Mga Magmamantala sa Gingharian Nagtaho
“Ang Imong Katawhan Kinabubut-ong Mohalad sa Ilang Kaugalingon”
GISANLA ang gamhanang pangulo sa kasundalohan sa Sirya nga si Naaman. Kon dili matambalan, kining makaluod nga sakit mahimong moresulta sa pagkadaot sa pigura ug kamatayon. Unsay buhaton ni Naaman? Apil niadtong anaa sa panimalay ni Naaman mao ang usa ka dalagita, “nga bihag gikan sa yuta sa Israel.” Siya walay kahadlok nga nagsulti ug nagsugyot nga si propeta Eliseo mao ang makaayo ni Naaman.—2 Hari 5:1-3.
Tungod sa maisogong baroganan sa dalagitang babaye, miadto si Naaman kang Eliseo ug naayo. Dugang pa, si Naaman nahimong usa ka magsisimba ni Jehova! Kini nga kasinatian, nga girekord sa Bibliya, nahitabo niadtong ikanapulong siglo W.K.P. (2 Hari 5:4-15) Karong adlawa, daghang batan-on ang nagpasundayag ug susamang kaisog sa pagsulti alang sa intereses sa Gingharian. Ang mosunod nga kasinatiang gikan sa Mozambique nagpamatuod niini.
Ang sayis-anyos nga si Nuno maoy usa ka di-bawtismadong magmamantala sa maayong balita. Bisan sa wala pa siya mahimong di-bawtismadong magmamantala, tigomon ni Nuno ang mga bata sa iyang mga silingan, magtanyag ug pag-ampo, ug magtudlo kanila sa Bibliya, nga ginamit ang publikasyong Akong Basahon sa mga Estorya sa Bibliya.
Daghang beses nga si Nuno mobangon sa sayong kabuntagon sa Sabado ug magpahinumdom sa iyang pamilya: “Karong adlawa mogula kita sa ministeryo sa kanataran.” Ang iyang kasibot alang sa ministeryo nadayag sa ubang mga paagi. Samtang nagkauban sa iyang ginikanan sa pagsangyaw sa dalan sa Maputo, sagad ginaduol ni Nuno ang mga tawo nga siyasiya lang. Sa usa sa maong okasyon, usa ka negosyante ang miduol kaniya ug nangutana: “Nganong kamo nagabaligya niini nga magasin?” Miingon si Nuno: “Wala ako nagbaligyag mga magasin, apan ako modawat ug mga kontribusyon aron makatabang sa galastohan sa buluhatong pagsangyaw.” Ang negosyante mitubag: “Bisan ako dili interesado, natandog ako sa imong tinamdan ug katakos. Buot kong mohatag ug kontribusyon alang niini nga buluhaton.”
Sa laing higayon, giduol ni Nuno ang usa ka tawo diha sa dalan ug gitanyag kaniya ang librong Matuod nga Kalinaw ug Kasegurohan—Sa Unsang Paagi Imong Makaplagan? Ang tawo misukna: “Dili ba nagtungha ka nianang eskuylahan sa unahan?” “Oo,” si Nuno mitubag, “nagtungha ako sa maong eskuylahan, apan karon ako nagtanyag ug usa ka hinungdanong mensahe niini nga libro. Kini nagpakita kanimo nga ikaw mahimong mabuhi sa bag-ong kalibotan nga himoon sa Diyos, ingon sa gipakita sa hulagway niini nga libro.” Wala makamatikod si Nuno nga ang tawo nga iyang gikaestorya maoy usa ka magtutudlo sa iyang tunghaan. Dili kay libro lang ang gidawat sa magtutudlo apan karon siya usab regular nga nagdawat ug mga magasing Bantayanang Torre ug Pagmata! gikan kang Nuno.
Dihang gipangutana si Nuno kon nganong gusto niyang moapil sa buluhatong pagsangyaw, siya nag-ingon: “Buot kong mosulti sa mga tawo ug motudlo kanila mahitungod kang Jehova ug sa iyang Anak, si Jesu-Kristo.” Siya nagdugang: “Ug kon ang mga tawo dili gustong maminaw, walay katarongan nga maglagot.”
Sa tibuok-kalibotan, linibo ka batan-ong sama kang Nuno ang “kinabubut-ong mohalad sa ilang kaugalingon” sa pagtudlo ug pagsangyaw mahitungod sa Gingharian sa Diyos. (Salmo 110:3) Apan kini wala mahitabo nga sulagma. Ang mga ginikanan nga nagtudlo sa ilang mga anak mahitungod kang Jehova gikan sa pagkamasuso, naghatag ug maayong sumbanan diha sa ministeryo, ug madasigong nangab-ot sa intereses sa Gingharian pagagantihan nga madagayaon.