Pagmaya Diha Kang Jehova ug Paglipay

ANG kalamposan sa bisan unsang mapuslanong proyekto sa kanunay maoy panahon sa pagmaya. Ingon gayod niana ang kahimtang sa graduwasyon sa 48 ka estudyante sa ika-106 nga klase sa Watchtower Bible School of Gilead nga gihimo niadtong Marso 13, 1999, sa Watchtower Educational Center sa Patterson, New York.

Ang pangbukas nga pakigpulong ni Theodore Jaracz, usa ka membro sa Nagamandong Lawas, graduwado sa ikapitong klase sa Gilead, ug tsirman sa programa sa graduwasyon, nagpasiugda sa mga pulong sa Salmo 32:11: “Pagmaya diha kang Jehova ug paglipay, kamong mga matarong.” Misaysay kon nganong tukma alang sa tanan nga magmaya niining okasyona, siya miingon: “Tungod kini sa ginapalampos ni Jehova uban kanilang matul-id ug kasingkasing, lakip ang atong mga estudyante sa Gilead, nga kita magmaya sa mga okasyon nga sama niini.” Samtang ang mga estudyante nagplano sa pag-adto sa Tunghaan sa Gilead ug masibotong naningkamot nga mokuwalipikar sa misyonaryong pag-alagad, si Jehova maoy nagpaposible aron magmalamposon ang tanan. (Proverbio 21:5; 27:1) Kana, pasiugda pa ni Brader Jaracz, maoy rason nga ‘magmaya diha kang Jehova.’

Lakip niadtong diha sa awditoryum sa Patterson mao ang mga membro sa pamilya ug mga bisita sa mga estudyante nga gikan sa 12 ka nasod aron sa pagsaksi niining malipayong hitabo. Samtang ang 5,198 nga mitambong​—lakip ang mga membro sa pamilyang Bethel sa Brooklyn, Patterson, ug Wallkill, nga gikonektar pinaagig audio ug video—​naghinamhinam sa mosunod nga programa, dayag nga ang malipayong espiritu naglungtad.

Gitambagan nga Imentinar ang Malipayong Espiritu

Sa dihang gitapos ni Brader Jaracz ang iyang pangbukas nga pakigpulong, iyang gipaila ang una sa lima ka mamumulong, nga nag-andam ug makapadasig nga Kasulatanhong tambag dili lamang alang sa mga graduwado sa Gilead kondili alang sa tanang nanambong.

Ang unang misulti mao si William Malenfant, graduwado sa ika-34ng klase sa Gilead, karon nag-alagad ingon nga katabang sa Komite sa Pagtudlo sa Nagamandong Lawas. Maylabot sa iyang tema nga “‘Ang Tanan’ Dili Kakawangan!” nga gipasikad sa Ecclesiastes 1:2, siya misukna: “Gipasabot ba ni Solomon nga ang tanan, diha sa absolutong diwa sa pulong, maoy kakawangan?” Ang tubag: “Dili. Iyang gitumong nga ang tawhanong mga kahimoan nga nagsalikway sa kabubut-on sa Diyos, mga pangagpas nga sukwahi sa kabubut-on sa Diyos​—kanang tanan kakawangan.” Sa kasukwahi, ang pagsimba sa tinuod nga Diyos, si Jehova, dili kakawangan; ni ang pagtuon sa Pulong sa Diyos, ang Bibliya, ug ang pagtudlo niini ngadto sa uban. Dili hikalimtan sa Diyos ang maong mga paningkamot sa iyang mga alagad. (Hebreohanon 6:10) Sa pagkatinuod, bisan kon ang katalagman modangat niadtong giuyonan sa Diyos, sila “maputos gayod sulod sa usa ka puntil sa kinabuhi uban kang Jehova.” (1 Samuel 25:29) Makapadasig kaayong hunahunaon! Ang paghinumdom niining mga puntoha makatabang sa tanang magsisimba ni Jehova sa pagmentinar ug usa ka malipayong espiritu.

