Mapasalamaton Tungod sa Lig-ong Kristohanong Panulondon

SUMALA SA GIASOY NI GWEN GOOCH

Sa tunghaan giawit nako ang usa ka himno nga may mga pulong nga, ‘ang Dako nga Jehova naentrono sa iyang himaya.’ Subsob akong mahibulong, ‘Kinsa kini si Jehova?’

ANG akong mga apohan maoy mahinadlokon sa Diyos. Sayo niining sigloha, sila nakig-uban sa mga Estudyante sa Bibliya, ingon sa pag-ila kaniadto sa mga Saksi ni Jehova. Ang akong amahan malamposon sa negosyo apan sa sinugdan wala magpasa ngadto sa iyang tulo ka anak sa Kristohanong panulondon nga gitanyag kaniya.

Niadto lamang gihatagan ni Papa ang akong igsoong lalaki, nga si Douglas, akong igsoong babaye, nga si Anne, ug ako sa mga pulyetong nag-ulohan nga His Works ug Who Is God? nga akong nasayran nga Jehova maoy ngalan sa matuod nga Diyos. (Salmo 83:18) Nahinam ako! Apan unsay nakapukaw pag-usab sa kaikag ni Papa?

Sa 1938, sa dihang nakita niya ang mga nasod nga nangandam alang sa gubat, naamgohan ni Papa nga nagkinahanglag labaw pa sa tawhanong mga paningkamot ang pagsulbad sa mga suliran sa kalibotan. Gihatagan siya ni Lola sa librong Enemies, nga gipatik sa mga Saksi ni Jehova. Sa pagbasa niana, iyang nakat-onan nga ang tinuod nga kaaway sa katawhan mao si Satanas nga Yawa ug nga ang Gingharian sa Diyos lamang ang makapahinabog kalinaw sa kalibotan.a​—Daniel 2:​44; 2 Corinto 4:4.

Samtang nagsingabot ang gubat, ang among pamilya nagsugod sa pagtambong sa mga tigom sa Kingdom Hall sa mga Saksi ni Jehova sa Wood Green, Amihanang London. Sa Hunyo 1939 miadto kami sa haduol nga Alexandra Palace aron maminaw sa pakigpulong publiko nga, “Kagamhanan ug Pakigdait,” nga gipahayag ni Joseph F. Rutherford, presidente niadto sa Watch Tower Society. Ang pakigpulong ni Rutherford sa Madison Square Garden sa New York City gisibya sa radyo sa London ug sa ubang dagkong mga siyudad. Tin-aw kaayo namong madungog ang pakigpulong nga sa dihang nagsamoksamok ang lampingasang magubtanong panon sa New York, miliraw ang akong mata aron sa pagsusi kon kana nahitabo ba sa among awditoryum!

Ang Kasibot ni Papa Alang sa Kamatuoran sa Bibliya

Miinsistir si Papa nga matag Sabado sa gabii ang among tibuok nga pamilya duyog nga makig-ambit sa pagtuon sa Bibliya. Ang among pagtuon nasentro sa ulohan sa Bibliya sa Ang Bantayanang Torre nga gieskedyul nga hisgotan pagkasunod adlaw. Sa pag-ilustrar sa epekto niining maong mga pagtuon, hangtod niining adlawa ang asoy mahitungod kang Josue ug sa paglikos sa siyudad sa Ai nga gihisgotan sa Ang Bantayanang Torre sa Mayo 1, 1939, tin-aw pa gihapon sa akong hunahuna. Naikag ako pag-ayo sa maong asoy nga akong gisusi ang tanang reperensiya niana diha sa akong kaugalingong Bibliya. Nalingaw ako sa maong panukiduki​—ug mao gihapon karon.

Ang pagpakig-ambit sa uban kon unsay among nakat-onan nagpatisok sa mga pagtulon-an sa Bibliya sa akong kasingkasing. Usa ka adlaw niana gihatagan ko ni Papa ug usa ka ponograpo uban ang plaka sa sermon sa Bibliya, usa ka pulyeto nga among gigamit sa pagtuon sa Bibliya, ug ang adres sa usa ka tigulang nga babaye. Unya iya kong gihangyo nga moduaw kaniya.

