Nganong Namiya Sila sa Relihiyon?
SA TUNGATUNGA sa ika-19ng siglo, dili gayod madungog sa usa ka molupyo sa Prussia (karon amihanang Alemanya) ang pag-ingon nga siya walay gianibang partikular nga relihiyon. Sa pagkamatuod, ang pagbalhin lang gikan sa pangunang relihiyon ngadto sa usa ka lahi nga relihiyon magpailalom kaniya nga panid-an sa mga polis. Pagkadako na kaayo sa kausaban sa panahon!
Karon, daghang Aleman nangluwat sa mga simbahan. Gikataho, 1 sa 4 nangangkon nga walay gianibang relihiyon. Ang samang kiling makita sa Austria ug Switzerland. Kon ang pagkamembro mao ang dugo-sa-kinabuhi sa usa ka relihiyon, nan, ingon sa pagkapahayag niana sa Alemang magsusulat nga si Reimer Gronemeyer, “ang mga simbahan sa Uropa nagkadugo hangtod sa kamatayon.”
Kon Nganong Sila Mibulag sa Relihiyon
Nganong daghan ang mibulag sa organisadong relihiyon? Kasagaran, alang sa pinansiyal nga mga katarongan, ilabina diha sa kayutaan diin ang mga membro kinahanglang mobayad ug buhis sa simbahan. Daghan ang nangutana, ‘Nganong ang akong gihagoan pag-ayong salapi ientrigo sa simbahan?’ Ang uban gilainan sa dakong bahandi ug gahom sa simbahan. Lagmit mouyon sila kang Kardinal Joachim Meisner sa Cologne, Alemanya, kinsa miingon nga ang bahandi sa simbahan tingali maoy nag-agak niini sa paghatag ug sobrang pagtagad sa materyal nga mga butang ug “kulang sa paghatag ug seryosong pagtagad sa pagtuo diha kang Kristo.”
Ang uban namiya sa ilang simbahan tungod kay ilang nakita kini nga makalaay, dili-makaiikag, nga dili makahatag ug katagbawan sa ilang espirituwal nga kagutom. Nag-antos sila sa kagutom nga gitagna ni manalagnang Amos, “usa ka kagutom, dili sa tinapay, ug kauhaw, dili sa tubig, kondili sa pagkadungog sa mga pulong ni Jehova.” (Amos 8:11) Sanglit diyutayng pagkaon lamang ang ilang madawat gikan sa ilang relihiyon, sila namiya niini.
Samtang ang mga problemang ginaatubang maoy tinuod, husto bang pagsanong ang pagbiya sa tanang relihiyon? Handurawa ang usa ka tawong gigutom kinsa nakakita nianang usa ka butang nga morag tinapayng tan-awon. Apan, sa dihang iyang gisulayan kini ug kaon, iyang nakaplagan nga hinimo kini sa ginabas. Mohunong ba siya sa paghunahuna sa pagkaon ug sa pagtagbaw sa iyang kagutom? Dili, mangita siya ug usa ka tinuod nga pagkaon. Sa susama, kon ang usa ka relihiyon wala makatagbaw sa espirituwal nga kagutom sa mga membro niini, motalikod na lang ba diay siya sa relihiyon? O mas maalamon bang mangita sila ug paagi nga matagbaw ang ilang espirituwal nga kagutom? Mao kanay gihimo sa daghan, ingon sa ipakita sa sunod nga artikulo.