Si John Barr, usa ka membro sa Nagamandong Lawas, nagdasig sa mograduwar nga klase diha sa iyang pakigpulong nga “Kahimut-i ang Inyong Misyonaryong Asaynment.” Gipakita niya nga ang misyonaryong pag-alagad maoy butang nga kanunayng suod kaayo sa kasingkasing ni Jehova nga Diyos. “Kana maoy kinaiyanhong bahin sa kapahayagan sa gugma ni Jehova alang sa kalibotan. Iyang gipadala ang iyang bugtong Anak niining yutaa. Si Jesus mao ang labing bantogang misyonaryo, ang pangunang misyonaryo.” Samtang pamalandongon sa mga graduwado ang mga kausaban nga kinahanglang himoon ni Jesus aron magmalamposon sa iyang asaynment sa yuta, ang mga kaayohan sa misyonaryong pag-alagad ni Jesus mabatonan gihapon sa tanang mopahimulos niini. Kini tungod kay, sumala sa gitumong ni Brader Barr, gikahimut-an ni Jesus ang pagbuhat sa buluhaton sa Diyos, ug gihigugma usab niya ang mga anak sa mga tawo. (Proverbio 8:30, 31) Giawhag ni Brader Barr ang mga graduwado sa pagpabilin diha sa ilang mga asaynment, dili lamang isip butang nga nanginahanglan sa paglahutay, kondili tungod kay sila nahimuot sa pagbuhat sa ingon. “Salig kang Jehova; dili ka niya pasagdan,” iyang giawhag ang klase.​—Salmo 55:22.

“Paglakaw Diha sa Ngalan ni Jehova sa Walay-Kataposan” mao ang tema nga gipili sa sunod nga mamumulong, si Lloyd Barry, laing membro sa Nagamandong Lawas. Kay nakaalagad ingong misyonaryo sa kapin sa 25 ka tuig sa Hapon human makompleto ang ika-11ng klase sa Gilead, si Brader Barry miasoy ug pipila ka kasinatian bahin sa unang mga misyonaryo ug mihubit sa mga hagit nga ilang giatubang. Unsang praktikal nga tambag ang iyang gihatag sa mograduwar nga klase? “Labaw sa tanan, imentinar ang inyong espirituwalidad. Tun-i usab ang pinulongan ug ang kultura. Hupti ang inyong sentido sa pagkasiawan. Ug pabilin sa buluhaton; ayawg kaluya o kataka.” Giingnan ni Brader Barry ang mga graduwado nga sa ilang langyawng mga asaynment, ilang ikahimamat ang daghang tawo nga nagsunod sa lainlaing diyos ug mga diyosdiyos, ug iyang gipahinumdoman sila sa mga pulong ni Miqueas: “Ang tanang katawhan, sa ilang bahin, magalakaw ang tagsatagsa sa ngalan sa iyang diyos; apan kita, sa atong bahin, magalakaw sa ngalan ni Jehova nga atong Diyos hangtod sa panahong walay tino, bisan hangtod sa hangtod.” (Miqueas 4:5) Ang panig-ingnan sa kanhing mga misyonaryo maoy usa gayod ka puwersadong panukmod alang sa tanang alagad sa Diyos aron magpadayon sa paglakaw diha sa ngalan ni Jehova ug sa pag-alagad kaniya nga matinumanon.

Ang misunod diha sa programa mao ang instruktor sa Gilead nga si Lawrence Bowen. Ang tema sa iyang presentasyon nagsukna sa pangutanang, “Magpamatuod Ka nga Unsa?” Iyang gipakitang ang kalamposan sa pag-alagad sa Diyos nag-agad sa pagtuo ug pagsalig kang Jehova. Ang bug-os nga pagsalig kang Jehova naghatag ug dakong kadaogan kang Haring Asa batok sa kaaway nga kasundalohan nga usa ka milyon. Apan siya gipahinumdoman ni propetang Azarias sa panginahanglan sa pagpadayon sa pagsalig sa Diyos: “Si Jehova magauban kanimo basta ikaw magasalig kaniya.” (2 Cronicas 14:9-12; 15:1, 2) Sanglit ang ngalan sa Diyos, ang Jehova, nagpasabot sa ideya nga siya mahimong bisan unsa nga gikinahanglan aron sa pagtuman sa iyang katuyoan​—magpasabot man kana nga siya mahimong usa ka Tigtagana, Tigpanalipod, o bisan usa ka Tigpatay—​ang mga misyonaryo nga mosalig kang Jehova ug molihok uyon sa iyang katuyoan molampos diha sa ilang mga asaynment. (Exodo 3:14) “Ayawg kalimot,” mihinapos si Brader Bowen, “basta inyong himoon ang katuyoan ni Jehova nga maoy inyong katuyoan, iyang ipahinabo nga ikaw mahimong bisan unsa nga gikinahanglan aron sa pagtuman sa inyong asaynment.”