“Unsa may akong isulti, ug unsa may akong buhaton?” ako nangutana.

“Anaa diha ang tanan,” mitubag si Papa. “Patokara lang ang plaka, basaha ang mga pangutana, ipabasa sa tagbalay ang mga tubag, ug unya basaha ang mga kasulatan.”

Gibuhat nako ang iyang giingon kanako, ug niining paagiha nakakat-on ako sa pagdumala ug pagtuon sa Bibliya. Pinaagi sa paggamit sa Kasulatan diha sa akong ministeryo, mas nasabtan nako kini.

Suliran sa Katuigan sa Gubat

Ang Gubat sa Kalibotan II mibuto niadtong 1939, ug pagkasunod tuig nabawtismohan ako ingong simbolo sa akong pahinungod nga moalagad kang Jehova. Trese anyos pa lang ako niadto. Mihukom ako niadtong panahona nga mahimong payunir, ingon sa pagtawag sa bug-os-panahong mga ministro. Miundang ako pagtungha sa 1941 ug sa kombensiyon sa Leicester miduyog kang Douglas sa bug-os-panahong buluhatong pagsangyaw.

Pagkasunod tuig, nabilanggo si Papa tungod sa iyang matanlagong pagdumili sa pag-apil sa pakiggubat. Kaming mga anak naghiusa aron sa pagtabang sa among inahan, nga mitabang kaniya sa pag-atiman sa among panimalay sulod sa malisod nga panahon sa gubat. Unya, dihadiha human pagawsa si Papa gikan sa bilanggoan si Douglas gipatawag aron sa pag-alagad sa militar. Usa ka ulohang balita sa lokal nga mantalaan ang mabasa, “Kon Nganong ang Anak nga Sama sa Amahan Mipili nga Mabilanggo.” Misangpot ang maayong pagpamatuod, sanglit gitagana ang kahigayonan sa pagsaysay kon nganong ang matuod nga mga Kristohanon dili makig-ambit sa pagpamatay sa ilang mga isigkatawo.​—Juan 13:​35; 1 Juan 3:​10-12.

Panahon niadtong katuigan sa gubat, daghang Saksi nga diha sa bug-os-panahong ministeryo ang magduawan sa among panimalay, ug ang ilang makapalig-on nga binase sa Bibliyang mga panaghisgot nagbilin ug dumalayong epekto. Lakip niining matinumanong Kristohanong mga igsoon mao si John Barr ug Albert Schroeder, nga karon mga membro sa Nagamandong Lawas sa mga Saksi ni Jehova. Ang akong mga ginikanan maabiabihon gayod, ug gitudloan nila kami sa pagbuhat sa susama.​—Hebreohanon 13:2.

Andam sa Pagtagana ug Tubag

Wala madugay human ako misugod pagpayunir, nahimamat ko si Hilda diha sa balay-balayng ministeryo. Masuk-anon siyang miingon: “Ang akong bana nakiggubat alang sa mga tawo nga sama kanimo! Nganong wala ka may gibuhat nga butang ngadto sa paningkamot sa gubat?”

“Unsa ka dako ang imong nahibaloan bahin sa akong ginahimo?” ako nangutana. “Nahibalo ka ba kon nganong mianhi ako kanimo?”

“Aw,” siya mitubag, “maayo pang modayon ka ug suginlan ako.”

Nakasaysay ako nga gitagana namo ang tinuod nga paglaom ngadto sa katawhan nga nag-antos tungod sa makalilisang nga mga buhat nga ginahimo​—kasagaran sa ngalan sa Diyos. Si Hilda naminaw uban ang pagpabili, ug nahimo siyang akong unang regular nga gitun-an sa Bibliya. Siya usa ka aktibong Saksi sulod na sa kapin sa 55 ka tuig.

