Magmabinantayon ug Magmakugihon!

“Busa, padayon sa pagbantay tungod kay wala kamo mahibalo sa adlaw ni sa takna.”​—MATEO 25:13.

1. Ngadto sa unsa nga si apostol Juan nagalantaw?

SA KATAPOSANG pagpakig-estorya diha sa Bibliya, si Jesus misaad: “Ako moabot sa madali.” Ang iyang apostol nga si Juan mitubag: “Amen! Umari ka, Ginoong Jesus.” Ang apostol wala magduhaduha nga si Jesus moabot. Apil si Juan sa mga apostol nga misukna kang Jesus: “Kanus-a man kining mga butanga mahitabo, ug unsa man unya ang ilhanan sa imong pagkaanaa [Grego, pa·rou·siʹa] ug sa katiklopan sa sistema sa mga butang?” Oo, si Juan masaligong naghulat sa umaabot nga presensiya ni Jesus.​—Pinadayag 22:20; Mateo 24:3.

2. Maylabot sa presensiya ni Jesus, unsay kahimtang sa mga iglesya?

² Ang maong pagsalig talagsaon niining mga adlawa. Daghang iglesya ang adunay opisyal nga doktrina bahin sa ‘pag-abot’ ni Jesus, apan pipila ra sa ilang mga membro ang nagpaabot gayod niana. Nagkinabuhi sila nga maorag si Jesus dili moabot. Ang librong The Parousia in the New Testament nag-ingon: “Dunay diyutayng makahuloganong impluwensiya ang paglaom sa Parousia diha sa kinabuhi, panghunahuna ug buluhaton sa iglesya. . . . Ang hilabihang pagkadinalian nga niana ang iglesya angayng magbuhat sa mga tahas niini sa paghinulsol ug sa misyonaryong pagsangyaw sa ebanghelyo, naluya kon wala man ugaling mahanaw sa bug-os.” Apan dili alang sa tanan!

3. (a) Unsay pagbati sa tinuod nga mga Kristohanon bahin sa pa·rou·siʹa? (b) Unsa sa partikular ang atong tagdon karon?

³ Ang tinuod nga mga tinun-an ni Jesus masibotong nagpaabot sa kataposan sa presenteng daotang sistema sa mga butang. Samtang maunongong nagabuhat sa ingon, kinahanglang atong huptan ang hustong panglantaw diha sa tanang nalangkit sa presensiya ni Jesus ug sa pagbuhat uyon niana. Magpaarang kana kanato sa ‘paglahutay hangtod sa kataposan ug maluwas.’ (Mateo 24:13) Diha sa lakat sa paghatag sa tagna nga atong makaplagan sa Mateo mga kapitulo 24 ug 25, si Jesus nagtaganag maalamong tambag nga atong ikapadapat, alang sa atong dumalayong kaayohan. Ang kapitulo 25 naundan sa mga sambingay nga lagmit imong nahibaloan, lakip ang usa bahin sa napulo ka ulay (ang maalamon ug buangbuang nga mga ulay) ug ang sambingay bahin sa mga talanton. (Mateo 25:1-30) Sa unsang paagi kita makabenepisyo sa maong mga ilustrasyon?

Magmabinantayon, Sama sa Lima ka Ulay!

4. Unsa ang pangunang punto sa sambingay bahin sa mga ulay?

⁴ Tingali gusto nimong basahon pag-usab ang sambingay bahin sa mga ulay, nga makaplagan sa Mateo 25:1-13. Ang esena maoy usa ka engrandeng Hudiyohanong kasal nga niana ang pamanhonon moadto sa balay sa amahan sa pangasaw-onon aron kuyogan siya ngadto sa balay sa pamanhonon (o sa balay sa iyang amahan). Ang maong prosesyon tingali maglakip sa mga musikero ug mga mag-aawit, ug ang panahon sa pag-abot niini dili tukmang mahibaloan. Sa sambingay, napulo ka ulay ang naghulat hangtod sa pagkagabii alang sa pag-abot sa pamanhonon. Sa kadanghag ang lima wala magdalag igong lana sa lampara ug busa kinahanglang molakaw aron mopalit ug dugang. Ang laing lima maalamong nagdalag ekstrang lana diha sa mga sudlanan aron ilang kasudlan ang ilang mga lampara kon kinahanglanon panahon sa ilang paghulat. Kini lamang lima ang presente ug andam sa dihang ang pamanhonon miabot. Busa, sila lamang ang gipasulod sa kombira. Sa pagbalik sa lima ka buangbuang nga mga ulay, ulahi na kaayo aron sila makasulod.

