Ikaw Nagpakita ba sa Imong Kaugalingon nga Mapasalamaton?

Diha sa usa ka pinuy-anan sa misyonaryo sa kasadpang aprika, dihay iro nga tigbantay nga nabuhi niadto nga ginganlag teddy. Sa matag panahong may molabay kang teddy ug usa ka hiwang karne, iyang tunlon dayon kini, nga way pagtagamtam sa lami, way pag-usap-usap. naghangos ilalom sa tropikal nga kainit, siya naghulat sa sunod nga pagkaon nga ilabay diha kaniya. sa dihang nahurot ang sunod nga pagkaon, siya mitalikod ug milakaw.

Si Teddy wala gayod magpasalamat bisag gamay sa iyang nadawat. walay nagdahom kaniya nga magpasalamat. Total, siya maoy usa lamang ka iro.

KON BAHIN sa pagtan-aw ug utang-kabubut-on, kita sagad magdahom ug labaw sa isigkatawo kay sa atong pagdahom sa mga hayop. Kasagaran kita mahigawad. Daghang tawo mosakmit dayon kutob sa ilang mahimo gikan sa kinabuhi ug mangita pag dugang. Dili usab kini ikahibulong. Ang Bibliya nagtagna nga sa kataposang mga adlaw, ang mga tawo dili-mapasalamaton.​—2 Timoteo 3:1, 2.

Apan, ang mga alagad sa Diyos adunay lahi nga espiritu. Sila mosunod sa tambag ni apostol Pablo, kinsa nagtambag sa isigkamagtutuo: “Ipakita ang inyong kaugalingon nga mapasalamaton.”​—Colosas 3:15.

Si Jehova Nagpakita sa Iyang Kaugalingon nga Mapasalamaton

Si Jehova nga Diyos naghatag ug hingpit nga panig-ingnan sa pagpakitag pagkamapasalamaton. Tagda kon unsay iyang paglantaw sa iyang matinumanong mga alagad. Si Pablo, ilalom sa pagdasig, misulat ngadto sa Hebreohanong mga Kristohanon: “Ang Diyos dili usang dili-matarong nga kalimtan ang inyong buhat ug ang gugma nga inyong gipakita alang sa iyang ngalan, sa pagkaagi nga kamo nakaalagad sa mga balaan ug padayong nagaalagad.”​—Hebreohanon 6:10.

Ang mga panig-ingnan sa pagkamapasalamaton ni Jehova alang sa iyang matinumanong mga alagad dagaya. Iyang gipanalanginan si Abraham pinaagi sa pagpadaghan sa iyang literal nga mga anak, aron sila mahimong “sama ka daghan sa mga bituon sa kalangitan ug sama sa mga balas nga anaa sa baybayon sa dagat.” (Genesis 22:17) Agig pasalamat sa pagkamatinumanon ni Job ilalom sa pagsulay, si Jehova dili lamang nagpasig-uli sa dakong bahandi ni Job kondili naghatag usab ug “duha ka pilong gidaghanon.” (Job 42:10) Ang mga pakiglabot ni Jehova sa mga tawo sa tibuok milenyo nagpamatuod sa pagkatinuod sa mga pulong: “Labot kang Jehova, ang iyang mga mata nagalantaw sa tibuok yuta aron sa pagpakita sa iyang kusog alang niadtong adunay hingpit nga kasingkasing alang kaniya.”​—2 Cronicas 16:9.

Ang pagkamapasalamaton sa Diyos ug hilig sa pagganti niadtong nagapaningkamot sa pagtuman sa iyang kabubut-on maoy pangunang mga bahin sa iyang personalidad. Ang pag-ila niini hinungdanon sa Kristohanong pagtuo. Si Pablo misulat: “Kon walay pagtuo imposible sa pagpahimuot kaniya pag-ayo, kay siya nga nagaduol sa Diyos kinahanglang motuo . . . nga siya maoy tigganti sa mga matinuorong nagapangita kaniya.”​—Hebreohanon 11:6.

