Ilang Gituman ang Kabubut-on ni Jehova

Migugol ug Panahon si Jesus Uban sa mga Bata

ANG tulo-ka-tuig-ug-tunga nga ministeryo ni Jesus talitapos na. Sa dili madugay siya mosulod sa Jerusalem ug mag-antos sa masakit nga kamatayon. Nasayod siya kaayo kon unsay mahitabo sa unahan, kay iyang gisultihan ang iyang mga sumusunod: “Ang Anak sa tawo igatugyan ngadto sa mga kamot sa mga tawo, ug sila magpatay kaniya.”​—Marcos 9:31.

Dayag, buot ni Jesus nga pahimuslan pag-ayo ang matag adlaw, matag oras, matag gutlo nga nahibilin. Nagkinahanglan pa ug pagtagad ang iyang mga tinun-an. Nakita ni Jesus nga gikinahanglan pa nila ang kusganong tambag mahitungod sa panginahanglan sa pagkamapainubsanon ug ang anaa kanunayng kapeligrohan sa pagkapangdol. (Marcos 9:​35-37, 42-48) Gikinahanglan usab nila ang instruksiyon bahin sa kaminyoon, pagdiborsiyo, ug pagkadili-minyo. (Mateo 19:​3-12) Kay nahibalo nga sa dili madugay siya mamatay, sa walay duhaduha nakigsulti si Jesus sa iyang mga tinun-an sa matin-aw ug uban ang pagbati sa pagkadinalian. Hinungdanon ang panahon​—usa ka kamatuoran nga naghimo sa sunod nga gibuhat ni Jesus nga labi pang talagsaon.

Giabiabi ni Jesus ang mga Bata

Ang asoy sa Bibliya nag-ingon: “Ang mga tawo misugod pagdala ngadto kaniya ug mga bata aron ipahikap kini sila kaniya.” Sa dihang nakita sa mga tinun-an kini, dihadiha ilang gipatugbaw ang ilang pagsupak. Tingali nangatarongan sila nga si Jesus hilabihan ka importante o hilabihan ka puliki sa paghatag ug pagtagad sa kabataan. Nan, handurawa ang kakurat sa mga tinun-an sa dihang si Jesus nasuko kanila! “Pasagdi ang mga bata nga moduol kanako,” iyang gisultihan sila. “Ayaw sila pagpugngi, kay ang gingharian sa Diyos ilaha sa mga ingon kanila.” Unya midugang si Jesus: “Sa pagkamatuod ako magaingon kaninyo, Bisan kinsa nga dili modawat sa gingharian sa Diyos sama sa usa ka bata dili gayod makasulod ngadto niini.”​—Marcos 10:​13-15.

Nakita ni Jesus ang dalayegong mga hiyas sa mga bata. Kasagarang sila masukitsukiton ug masaligon. Dawaton nila ang mga pulong sa ilang mga ginikanan ug panalipdan pa gani sila atubangan sa ubang mga bata. Ang ilang madinawaton, matudloan nga kinaiya maoy takos pagasundogon sa tanang nagtinguha sa pagsulod sa Gingharian sa Diyos. Sama sa giingon ni Jesus, “ang gingharian sa Diyos ilaha sa mga ingon kanila.”​—Itandi ang Mateo 18:​1-5.

Apan wala lamang gamita ni Jesus kining mga bataa alang sa ilustrasyon. Gipatin-aw sa asoy nga si Jesus tinuod gayod nga malipay nga mahiuban kanila. Nagtaho si Marcos nga si Jesus ‘mikugos sa mga bata ug misugod sa pagpanalangin kanila, nga nagpatong sa iyang mga kamot diha kanila.’ (Marcos 10:16) Ang asoy lamang ni Marcos ang nagtaho sa mainitong detalye nga si Jesus ‘mikugos sa mga bata.’a Busa milabaw si Jesus sa mga pagdahom sa mga hingkod, nga nagdala niining mga bataa ngadto kang Jesus nga basin iyang “hikapon” lamang sila.

Unsay kahulogan sa ‘pagpatong sa mga kamot’ ni Jesus diha sa mga bata? Walay gisugyot dinhi nga usa ka relihiyosong seremonyas, sama sa bawtismo. Samtang sa ubang mga okasyon, ang pagpatong sa mga kamot nagpasabot ug pagtuga ug usa ka buluhaton, diha sa ubang mga okasyon kini nagkahulogan lamang sa paghatag ug panalangin. (Genesis 48:​14; Buhat 6:6) Busa lagmit si Jesus yanong nagpanalangin sa mga bata.

Sa bisan unsang hitabo, gigamit ni Marcos ang usa ka mas kusganong pulong alang sa “panalangin” (ka·teu·lo·geʹo), nga nagpaila ug kusganong puwersa. Nagsugyot kini nga gipanalanginan ni Jesus ang mga bata nga masinaboton, mabination, ug mainiton. Dayag, wala niya lantawa ang mga bata ingong usa ka makahurot-ug-panahon nga palas-anon.

Leksiyon Alang Kanato

Ang paagi sa pagpakiglabot ni Jesus sa mga bata ug sa mga hingkod maoy dili makapahadlok ni makapaubos. “Dali siyang mopahiyom ug mokatawa nga mangayaon,” nag-ingon ang usa ka reperensiyang basahon. Dili ikatingala nga ang mga tawo sa bisan unsang pangedaron mibating komportable kauban niya. Namalandong sa panig-ingnan ni Jesus, kita makasukna sa atong kaugalingon, ‘Mibati ba ang uban nga ako daling maduol?’ ‘Puliki ra ba ako kaayo aron mabalda sa mga buluhaton ug mga suliran sa uban?’ Ang pag-ugmad ug usa ka sinserong interes sa mga tawo mopalihok kanato sa paghatag sa atong kaugalingon, sama sa gibuhat ni Jesus. Mamatikdan sa uban ang atong tiunay nga interes ug madani kanato.​—Proverbio 11:25.

Ingon sa gipakita sa asoy ni Marcos, nalingaw si Jesus uban sa mga bata. Lagmit, migahin siyag panahon sa pagpaniid kanila nga nagdula, kay gihisgotan niya ang ilang mga dula diha sa usa sa iyang mga ilustrasyon. (Mateo 11:​16-19) Tingali ang ubang mga bata nga gipanalanginan ni Jesus maoy bata pa kaayo sa pagsabot kon kinsa siya ug kon unsay iyang gitudlo. Apan wala kini magpabati kaniya nga nag-usik-usik siya sa iyang panahon. Migugol siyag panahon uban sa mga bata tungod kay gihigugma niya sila. Lagmit, daghan sa mga bata nga nahibalag ni Jesus panahon sa iyang ministeryo natukmod sa ulahi sa pagsanong sa iyang gugma pinaagi sa pagkahimong iyang mga tinun-an.

Kon si Jesus migugol ug panahon uban sa mga bata sulod sa kritikal nga kataposang mga semana sa iyang kinabuhi, sa walay duhaduha makagahin kitag panahon alang kanila diha sa atong puliking eskedyul. Angay kitang magmahunahunaon ilabina niadtong adunay espesyal nga mga panginahanglan, sama sa walay-amahan nga mga batang lalaki ug babaye. Sa pagkatinuod, ang tanang bata mouswag sa dihang sila hatagan ug pagtagad, ug maoy tinguha ni Jehova nga hatagan nato sila sa tanang gugma ug tabang nga atong mahimo.​—Salmo 10:14.

[Mga footnote]