5. Unsang mga kasulatan ang nagpatin-aw sa mahulagwayong kahulogan sa sambingay bahin sa mga ulay?

⁵ Daghang bahin niining sambingaya ang masabot ingong simboliko. Pananglitan, ang Kasulatan naghisgot kang Jesus isip usa ka pamanhonon. (Juan 3:28-30) Gipakasama ni Jesus ang iyang kaugalingon ngadto sa usa ka anak lalaki sa hari nga alang kaniya giandam ang kombira sa kasal. (Mateo 22:1-14) Ug ang Bibliya nagtandi kang Kristo ngadto sa usa ka bana. (Efeso 5:23) Makaiikag, bisan tuod ang dinihogang mga Kristohanon sa laing bahin gihubit ingong “pangasaw-onon” ni Kristo, ang sambingay wala maghisgot ug pangasaw-onon. (Juan 3:29; Pinadayag 19:7; 21:2, 9) Apan, kini naghisgot ug napulo ka ulay, ug ang dinihogan sa laing bahin gipakasamag usa ka ulay nga gikasaad sa kaminyoon ngadto kang Kristo.​—2 Corinto 11:2.a

6. Unsang pahimangno ang gihatag ni Jesus sa pagtapos sa sambingay bahin sa mga ulay?

⁶ Gawas pa sa maong mga detalye ug sa bisan unsang matagnaong mga kapadapatan, duna gayoy maayong mga prinsipyo nga atong makat-onan gikan niining sambingaya. Pananglitan, matikdi nga kini gitapos ni Jesus uban ang mga pulong: “Busa, padayon sa pagbantay tungod kay wala kamo mahibalo sa adlaw ni sa takna.” Busa ang sambingay nagpasabot sa panginahanglan nga ang matag usa kanato magmabinantayon, nga magmaalisto sa nagsingabot nga kataposan niining daotang sistema. Kini nga kataposan moabot gayod, bisag dili nato matumbok ang petsa. Niining bahina, matikdi ang mga tinamdan nga gipasundayag sa duha ka grupo sa mga ulay.

7. Sa unsang diwa nga ang lima ka ulay diha sa sambingay napamatud-ang buangbuang?

⁷ Si Jesus miingon: “Lima kanila mga buangbuang.” Tungod ba kadto kay sila wala magtuo nga moabot ang pamanhonon? Nanglakaw ba sila sa pagpangitag kalingawan? O sila ba nalimbongan? Wala gayod. Si Jesus miingon nga kining lima “nanggula aron sa pagsugat sa pamanhonon.” Sila nasayod nga siya moabot, ug sila buot nga malangkit, bisan gani sa pagpakig-ambit sa “kombira sa kasal.” Apan, igo ba gayod ang ilang pagkaandam? Taudtaod silang naghulat kaniya, hangtod “sa pagkatungang gabii,” apan dili sila andam sa iyang pag-abot bisan kanus-a pa kana​—sayosayo man o sa mas ulahi kay sa ilang unang gidahom.

8. Sa unsang paagi ang lima ka ulay diha sa sambingay napamatud-ang maalamon?

⁸ Ang laing lima​—kadtong gitawag ni Jesus nga maalamon—​nanggawas usab dala ang dinagkotang mga lampara, nga nagdahom sa pag-abot sa pamanhonon. Kinahanglan usab silang maghulat, apan sila “maalamon.” Ang Gregong pulong nga gihubad “maalamon” mahimong magpasabot sa pagkahimong “mapanagan-on, masinaboton, maalamon sa praktikal nga paagi.” Kining lima nagpamatuod nga sila maalamon pinaagi sa pagdalag mga sudlanan nga may ekstrang lana aron kasudlan ang ilang mga lampara kon kinahanglanon. Sa pagkatinuod, masiboton kaayo sila nga mahimong andam alang sa pamanhonon nga dili nila ihatag ang ilang lana. Ang maong pagkamabinantayon dili sayop, ingon sa napamatud-an sa ilang pagkapresente ug bug-os nga pagkaandam sa dihang miabot ang pamanhonon. Kini silang ‘mga andam misulod uban kaniya ngadto sa kombira sa kasal; ug ang pultahan gisirhan.’

9, 10. Unsa ang punto sa sambingay bahin sa mga ulay, ug unsang mga pangutana ang angay natong isukna sa atong kaugalingon?

