“Magmapasalamaton Kamo”
1 Sa dihang giayo ni Jesus ang napulo ka sanlahon, usa lamang kanila ang mibalik aron sa pagpasalamat. Si Jesus nangutana: “Ang napulo nahinloan, dili ba? Nan, hain ba ang siyam?” (Luc. 17:11-19) Hinungdanon gayod nga kita magmapabilhon ug magmapasalamaton sa tanang maayo ug hingpit nga gasa nga gihatag sa atong mahinatagon ug mahigugmaong langitnong Amahan, si Jehova nga Diyos!—Col. 3:15; Sant. 1:17.
2 Unsa ang pipila ka butang nga angay natong pasalamatan? Kita mapasalamaton sa lukat, ang kinadak-ang gasa sa Diyos alang sa katawhan. (Juan 3:16) Mapasalamaton kita kang Jehova tungod sa iyang pagkabig kanato. (Juan 6:44) Angay usab kitang magmapasalamaton tungod sa atong Kristohanong panaghiusa. (Sal. 133:1-3) Walay duhaduha makahunahuna ka ug daghan pang mga gasa gikan kang Jehova. Dili gayod nato buot nga mahisama niadtong dili mapasalamatong mga Israelinhon nga nalimot sa mga buhat ni Jehova alang kanila!—Sal. 106:12, 13.
3 Ipasundayag ang Pagkamapasalamaton: Bisan pag naapresyar tingali sa napulo ka sanlahon ang gihimo ni Jesus, apan usa lamang kanila ang nagpakita ug pagkamapasalamaton. (Luc. 17:15) Sa susama, atong ikapasundayag ang pagkamapasalamaton pinaagi sa atong kasibot diha sa ministeryo. Kon kita tinuod nga mapasalamaton sa tanang nahimo sa atong mahigugmaong Amahan, kita matukmod sa pagsundog sa iyang gugma ug pagkamahinatagon pinaagi sa pagsulti sa uban bahin kaniya. (Luc. 6:45) Sa baylo, samtang atong isulti sa uban ang ‘katingalahang mga buhat ni Jehova ug ang iyang mga hunahuna nganhi kanato,’ ang atong gugma ug pagpabili kang Jehova motubo.—Sal. 40:5.
4 Dasiga ang Uban sa Pagpakitag Pagpabili: Angay kitang magmaabtik sa pagtabang sa atong mga anak ug mga estudyante sa Bibliya sa pag-ugmad sa pagkamapabilhon. Ang mga ginikanan adunay daghang kahigayonan sa paghimo niini, sama sa dihang makighisgot sa mga bata bahin sa kalalangan ni Jehova. (Roma 1:20) Sa dihang magdumalag pagtuon sa Bibliya, mahimong pangutan-on nato ang estudyante, “Unsay gisulti niini kanato bahin sa pagkapersona ni Jehova?” Samtang ang pagpabili sa maong estudyante motubo, ang iyang gugma ug determinasyon nga pahimut-an ang Diyos motubo usab.
5 Niining kataposang mga adlaw, daghan ang dili mapabilhon ug dili mapasalamaton. (2 Tim. 3:1, 2) Dako gayod ang kalipay ni Jehova nga makita ang iyang maunongong mga alagad nga nagpasundayag ug pagkamapasalamaton pinaagi sa ilang masibotong pagpakigbahin diha sa ministeryo!—Sant. 1:22-25.