Kon sa Unsang Paagi ang mga Manulonda Makatabang Kanimo
ANG Pulong sa Diyos nagpamatuod sa paglungtad sa mga manulonda. Kini nagtug-an kanato nga dunay minilyon niining espiritung mga linalang. Ang alagad ni Jehova nga Diyos nga si Daniel may panan-awon sa langitnong mga butang nga mahitungod niana siya misulat: “Dihay usa ka libo ka mga libo nga nanag-alagad [sa Diyos], ug napulo ka libo ka napulo ka libo nga nanagtindog sa iyang atubangan.”—Daniel 7:10.
Matikdi nga ang pahayag ni Daniel naghatag kanato ug dugang impormasyon mahitungod sa mga manulonda kay sa ilang gidaghanon lamang. Nagpakita usab kini nga ang mga manulonda nag-alagad sa Diyos. Sila maoy iyang mga alagad. Kaharmonya niini, ang salmista miawit: “Dayegon ninyo si Jehova, Oh kamong mga manulonda niya, gamhanan sa kalig-on, nga nanagtuman sa iyang pulong, pinaagi sa pagpatalinghog sa tingog sa iyang pulong. Dayega si Jehova, kamong tanang mga panon niya, kamong mga alagad niya, nga nanagbuhat sa iyang kabubut-on.”—Salmo 103:20, 21.
Ang Bibliya nagsaysay usab nga ang mga manulonda wala magsugod sa ilang mga kinabuhi ingong mga tawo dinhi sa yuta. Gilalang ni Jehova ang mga manulonda sa langit bisan sa wala pa niya lalanga ang yuta. Sa dihang ang Diyos ‘nagpahiluna sa mga patukoranan sa yuta, ang tanang manulondang anak sa Diyos naninggit sa pagdayeg.’—Job 38:4-7.
Ang mga manulonda maoy espiritung mga linalang—dili-makita, gamhanan, intelihente. Sa Bibliya, ang Hebreohanong pulong nga mal·ʼakhʹ ug ang Gregong termino nga agʹge·los gihubad ug “manulonda” sa dihang gipasabot ang usa ka espiritung linalang. Kining mga pulonga makita duolan sa 400 ka beses diha sa Bibliya. Kanang duha parehog kahulogan, nga mao, “mensahero.”
Mga Paghibalag ug Manulonda
Ang mga manulonda tinuod gayod nga mga mensahero. Nasinati ka tingali sa asoy sa Bibliya mahitungod sa panahon sa dihang ang manulondang si Gabriel nagpakita kang Maria. Giingnan niya siya nga bisan tuod siya usa ka ulay, magsamkon siya ug usa ka anak nga lalaki nga paganganlag Jesus. (Lucas 1:26-33) Usa ka manulonda ang nagpakita usab sa pipila ka magbalantay nga diha sa uma. Siya nagpahibalo: “May natawo kaninyo karong adlawa nga usa ka Manluluwas, kinsa maoy Kristo nga Ginoo.” (Lucas 2:8-11) Sa susama, ang mga manulonda naghatod ug mga mensahe ngadto kang Hagar, Abraham, Lot, Jacob, Moises, Gideon, Jesus, ug uban pa nga gisulat diha sa Bibliya.—Genesis 16:7-12; 18:1-5, 10; 19:1-3; 32:24-30; Exodo 3:1, 2; Maghuhukom 6:11-22; Lucas 22:39-43; Hebreohanon 13:2.
Takos tagdon nga kining tanang mensahe nga gihatod sa mga manulonda kaharmonya sa pagpatuman sa mga katuyoan sa Diyos ug dili katuyoan niadtong mga tawo nga nalangkit. Ang mga manulonda nagpakita ingong mga hawas sa Diyos, sumala sa iyang kabubut-on ug gitakdang panahon. Ang mga tawo wala magtawag kanila.
Kinahanglan ba Kitang Motawag sa mga Manulonda Alang sa Tabang?
Angayan ba ang pagtawag sa mga manulonda sa mga panahon sa kalisod? Kon mao, buot natong mahibaloan ang ngalan sa manulonda nga labing makaarang sa pagtabang kanato. Tungod niini, ang pipila ka komersiyal nga mga basahon naglista sa gituohang mga ngalan sa daghang manulonda, duyog sa ilang ranggo, mga titulo, ug mga katungdanan. Usa ka libro naglista sa gitawag niini nga “pangunang napulo sa langit,” ang “labing-iladong mga manulonda sa Kasadpang kalibotan.” Duyog sa lista dunay tambag sa pagpiyong sa imong mga mata, pagsulti sa ngalan sa manulonda nga hinayhinay sa makadaghan, pagginhawag lawom, pagginhawag hinay, ug “pag-andam sa imong kaugalingon sa posibleng pakigkontak kanila.”
Sa kasukwahi, ang Bibliya naghatag kanato sa mga ngalan sa duha lamang sa matinumanong mga manulonda sa Diyos, si Miguel ug si Gabriel. (Daniel 12:1; Lucas 1:26) Posible, ang katarongan sa paghatag niining mga ngalana mao ang pagpakita nga ang matag manulonda maoy talagsaon nga espiritung persona nga dunay ngalan, dili lamang usa ka walay personang enerhiya o puwersa.
