Si Jehova Magatuman sa Iyang mga Saad sa mga Matinumanon
“Kasaligan siya nga misaad.”—HEBREOHANON 10:23.
1, 2. Nganong kita bug-os makasalig sa mga saad ni Jehova?
SI Jehova naghangyo nga ang iyang mga alagad mag-ugmad ug maghupot ug malig-ong pagtuo kaniya ug sa iyang mga saad. Pinaagi sa maong pagtuo ang usa bug-os nga makasalig kang Jehova nga tumanon niya ang iyang gisaad nga pagabuhaton. Ang iyang dinasig nga Pulong nag-ingon: “Si Jehova sa mga panon nanumpa, nga nag-ingon: ‘Ako nang nahunahuna, mao man ang mahitabo; ug sama sa ako nang gitambag, mao man ang mamatuman.’”—Isaias 14:24.
2 Ang pulong, “si Jehova sa mga panon nanumpa,” nagpakita nga siya naghatag sa iyang solemneng panumpa nga tumanon niya ang iyang mga saad. Maoy hinungdan nga ang iyang Pulong nakaingon: “Salig kang Jehova uban sa bug-os mo nga kasingkasing ug ayaw pagsalig sa imong kaugalingong pagsabot. Sa tanan nimong mga dalan ilha siya, ug siya magatul-id sa imong mga alagianan.” (Proverbio 3:5, 6) Kon kita mosalig kang Jehova ug kita magpagiya sa iyang kaalam, ang atong mga alagianan sa walay pagkapakyas motultol sa kinabuhing walay kataposan, kay ang kaalam sa Diyos maoy “usa ka kahoy sa kinabuhi alang niadtong magahawid niana.”—Proverbio 3:18; Juan 17:3.
Matuod nga Pagtuo sa Karaang mga Panahon
3. Sa unsang paagi si Noe nagpakita ug pagtuo kang Jehova?
3 Ang rekord sa mga buhat ni Jehova ngadto sa mga tawong adunay matuod nga pagtuo nagpamatuod sa iyang pagkakasaligan. Pananglitan, kapin sa 4,400 ka tuig kanhi, gisultihan sa Diyos si Noe nga ang kalibotan sa iyang adlaw laglagon pinaagi sa tibuok-kalibotan nga Lunop. Iyang gisugo si Noe sa pagtukod ug dakong arka aron maluwas ang mga kinabuhi sa tawo ug mga hayop. Unsay gihimo ni Noe? Ang Hebreohanon 11:7 nagsulti kanato: “Tungod sa pagtuo si Noe, human mahatagi ug pasidaang iya-sa-Diyos labot sa mga butang nga wala pa makita, mipakitag diyosnong kahadlok ug nagtukod ug arka alang sa pagluwas sa iyang panimalay.” Nganong may pagtuo si Noe sa usa ka butang nga wala pa sukad mahitabo, usa ka butang nga “wala pa makita”? Tungod kay may igo siyang kahibalo sa nangaging mga pakiglabot sa Diyos sa tawhanong pamilya sa pagkasabot nga bisag unsay isulti sa Diyos mamatuman. Busa si Noe masaligon nga ang Lunop mahitabo usab.—Genesis 6:9-22.
4, 5. Nganong si Abraham bug-os nga misalig kang Jehova?
4 Laing pananglitan sa matuod nga pagtuo mao si Abraham. Duolan sa 3,900 ka tuig kanhi, gisugo siya sa Diyos sa paghalad kang Isaac, ang iyang bugtong anak sa iyang asawa, si Sara. (Genesis 22:1-10) Sa unsang paagi misanong si Abraham? Ang Hebreohanon 11:17 nag-ingon: “Tungod sa pagtuo si Abraham, sa dihang siya gisulayan, sama sa nakatanyag na kang Isaac.” Hinunoa, sa kataposang gutlo, gipugngan si Abraham sa manulonda ni Jehova. (Genesis 22:11, 12) Apan, nganong gihimo pa gihapon ni Abraham kadto? Tungod kay, ingon sa gisulti sa Hebreohanon 11:19, “iyang giisip nga ang Diyos makahimo sa pagbangon [kang Isaac] bisan gikan sa mga patay.” Apan nganong nakatuo man si Abraham sa pagkabanhaw nga wala man siyay nakita nga gibanhaw ug walay nangaging rekord nga may nabanhaw?