Pagkatapos sa gubat, nakadawat ako ug bag-ong payunir nga asaynment sa Dorchester, usa ka lungsod sa habagatan-kasadpang Inglaterra. Mao kadto ang unang higayon nga nagpuyo ako nga halayo sa balay. Ang among gamayng kongregasyon nagtigom sa usa ka restawran, usa ka ika-16 nga siglong tinukod nga gitawag ug “Ang Karaang Balay sa Tsa.” Kinahanglang usbon namo pagpahimutang ang mga lamesa ug mga lingkoranan alang sa matag tigom namo. Lahi kaayo kadto sa Kingdom Hall nga naandan nako. Bisan pa niana, ang samang espirituwal nga pagkaon ug mahigugmaong pakig-uban sa Kristohanong mga igsoong lalaki ug babaye didto gihapon.

Kasamtangan ang akong mga ginikanan mibalhin sa Tunbridge Wells, habagatang London. Mipauli ako aron si Papa, si Anne, ug ako makapayunir nga magkauban. Ang among kongregasyon sa wala madugay mitubo gikan sa 12 ngadto sa 70 ka Saksi, busa ang among pamilya gihangyo nga mobalhin sa Brighton sa habagatang baybayon, diin mas dako ang panginahanglan sa mga magmamantala sa Gingharian. Daghan ang masibotong miduyog sa pagsangyaw uban sa among payunir nga pamilya, ug among nakita nga dagayang nagapanalangin si Jehova sa among buluhaton. Ang usa ka kongregasyon sa wala madugay nahimong tulo!

Usa ka Wala-Damhang Imbitasyon

Sa ting-init sa 1950, ang among pamilya nalakip sa 850 ka delegado gikan sa Britanya nga mitambong sa Pag-uswag sa Teokrasya nga Internasyonal nga Asembliya sa Yankee Stadium sa New York City. Daghang payunir nga mitambong sa maong kombensiyon gikan sa laing mga nasod ang gipadad-an ug aplikasyon nga motambong sa Watchtower Bible School of Gilead, nga nahimutang duol sa South Lansing, New York. Si Douglas, Anne, ug ako nalakip kanila! Nahinumdom akong naghunahuna sa dihang gipadala nako ang akong gipil-apang aplikasyon, ‘Karon nabuhat na gayod nako kini! Unsa kahay dangatan sa akong kinabuhi?’ Bisan pa niana ang akong determinasyon mao: “Ania ako! Ipadala ako.” (Isaias 6:8) Nahinam ako sa dihang akong nadawat ang imbitasyon nga magpabilin human sa kombensiyon aron motambong sa ika-16 nga klase sa Gilead, duyog kang Douglas ug Anne. Kaming tanan nahibalo nga mahimo kaming ipadala ingong mga misyonaryo sa bisan haing dapit sa kalibotan.

Human pahimusli ang kombensiyon nga magkauban ingong pamilya, ang panahon miabot nga ang among mga ginikanan mopauli na sa Inglaterra​—nga sila na lang. Kaming tulo nga mga anak mibabay samtang milawig sila paingon sa amoa sakay sa Mauritania. Pagkatugob sa pagbati kadto nga panagbulag!

Misyonaryong mga Asaynment

Ang ika-16 nga klase sa Gilead gilangkoban sa 120 ka estudyante gikan sa tanang bahin sa kalibotan, lakip sa pipila nga nag-antos sa mga kampong konsentrasyon sa Nazi. Sanglit ang among klase gitudloag Kinatsila, among gidahom nga ipadala kami ngadto sa pipila ka nagsultig-Kinatsila nga nasod sa Amerika del Sur. Handurawa ang among katingala sa dihang sa adlaw sa graduwasyon among nasayran nga si Douglas ipadala sa Hapon ug si Anne ug ako ngadto sa Syria. Busa kaming mga babaye kinahanglang magtuon ug Arabe, ug kini kinahanglan gihapon bisan sa dihang gibalhin ang among asaynment sa Lebanon. Samtang nagpaabot sa among mga bisa, gitudloan kami ug Arabe kaduha sa usa ka semana ni George Shakashiri, ang typesetter sa Arabe nga Bantayanang Torre sa Watch Tower Society.