Takos tagdon nga ang pipila ka manulonda wala magpahibalo sa ilang mga ngalan ngadto sa mga tawo. Sa dihang si Jacob mihangyo sa usa ka manulonda sa pagbutyag sa iyang ngalan, wala niya kana ibutyag. (Genesis 32:29) Sa dihang gihangyo sa pagpaila sa iyang kaugalingon, ang manulonda nga miduol kang Josue miingon lamang nga siya mao ang “prinsipe sa panon ni Jehova.” (Josue 5:14) Sa dihang ang mga ginikanan ni Samson nangutana sa usa ka manulonda sa iyang ngalan, siya miingon: “Nganong nangutana ka sa akong ngalan, sa dihang kini kahibulongan?” (Maghuhukom 13:17, 18) Sa dili pagtagana sa listahan sa mga ngalan sa mga manulonda, ang Bibliya nanalipod kanato gikan sa paghatag sa mga manulonda ug dili-angayang pasidungog ug pagsimba. Sa ato unyang masabtan, wala usab kini magsugo kanato sa pagpangamuyo kanila.
Pagsangpit sa Diyos
Ang Bibliya nagtug-an kanato sa tanang kinahanglang mahibaloan nato mahitungod sa mga kalihokan sa mga manulonda diha sa espiritung dominyo. Si apostol Pablo misulat: “Ang tibuok Kasulatan inspirado sa Diyos ug mapuslanon sa pagpanudlo . . . aron nga ang tawo sa Diyos mahimong bug-os makasarang, kompleto nga masinangkapan alang sa tanang maayong buhat.” (2 Timoteo 3:16, 17) Kon buot sa Diyos nga mahibaloan nato ang mga ngalan sa daghang manulonda, gipadayag unta niya kini diha sa iyang Pulong, ang Bibliya. Ug kon ang Diyos nagtinguha sa pagpahibalo kanato kon unsaon pagkontak ang mga manulonda ug pagpakigsulti kanila diha sa pag-ampo, gitagana unta niya kanang impormasyona diha sa Kasulatan.
Hinunoa, si Jesu-Kristo nagtudlo: “Sa dihang mag-ampo ka, sulod sa imong kaugalingong lawak ug, human masirhi ang imong pultahan, pag-ampo sa imong Amahan nga anaa sa tago . . . Busa, kinahanglang mag-ampo kamo niining paagiha: ‘Amahan namo sa mga langit, balaana ang imong ngalan.’” (Mateo 6:6, 9) Ang Kasulatanhong panglantaw mao kini: Dili kita motawag sa mga manulonda o moampo kanila, kondili kinahanglang sa kamainampoon moduol kita sa Maglalalang sa mga manulonda, ang Diyos mismo. Ang iyang ngalan dili usa ka misteryo, ug dili na kinahanglan nga ipadayag kini sa usa ka tawo sa panan-awon. Bisan tuod gihimo ang mga paningkamot sa pagtago sa balaang ngalan, makita kini diha sa talaan sa Bibliya ug kapin sa 7,000 ka beses. Pananglitan, mahitungod sa langitnong Amahan nga miawit ang salmista: “Ikaw, kansang ngalan mao si Jehova, ikaw lamang ang Labing Hataas sa tibuok yuta.”—Salmo 83:18.
Si Jehova dili gayod puliki kaayo nga dili na maminaw kanato kon kita moduol kaniya sa hustong paagi diha sa pag-ampo. Ang Bibliya naghatag niini nga pasalig: “Mahitungod kang Jehova, ang iyang mga mata nagangadto-nganhi sa tibuok yuta aron sa pagpakita sa iyang kusog alang niadtong kansang kasingkasing bug-os ngadto kaniya.”—2 Cronicas 16:9.
Mga Manulonda ug mga Pamatasan
Kasukwahi sa kanunayng ihulagway diha sa palaumagian sa balita, ang mga manulonda dili mohukom sa mga tawo. Haom kana, tungod kay ang mga manulonda wala awtorisahi sa paghukom sa mga tawo. Si Jehova mao “ang Maghuhukom sa tanan,” bisan tuod “iyang gipiyal ang tanang pagpanghukom ngadto sa iyang Anak,” si Jesu-Kristo. (Hebreohanon 12:23; Juan 5:22) Bisan pa niana, sayop ang paghunahuna nga ang mga manulonda dili-manumbaling kon sa unsang paagi kita nagkinabuhi. Si Jesus miingon: “Motugbaw ang kalipay taliwala sa mga anghel sa Diyos tungod sa usa ka makasasala nga maghinulsol.”—Lucas 15:10.