5 Hinumdomi, si Sara 89 na sa dihang gisaaran sila sa Diyos ug usa ka anak nga lalaki. Ang tagoangkan ni Sara lapas na sa edad nga makapanganak—patay na, pagaingnon pa. (Genesis 18:9-14) Gibuhi sa Diyos ang tagoangkan ni Sara, ug siya nanganak kang Isaac. (Genesis 21:1-3) Si Abraham nahibalo nga kon nakapabuhi ang Diyos sa patayng tagoangkan ni Sara, nan siya makapabuhi usab kang Isaac kon gikinahanglan. Ang Roma 4:20, 21 nag-ingon bahin kang Abraham: “Tungod sa saad sa Diyos siya wala magpalingpaling diha sa kawalay pagtuo, apan nahimong kusganon pinaagi sa iyang pagtuo, nga nagahatag ug himaya sa Diyos ug bug-os kombinsido nga kon unsa ang iyang gikasaad siya usab makahimo sa pagbuhat.”
6. Sa unsang paagi gipadayag ni Josue ang pagsalig kang Jehova?
6 Kapin sa 3,400 ka tuig kanhi sa dihang si Josue nag-edad ug kapin sa usa ka gatos ka tuig ug human sa tibuok kinabuhing pagkasinati sa pagkakasaligan sa Diyos, siya mihatag niini nga katarongan sa iyang pagsalig: “Kamo nahibalo sa bug-os ninyong mga kasingkasing ug sa bug-os ninyong mga kalag nga walay usa ka pulong sa tanang maayong mga pulong nga gipamulong kaninyo ni Jehova nga inyong Diyos ang napakyas. Kining tanan natuman diha kaninyo. Walay usa ka pulong niana ang napakyas.”—Josue 23:14.
7, 8. Unsang makaluwas nga buhat ang gihimo sa matinumanong mga Kristohanon sa unang siglo, ug ngano?
7 Sa mga 1,900 ka tuig kanhi, daghang tawong mapainubsanon ang nagpasundayag ug matuod nga pagtuo. Ilang naamgohan gikan sa katumanan sa tagna sa Bibliya nga si Jesus mao ang Mesiyas ug midawat sa iyang mga pagtulon-an. Tungod kay nakabaton ug malig-ong basehanan sa mga kamatuoran ug diha sa Hebreohanong Kasulatan, sila mituo sa gitudlo ni Jesus. Busa, sa dihang si Jesus miingon nga ang paghukom sa Diyos umaabot batok sa Judea ug Jerusalem tungod sa pagkadili-matinumanon, sila mituo kaniya. Ug sa dihang iyang gisultihan sila kon unsay ilang kinahanglang buhaton aron maluwas ang ilang mga kinabuhi, gihimo nila kana.
8 Gisultihan ni Jesus ang mga magtutuo nga sa dihang likosan ang Jerusalem sa kasundalohan, sila kinahanglang mokalagiw. Ang Romanong kasundalohan misulong gayod sa Jerusalem sa tuig 66 K.P. Apan unya ang mga Romano mibiya sa dili ikasaysay nga katarongan. Mao kadto ang signal sa mga Kristohanon sa pagbiya sa siyudad, kay si Jesus miingon: “Inigkakita ninyo sa Jerusalem nga malibotan sa nagkampong kasundalohan, nan hibaloi nga ang paghimong awaaw niya haduol na. Nan silang anaa sa Judea pakalagiwa na ngadto sa kabukiran, ug kadtong anaa sa iyang taliwala pabiyaa, ug kadtong anaa sa banikang mga dapit ayaw na pasudla ngadto kaniya.” (Lucas 21:20, 21) Kadtong adunay matuod nga pagtuo mibiya sa Jerusalem ug sa kasikbit nga lugar ug mikalagiw sa kaluwasan.