Pagkakulbahinam nga moadto sa usa ka yuta sa Bibliya nga among gitun-an sa klase! Sila si Keith ug Joyce Chew, Edna Stackhouse, Olive Turner, Doreen Warburton, ug Doris Wood mikuyog namo didto. Nahimo gayod kaming malipayong misyonaryong pamilya! Usa ka lokal nga Saksi miduaw sa among misyonaryong puy-anan aron tabangan pa kami sa pinulongan. Panahon sa among adlaw-adlaw nga yugto sa pagtudlo, mag-ensayo kami ug mubo nga presentasyon, nga human niana mogawas kami ug gamiton kana sa among buluhatong pagsangyaw.

Among gigugol ang among unang duha ka tuig sa Tripoli, diin dihay natukod na nga kongregasyon. Si Joyce, Edna, Olive, Doreen, Doris, Anne, ug ako mitabang sa mga asawa ug mga anak nga babaye sa lokal nga mga Saksi aron makapakig-ambit sa mga tigom maingon man sa publikong ministeryo. Hangtod niadtong panahona, ang among Kristohanong mga igsoong lalaki ug babaye, nga nagsunod sa lokal nga kostumbre, dili magtupad pagpanglingkod diha sa mga tigom, ug panagsa ra nga kining Kristohanong mga igsoong babaye makig-ambit sa balay-sa-balay nga ministeryo. Gikinahanglan namo ang ilang tabang sa pinulongan diha sa among pagsangyaw sa publiko, ug gidasig namo sila nga makig-ambit niining buluhatona mismo.

Si Anne ug ako sunod nga giasayn nga motabang sa gamayng grupo sa mga Saksi sa karaang siyudad sa Sidon. Wala madugay human niadto, gipabalik kami sa kaulohan, sa Beirut. Ang mga binhi sa kamatuoran sa Bibliya napugas taliwala sa nagsultig-Armenian nga komunidad didto, busa among gitun-an ang maong pinulongan aron sa pagtabang kanila.

Mga Kausaban sa Asaynment

Nahimamat nako si Wilfred Gooch una mobiya sa Inglaterra. Siya masiboton, mabinationg igsoon nga nag-alagad sa Bethel sa London. Si Wilf maoy membro sa ika-15 nga klase sa Gilead, nga migraduwar panahon sa 1950 nga kombensiyon sa Yankee Stadium. Ang iyang misyonaryong asaynment mao ang sangang buhatan sa Watch Tower Society sa Nigeria, ug sulod sa pipila ka panahon nagsinulatay kami. Sa 1955 kaming duha mitambong sa “Madaogong Gingharian” nga kombensiyon sa London, ug wala madugay human niadto nagkatrato kami. Pagkasunod tuig, gikasal kami sa Ghana, ug miduyog ako kang Wilf sa iyang misyonaryong asaynment sa Lagos, Nigeria.

Human nako biyai si Anne sa Lebanon, naminyo siya sa usa ka buotan nga Kristohanong igsoong lalaki nga nakakat-on sa kamatuoran sa Jerusalem. Ang akong mga ginikanan wala makatambong sa among mga kasal, sanglit si Douglas, Anne, ug ako nangaminyo sa lainlaing mga dapit sa kalibotan. Sa gihapon, kontento sila sa pagkahibalo nga kaming tanan malipayong nag-alagad sa atong Diyos, si Jehova.

Buluhaton sa Nigeria

Sa sangang buhatan sa Lagos, giasayn ako sa paghinlo sa mga lawak sa walo ka membro sa among pamilya sa sangang buhatan maingon man sa paghikay sa ilang mga pagkaon ug paglaba sa ilang mga sinina. Para kanako morag dili lang bana ang akong nabatonan kondili usa ka dihadihang pamilya usab!