⁹ Si Jesus wala maghatag ug leksiyon maylabot sa hustong panggawi sa kasal, ni siya nagtambag bahin sa pagpakig-ambitay. Ang iyang punto mao: “Busa, padayon sa pagbantay tungod kay wala kamo mahibalo sa adlaw ni sa takna.” Suknaa ang imong kaugalingon, ‘Tinuod ba akong mabinantayon bahin sa presensiya ni Jesus?’ Kita nagtuo nga si Jesus nagmando na karon sa langit, apan unsa ka dulot ang atong pagtagad sa kamatuoran nga ‘ang Anak sa tawo sa di-madugay moanhi diha sa mga panganod sa langit uban ang gahom ug dakong himaya’? (Mateo 24:30) Sa “pagkatungang gabii,” ang pag-abot sa pamanhonon mas duol na gayod kay sa dihang ang mga ulay unang nanggawas sa pagsugat kaniya. Sa susama, ang pag-abot sa Anak sa tawo aron sa paglaglag sa presenteng daotang sistema mas duol na kay sa dihang nagsugod kita sa paglantaw sa iyang pag-abot. (Roma 13:11-14) Kita ba padayong nagmabinantayon, nga labi pa ganing mabinantayon samtang nagakahiduol ang panahon?

¹⁰ Ang pagsunod sa sugo nga “padayon sa pagbantay” nagkinahanglag makanunayong pagkamabinantayon. Lima ka ulay ang nahutdan sa ilang lana ug milakaw aron sa pagpalit ug dugang. Ang usa ka Kristohanon karong adlawa tingali sa susama malinga mao nga siya dili kaayo andam sa nagkaduol nga pag-abot ni Jesus. Nahitabo kini sa pipila ka unang-siglong mga Kristohanon. Mahitabo usab kini sa pipila karong adlawa. Busa atong suknaon ang atong kaugalingon, ‘Nagakahitabo ba kini kanako?’​—1 Tesalonica 5:6-8; Hebreohanon 2:1; 3:12; 12:3; Pinadayag 16:15.

Magmakugihon Samtang Nagakahiduol ang Kataposan

11. Unsang sambingay ang sunod nga gihatag ni Jesus, ug sa unsa nga kini susama?

¹¹ Sa iyang sunod nga sambingay, dugang pa ang gihimo ni Jesus kay sa pag-awhag lamang sa iyang mga sumusunod nga magmabinantayon. Human maghisgot bahin sa maalamon ug buangbuang nga mga ulay, iyang giasoy ang ilustrasyon bahin sa mga talanton. (Basaha ang Mateo 25:14-30.) Sa daghang bahin kini susama sa mas unang sambingay bahin sa mga mina, nga gihatag ni Jesus tungod kay daghang “naghunahuna nga ang gingharian sa Diyos magapadayag sa kaugalingon niini dihadiha.”​—Lucas 19:11-27.

12. Unsa ang pangunang punto sa sambingay bahin sa mga talanton?

¹² Sa sambingay bahin sa mga talanton, si Jesus nagsugilon bahin sa usa ka lalaki nga, una pa milangyaw sa laing nasod, nagpatawag sa tulo ka ulipon. Ngadto sa usa iyang gipiyal ang lima ka talanton, ngadto sa lain duha, ug sa ikatulo usa lamang​—“sa matag usa sumala sa iyang kaugalingong katakos.” Lagmit, kini nagpasabot ug talanton nga salapi, nga ang kasagarang kantidad kaniadto maoy kitaon sa usa ka mamumuo sulod sa 14 ka tuig​—pagkadaghang salapi! Sa pagbalik sa tawo, siya nakighusay sa mga ulipon bahin sa ilang nahimo sulod sa “hataas nga panahon” nga siya nahilayo. Ang unang duha ka ulipon nakadoble sa kantidad nga gipiyal kanila. Siya miingon “maayong pagkabuhat,” nga nagsaad sa matag usa ug dugang katungdanan, ug mihinapos: “Sumulod sa kangaya sa imong agalon.” Namasangil nga ang agalon sobra ka masuktanon, ang ulipon nga may usa ka talanton wala mogamit sa talanton sa paaging makaganansiya. Iyang gitagoan ang salapi, nga wala gani magdeposito niini sa mga magbabangko aron makainteres. Ang agalon nagtawag kaniyang “tuman-kadaotan ug tapolan” kay siya milihok batok sa intereses sa iyang agalon. Ingong resulta, ang talanton gikuha gikan kaniya, ug siya gipagawas diin “didto unya ang iyang pagdanguyngoy ug ang pagkagot sa iyang mga ngipon.”