Mga Sangpotanan sa Pagkawalay-Pagtuo
9, 10. (a) Sa unsang paagi ang mga lider sa relihiyon nagpakitag kawalay-pagtuo kang Jesus? (b) Unsay misangpot sa ilang pagkawalay-pagtuo?
9 Unsay gihimo niadtong walay matuod nga pagtuo? Sila wala mokalagiw samtang diha pa silay higayon. Sila nagtuo nga ang ilang mga lider makaluwas kanila. Bisan pa, kadtong maong mga lider ug ang ilang mga sumusunod may ebidensiya usab sa pagka-Mesiyas ni Jesus. Busa nganong wala man sila motuo sa giingon ni Jesus? Tungod sa pagkadaotan sa ilang mga kasingkasing. Kini nayagyag sayosayo pa sa dihang ilang nakita nga miduol ang daghang ordinaryong mga tawo ngadto kang Jesus human nga iyang gibanhaw si Lazaro. Ang Juan 11:47, 48 nag-asoy: “Gitigom sa pangulong mga saserdote ug sa mga Fariseo ang Sanhedrin [ang Hudiyohanong hataas nga hukmanan] ug misugod sa pag-ingon: ‘Unsay atong buhaton, tungod kay kining tawhana [Jesus] nagabuhat ug daghang ilhanan? Kon pasagdan lang nato siya niining paagiha, silang tanan magabutang ug pagtuo kaniya, ug ang mga Romano manganhi ug kuhaon ang atong dapit ug ang atong nasod.’” Ang bersikulo 53 nag-ingon: “Busa sukad niadtong adlawa sila nagsabot sa pagpatay kaniya.”
10 Pagkakatingalahang milagro ang gihimo ni Jesus—pagbanhaw kang Lazaro gikan sa mga patay! Apan ang mga lider sa relihiyon nagtinguha sa pagpatay kang Jesus tungod sa paghimo niana. Ang ilang tumang pagkadaotan dugang nayagyag sa dihang “ang pangulong mga saserdote . . . nagsabot nga patyon usab si Lazaro, tungod kay gumikan kaniya daghan sa mga Judio ang nangadto ug nagbutang ug pagtuo kang Jesus.” (Juan 12:10, 11) Mao pay pagkabanhaw ni Lazaro gikan sa mga patay, ug kadtong maong mga saserdote buot nga makakita kaniya nga patay na usab! Sila wala mabalaka sa kabubut-on sa Diyos o sa kaayohan sa katawhan. Sila mga hakog, nga nabalaka sa ilang mga katungdanan ug mga kaayohan. “Ilang gihigugma ang himaya sa mga tawo nga labaw gani kay sa himaya sa Diyos.” (Juan 12:43) Apan ilang gibayran ang ilang pagkawalay-pagtuo. Sa tuig 70 K.P., ang Romanong kasundalohan mibalik ug gilaglag ang ilang dapit ug ang ilang nasod, ug daghan ang nangamatay kanila.
Pagtuo Gipasundayag sa Atong Panahon
11. Sa unang bahin niining sigloha, sa unsang paagi ang matuod nga pagtuo gipasundayag?
11 Niining sigloha, adunay daghan usab nga mga lalaki ug mga babaye sa matuod nga pagtuo. Pananglitan, balik sa unang mga tuig sa 1900, ang mga tawo sa katibuk-an nagpaabot ug usa ka malinawon, mauswagong umaabot. Sa mao gihapong panahon, kadtong nagtuo kang Jehova nagmantala nga ang katawhan hapit nang mosulod sa labing makalilisang nga panahon sa kagubot. Mao kanay gitagna sa Pulong sa Diyos diha sa Mateo kapitulo 24, 2 Timoteo kapitulo 3, ug sa ubang bahin. Ang gipanulti niadtong mga tawo sa pagtuo nahitabo gayod, sugod sa 1914 uban sa Gubat sa Kalibotan I. Ang kalibotan sa pagkatinuod misulod sa gitagnang “kataposang mga adlaw” uban sa “makuyaw nga mga panahong lisod sagubangon.” (2 Timoteo 3:1) Nganong ang mga alagad ni Jehova nahibalo sa kamatuoran bahin sa kahimtang sa kalibotan balik niadto samtang ang uban wala? Tungod kay, sama kang Josue, sila nagtuo nga walay usa ka pulong ni Jehova ang mapakyas.