Ang kataposang mamumulong niining bahina sa programa mao si Wallace Liverance, kanhing misyonaryo ug karon mao ang tigrehistro sa tunghaan. Ang iyang pakigpulong, nga nag-ulohang “Hupti ang Pulong sa Diyos nga Buhi ug Nagalihok Diha Kaninyo,” naghatag ug pagtagad sa di-mapakyas nga mensahe, o saad, sa Diyos nga kanunayng nagmalamposon. (Hebreohanon 4:12) Nag-impluwensiya kini sa mga kinabuhi niadtong kinsa motugot niini sa pagbuhat sa ingon. (1 Tesalonica 2:13) Sa unsang paagi kanang pulonga mahuptang buhi ug nagalihok sa atong mga kinabuhi? Pinaagi sa makugihong pagtuon sa Bibliya. Gipahinumdoman ni Brader Liverance ang mga graduwado bahin sa mga metodo sa pagtuon sa Bibliya nga nakat-onan diha sa Gilead nga naglakip sa pagbasa ug pagpadayag sa diwa sa kapadapatan sa Pulong sa Diyos. Iyang gikutlo ang mga pulong ni Albert Schroeder, usa ka membro sa Nagamandong Lawas nga nag-alagad ingong tsirman sa komite nga maoy nagmugna sa Tunghaang Gilead kapin na sa 50 ka tuig kanhi: “Pinaagi sa paggamit sa konteksto, ang usa makabaton sa bug-os, tukma, espirituwal nga puwersa nga gihatag sa Diyos diha sa iyang Pulong.” Kining paagiha sa pagtuon sa Bibliya makapahimong buhi sa Pulong sa Diyos ug makapalihok.

Makapalipayng mga Kasinatian ug mga Interbiyo

Human sa mga pakigpulong, ang nanambong gilingaw sa pipila ka makapalipayng mga kasinatian gikan sa mga estudyante. Ilalom sa pagtultol ni Mark Noumair, kanhing misyonaryo ug karon instruktor sa Gilead, ang usa ka grupo sa mga estudyante miasoy ug mipasundayag kon sa unsang paagi sila naningkamot sa pagsangyaw diha sa nagkalainlaing mga kahimtang. Ang uban nakasugod ug nakadumalag mga pagtuon sa Bibliya uban sa mga tawo diha sa teritoryo pinaagi sa pagkamapaniiron sa ilang mga kahimtang ug mga ekspresyon ug sa pagpakitag personal nga kaikag. Busa ang mga estudyante ‘nagtagad kanunay sa ilang kaugalingon ug sa ilang pagpanudlo’ ug maikagon gayod sa pagtabang sa uban nga maluwas.​—1 Timoteo 4:16.

Daghang praktikal nga mga sugyot ang gihatag, ug ang kalipay sa misyonaryong pag-alagad gipakita usab pinaagi sa daghang may-kasinatiang mga igsoong lalaki nga nakadawat ug pagbansay sa tunghaan alang sa mga membro sa komite sa sanga nga gidumala sa Watchtower Educational Center. Sila Brader Samuel Herd ug Robert Johnson nga sakop sa kawani sa hedkuwarter midumalag makapadasig nga mga interbiyo uban sa mga hawas nga gikan sa mga sangang buhatan sa Sosyedad sa Bolivia, Zimbabwe, Nicaragua, Republika sa Sentral Aprika, Dominican nga Republika, Papua New Guinea, ug Cameroon.