13. Sa unsang paagi si Jesus napamatud-ang sama sa agalon diha sa sambingay?

¹³ Sa makausa pa, ang mga detalye niini masabot sa simbolikong diwa. Pananglitan, si Jesus, nga gihulagwayan sa lalaking milangyaw sa gawas sa nasod, mibiya sa iyang mga tinun-an, miadto sa langit, ug naghulat ug taas nga panahon hangtod nga iyang nadawat ang harianong gahom.b (Salmo 110:1-4; Buhat 2:34-36; Roma 8:34; Hebreohanon 10:12, 13) Apan, sa makausa pa, atong masabtan ang mas masangkarong leksiyon o prinsipyo nga angayng ipadapat natong tanan diha sa atong kinabuhi. Unsa kana?

14. Ang sambingay bahin sa mga talanton nagpasiugdag unsang hinungdanong panginahanglan?

¹⁴ Kon kaha ang atong paglaom mao kanang imortal nga kinabuhi sa langit o walay-kataposang kinabuhi sa paraisong yuta, dayag gikan sa sambingay ni Jesus nga kita kinahanglang maningkamot diha sa Kristohanong mga kalihokan. Sa pagkatinuod, ang mensahe niining sambingaya masumaryo diha sa usa ka pulong: pagkamakugihon. Gipakita sa mga apostoles ang sumbanan gikan sa Pentekostes 33 K.P. padayon. Atong mabasa: “Uban sa daghan pang mga pulong [si Pedro] mihatag ug bug-os nga pagpanaksi ug padayong maawhagong nagtambag kanila, nga nag-ingon: ‘Pagpakaluwas gikan niining baliko nga kaliwatan.’” (Buhat 2:40-42) Ug pagkamaayong balos ang iyang naangkon sa iyang mga paningkamot! Samtang ang uban miduyog sa mga apostol diha sa Kristohanong pagsangyaw nga buluhaton, sila usab makugihon, uban sa maayong balita nga “nagalambo sa tibuok kalibotan.”​—Colosas 1:3-6, 23; 1 Corinto 3:5-9.

15. Sa unsang linaing paagi nga kita kinahanglang magpadapat sa pangunang punto sa sambingay bahin sa mga talanton?

¹⁵ Hinumdomi ang konteksto niining sambingaya​—usa ka tagna bahin sa presensiya ni Jesus. Kita adunay igong pamatuod nga ang pa·rou·siʹa ni Jesus nagapadayon ug sa di-madugay modangat sa kataposan. Hinumdomi ang paglangkit nga gihimo ni Jesus sa “kataposan” ug sa buluhaton nga kinahanglang himoon sa mga Kristohanon: “Kining maayong balita sa gingharian igawali sa tibuok gipuy-ang yuta ingong usa ka pagsaksi ngadto sa tanang kanasoran; ug unya moabot ang kataposan.” (Mateo 24:14) Uban niini sa hunahuna, haing matanga sa ulipon kita nahisama? Suknaa ang kaugalingon: ‘Makataronganon ba ang paghinapos nga ako sama sa ulipon nga nagtago sa gipiyal kaniya, tingali samtang siya nag-atiman sa iya mismong personal nga mga atimanonon? O tataw ba nga ako sama kanilang maayo ug matinumanon? Ako ba bug-os nga determinado sa pagpauswag sa intereses sa Agalon sa matag okasyon?’

Mabinantayon ug Makugihon Panahon sa Iyang Presensiya

16. Unsay mensahe sa duha ka sambingay nga atong gihisgotan alang kanimo?

¹⁶ Oo, gawas pa sa masambingayon ug matagnaong kahulogan niini, kining duha ka sambingay naghatag kanatog tin-aw nga pagdasig nga naggikan mismo sa baba ni Jesus. Ang iyang mensahe mao kini: Magmabinantayon; magmakugihon, ilabina kon ang ilhanan sa pa·rou·siʹa ni Kristo nakita na. Mao na kini karon. Busa kita ba tinuod gayong mabinantayon ug makugihon?

17, 18. Unsay gitambag ni disipulong Santiago bahin sa pagkaanaa ni Jesus?

¹⁷ Ang igsoon ni Jesus sa inahan nga si Santiago wala didto sa Bukid sa mga Olibo aron sa pagpatalinghog sa tagna ni Jesus; apan siya nakahibalo bahin niini sa ulahi, ug siya dayag nga nakasabot sa kahinungdanon niini. Siya misulat: “Busa, magmapailobon, mga igsoon, hangtod sa pagkaanaa sa Ginoo. Tan-awa! Ang mag-uuma nagasigeg hulat sa bililhong bunga sa yuta, nga nagamapailobon niini hangtod nga iyang mabatonan ang sayo nga ulan ug ang ulahi nga ulan. Kamo usab magmapailobon; lig-ona ang inyong mga kasingkasing, tungod kay ang pagkaanaa sa Ginoo duol na.”​—Santiago 5:7, 8.