12. Karong adlawa, unsang mga saad ni Jehova nga bug-os nga makasalig ang iyang mga alagad?
12 Karon, ang mga alagad ni Jehova, kinsa may pagsalig kaniya, may gidaghanon nga duolan sa sayis milyones sa tibuok-kalibotan. Sila nahibalo sumala sa ebidensiya sa katumanan sa matagnaong pulong sa Diyos nga sa dili madugay taposon na niya kining mapintas, imoral nga sistema sa mga butang. Busa sila masaligon nga ang panahon haduol na sa dihang ilang makita ang katumanan sa 1 Juan 2:17, nga nag-ingon: “Ang kalibotan mahanaw maingon man ang tinguha niini, apan siya nga nagabuhat sa kabubut-on sa Diyos magapabilin hangtod sa hangtod.” Ang iyang mga alagad bug-os nga nagsalig nga tumanon ni Jehova kining saara.
13. Sa unsang sukod nga makasalig ka kang Jehova?
13 Sa unsang sukod nga makasalig ka kang Jehova? Makatahan ka sa imong kinabuhi kaniya! Bisan pag mawad-an ka sa imong kinabuhi karon sa pag-alagad kaniya, iyang ibalik paghatag kanimo ang mas maayong kinabuhi diha sa pagkabanhaw. Si Jesus nagpasalig kanato: “Ang takna nagasingabot diin kadtong tanan nga anaa sa handomanang mga lubnganan [sa ato pa, sa panumdoman sa Diyos] makadungog sa iyang tingog ug managpanggula.” (Juan 5:28, 29) May nailhan ka bang doktor, lider sa politika, siyentipiko, negosyante, o bisan kinsang tawo nga makahimo niana? Ang ilang nangaging rekord nagpakita nga sila dili makahimo. Si Jehova makahimo, ug iyang himoon gayod kana!
Usa ka Katingalahang Umaabot Alang sa mga Matinumanon
14. Unsang katingalahang umaabot ang gisaad sa Pulong sa Diyos ngadto sa mga matinumanon?
14 Gipakita ni Jesus ang pagkatino sa usa ka bag-ong kalibotan ilalom sa langitnong Gingharian sa Diyos, nga nag-ingon: “Malipayon ang mga malumog-buot, sanglit magapanunod sila sa yuta.” (Mateo 5:5) Kana dugang nagpalig-on sa saad sa Diyos nga makita diha sa Salmo 37:29: “Ang mga matarong magapanunod sa yuta, ug sila magapuyo diha niana sa walay kataposan.” Ug sa hapit nang mamatay si Jesus sa dihang usa ka mamumuhat ug daotan nagpadayag ug pagtuo kaniya, si Jesus miingon sa maong tawo: “Ikaw magauban kanako sa Paraiso.” (Lucas 23:43) Oo, ingong Hari sa Gingharian sa Diyos, tinoon ni Jesus nga kining tawhana mabanhaw sa kinabuhi dinhi sa yuta nga may higayon nga mabuhi sa walay kataposan niana nga Paraiso. Karon, kadtong may pagsalig sa Gingharian ni Jehova makapaabot usab sa pagkinabuhi sa Paraiso sa dihang “pahiran [sa Diyos] ang matag luha sa ilang mga mata, ug wala na unyay kamatayon, ni pagbangutan ni pagtiyabaw ni may kasakit pa.”—Pinadayag 21:4.
15, 16. Nganong malinawon kaayo ang kinabuhi diha sa bag-ong kalibotan?