Kon si Jehova nagpakita pa ug mapintas, hinawayon nga espiritu, kitang tanan mahimong tinunglo. Ang salmista nagpahayag niining puntoha dugay na kanhi: “Kon mga sala pa ang imong gitan-aw, Oh Jah, Oh Jehova, kinsay makabarog?” (Salmo 130:3) Si Jehovah dili kay dili mapasalamaton ni hinawayon. Siya nalipay niadtong nag-alagad kaniya. Siya nagpakita sa iyang kaugalingon nga mapasalamaton.

Si Jesus​—Usa ka Mapasalamaton Gayod nga Tawo

Nagpabanaag sa mga hiyas sa hingpit nga paagi sa iyang langitnong Amahan, si Jesu-Kristo nagpakita sa iyang kaugalingon nga mapasalamaton sa mga butang nga gihimo sa uban diha sa pagtuo. Palandonga ang nahitabo kas-a diha sa templo sa Jerusalem: “Karon sa miyahat [si Jesus] iyang nakita ang mga dato nga nanghulog sa ilang mga gasa sa mga panudlanag bahandi. Unya iyang nakita ang usa ka kabos nga babayeng balo nga naghulog didto ug duha ka gagmayng sensilyo nga kubos kaayog bili, ug siya miingon: ‘Ako magasulti kaninyo sa pagkamatuod, Kini nga babayeng balo, bisan kabos, mihulog ug labaw pa kay sa gihimo sa tanan. Kay ang tanan kanila mihulog ug mga gasa gikan sa ilang mga sobra, apan kini nga babaye gikan sa iyang kawalad-on mihulog sa tanang kahinguhaan nga gibatonan niya.’”​—Lucas 21:1-4.

Kon bahin sa panglantaw may kalabotan sa panalapi, ang amot gamay ra, ilabina kon itandi niadtong mga tawong sapian. Ang kadaghanan niadtong atua didto dili gayod makamatikod kaniya. Bisan pa niana, si Jesus nakakita sa babayeng balo. Siya nakasabot sa iyang mga kahimtang. Si Jesus nakakita kaniya ug miapresyar kaniya.

Laing hitabo naglangkit sa usa ka babayeng dato, si Maria. Samtang si Jesus nagsandig diha sa usa ka pangaon, siya nagbubo ug mahal kaayong pahumot nga lana sa mga tiil ni Jesus ug sa iyang ulo. Ang uban misaway sa iyang gihimo, nga nangatarongan nga ang lana mahimong ikabaligya ug ang salapi magamit sa pagtabang sa kabos. Unsay reaksiyon ni Jesus? Siya miingon: “Pasagdi siya. Nganong inyo man siyang samokon? Mihimo siya ug maayong buhat kanako. Sa pagkamatuod ako magaingon kaninyo, Diin gani ang maayong balita iwali sa tibuok nga kalibotan, ang gibuhat niini nga babaye igasaysay usab ingong handomanan kaniya.”​—Marcos 14:3-6, 9; Juan 12:3.

Si Jesus wala sa pagkahinawayon nagmulo nga ang mahal nga lana wala gamita sa laing paagi. Siya mapasalamaton sa mahinatagong pagpasundayag sa gugma ug pagtuo ni Maria. Ang hitabo narekord diha sa Bibliya ingong handomanan sa iyang maayong buhat. Kining mga asoya ug ang uban pa nagpakita nga si Jesus maoy mapasalamaton kaayong tawo.

Kon usa ikaw ka alagad sa Diyos, makatino ka nga si Jehova nga Diyos ug si Jesu-Kristo mapasalamaton gayod sa imong mga paningkamot sa pagpalambo sa putli nga pagsimba. Ang maong kahibalo magpasuod kanato ngadto kanila ug magpalihok kanato sa pagsundog kanila pinaagi sa pagpamatuod sa atong kaugalingon nga mapasalamaton.