Apan, ang mga manulonda wala maghinan-aw lamang. Sa kanhing kapanahonan, nag-alagad sila ingong mga tigpatay, nga nagtuman sa mga paghukom sa Diyos. Pananglitan, ang Diyos migamit ug mga manulonda batok sa karaang mga Ehiptohanon. Sumala sa Salmo 78:49, “iyang gipadala sa ibabaw nila ang iyang nagdilaab nga kasuko, kaligutgot ug pagsaway ug kagul-anan, mga panon sa mga manulonda nga nagpahinabog kalamidad.” Sa susama, ang Bibliya nagtaho nga sa usa ka gabii ang usa ka manulonda naglaglag sa 185,000 ka Asiryanhong kasundalohan.—2 Hari 19:35.
Sa susama, sa umaabot, ang mga manulonda maglaglag niadtong tungod sa dili-pagsunod sa matarong nga mga sukdanan sa Diyos nagpameligro sa kaayohan sa uban. Si Jesus moabot “uban sa iyang gamhanang mga anghel sa nagadilaab nga kalayo, sa dihang siya magapanimalos kanilang wala makaila sa Diyos ug kanilang wala mosunod sa maayong balita.”—2 Tesalonica 1:7, 8.
Busa ang Kasulatan nagpakita nga ang matinumanong mga manulonda sa Diyos kanunayng mobuhat sa iyang kabubut-on pinaagi sa pagtuman sa iyang mga sugo ug pagpaluyo sa iyang matarong nga mga sukdanan. Tataw, kon buot nato nga tabangan kita sa mga manulonda sa Diyos, kinahanglang mahibalo kita kon unsa ang kabubut-on sa Diyos ug maningkamot pag-ayo sa pagtuman niana.
Mga Manulonda nga Magbalantay
Ang mga manulonda ba nagtagad sa mga tawo ug nanalipod kanila? Si apostol Pablo nangutana: “Dili ba silang [mga manulonda] tanan mga espiritu alang sa publikong pag-alagad, gipadala aron mag-alagad niadtong mga magapanunod ug kaluwasan?” (Hebreohanon 1:14) Tataw, ang tubag sa pangutana ni Pablo maoy oo.
Tungod kay wala sila moyukbo atubangan sa bulawang larawan nga gipatindog sa Babilonyanhong Haring Nabucodonosor, ang tulo ka Hebreohanon nga si Sadrak, Mesak, ug Abednego gitambog ngadto sa gipainit pag-ayong hudno. Apan, kanang matinumanong mga alagad sa Diyos wala maunsa sa kalayo. Sa dihang ang hari mitan-aw ngadto sa hudno, nakita niya ang “upat ka himsog nga lalaki,” ug miingon nga “ang dagway sa ikaupat [maoy] sama sa usa ka anak sa mga diyos.” (Daniel 3:25) Pipila ka tuig sa ulahi, gitambog si Daniel sa langob sa mga leyon tungod sa iyang pagkamatinumanon. Siya usab nakalingkawas nga wala maunsa ug miingon: “Ang akong Diyos nagpadala sa iyang manulonda ug nagtak-op sa baba sa mga leyon.”—Daniel 6:22.
Sa pagkatukod sa kongregasyon sa mga sumusunod ni Kristo sa unang siglo K.P., ang mga manulonda nagpakita na usab, nga nagpagawas sa mga apostol gikan sa bilanggoan. (Buhat 5:17-24; 12:6-12) Ug sa dihang nameligro ang kinabuhi ni Pablo sa dagat, usa ka manulonda nagpasalig kaniya nga moabot siya nga luwas sa Roma.—Buhat 27:13-24.
Ang presenteng-adlawng mga alagad ni Jehova nga Diyos bug-os nga kombinsido nga ang dili-makitang manulondang puwersa sa Diyos maoy tinuod ug makaarang sa pagtagana ug panalipod, sama sa ilang gihimo alang kang Eliseo ug sa iyang sulugoon. (2 Hari 6:15-17) Sa pagkatinuod, “ang manulonda ni Jehova nagakampo palibot niadtong nangahadlok kaniya, ug siya nagaluwas kanila.”—Salmo 34:7; 91:11.
Ang Mensahe nga Gidala sa mga Manulonda
Bisan tuod ang mga manulonda may kaikag sa kaayohan niadtong nag-alagad kang Jehova nga Diyos, nalangkit usab sila sa pagtino nga ang mga tawo makakat-on bahin kaniya ug sa iyang katuyoan. Si apostol Juan misulat: “Nakita ko ang laing anghel nga nagalupad sa katung-ang langit, ug siya adunay walay-kataposang maayong balita nga ipahayag ingon nga makangayang mensahe ngadto sa mga nagapuyo sa yuta, ug ngadto sa matag nasod ug tribo ug dila ug katawhan, nga sa makusog nga tingog nagaingon: ‘Kahadloki ninyo ang Diyos ug ihatag kaniya ang himaya.’”—Pinadayag 14:6, 7.
Buot ba nimong mahibaloan ang unod niining “walay-kataposang maayong balita”? Kon mao, pangutan-a ang mga Saksi ni Jehova. Malipay sila nga mopaambit niana kanimo.
[Mga hulagway sa panid 7]
Usa ka manulonda sa kinataliwad-an sa langit nagpahayag ug walay-kataposang maayong balita. Buot ba nimong mahibalo bahin niana?