15 Atong buhion diha sa atong mga hunahuna kanang bag-ong kalibotan. Handurawa nga kita nagkinabuhi na diha niana. Dihadiha, ato dayong makita bisan asa ang malipayong mga tawo nga nag-ipon pagpuyo diha sa bug-os nga pakigdait. Ilang ginatagamtam ang mga kahimtang nga susama sa gibatbat sa Isaias 14:7: “Ang tibuok yuta nagmalinawon, nga walay kagubot. Nagmangayaon ang mga tawo nga nanghugyaw sa kalipay.” Nganong ingon sila niana? Una, matikdi nga ang mga pultahan sa mga balay walay mga kandado. Wala na sila magkinahanglan niini, sanglit wala nay krimen o kapintasan. Sama gayod kini sa giingon sa Pulong sa Diyos: “Sila manglingkod, ang matag usa ilalom sa iyang paras ug ilalom sa iyang kahoyng igos, ug walay usa ang maghadlok kanila.”—Miqueas 4:4.
16 Wala na usay gubat, kay niining bag-ong kalibotan, ang gubat gidili. Ang tanang hinagiban gipanghimong mga galamiton sa pakigdait. Sa bug-os nga diwa, ang Isaias 2:4 natuman: “Ang ilang mga espada ilang himoon nga mga punta sa daro ug ang ilang mga bangkaw himoon nga mga galab. Usa ka nasod dili na mobakyaw ug espada batok sa laing nasod, ni makakat-on pa sila ug gubat.” Apan, mao kanay atong gipaabot! Ngano? Tungod kay daghang molupyo sa bag-ong kalibotan ang nakakat-on sa pagbuhat niana samtang nag-alagad sa Diyos diha sa karaang kalibotan.
17. Unsang mga kahimtang sa kinabuhi ang maglungtad ilalom sa Gingharian sa Diyos?
17 Lain pang butang nga imong makita mao nga wala nay kakabos. Wala nay nagpuyo diha sa hugawng mga barongbarong o nagkagidlay o walay mga balay. Ang tanan adunay hamugawayng mga balay ug maayong pagkaareglar nga kabtangan nga may maanindot nga mga kakahoyan ug kabulakan. (Isaias 35:1, 2; 65:21, 22; Ezequiel 34:27) Ug wala nay kagutom tungod kay ang Diyos nagtuman sa iyang saad nga adunay abundang pagkaon alang sa tanan: “Aduna unyay dagayang lugas sa yuta; sa tumoy sa kabukiran aduna unyay pag-awas.” (Salmo 72:16) Sa pagkatinuod, ilalom sa paggiya sa Gingharian sa Diyos, usa ka mahimayaong paraiso ipasangkad sa tibuok yuta, ingon sa gimbut-an sa Diyos balik sa Eden.—Genesis 2:8.
18. Diha sa bag-ong kalibotan, unsang mga butanga ang dili na makahatag ug kadaot sa mga tawo?
18 Matingala ka usab sa baskog nga panglawas sa tanan. Tungod kini kay sila karon adunay hingpit nga mga lawas ug mga hunahuna. Wala nay balatian, kasakit, o kamatayon. Walay usa ang anaa sa wheelchair o katre sa ospital. Kanang tanan nahanaw na sa dayon. (Isaias 33:24; 35:5, 6) Ngani, wala nay mga hayop nga makuyaw, tungod kay sila gihimong makigdaiton pinaagi sa gahom sa Diyos!—Isaias 11:6-8; 65:25; Ezequiel 34:25.
19. Nganong ang matag adlaw diha sa bag-ong kalibotan maoy usa nga “tuman nga makapalipay”?
19 Pagkakatingalahang sibilisasyon ang ginatukod sa matinumanong mga molupyo niining bag-ong kalibotan! Ang ilang mga kusog ug mga kahanas ug ang bahandi sa yuta gigamit sa maayong mga tumong, dili makapadaot; sa pagtabang sa uban, dili sa pagpakig-indig kanila. Ug ang tanan nga imong ikahibalag maoy tawo nga imong masaligan tungod kay, sama sa gisaad sa Diyos, ang tanan maoy “mga tawo nga gitudloan ni Jehova.” (Isaias 54:13) Sanglit ang tanan gigamhan sa mga balaod sa Diyos, ang yuta “mapuno sa kahibalo ni Jehova maingon sa mga tubig nga nagatabon sa dagat.” (Isaias 11:9) Sa pagkatinuod, ang matag adlaw niining bag-ong kalibotan mahisama sa giingon sa Salmo 37:11, nga “tuman nga makapalipay.”
