:​17-19) Daw sukad sa adlaw nga sila gipalagpot sa tanaman, si Jehova mihunong sa pagpakigsulti kanila. Nawad-an sila sa ilang kahingpitan, sa paglaom nga mabuhing walay kataposan, ug sa ilang tanamang puy-anan. (Genesis 3:23) Apan labaw sa tanan, sanglit nawala nila ang ilang relasyon uban sa Diyos, nawala ang ilang yawi sa kalipay.

Atong Katakos sa Pagpili

Una mamatay, gipasa ni Adan ug Eva ngadto sa ilang mga anak ang ilang tawhanong mga kinaiya, ilang kinaiyanhong tanlag, ug ang kapasidad alang sa espirituwalidad. Ang tawhanong pamilya wala ipakaubos ngadto sa lebel sa mga mananap. Kita mahimong mapasig-uli ngadto sa Maglalalang. (2 Corinto 5:18) Ingong intelihenteng mga linalang, ang mga tawo padayong nakabaton ug gahom sa pagpili kon mosugot o dili sa Diyos. Kini giilustrar daghang siglo sa ulahi sa dihang gihatagan ni Jehova ang bag-ong natukod nga nasod sa Israel sa kapilian sa kinabuhi o kamatayon. Pinaagi sa iyang tigpamaba nga si Moises, ang Diyos miingon: “Gibutang ko karon sa atubangan mo ang kinabuhi ug ang kaayohan, ang kamatayon ug kadaotan.”​—Deuteronomio 30:​15-18.

Bisan karon, linibo ka tuig human mawala ang orihinal nga Paraiso, kitang mga tawo may katakos gihapon sa paghimo sa hustong pagpili. Kita adunay nagalihok nga tanlag ug usa ka lintunganayng katakos sa pagsugot sa mga balaod sa Diyos. Ang Bibliya naghisgot sa “among pagkatawo sa sulod” ug ang “pagkatawo sa sulod.” (2 Corinto 4:​16; Roma 7:22) Kining maong mga ekspresyon may kalabotan sa kinaiyanhong katakos nga nabatonan natong tanan sa pagpabanaag sa personalidad sa Diyos, sa paghunahuna sa iyang mga hunahuna, sa pagkahimong espirituwal.

Mahitungod sa atong moral nga kinaiyahan ug tanlag, si apostol Pablo misulat: “Dihang ang katawhan sa kanasoran nga walay balaod nagabuhat nga kinaiyahanon sa mga butang sa balaod, kining mga tawhana, bisan tuod walay balaod, maoy balaod ngadto sa ilang kaugalingon. Sila mao mismo ang nagapasundayag sa mga butang labot sa balaod nga nahisulat diha sa ilang mga kasingkasing, samtang ang ilang tanlag nagapanaksi duyog kanila ug, tali sa ilang kaugalingong mga panghunahuna, sila ginasumbong o gani ginapalingkawas.”​—Roma 2:​14, 15.

Diyosnong Kaalam ug Pagkamasinugtanon​—Ang Yawi

Apan ang usa mangutana tingali, ‘Kon kitang tanan adunay kinaiyanhong kiling sa pagsimba sa Diyos ug, ingong resulta, sa pagpahimulos ug tinuod nga kalipay, nganong kaylap kaayo ang pagkadili-malipayon?’ Tungod kini kay aron magmalipayon, ang matag usa kanato kinahanglang mouswag sa espirituwal. Bisan tuod sa sinugdan gilalang sa dagway sa Diyos, ang tawo napahilayo sa iyang Maglalalang. (Efeso 4:​17, 18) Busa, ang matag usa kanato kinahanglang mohimog tinong mga lakang aron matukod ug mahuptan ang espirituwal nga relasyon uban sa Diyos. Ang maong relasyon dili awtomatikong mahitabo.

Gipakita ni Jesus ang duha ka hinungdanong mga prinsipyo sa pag-ugmad sa espirituwalidad. Ang usa mao ang pagbaton ug tukmang kahibalo sa Diyos, ug ang lain mao ang pagpasakop nga masinugtanon sa iyang kabubut-on. (Juan 17:3) Nagkutlo sa Pulong sa Diyos, si Jesus miingon: “Kini nahisulat, ‘Ang tawo mabuhi, dili sa tinapay lamang, apan sa matag pamulong nga nagagula sa baba ni Jehova.’” (Mateo 4:4) Sa laing higayon, si Jesus miingon: “Ang akong pagkaon mao ang pagbuhat ko sa kabubut-on niya nga nagpadala kanako ug ang paghuman sa iyang buluhaton.” (Juan 4:34) Dili kinahanglang mogugol kita ug daghang dekada sa pag-eksperimento aron sa pagpangitag kalipay. Ang kasinatian dili mao ang yawi sa kalipay. Hinunoa, ang diyosnong kaalam ug pagkamasinugtanon lamang sa atong Maglalalang ang motultol sa tinuod nga kangaya sa kinabuhi.​—Salmo 19:7, 8; Ecclesiastes 12:13.

Tin-aw, ang kalipay nga modangat tungod sa pagpakita ug diyosnong kaalam ug pagbaton ug maayong baroganan atubangan sa Diyos mahimong makab-ot nato. (Buhat 17:​26, 27) Ang kahibalo bahin kang Jehova ug sa iyang katuyoan mabatonan sa tanan. Uban sa binilyong kopya sa daghang pinulongan, ang Bibliya mao gihapon ang labing kaylap nga gipanagtag nga basahon sa kalibotan. Ang Bibliya makatabang kanimo nga mahimong higala sa Diyos ug makapahimulos ug tinuod nga kalipay, kay ang Kasulatan nagtug-an kanato nga “malipayon ang katawhan kansang Diyos mao si Jehova!”​—Salmo 144:15.

[Kapsiyon sa panid 7]

“Malipayon kadtong mahunahunaon sa ilang espirituwal nga panginahanglan.”​—Mateo 5:3