¹⁸ Kay gipasaligan nga hukman sa Diyos sa kalaglagan kadtong naggamit sa ilang bahandi sa sayop nga paagi, giawhag ni Santiago ang mga Kristohanon nga dili mawad-ag pailob samtang nagahulat kang Jehova nga molihok. Ang dili-mapailobong Kristohanon tingali mahimong mapanimaslon, maorag siya mismo ang kinahanglang motul-id sa mga sayop nga nahimo. Apan, dili angayng maingon niana, tungod kay ang panahon sa paghukom moabot gayod. Ang ehemplo sa mag-uuma nagpakita niana, ingon sa gisaysay ni Santiago.

19. Ang Israelinhong mag-uuma makapakitag unsang matang sa pailob?

¹⁹ Ang Israelinhong mag-uuma nga nagtanom ug binhi kinahanglang maghulat, una sa paggitib sa dahon, dayon sa pagtubo sa tanom, ug sa kataposan alang sa pag-ani. (Lucas 8:5-8; Juan 4:35) Latas sa maong mga bulan, dihay panahon ug tingali hinungdan sa kabalaka. Moabot kaha ang sayo nga ulan ug bastante? Komosta ang ulahi nga ulan? Patyon kaha sa dangan o bagyo ang mga tanom? (Itandi ang Joel 1:4; 2:23-25.) Hinunoa, sa katibuk-an ang Israelinhong mag-uuma makasalig kang Jehova ug sa kinaiyanhong mga siklo nga iyang gipahiluna. (Deuteronomio 11:14; Jeremias 5:24) Ang pailob sa mag-uuma motumbas gayod sa masaligong pagpaabot. Pinaagi sa pagtuo siya nasayod nga ang iyang ginahulat moabot. Kini moabot gayod!

20. Sa unsang paagi kita makapakitag pailob uyon sa tambag ni Santiago?

²⁰ Samtang ang usa ka mag-uuma hayan may diyutayng kahibalo kon kanus-a ang ting-ani, ang unang-siglong mga Kristohanon dili makabanabana kon kanus-a ang presensiya ni Jesus. Apan, kadto moabot gayod. Si Santiago misulat: “Ang pagkaanaa [Grego, pa·rou·siʹa] sa Ginoo duol na.” Sa panahong gisulat ni Santiago ang maong mga pulong, ang dako, o tibuok-yuta, nga ilhanan sa presensiya ni Kristo wala pa makita. Apan kini karon makita na! Busa unsay angay natong bation niining yugtoa? Ang ilhanan aktuwal nga makita. Atong makita kini. Kita makasulting masaligon, ‘Akong nakita ang ilhanan nga nagakatuman.’ Kita masaligong makasulti, ‘Ang pagkaanaa sa Ginoo ania na, ug ang tayuktok niini haduol na.’

21. Unsa man gayod ang ihukom natong buhaton?

²¹ Sanglit ingon niana ang kahimtang, kita ilabinang adunay kusganong rason nga motuo ug mopadapat sa pangunang mga leksiyon sa duha ka sambingay ni Jesus nga atong gihisgotan. Siya miingon: “Busa, padayon sa pagbantay tungod kay wala kamo mahibalo sa adlaw ni sa takna.” (Mateo 25:13) Kini na gayod ang panahon nga kita magmasiboton diha sa atong Kristohanong pag-alagad. Atong ipakita matag adlaw diha sa atong kinabuhi nga atong nasabtan ang punto ni Jesus. Magmabinantayon kita! Magmakugihon kita!

[Mga footnote]

Nakahinumdom Ka Ba?

◻ Unsa ang pangunang punto nga imong nasabtan gikan sa sambingay bahin sa maalamon ug buangbuang nga mga ulay?

◻ Pinaagi sa sambingay bahin sa mga talanton, unsang pangunang tambag ang gihatag ni Jesus kanimo?

◻ Sa unsang diwa nga ang imong pailob maylabot sa pa·rou·siʹa susama nianang iya sa Israelinhong mag-uuma?

◻ Nganong kini maoy ilabinang makapahinam ug malisod nga panahon nga mabuhi?

[Mga hulagway sa panid 23]

Unsang mga leksiyon ang imong makat-onan sa sambingay bahin sa mga ulay ug nianang bahin sa mga talanton?