Human ang mga kasinatian ug mga interbiyo, si Gerrit Lösch, graduwado sa ika-41ng klase sa Gilead ug karon usa ka membro sa Nagamandong Lawas, mihatag sa paniklop nga pakigpulong diha sa makapahinuklog nga temang “Ikaw ba Usa ka ‘Tilinguhaon nga Tawo’?” Gipahinumdoman una ni Brader Lösch ang mga graduwado nga si Jesus, ang hingpit nga Anak sa Diyos, wala isipang tilinguhaon sa mga tawo, apan “siya gitamay ug gilikayan sa mga tawo.” (Isaias 53:3) Busa dili ikatingala nga karon diha sa daghang bahin sa kalibotan, ang mga misyonaryo giisip ingon nga persona non grata, sa personal dili-madawat o maabiabi. Sa laing bahin, sulod sa dugayng katuigan nga pag-alagad ni Daniel sa Babilonya, pinaagi sa usa ka manulonda ang Maglalalang tulo ka higayon nga nagtawag kang Daniel nga “tilinguhaon kaayo.” (Daniel 9:23; 10:11, 19) Unsay nakapahimo kang Daniel nga ingon niana? Wala gayod niya ikompromiso ang mga prinsipyo sa Bibliya sa dihang nagpasibo sa kultura sa Babilonya; matinud-anon siya sa tanang paagi, nga wala gayod maggamit sa iyang katungdanan alang sa personal nga kaayohan; ug siya maoy usa ka masibotong estudyante sa Pulong sa Diyos. (Daniel 1:8, 9; 6:4; 9:2) Nag-ampo usab siya nga makanunayon ngadto kang Jehova ug andam kanunay sa paghimaya sa Diyos sa iyang mga kalamposan. (Daniel 2:20) Pinaagi sa pagsunod sa panig-ingnan ni Daniel, ang mga alagad sa Diyos mahimong tilinguhaon, dili gayod alang sa kalibotan, kondili alang kang Jehova nga Diyos.

Sa pagtapos sa makapalig-on sa espirituwal nga programa, ang tsirman mibasa ug pipila sa mga telegrama ug mga mensahe nga miabot gikan sa tibuok kalibotan. Dayon, ang matag usa sa 24 ka magtiayon midawat sa ilang mga diploma, ug ang nasod nga ilang adtoan gipahibalo. Sa kataposan, usa ka hawas sa klase mibasa sa sulat nga giadres ngadto sa Nagamandong Lawas ug sa pamilyang Bethel, nga mipahayag ug apresasyon nga maoy gibati sa klase tungod sa pagbansay ug pagpangandam nga ilang nadawat sa miaging lima ka bulan.

Sa pagkatapos sa programa, “ang pagmaya uban ang mga pasalamat” nadungog taliwala sa namauli nga panon.​—Nehemias 12:27.

[Kahon sa panid 27]

Mga Estadistika sa Klase

Gidaghanon sa mga nasod nga gihawasan: 10

Gidaghanon sa gipadad-an nga mga nasod: 19

Gidaghanon sa mga estudyante: 48

Gidaghanon sa mga magtiayon: 24

Aberids nga edad: 33

Aberids nga mga tuig diha sa kamatuoran: 16

Aberids nga mga tuig diha sa bug-os-panahong ministeryo: 13

[Hulagway sa panid 25]

Ika-106 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan ngadto sa likod, ug ang mga ngalan gilista gikan sa wala ngadto sa tuo sa matag laray.

 (1) Deakin, D.; Puopolo, M.; Laguna, M.; Davault, S.; Dominguez, E.; Burke, J. (2) Gauter, S.; Vazquez, W.; Seabrook, A.; Mosca, A.; Helly, L.; Breward, L. (3) Brandon, T.; Olivares, N.; Coleman, D.; Scott, V.; Petersen, L.; McLeod, K. (4) McLeod, J.; Thompson, J.; Luberisse, F.; Speta, B.; Lehtimäki, M.; Laguna, J. (5) Gauter, U.; Dominguez, R.; Helly, F.; Smith, M.; Beyer, D.; Mosca, A. (6) Scott, K.; Seabrook, V.; Speta, R.; Coleman, R.; Breward, L.; Davault, W. (7) Smith, D.; Lehtimäki, T.; Petersen, P.; Thompson, G.; Vazquez, R.; Beyer, A. (8) Luberisse, M.; Deakin, C.; Brandon, D.; Puopolo, D.; Olivares, O.; Burke, S.