Si Wilf ug ako nakakat-on ug mugbong mga presentasyon sa Bibliya sa pinulongang Yoruba, ug gigantihan kami sa among mga paningkamot. Usa ka batan-ong estudyante nga among nakontak kaniadto sa pagkakaron adunay anak nga lalaki ug babaye nga nag-alagad sa dakong pamilyang Bethel sa Nigeria nga adunay mga 400 ka membro.

Sa 1963, si Wilf nakadawat ug imbitasyon nga motambong sa napulo-ka-bulan nga kurso sa espesyal nga instruksiyon sa Brooklyn, New York. Human matapos kana, sa wala damha giasayn siya pagbalik sa Inglaterra. Nagpabilin ako niadto sa Nigeria ug gihatagan lamang ug 14 ka adlaw sa pagpangandam dayon moduyog kang Wilf sa London. Milarga ako nga nagsagol ang gibati, sanglit ang Nigeria maoy usa ka makalipayng asaynment. Human mag-alagad ug 14 ka tuig sa laing nasod, nagkinahanglag panahon ang pagpasibo pag-usab sa kinabuhi sa Inglaterra. Bisan pa niana, mapasalamaton kami nga sa makausa pa nahiduol sa among tigulang nga mga ginikanan ug makatabang sa pag-atiman kanila.

Gipalig-on sa Atong Paglaom

Sukad sa 1980, nakapribilehiyo ako sa pagkuyog kang Wilf samtang mibiyahe siya ngadto sa daghang nasod ingong magtatan-aw sa sona. Ilabinang gikahinaman nako ang among mga balik nga pagduaw sa Nigeria. Sa ulahi miadto usab kami sa Scandinavia, sa West Indies, ug sa Tungang Sidlakan​—lakip sa Lebanon. Usa ka linaing kahinam nga buhion pag-usab ang malipayong mga handomanan ug makita kadtong akong nailhan sa mga tin-edyer pa nga nag-alagad ingong Kristohanong mga ansiyano.

Ikasubo, ang akong minahal nga bana namatay sa tingpamulak sa 1992. Siya 69 anyos lamang. Ilabinang masakit kadto nga katalagman sanglit nahitabo kadto nga kalit kaayo. Human sa 35 ka tuig nga kaminyoon, nagkinahanglag panahon sa pagpasibo. Apan nakadawat akog dakong tabang ug gugma gikan sa akong tibuok-kalibotang Kristohanong pamilya. Daghan kaayo akog mga eksperyensiya nga palandongon.

Ang akong mga ginikanan parehong nagpakita ug maayo kaayong panig-ingnan sa Kristohanong integridad. Si Mama namatay sa 1981 ug si Papa sa 1986. Si Douglas ug Anne nagpadayon sa pag-alagad kang Jehova nga matinumanon. Si Douglas ug iyang asawa, si Kam, nahibalik sa London, diin nagpabilin sila human mag-atiman kang Papa. Si Anne ug ang iyang pamilya atua na sa Tinipong Bansa. Kaming tanan nagpabili pag-ayo sa among hinatag sa Diyos nga paglaom ug panulondon. Nagapadayon kami sa “pagpakita ug nagahulat nga tinamdan,” nga nagapaabot sa panahon sa dihang ang mga buhi, duyog sa ilang binanhawng mga minahal, mag-alagad sa walay kataposan nga magkauban ingong mga membro sa yutan-ong pamilya ni Jehova.​—Lamentaciones 3:24.

[Mga footnote]

[Mga hulagway sa panid 23]

Nunot sa relo sugod sa ibabawng wala:

Si Gwen sa edad nga 13 nagpasundayag sa modelong pagtuon didto sa Kingdom Hall sa Enfield

Misyonaryong pamilya sa Tripoli, Lebanon, 1951

Si Gwen uban sa iyang naanhing nga bana, si Wilf