Mga Magmamantala sa Gingharian Nagtaho
Pagsangyaw ‘sa Paborableng Panahon ug sa Masamokong Panahon’
SA DIHANG ang gubat mikaylap sa nasod sa Bosnia ug Herzegovina, linibo ang nakasinati ug hilabihang kalisdanan. Nianang masulayong panahon, ang mga Saksi ni Jehova mihimo sa tanang paningkamot sa pagdala ug pagdasig ug paglaom ngadto sa katawhan. Ang mosunod maoy mga kinutlo gikan sa sulat sa usa ka Saksi nga nag-alagad ug makadiyot sa Sarajevo.
“Lisod ang kinabuhi dinhi, apan ang mga tawo madinawaton kaayo sa kamatuoran sa Bibliya. Ang lokal nga mga Saksi maoy kahibulongang panig-ingnan sa pagkamalahutayon. Sa materyal nga paagi, diyutay ra ang ilang nabatonan, apan duna silay ekselenteng espiritu. Halos ang tanang batan-on sa kongregasyon anaa sa bug-os-panahong ministeryo. Ang bag-ong mga magmamantala nadasig niining maong kasibot, ug dili talagsaon nga sila makagugol ug 60 ka oras o kapin pa sa usa ka bulan diha sa ministeryo sukad gayod sa ilang unang bulan sa pag-alagad.
“Gawas pa sa pagpamalaybalay, gisulayan namo ang ubang lainlaing mga paagi sa pag-abot sa mga tawo. Pananglitan, diha kamiy maayong mga resulta sa pagpaambit ug mga publikasyon sa Bibliya diha sa daghang sementeryo sa siyudad.
“Gisangyawan usab ang mga ospital. Sa Cardiology Department sa usa ka ospital sa Sarajevo, ang pangulong doktor midawat sa Disyembre 8, 1996, nga Pagmata!, nga ang ulohan sa hapin maoy ‘Atake sa Kasingkasing—Unsay Mahimo?’ Nangayo siya ug dugang mga kopya aron iyang ikapaambit kini sa ubang mga doktor. Dayon gitugotan ang mga Saksi sa pagduaw sa tanang pasyente sa iyang departamento. Busa, sa kapin lag diyutay sa usa ka oras, kapin sa 100 ka magasin ang napanagtag sa nagkalainlaing mga kama. Daghang pasyente ang miingon nga mao kadto ang unang higayon nga may miduaw kanila sa ospital sa pagtanyag ug pagdasig ug paglaom.
“Sa laing higayon ang Pediatric Department giduaw uban sa mga artikulo sa magasin nga haom sa kabataan. Ang pangulong doktor midawat usab ug pipila ka kopya sa Akong Basahon sa mga Estorya sa Bibliya alang sa lawak basahanan. Karon ang mga inahan nga moduaw sa ilang mga anak sa ospital mobasa ug mga estorya sa Bibliya ngadto kanila adlaw-adlaw. Gihimo usab ang mga kahikayan sa pagduaw niining maong doktor sa iyang balay.
“Sa Sarajevo dunay linibo ka sundalo sa NATO [North Atlantic Treaty Organization] nga lainlaig nasyonalidad. Sila usab nakadawat ug bug-os nga pagpamatuod. Usahay moduaw kami sa lainlaing tinamingang mga sakyanan nga naggamit sa pulyetong Good News for All Nations duyog sa mga magasing Bantayanang Torre ug Pagmata! sa lainlaing pinulongan. Kapin sa 200 ka magasin ang napanagtag diha sa mga kuwartel sa Italyanong mga sundalo. Katingad-an, daghang Italyanong mga sundalo ang miingon nga wala pa gayod sila makapakigsulti sa mga Saksi ni Jehova kaniadto. Aw, nasakpan namo sila sa Sarajevo.
“Usa ka adlaw niana usa ka tinamingang sakyanan ang giparada sa daplin sa dalan. Mituktok ako sa sakyanan ginamit ang akong payong, ug migula ang usa ka sundalo. Gitanyagan nako siya ug Bantayanang Torre nga ang ulohan sa hapin maoy ‘Mga Mensahero sa Pakigdait—Kinsa Sila?’ Gitutokan ako sa sundalo ug nangutana, ‘Usa ka sa mga Saksi ni Jehova, di ba?’ Human mahibalo nga ako mao, siya mitubag, ‘Dili ko makatuo; nia sab mo dinhi! Duna bay dapit sa yuta nga walay mga Saksi?’”
Mitambag si apostol Pablo: “Iwali ang pulong, magmadalion diha niini sa paborableng panahon, sa masamokong panahon.” (2 Timoteo 4:2) Sama sa ilang kaubang mga magtutuo sa tibuok kalibotan, ang mga Saksi ni Jehova sa Sarajevo naghimo niana, bisan diha sa nagkalainlaing kama ug diha sa nagkalainlaing tinamingang sakyanan!