Ang Hinawayong Espiritu ni Satanas

Karon atong tagdon ang usa ka pananglitan sa usa kinsa wala magpasundayag sa iyang kaugalingon nga mapasalamaton​—si Satanas nga Yawa. Ang pagkadili-mapasalamaton ni Satanas nakaamot sa iyang pagpanguna sa usa ka pag-alsa batok sa Diyos nga misangpot ug kadaot.

Naghambin ug hinawayong espiritu sa pagkawalay-katagbawan sa iyang kaugalingon, si Satanas misugod sa pagsabod niini diha sa uban. Palandonga ang mga hitabo diha sa tanaman sa Eden. Nalalang na ni Jehova ang unang lalaki ug babaye, gibutang sila diha sa samag-paraiso nga tanaman, ug sila gisugo: “Gikan sa matag kahoy sa tanaman makakaon ka hangtod sa katagbawan.” Apan dihay usa ka restriksiyon. Ang Diyos miingon: “Bahin sa kahoy sa pag-ila sa maayo ug sa daotan dili ka magkaon gikan niana, kay sa adlaw nga mokaon ka niana mamatay ka gayod.”​—Genesis 2:16, 17.

Hinunoa, wala magdugay gihagit ni Satanas ang pagkakatuohan ni Jehova. Sa usa ka sukod, buot niyang mahimong inggrato si Eva kang Jehova aron siya mapukaw sa pag-alsa batok kaniya, sama sa pag-alsa mismo ni Satanas. “Tinuod ba diay nga miingon ang Diyos nga dili kamo makakaon sa tanang kahoy sa tanaman?” si Satanas nangutana. (Genesis 3:1) Ang tin-awng implikasyon mao nga ang Diyos naghikaw ug usa ka butang nga bililhon gikan kang Eva, usa ka butang nga makabukas sa iyang mga mata ug maghimo kaniya nga mahisama sa Diyos. Imbes magpakita sa iyang kaugalingon nga mapasalamaton sa daghang panalangin nga gihatag ni Jehova kaniya, si Eva misugod sa pagpangandoy sa gidili.​—Genesis 3:5, 6.

Ang daotang mga resulta nahibaloan sa tanan. Bisag gihatagan ug ngalang Eva “tungod kay siya nahimong inahan sa tanang may kinabuhi,” sa laing diwa siya nahimong inahan sa tanang mangamatay. Gikan kang Adan ang tanang tawo nakapanunod sa sala nga mosangpot ug kamatayon.​—Genesis 3:20; Roma 5:12.

Sundoga ang Diyos ug si Kristo

Palandonga ang kalainan ni Satanas ug ni Jesus. Si Satanas gibatbat ingong “ang magsusumbong sa atong mga igsoon . . . , kinsa nagasumbong kanila adlaw ug gabii atubangan sa atong Diyos.” (Pinadayag 12:10) Si Jesus “makahimo usab sa pagluwas sa bug-os kanilang kinsa nagaduol sa Diyos pinaagi kaniya, tungod kay siya buhi man kanunay aron sa pagpangamuyo alang kanila.”​—Hebreohanon 7:25.

Si Satanas nangakusar sa mga alagad sa Diyos. Si Jesus mapasalamaton kanila ug nangaliyupo alang kanila. Ingong mga magsusundog ni Kristo, ang mga Kristohanon kinahanglang maningkamot nga mangita ug maayo diha sa usag usa, nga mapasalamaton ug mapabilhon sa usag usa. Sa ingon, sila nagpakita sa ilang kaugalingon nga mapasalamaton sa usa nga naghatag ug kinalabwang panig-ingnan sa pagkamapasalamaton, si Jehova nga Diyos.​—1 Corinto 11:1.

[Hulagway sa panid 17]

Si Jesus nagpahayag ug pasalamat sa maayong buhat ni Maria