Usa ka Malipayong Umaabot Segurado
20. Unsay atong kinahanglang himoon aron makatagamtam ug malinawong umaabot?
20 Unsay atong kinahanglang buhaton aron mahimong bahin nianang malipayong umaabot? Ang Isaias 55:6 nagtug-an kanato: “Pangitaa ninyo si Jehova samtang siya makaplagan pa. Sangpita siya samtang siya anaa pa sa duol.” Ug samtang kita mangita, ang atong tinamdan angay mahisama sa gibatbat sa Salmo 143:10: “Tudloi ako sa pagtuman sa imong kabubut-on, kay ikaw mao ang akong Diyos.” Kadtong nagahimo niini makalakaw nga walay ikasaway atubangan kang Jehova latas niining kataposang mga adlaw ug makalaom ug usa ka maayong umaabot. “Bantayi ang tawong matarong ug tan-awa ang tawong matul-id, kay ang umaabot nianang tawhana malinawon. Apan ang mga malapason dungan nga pagalaglagon gayod; ang umaabot sa mga tawong daotan pagaputlon gayod.”—Salmo 37:37, 38.
21, 22. Unsay ginatukod sa Diyos karon, ug sa unsang paagi ginahimo ang pagbansay?
21 Karon mismo si Jehova nanawag gikan sa tanang nasod niadtong nagtinguha sa pagtuman sa iyang kabubut-on. Iyang himoon sila nga pundasyon sa iyang bag-ong yutan-ong katilingban, ingon sa gitagna sa Bibliya: “Sa kataposang bahin sa mga adlaw [ang panahon nga atong gikinabuhian karon] . . . daghang katawhan manungas ug manag-ingon: ‘Umari kamo, ug manungas kita sa bukid ni Jehova [ang iyang nabayaw nga matuod nga pagsimba] . . . Kita pagatudloan niya sa iyang mga dalan, ug manglakat kita sa iyang mga alagianan.’”—Isaias 2:2, 3.
22 Ang Pinadayag 7:9 naghubit kanila ingong “usa ka dakong panon . . . gikan sa tanang kanasoran ug mga tribo ug katawhan ug mga dila.” Ang bersikulo 14 nag-ingon: “Mao kini sila ang nanagpakagawas gikan sa dakong kasakitan,” nga nakalabang-buhi sa kataposan sa presenteng sistema. Kini nga pundasyon alang sa bag-ong kalibotan karon maoy duolan na sa unom ka milyon, uban sa daghang bag-ohan nga nangahimong bahin niana matag tuig. Kining tanang matinumanong mga alagad ni Jehova ginabansay na alang sa kinabuhi diha sa iyang bag-ong kalibotan. Sila nagpakakat-on sa espirituwal ug uban pang mga kahanas nga gikinahanglan sa pagbag-o niining yutaa nga usa ka paraiso. Ug sila bug-os nga nagsalig nga ang Paraiso mahimong tinuod tungod kay “kasaligan siya nga misaad.”—Hebreohanon 10:23.
Mga Punto Agig Repaso
◻ Unsay misangpot tungod sa pagkawalay-pagtuo niadtong unang siglo?
◻ Sa unsang sukod nga ang mga alagad sa Diyos makasalig kaniya?
◻ Unsang umaabot ang naghulat sa mga matinumanon?
◻ Unsay atong kinahanglang himoon aron matino ang usa ka malipayong umaabot alang sa atong kaugalingon diha sa bag-ong kalibotan sa Diyos?
[Hulagway sa panid 18]
Karon mismo si Jehova nagtukod sa pundasyon sa usa ka bag-ong yutan-ong katilingban