Duna Ka bay Manulonda nga Magbalantay?
NAGTUO ka ba nga duna kay manulonda nga magbalantay? Daghang tawo naghunahuna nga sila dunay manulonda nga magbalantay. Mahitungod nianang butanga, usa ka babaye sa kasadpang Canada gikaingon nga dunay linaing gasa nga naglangkit sa mga manulonda. Kon hatagan mo siya sa imong kompletong ngalan lakip ang $200, siya nangangkon nga ipahinabo niyang makontak nimo ang imong manulonda nga magbalantay. Una, mamalandong siya pinaagi sa pagtutok sa siga sa kandila. Sunod, duna siyay panan-awon nga niana ang imong manulonda maghatag kaniya ug mensahe nga ipasa kanimo. Ingong pakapin, ang babaye maghatag ug usa ka dibuho sa hitsura sa imong manulonda.
Alang sa pipila, daw susama kini sa sugilanon mahitungod sa Pranses nga Haring Louis IX. Gituohan nga mipalit siya ug mahalon kaayong mga balhibo nga gikaingong nahulog gikan sa mga pako sa Arkanghel nga si Miguel. Bisan tuod nagduhaduha sa maong sugilanon, daghan ang wala gayod magduhaduha sa mga pangangkon sa Canadiana.
Pagkadani sa mga Manulonda
Sa di pa dugayng katuigan dunay dakong kaikag sa mga manulonda. Diha sa telebisyon ug sa mga salida sa sine, mga libro, mga magasin, ug gagmayng mga mantalaan, gisuginlan kita mahitungod sa mga manulonda nga mohupay niadtong grabeng nasakit, molipay sa mga nagbangotan, mohatag ug kaalam, ug mosakmit sa mga tawo gikan sa kamatayon. Sa Tinipong Bansa, mga 20 ka milyong tawo ang nagatan-aw sa usa ka senemana nga seryal sa telebisyon nga naghulagway sa pagsalga sa mga manulonda sa kinabuhi sa mga tawo. Usa ka tindahan ug libro naglista ug kapin sa 400 ka libro nga naghisgot lamang sa mga manulonda.
Usa ka bag-ohay pang libro nag-asoy ug mga eksperyensiya kon sa unsang paagi ang mga manulonda nga magbalantay nakaluwas sa kinabuhi sa mga sundalo nga nakiggubat. Ang mga sticker diha sa dulong sa awto nag-ingon nga ang mga drayber gipanalipdan sa mga manulonda nga magbalantay. Ang mga organisasyon, mga komperensiya, ug mga seminar nagpasiugda sa pagtuon bahin sa mga manulonda ug gikaingon nga motabang sa mga tawo sa pagpakigsulti kanila.
Si Eileen Freeman mao ang magsusulat sa tulo ka libro mahitungod sa mga manulonda ug ang magpapatik sa usa ka magasin nga naghisgot lamang kanila. Siya nag-angkon: “Ako nagtuo nga alang sa matag manulonda sa langit dunay usa ka manulonda nga magbalantay dinhi sa Yuta, usa ka linalang kansang mga katungdanan dili lamang mao ang pagdayeg sa Diyos didto sa langitnong dapit kondili ang aktuwal nga pag-atiman sa mga tawo ug ubang matang sa kinabuhi dinhi sa Yuta. Ang usa ka manulonda nga magbalantay giasayn sa matag usa kanato sa dihang kita gisamkon ug nagbantay kanato latas sa atong pagtubo diha sa tagoangkan, latas sa atong pagkatawo, latas sa atong kinabuhi niining kalibotana, hangtod nga ang manulonda mogiya kanato gikan sa mga utlanan niining kalibotana ngadto sa himaya sa langit.” Kini naghubit pag-ayo sa popular nga panglantaw bahin sa mga manulonda nga magbalantay.
Niining pit-os ug malisod nga kapanahonan, makapahupay ang pagtuo nga duna kitay kaugalingong manulonda nga magbalantay, kansang katungdanan mao ang pagpanalipod kanato. Unsay giingon sa Pulong sa Diyos, ang Bibliya, bahin niini? Sulayan ba gayod nato sa pagkontak ang mga manulonda? May kaikag ba sila sa atong moral nga mga sukdanan ug relihiyosong mga tinuohan? Unsang tabang ang atong madahom gikan kanila? Kining mga pangutanaha tubagon sa sunod nga artikulo.