Gituohan ba sa Tanang Klerigo ang Ilang Ginatudlo?

MAO pay pagkamatay sa bana sa babaye. Ang pari nagpatin-aw nga dili igo ang kamaayo sa iyang bana aron direktang mosaka sa langit ni igo ang kadaotan aron itugyan sa kalayo sa impiyerno. Busa, sumala sa pari, nag-antos siya ug silot hangtod makuwalipikar siya alang sa langit. Gibayran niya ang pari nga mag-ampo aron mapagawas dayon ang iyang bana gikan sa purgatoryo. Kontento na ang balo niini, nga mibating nagtuo usab ang pari sa iyang sinserong mga tinuohan.

Nagtuo ka bang mobatig kapakyasan ang balo kon masayran niya nga ang pari wala gayod magtuo sa silot human sa kamatayon? Daghan ang nahasol sa pagkahibalo nga daghang klerigo ang wala magtuo sa kadaghanan sa ila mismong ginatudlo. Ang National Catholic Reporter, nga nagtagad sa gitawag niining “mas lalom nga suliran sa klero kay sa seksuwal nga kahiwian,” nag-ingon: “Taliwala sa klero sa kinatibuk-an, dunay daghan nga wala na magtuo sa paglungtad sa Diyos o sa doktrina sa mga ganti ug mga silot o sa pagkabanhaw . . . nga ang kultura sa klero naghupot niining kawalay-pagtuo ingong bahin sa impluwensiya niini, nga samag gabon.”

Ang ubang iglesya nag-atubang sa susamang suliran. Ang usa ka surbi sa mga bikaryo sa Church of England nagpadayag nga daghan ang “dili motuo sa paninugdang mga bahin sa tradisyonal nga Kristohanong pagtuo sama sa pagpanganak sa ulay, sa mga milagro ni Jesus ug sa ikaduhang pag-abot sa mesiyas,” nagtaho ang Canberra Times sa Australia.

Ang magsusulat sa relihiyon nga si George R. Plagenz nangutana maylabot sa usa ka ministro kon giunsa niya, uban ang maayong tanlag, pagyamyam ug usa ka kredo nga wala niya mismo gituohan. Ang usa ka ministro miingon nga iya lamang gipulihan ang pang-abling mga pulong sa kredo nga, “Mituo ako.” Matod niya: “Sugdan nako ang kredo sa pag-ingon, ‘Mituo SILA sa Diyos nga Amahang Labing Gamhanan . . .’” Gitawag ni Plagenz ang maong pagkasalingkapaw nga “kinadak-ang pagpangilad sa nasod.”

Ikasubo, ang maong kawalay-pagtuo ug pagkasalingkapaw sa klero nagpabatig kapakyasan sa daghang tawo maylabot sa relihiyon sa kinatibuk-an. Apan dili lamang kana ang makapahasol nga bahin sa relihiyon karong adlawa. Ang kadaghanang tigsimba gitudloan nga ang Bibliya maoy Pulong sa Diyos. Mahibulong kaha sila sa pagkasayod nga pipila sa dugay nang gidawat nga mga doktrina sa simbahan wala itudlo sa Bibliya? Ang mosunod nga artikulo magtagad sa usa ka pananglitan.